E fanaˈo anei outou i te tahi mau haamaitairaa i te mau faufaa no ǒ mai i te Atua ra?
“Ei ia oe na e maitai ai te mau fenua atoa. E teie nei, te feia e faaroo nei ua maitai ïa ratou e Aberahama atoa i faaroo ra.” — GALATIA 3:8, 9.
1. Eaha ta te Tuatapaparaa e faaite maira no nia i te mau faahopearaa i noaa mai i te mau huru faatereraa e rave rahi?
TE PARAUHIA ra no vetahi mau arii no Europa ma o te senekele XVIII e e “feia faatere haavî e te hamani maitai atoa ratou.” Te ‘hinaaro ra hoi ratou, e mea maitai roa hoi te reira, e faatere i to ratou mau taata mai te hoê metua tane hamani maitai ra te huru, aita râ hoi ta ratou mau opuaraa e ta ratou mau faanahoraa i manuïa noa ˈˈea’. (L’encyclopédie américaine.) O te hoê o te mau tumu rahi hoi te reira i tupu ai te ohipa orure hau tei parare roa na te pae Europa ma.
2, 3. E taa ê o Iehova i tei hea mau taata e faatere ra ei arii?
2 Mea taa ê roa o Iehova i te feia faatere o te fenua nei, e tauiui noa hoi to ratou huru. Mea ohie roa ˈtura ïa ia tatou ia taa e no te aha râ te huitaata nei e hinaaro ai i te hoê tauiraa e nehenehe e hopoi mai i te mau ravea mau no te arai i te mau ohipa tia ore e i te mau mauiui. Inaha hoi, eiaha tatou e haapeapea, inaha, e ere roa ˈtu no te tahi noa ohipa rii hauti te Atua e faatupu ai i te reira. I roto i te buka parare rahi roa ˈˈe, ua faataa papu mai te Atua i ta ˈna parau tǎpǔ, oia hoi e haamaitai mai oia e a muri noa ˈtu i te feia atoa e tiaturi ia ˈna, noa ˈtu eaha te huru o to ratou nunaa, to ratou iri, to ratou ite aore ra to ratou tiaraa totiare (Galatia 3:28). E nehenehe mau anei râ hoi e tiaturi i taua parau tǎpǔ ra?
3 I muri aˈe i to ˈna faahitiraa mai i te tahi tuhaa o te parau tǎpǔ a te Atua ia Aberahama: “E haamaitai mau â vau i te haamaitairaa ia oe”, te na ô râ te aposetolo Paulo e i te mea hoi e e “ore e tia i te Atua ia haavare ra”, te ‘faaitoito-puai-hia maira tatou e horo i te tiaturiraa i tuuhia mai i mua ia tatou’. (Hebera 6:13-18.) E rahi atu â to tatou tiaturiraa i taua mau haamaitairaa ra, ia tuatapapa tatou e nafea râ te Atua ia tuu mai i te mau niu no te faatupu i te reira.
4. Mea nafea to te Atua faaohiparaa i te mau faufaa e rave rahi no te faatupu i ta ˈna opuaraa?
4 Mai ta tatou i ite aˈenei, ua faaau te Atua i te hoê faufaa ia Aberahama e haapapu maira e e tiaraa faufaa roa to te hoê huaai i roto i te haamaitairaa o “te mau fenua atoa”. (Genese 22:17, 18.) Ua riro maira te mau ati Iseraela ei huaai i te tino nei, e rahi roa ˈtu â râ i te pae varua, o Iesu Mesia atura hoi te melo matamua o te huaai a Aberahama. O Iesu atoa te Tamaiti, aore ra te Huaai, a te Aberahama Rahi ra o Iehova. Area te mau kerisetiano ‘no te Mesia ra’, o ratou ïa te piti o te tuhaa o te huaai a Aberahama (Galatia 3:16, 29). I muri aˈe i to ˈna faaauraa ˈtu i te faufaa aberahama, ua amui maira te Atua no te hoê noa taime, i te faufaa o te Ture i faaauhia ˈtu i te nunaa o Iseraela. Ua horoa maira taua faufaa hopea nei i te haapapuraa e e mau taata hara anaˈe te mau ati Iseraela e mea hinaaro na ratou i te hoê tahuˈa e vai tamau mai e i te hoê tusia hapa ore. Ua paruru aˈera oia i te feia aiˈa a te Huaai e ua ohie aˈera hoi i te itehia e o vai mau na oia. Ua faaite atoa mai te faufaa o te Ture e e faatupu te Atua i te hoê nunaa arii-tahuˈa. A mana noa ˈi te Ture, ua faaau maira te Atua i te hoê faufaa ia Davida ia iteahia te hoê opu fetii hui arii i Iseraela. Te faaite maira te faufaa i faaauhia ia Davida no te hoê Basileia e, e faatere mai te hoê arii ma te tamau i nia i te fenua nei.
