Ua haaparari au i te mau fǐfǐ o te ohipa tahutahu

UA TAIRI maira te ati i to ˈu utuafare fetii i te 14raa o to ˈu matahiti. Inaha, ua haamata aˈera te hoê taparahi taata maamaa i te haapohe i to ˈu mau fetii. Te mau taata matamua ta ˈna i taparahi pohe roa, o na iva tamarii ïa o te hoê o to ˈu mau tuahine, e i muri aˈe, ta ˈna ïa tane. I muri noa iho, o te tahi â ïa o to ˈu mau tuahine tei pohe. I muri aˈe, ua taparahi-pohe-hia aˈera to ˈu mau taeae e tuahine e maha ra, e toe noa mai nei to ˈu metua vahine e o vau iho nei. Ua oti roa vau i te riaria!

I roto i te mau matahiti i muri iho, noa ˈtu e e tamaa au, e rave au i te ohipa, e haere au e taoto, tei roto noa ïa vau i te riaria, e teie te mau uiraa tei haapeapea noa na ia ˈu: ‘Afea oia e tairi mai ai? O vai to muri iho: o Mama anei aore ra o vau iho?’

To ˈu oraraa

Ia nehenehe outou e taa i te ohipa i tupu mai i muri aˈe, e horoa ˈtu vau i te tahi mau haamaramaramaraa no nia i to ˈu oraraa. Ua fanauhia mai vau i te matahiti 1917 i te fenua Suriname i roto i te nunaa ereere a te mau Saramaccas, i nia i te hoê motu iti no Maroni. E mau lowenengre to ˈu mau tupuna, oia hoi, te mau tîtî tei horo ê e tei tapuni na i roto i te uru raau no te ora ˈtu i te hoê oraraa fifi mau, e oraraa tiamâ râ. I te parau mau râ, ahiri e ua tiamâ mai ratou i te faatîtîraa a te mau taata, aita ïa ratou i tiamâ i te faatîtîraa a te mau demoni.

I roto i to matou oire iti, na te haamoriraa i te mau demoni e te mau tupuna e aratai ra i te oraraa o te mau mahana atoa. No te pifao e no te taora i te maˈi aore ra i te pohe i nia i te hoê taata, e faaohipa te tahi pae i te wisi, te tahutahu ereere, aore ra e ani ratou i te hoê koenoe (a parau ku-nu), oia hoi te hoê varua hamani ino, no te ohipa no ratou. Te tiaturihia ra e teie mau varua hamani ino, e mau taata ïa tei hamani-ino-hia na te hoê fetii e o te hoˈi mai i muri aˈe i to ratou pohe no te tahoo. I te parau mau râ, e mau demoni faufau teie mau varua hamani ino, o te faahepo i te mau taata ia haamori ia ratou.

I te mea e no roto vau i te Taatiraa a te mau taeae evanelia, te hoê Ekalesia porotetani, ua haapii atoa vau i te tahi mau mea no nia i te Atua. Noa ˈtu e tei roto vau i te poiri no nia i te huru e haamori ai ia ˈna, ua iteahia mai ia ˈu i roto i te uru raau haumǎrû i reira vau e faaea ˈi, e rave rahi mau haapapuraa no to ˈna hamani maitai rahi. ‘Te hinaaro nei au e haamori i te hoê Atua maitatai, eiaha râ i te hoê varua ino o te haamauiui i te taata’, o ta ˈu ïa e manaˈo ra. Ua ite mau hoi au e mea au roa na taua mau varua hamani ino ra ia haamauiui e tae noa ˈtu i te pohe, i te feia tei raro aˈe i to ratou mana, o te ore râ e auraro maitai ia ratou.

Ua papu ïa ia outou i to ˈu peapea rahi i to ˈu iteraa e ua tono mai te mau enemi o ta matou utuafare fetii i te hoê koenoe no te tairi ia matou. E 14 matahiti to ˈu i to te varua taparahi taata haamataraa i ta ˈna ohipa. Piti ahuru ma ono matahiti i muri aˈe, o ta ˈu metua vahine e o vau anaˈe iho o te ora noa ra.

Farereiraa matamua

E vahine rave ohipa itoito mau, to ˈu metua vahine. I te hoê mahana, te haere atura hoi oia i to ˈna fare, ua taorahia aˈera oia i raro e aita ˈtura oia i nehenehe faahou e tia mai i nia. O ˈna ta te koenoe i maiti. Ua ino roa aˈera oia e ua paruparu roa ˈtura. Te hinaaro ra hoi oia i te tauturu — i ta ˈu tauturu. Ua feaa piti aˈera râ to ˈu manaˈo i rotopu i to ˈu here i to ˈu metua vahine e to ˈu riaria i te demoni tei roto ia ˈna. Teie râ, ia hamani ino anaˈe mai te koenoe, e tuôtuô noa to ˈu metua vahine iti e, no te mauiui rahi roa hoi ta ˈna e ite ra, e i te hoê mahana aita ˈtura ta ˈu e nehenehe e faaoromai faahou, ua tuu maira vau i to ˈna upoo i nia i to ˈu turi no te tamǎrû ia ˈna. Ua mǎrû ihora oia; o vau râ, mai te huru ra ïa e e “rima” te uumi ra ia ˈu.

I to ˈu hinaaroraa e horo, ua haamata faahou aˈera to ˈu metua vahine i te tuô. Ua faaea ihora vau no ˈna, e ma te mehameha rahi, ua tupu ihora to ˈu farereiraa matamua e te varua taparahi taata. E 40 matahiti ïa to ˈu i reira.

Te rahi noa ˈtura te mau hamani-ino-raa

Pohe aˈera to ˈu metua vahine. E toru noa mahana i muri aˈe, ua faaroo aˈera vau i te hoê reo mai to te hoê hoa ra te huru o te taˈiraa reo, i te parauraa mai e: “Lintina, Lintina, te faaroo maira anei oe? Te pii nei au ia oe.” I reira te haamataraa te hoê haamauiuiraa hairiiri roa e inaha hoi, tae roa aˈera vau i te hinaaro e pohe oioi noa.

I te omuaraa, e haere noa mai te demoni e hauti ia ˈu i te taime a haere ai au e taoto. I te taime a varea ˈi au i te taoto, e faaara mai te reo ia ˈu, no te paraparau mai no nia i te hunaraa maˈi e te pohe. Ua paruparu roa aˈera vau no te mea aita vau i navai i te taoto, ua tamau noa râ vau i te haapao i ta ˈu mau tamarii.

I muri aˈe, ua faarahi aˈera te demoni i ta ˈna mau hamani-ino-raa. E rave rahi taime to ˈu manaˈoraa e te uumi ra oia i to ˈu arapoa. Tamata ihora vau i te horo ê, aita râ ta ˈu i nehenehe; mai te mea ra e ua faateimaha roa te hoê taoˈa teiaha ia ˈu. Ua hinaaro ihora vau e tuô, ua mau noa râ to ˈu reo i roto i to ˈu arapoa. Noa ˈtu teie mau mea atoa, ua tamau noa na vau i te patoi i te haamori atu i te varua e hamani ino maira ia ˈu.

Ia tia mai vau i muri aˈe i te hoê hamani-ino-raa, e haamata faahou vau i ta ˈu ohipa i te fare faaapuraa, i reira vau e faaapu ai i te maniota e i te tô o ta ˈu e hoo atu i te matete no te hoê oire iti i te pae miti. Mea ohie aˈe na ˈu ia imi mai i te moni. Tera râ, tei mua â ia ˈu te mauiui ino roa ˈˈe.

Ua imi au i te hoê ravea

I te hoê mahana, ua faaroo aˈera vau i te reo, e a tahi ra hoi, o te demoni i te parauraa mai e: “E oru roa to oe opu ia ˈu mai te popo ra te huru.” I muri noa ˈˈe, ua tupu mau ihora te hoê oru i roto i to ˈu opu e ua rahi roa ˈˈera e inaha, mai te mea ra e ua hapû vau. Ma te riaria rahi, ua aniani ihora vau: ‘E nehenehe anei te Atua, te Poiete, e tauturu mai ia ˈu ia faaore i te koenoe? E nehenehe anei oia e tono mai i te hoê varua maitatai e tei puai aˈe i te koenoe no te tiahi ia ˈna?’ No te ite mai i te pahonoraa, ua haere atura vau e farerei i te hoê bonoeman, te hoê tahuˈa maˈi.