5. Eaha te tahi mau uiraa te tiâ ia pahonohia?
5 Noa ˈtu e eaha, aita vetahi mau huru aore ra mau tapao a taua mau faufaa ra e papu-maitai-hia ra aore ra e tiâ hoi ia haamaramaramahia. Ei hiˈoraa, mai te peu e e riro mai te Huaai e haere maira, ei arii no roto mai i te opu fetii o Davida, nafea ïa taua arii nei e nehenehe ai e riro ei tahuˈa e vai tamau mai e o tei hau aˈe hoi ta ˈna ohipa ia faaauhia i te mau tahuˈa na mua ˈtu ia ˈna (Hebera 5:1; 7:13, 14)? E nehenehe anei taua arii nei e faatere i rapaeau mai i te otia o te faatereraa o te fenua nei? Nafea hoi te mau melo o te piti o te tuhaa o te huaai, ia faaî i te mau huru e titauhia e fariihia ˈi ratou ei mau melo no te fetii o te Aberahama Rahi? E noa ˈtu pai e e nehenehe ta ratou, e arii ïa ratou i hea, inaha hoi e ere te rahiraa o ratou i te huaai na Davida? E tuatapapa anaˈe na mea nafea to te Atua raveraa i te tahi mau ravea tano mau i te ture ma te faaau mai i te tahi atu mau faufaa o te pahono mai i taua mau uiraa ra, e nehenehe atu ai tatou e oaoa e a muri noa ˈtu.
Te hoê faufaa i faaauhia no te hoê tahuˈa i te raˈi ra
6, 7. a) Ia au i te Salamo 110:4, eaha ˈtu â te faufaa ta te Atua i faaau? b) Eaha te aamu e tauturu mai ia tatou ia taa i te auraa o taua faufaa nei?
6 Mai ta tatou i ite aˈenei, i roto i te faufaa o te Ture, ua faaau maira te Atua ia Davida i te hoê faufaa i te tǎpǔraa mai ia ˈna i te hoê huaai e faatere mai e a muri noa ˈtu i nia i te fenua nei. Ua faaite atoa mai râ o Iehova ia Davida e e tae mai te hoê tahuˈa hopea. Teie ta Davida i papai: “Ua tǎpǔ Iehova e ore e tatarahapa: E tahuˈa oe e a muri noa ˈtu, ia au i te parau ia Melekisedeka [aore ra Melehizedeka].” (Salamo 110:4). Eaha hoi ta taua euhe a te Atua e titau ra, oia hoi ta taua faufaa iho ra i rotopu ia Iehova e te Tahuˈa e haere maira?
7 Ua riro o Melehizedeka ei arii no Salema tahito ra e vai ra i nia i te vahi i reira te paturaahia i muri iho te oire o Ierusalema (te vai ra i roto i taua iˈoa ra te parau ra “Salema”). Te faaite maira te aamu no nia i to ˈna farereiraa ia Aberahama e, e arii oia e te haamori ra oia i te “Atua teitei”. (Genese 14:17-20.) Inaha, te haapapu maira te parau a te Atua i roto i te Salamo 110:4 e e tahuˈa atoa o Melekisedeka, e inaha o ˈna anaˈe atura ïa mai te reira te huru. E arii oia e e tahuˈa atoa hoi i te vahi iho te mau arii o te opu fetii o Davida e te mau tahuˈa o te opu o Levi, raveraa i muri iho, i te mau tiaraa ta te Atua i haapao no ratou.
8. Ua faaauhia taua faufaa nei e faaite maira i te faraa mai te hoê tahuˈa mai ia Melehizedeka ia vai, e eaha ihora te faahopearaa?
8 Te horoa maira o Paulo i te tahi atu mau haamaramaramaraa no nia i taua faufaa ra ma te faaite mai i te parau no te faraa mai te hoê tahuˈa mai ia Melehizedeka. Te faataa ra hoi oia e te taata “[ta te Atua i parau e] E tahuˈa oe e a muri noa ˈtu ia au i te parau ia Melehizedeka”, o Iesu Mesia iho ïa (Hebera 5:4-10; 6:20; 7:17, 21, 22). Ma te papu maitai, no te fenua nei te mau metua o Melehizedeka, aita râ i taahia e o vai ma to ˈna mau tupuna. Oia atoa, maoti hoi i te rave i te tiaraa tahuˈa i te mea e no roto mai oia ia Melehizedeka ia au i te tahi parau i papaihia, na te Atua iho i nomino ia Iesu i nia i taua tiaraa ra. Eita te autahuˈaraa o Iesu e monohia, no te mea e “vai tahuˈa maite mai â [oia] e a muri noa ˈtu” i te mea hoi e e vai noa mai te mau haamaitairaa o to ˈna autahuˈaraa e a muri noa ˈtu. E nehenehe tatou e oaoa i te hoê tahuˈa o te “tia maitai roa ˈtu ia ˈna ia faaora i te feia e na reira ˈtu ia ˈna ra i te haere i te Atua ra”, te hoê tahuˈa o te nehenehe e haapii e e aratai i te mau taata haapao maitai e a muri noa ˈtu. — Hebera 7:1-3, 15-17, 23-25.
9, 10. Nafea te pae o te faufaa ia tauturu mai ia tatou ia papu maitai â i te tupuraa te opuaraa a te Atua?
9 Te tahi atu â ohipa faufaa roa ˈtu, eita te mau tiaraa Arii-tahuˈa o Iesu e taotia-noa-hia i te fenua nei. I roto i te salamo i reira e faahitihia ˈi i te parau no taua faufaa ra no nia i te hoê tahuˈa mai ia Melehizedeka, teie â ta Davida i papai: “Ua parau atura Iehova i tau Fatu, E parahi oe i tau rima atau nei; e ia faarirohia e au to mau enemi ei taahiraa avae no oe.” No reira, e parahi atu Iesu, te Fatu o Davida, ia parahi atu i nia i te raˈi i pihai iho ia Iehova. E o te ohipa mau hoi i tupu, ia ˈna i paiuma ˈtu i nia i te raˈi. Mai te raˈi mai, e nehenehe ta te Mesia e faaohipa i te mana i pihai iho i to ˈna Metua no te tuu roa i to ˈna mau enemi i raro a faatupu atu ai i te mau haavaraa. — Salamo 110:1, 2; Ohipa 2:33-36; Hebera 1:3; 8:1; 12:2.
10 No reira, maoti te pae o te faufaa i faaauhia ˈi tatou e nehenehe ai e papu maitai e nafea râ Iehova ia faatupu roa i ta ˈna opuaraa. Te faataa maira oia e e riro atoa te melo matamua o te huaai ei tahuˈa i nia i te raˈi e e faaohipa oia i to ˈna mana Arii-Tahuˈa i nia i te ao taatoa nei. — Petero 1, 3:22.
Te faufaa apî i faaauhia e te piti o te tuhaa o te huaai
11. Eaha te fifi no nia i te piti o te tuhaa o te huaai?
11 Ua haapii mai nei te faufaa aberahama ia tatou e ua riro mai o Iesu ei melo matamua na te huaai, inaha no roto mai oia i te opu fetii iho o te patereareha ra o Aberahama, e ua fariihia oia ei Tamaiti na te Aberahama rahi ia au i to ˈna tiaraa taata hapa ore. Eaha ˈtura râ te nehenehe e parau no te mau taata tei ia ratou te haamaitairaa no te riro atu ei melo no te piti o te tuhaa o te huaai a Aberahama, ei “feia aiˈa i tei parauhia maira”? (Galatia 3:29.) I te mea hoi e e mau taata tia ore ratou e e huaai atoa hoi na te taata rave hara ra o Adamu, eita ˈtura ïa ratou e nehenehe e ô atu i roto i te fetii o Iehova, te Aberahama Rahi. Eaha hoi te ravea no te arai i taua fifi o te huru taata tia ore ra? Te mea e ore e tia i te taata ia rave, e tia ïa i te Atua. — Mataio 19:25, 26.
12, 13. a) Mea nafea to Iehova faaiteraa mai i te parau no te tahi atu faufaa? b) Eaha te vahi taa ê o taua faufaa ra te tia mau ia tâuˈahia?
12 A mana noa ˈi te Ture, ua haapapai aˈera te Atua i taua parau tohu nei i te na ôraa e: “E faaau (...) vau i te utuafare o Iseraela, e te utuafare o Iuda, i te tahi faufaa apî; eiaha mai te faufaa ta ˈu i faaau atu i to ratou ra mau metua (...) e ua ino ihora taua faufaa na ˈu ra ia ratou, (...) e tuu vau i tau ture i roto ia ratou, e papai au i te reira i roto i to ratou aau; e e riro vau ei Atua no ratou, e ei taata hoi ratou no ˈu. E ore hoi ratou e haapii faahou, (...) i te na ôraa ˈtu e, Ia ite hoi outou ia Iehova; e ite paatoa hoi ratou ia ˈu, (...) e faaore hoi au i ta ratou hara, e ore au e manaˈo faahou i ta ratou ino.” — Ieremia 31:31-34.
13 Te vai ra te hoê ohipa taa ê i roto i taua faufaa apî ra: e nehenehe ta ˈna e faaore i te hara, ‘eiaha râ mai’ te mau tusia animala e titauhia na e te Ture. Ua haamaramarama mai Iesu i taua tumu parau ra i te mahana oia i pohe ai. I muri aˈe i to ˈna faatupuraa e ta ˈna mau pǐpǐ, i te Pasa ta te Ture e titau ra, ua haamau aˈera te Mesia i te Oroa a te Fatu. Hoê â hoi auˈa uaina ta te mau taata e inu i roto i taua oroa matahiti ra, ta Iesu i parau mai i te na ôraa e: “Teie nei auˈa, o te faufaa apî ïa i to ˈu nei toto, e haamaniihia no outou nei.” — Luka 22:14-20.
14. No te aha e tiaraa faufaa roa to te faufaa apî i roto i te faraa mai te piti o te tuhaa o te huaai?
14 No reira, e faufaahia te faufaa apî maoti te toto o Iesu. I nia i te niu o taua tusia hapa ore ra, e ‘faaore roa ˈi te [Atua] i te hapa e te hara’. A feruri na eaha to te reira auraa! I te mea hoi e e nehenehe ta ˈna e faaore roa i te mau hara a te mau taata faaroo ra no roto mai i te fetii o Adamu, e nehenehe atura ïa te Atua e faariro ia ratou ei mau taata hara ore, e fanau mai ia ratou ei mau tamarii i te pae varua na te Aberahama Rahi, e e faatavai ia ratou i te varua moˈa (Roma 8:14-17). E tauturu atura hoi te faufaa apî i haafaufaahia e te tusia o Iesu, i ta ˈna mau pǐpǐ, ia riro mai ei tuhaa piti no te huaai a Aberahama. Teie ta Paulo i papai: “[Ua hinaaro o Iesu]” e na te pohe oia i te faaere atu ia ˈna no ˈna te pohe nei, oia hoi te Diabolo ra; e ia faaora hoi i te feia i tîtî i te mǎtaˈu i te pohe e hope roa ˈˈe to ratou oraraa nei. Aita roa hoi oia i tapea i te mau melahi, ua tapea râ i te huaai o Aberahama.” — Hebera 2:14-16; 9:14.
15. O vai ma te feia i faaau i te faufaa apî?
15 O Iesu te Arai o te faufaa apî e te tusia i haafaufaa i te reira; o vai râ hoi te feia i faaau i taua faufaa ra? Ua faaite atea mai o Ieremia e e faaau te Atua i taua faufaa ra e “te fare o Iseraela”. Tei hea Iseraela? Aita oia e faahiti ra i te parau no te Iseraela i te tino nei, tei peritomehia i raro aˈe i te Ture, inaha te faaore ra hoi te faufaa apî i taua faufaa tahito ra (Hebera 8:7, 13; hiˈo api 31). E faaau mai râ oia i te faufaa i te mau ati Iuda e te mau Etene, oia hoi maoti te faaroo, tei ‘peritomehia te aau i te varua ra’, ei auraa parau. E tano maitai te reira e te faahitiraa parau a te Atua e faaite maira e ‘e papaihia ta ˈna mau ture i roto i te feruriraa e te mafatu’ o te feia e ô mai i roto i te faufaa apî (Roma 2:28, 29; Hebera 8:10). Ua mairi o Paulo i taua mau ati Iuda i te pae varua ra “te Iseraela o te Atua”. — Galatia 6:16; Iakobo 1:1.
16. Nafea te faufaa apî ia turu i te tupuraa no nia i tei faaite-atea-hia mai i roto i te Exodo 19:6?
16 I te mea hoi e te faaau maira te Atua i te hoê faufaa i te hoê Iseraela i te pae varua, ua matara aˈera ïa te hoê uputa i mua i te huitaata nei. Oia mau, a tuu mai ai te Atua i te Ture, ua faaite atea mai oia e e riro mai te mau tamarii Iseraela no ˈna ei “basileia tahuˈa (...), ei nunaa moˈa”. (Exodo 19:6.) Inaha hoi, aita te Iseraela i te tino nei i riro aˈenei e aita hoi i nehenehe aˈenei e riro mai ei nunaa e mau arii e e mau tahuˈa anaˈe to ˈna mau melo. Area te mau ati Iuda e te mau Etene i fariihia i roto i te piti o te tuhaa o te huaai a Aberahama ra, e nehenehe ïa ratou e riro mai ei mau arii e ei mau tahuˈab. Ta te aposetolo Petero ïa e haapapu ra i te na ôraa mai e: “E ui maitihia râ outou, e autahuˈa arii, e nunaa moˈa, e feia hoohia; ia faaite hua outou i to ˈna maitai, tei parau ia outou i to roto i te pouri, ia tae i to ˈna ra maramarama umerehia.” Te papai atoa ra oia e ‘e tufaa maheahea ore, o tei vaiihohia i nia i te raˈi’. — Petero 1, 1:4; 2:9, 10.
17. No te aha te faufaa apî e riro ai ei faufaa “maitai roa ˈˈe” i te faufaa o te Ture?
17 No reira, e amuihia ïa te faufaa apî e te faufaa aberahama, te faufaa tahito roa ˈˈe hoi, no te faatupu i te piti o te tuhaa o te huaai. E faaineine taua faufaa apî ra i faaauhia i rotopu ia Iehova e te mau kerisetiano faatavaihia i te varua, i te hoê nunaa arii-tahuˈa no nia i te raˈi, i roto i te fetii hui arii o te Aberahama Rahi. Te taa ra ïa ia tatou i teie nei e no te aha râ o Paulo e parau ai e e “faufaa maitai roa ra, o tei tatinanahia i te parau maitai ra, i parauhia maira”. (Hebera 8:6.) Te faaite atea ra hoi taua mau parau tǎpǔ ra e e oaoa te feia faaroo i te mea e ua papaihia te ture a te Atua i roto i to ratou mafatu, e eita te Atua e haamanaˈo faahou i ta ratou mau hara e ‘e ite paatoa ratou ia Iehova, mai te taata haehaa mai â e tae noa ˈtu i te feia rarahi ra’. — Hebera 8:11.
Te faufaa a Iesu no te hoê Basileia
18. Aita te mau faufaa i faaauhia ta tatou i tuatapapa aˈenei i faatupu faahope roa i te opuaraa a te Atua i roto i tei hea auraa?
18 Ia feruri hohonu tatou i na faufaa e ono ta tatou i faahiti aˈenei, e nehenehe ïa tatou e manaˈo e ua ite tatou i te mau faanahoraa atoa ta te Atua i rave no te faatupu i ta ˈna opuaraa. Inaha hoi, te faaite mai nei te Bibilia ia tatou i te parau no te tahi atu â faufaa e tuatihia i te mau faufaa na mua ˈtu, faufaa e haamaramarama maira i te tahi atu mau huru o taua tumu parau faufaa mau ra. Te tiai nei hoi te mau kerisetiano i faatavaihia i te varua, e te reira ma te tano mau, e ‘ia faaora mai te Fatu ia ratou i te mau ohipa iino atoa e ia faaora mai oia ia ratou no to ˈna basileia i te raˈi ra’. (Timoteo 2, 4:18.) I nia i te raˈi, e riro atu ratou ei nunaa arii-tahuˈa, teie râ eaha hoi te tuhaa ta ratou e faatere mai? Ia haere atu ratou i nia i te raˈi, tei reira ïa te Mesia i roto i to ˈna tiaraa autahuˈa rahi hapa ore ra. E tia atoa mai oia ma te mana arii no te faatere mai i te ao taatoa nei (Salamo 2:6-9; Apokalupo 11:15). Eaha ihora ïa te ohipa a te tahi atu mau arii-tahuˈa?
19. Afea ra e mea nafea te hoê o te faufaa maitai roa hoi i te faaauraahia?
19 I te 14 no Nisana o te matahiti 33, te po oia i faatupu ai i te Oroa a te Fatu ra e i faahiti ai i te parau no “te faufaa apî i [to ˈna] toto”, ua faataa maira Iesu i te parau no te tahi atu faufaa, te hituraa ïa, o ta tatou e tuatapapa. Ua parau atura oia i ta ˈna mau aposetolo haapao maitai ra e: “O outou te feia e tia i pihai iho ia ˈu i taua mau atiraa nei. E mai tau Metua i haapao i te tahi basileia no ˈu ra; ua haapao atoa vau ia outou; ia amu atoa outou e ia inu hoi i ta ˈu ra amuraa maa i to ˈu ra basileia, e ia parahi i nia i te terono i te haavaraa i na opu tino ahuru ma piti o Iseraela ra.” (Luka 22:20, 28-30). Mai te Metua i faaau i te hoê faufaa e o Iesu, ia riro mai oia ei tahuˈa mai ia Melehizedeka, na reira atoa te Mesia i te faaau i ta ˈna iho faufaa e ta ˈna mau pǐpǐ haapao maitai ra.
20. Ua faaauhia te faufaa no te hoê Basileia ia vai, e no te aha (Daniela 7:18; Timoteo 2, 2:11-13)?
20 Ua ati maite na aposetolo 11 ia Iesu i roto i to ˈna mau ati ra, e te faaite ra taua faufaa ra e, e parahi ratou i nia i te mau terono. I te tahi aˈe pae, te parau ra te Apokalupo 3:21 e, e parahi te mau kerisetiano atoa i faatavaihia i te varua i nia i te mau terono i nia i te raˈi ra. No reira, ua faaauhia teie nei faufaa i te taatoaraa o na 144 000 melo i hoohia mai i te toto o Iesu e ravehia ˈtu i nia i te raˈi, no te faatupu i te mau tiaraa tahuˈa e ‘no te faatere mai i nia i te fenua nei’. (Apokalupo 1:4-6; 5:9, 10; 20:6.) Na roto i taua faufaa ra, e tahoê mai Iesu ia ratou i pihai iho ia ˈna i roto i ta ˈna faatereraa. Mai te huru ra ïa e te faaipoipo maira te hoê vahine tiaraa teitei i te hoê arii e faatere ra. E faatere atoa mai hoi taua vahine faaipoipo ra i pihai iho ia ˈna. — Ioane 3:29; Korinetia 2, 11:2; Apokalupo 19:7, 8.
21, 22. Eaha te mau haamaitairaa ta tatou e nehenehe e tiaturi e e noaa mai maoti taua mau faufaa ra?
21 Eaha hoi te mau haamaitairaa ta te reira e hohora maira i mua i te huitaata faaroo ra? Eita o Iesu iho e na 144 000 melo e riro mai te mau taata faatere haavî e te hamani maitai atoa o tei ‘ore hoi e nehenehe e hopoi mai i te mau ravea ohie ia faaohipa’. Eita, ua papu râ ia tatou e e tahuˈa rahi o Iesu “i ati atoa hoi oia i te mau mea atoa mai ia tatou atoa nei, aita roa râ e hara”. Te taa ra ïa ia ratou e no te aha oia e ‘nehenehe ai e aroha mai’ i te mau paruparu o te mau taata e no te aha te mau “mamoe ê atu” e nehenehe ai, mai te mau kerisetiano faatavaihia, e haafatata “noa ˈtu” i te terono o te Atua, na roto i te arai o te Mesia. E nehenehe atoa hoi e “noaa [ia ratou] te maitai ei turu mai ia [r]atou i te tau e au ai ra”. — Hebera 4:14-16; Ioane 10:16.
22 Te feia ta Iesu i faaau atu i te hoê faufaa ia nehenehe ratou e riro mai ei arii e ei tahuˈa i pihai iho ia ˈna, te fanaˈo atoa nei ïa i te haamaitairaa a te huitaata nei. Mai te mau tahuˈa o te opu fetii e haafanaˈo na i te taatoaraa o te nunaa o Iseraela, na reira atoa te feia e parahi ra i nia i te mau terono i nia i te raˈi, i te haava mai i te feia atoa e ora ra i nia i te fenua ma te parau-tia. (Luka 22:30). I te mea hoi e ua ora ê na ratou mai te taata ra te huru, e taa ïa i taua mau arii-tahuˈa ra eaha te mau hinaaro o te huitaata nei. E tahoê mai te piti o te tuhaa o te huaai ia Iesu, no te haapao e ia ‘haamaitaihia te mau nunaa atoa’. — Galatia 3:8.
23. Eaha te tia i te taata tataitahi ia rave no te haa ia au maite i taua mau faufaa ra?
23 Te titauhia nei te mau taata atoa e hinaaro e fanaˈo atoa i taua mau haamaitairaa ra i faahereherehia no te huitaata nei, e e fanaˈo i te mau haamaitairaa o te mau faufaa a te Atua, ia na reira atoa ratou (Apokalupo 22:17). Te hoê ravea faufaa roa no te faatupu i taua hinaaro ra, te amuiraa ˈtu ïa i roto i te Oroa a te Fatu e faatupuhia i te mahana toru 22 no mati 1989 i muri aˈe i te taperaa mahana. A faanaho ia outou mai teie atu nei ia nehenehe outou e putuputu atu i roto i te hoê o te mau amuiraa a te mau Ite o Iehova i taua po ra. E rahi atu â ïa to outou ite no nia i te mau faufaa a te Atua e e rahi atoa outou i te papu e nafea râ outou e nehenehe ai e fanaˈo i te reira.
[Nota i raro i te api]
a “Ua tuu atoa te tahi mau tauiraa taa ê roa i te mau taata, i roto i te veve, te mau taata hui arii i nia i to ratou mau tiaraa e fanaˈo atoa ˈtu ai ratou i te tahi mau maitai i te pae no te tute, e te feia i raro noa mai i te feia hui arii ra, i te hiti i te faatereraa e i te totaiete (...). I mua i te tahi mau tumu parau faufaa roa, aita te faatereraa haavî e te manaˈo hamani maitai i nehenehe e hopoi mai i te tahi mau ravea e tano maitai i te mau ohipa politita e te ohipa faanavairaa faufaa e itehia ra i taua tau ra.” — Te huru oraraa i te pae tooa o te râ ma — To ˈna tupuraa mai e to ˈna oraraa: tei noaa mai i teie mahana (beretane).
b E ere o Iesu te tahi tuhaa o te feia i faaau i te faufaa apî. O ˈna râ te Arai, e aita ta ˈna e hara te tia ia faaorehia. Hau atu, aita e faufaa o ˈna ia riro mai ei arii e ei tahuˈa maoti taua faufaa ra, o ˈna hoi te arii ia au i te faufaa i faaauhia ia Davida e e tahuˈa oia mai ia Melehizedeka ra.
Te haamanaˈo ra anei outou?
◻ No te aha te faufaa ta te Salamo 110:4 e parau ra i faaauhia ˈi, e eaha ta ˈna i faatupu?
◻ O vai ma to roto i te faufaa apî, e mea nafea to ˈna raveraa e ia tupu te hoê nunaa arii-tahuˈa?
◻ No te aha Iesu i faaau ai i te hoê faufaa e ta ˈna mau pǐpǐ?
◻ Eaha na faufaa e hitu ta tatou i tuatapapa aˈenei?
[Tapura i te api 15]
(Hiˈo i te papai)
Faufaa i faaauhia i Edene ra Genese 3:15
Faufaa aberahama
Faufaa a te Ture
Faufaa i faaauhia ia Davida no te hoê Basileia
Faufaa no te riro ei tahuˈa mai ia Melehisedeka
Huaai matamua
Piti o te tuhaa o te huaai
Mau haamaitairaa mure ore
[Tapura i te api 17]
(Hiˈo i te papai)
Faufaa i faaauhia i Edene ra Genese 3:15
Faufaa aberahama
Faufaa a te Ture
Faufaa Apî
Faufaa i faaauhia ia Davida no te hoê Basileia
Faufaa no te riro ei tahuˈa mai ia Melehisedeka
Huaai matamua
Faufaa no te hoê Basileia i nia i te raˈi
Piti o te tuhaa o te huaai
Mau haamaitairaa mure ore