Ua horoa maira te tahuˈa matamua ta ˈu i farerei, i te mau tapoes, te tahi mau taoˈa tahutahu [taritoˈa], aita râ te reira i faaore i te oru o to ˈu opu. Ma te opua maite e ite mai i te hoê raau no to ˈu maˈi, ua farerei aˈera vau e rave rahi mau bonoeman, — aita râ e ravea. I roto i te area taime i rotopu e piti farereiraa, ua tamau noa aˈera vau i te haapao i te fare faaapuraa ia noaa mai ia ˈu te moni no te hoo mai i te pia, te uaina, te champagne e te mau more no te aufau i te mau tahuˈa. Mea pinepine ratou i te horoa mai i teie aˈoraa: “A tuturi e a pure i te koenoe. A farii e o ˈna to oe fatu. A haamori ia ˈna, e e faarue mai oia ia oe.” Nafea râ vau e nehenehe ai e tuturi e e pure i te hoê varua o te haamauiui noa ra ia ˈu e o te hinaaro ra e haapohe ia ˈu? Eita, eita ta ˈu e nehenehe?

Hau atu â, no to ˈu peapea rahi, ua rave noa aˈera vau i te mau mea atoa ta te mau tahuˈa e faaue mai na ia ˈu. Ua haapao maira te hoê tahuˈa ia ˈu i roto i te hoê roaraa e pae avae. Ua parau maira oia ia ˈu ia hopu i roto i te pape e raau to roto e ua umu aˈera oia i te pape o na ahuru ma hoê raau taa ê i roto i to ˈu mata — “no te tamâ i to ˈu mata”, ta ˈna ïa i parau, a tuô noa ˈi au no to ˈu mauiui. I te pae hopea râ, ua hoˈi atura vau i te fare, ua pau hoi ta ˈu moni, ua inoino roa hoi au e ua rahi roa ˈtu â to ˈu maˈi.

“E pohe oe”

Ua hapono maira te hoê o ta ˈu mau tamaroa, e ora ra i te Pays-Bas, i te moni ia tamau noâ vau i te imi i te rapaauraa. Ua haere atura vau e farerei i te hoê taote no te oire rahi. I muri aˈe i to ˈna hiˈopoaraa ia ˈu, ua parau maira oia e: “Aita ta ˈu e ravea no te rapaau ia oe. A haere e farerei i te hoê bonoeman.” Mai reira mai, ua haere atura vau e hiˈo i te hoê taata taura no Indonésie mai — e i taua atoa taime ra, aita i itehia mai te ravea. Ua hoˈi aˈera vau i te fare, aita râ vau i nehenehe e haere atu i rapaeau mai i te oire. Ua haere atura vau ma te paruparu roa hoi i te fare o te hoê o ta ˈu mau tamahine, e i reira, topa roa ˈtura vau i raro — ma te pohe roa hoi i te maˈi e te moni ore. Ma te faufaa ore, ua haamauˈa na vau 17 matahiti e ua aufau na vau 15 000 gulden (fatata 1 000 000 farane patitifa) no te maimi i te hoê raau. E 57 matahiti ïa to ˈu i reira.

I to ˈna hamani-ino-raa i muri aˈe, ua horoa maira te demoni i teie parau haamataˈuraa: “Ua oti ta ˈu ohipa i nia ia oe. E pohe oe.”

“E ere hoi oe te Atua, e ere oe o Iesu”, o ta ˈu ïa i tuô atu.

“Eita te Atua iho e nehenehe e tapea mai ia ˈu, ta te demoni ïa i pahono mai. Ua taiohia to oe mau mahana.”

Te aroraa hopea

Ua mairi aˈera tau hebedoma. Ua ani aˈera o Meena, te hoê vahine Ite no Iehova e faaea ra i pihai noa iho e e tavini taime taatoa hoi oia, i ta ˈu tamahine e eaha to ˈu e ua parau aˈera oia ia ˈna e: “O te Bibilia anaˈe te nehenehe e tauturu ia ˈna.” I te mea e ua faaroo atu vau i ta raua aparauraa, ua hinaaro atura vau e tapiri atu i pihai iho ia raua. Aita vau i tapae atura ia raua ra, tauehia ˈtura vau i raro. Ua horo maira o Meena i pihai iho ia ˈu e ua parau aˈera: “Eita teie demoni e faarue ia oe. O Iehova anaˈe te nehenehe e tauturu ia oe, aita ˈtu ai.” Pure ihora oia i te Atua ra o Iehova e o vau atoa hoi, e ua haere tamau maira o ˈna e farerei ia ˈu. Teie râ, a pinepine noa ˈi oia i te haere mai i to ˈu fare, ua haere noa atoa ˈtura te mau hamani-ino-raa a te demoni i te puairaa. I te po, no te mea e ruru rahi roa vau, aita ˈtura te utuafare i nehenehe faahou e taoto. Ua faaea aˈera vau i te amu i te maa e, i te tahi mau taime, e ino-roa-hia to ˈu upoo.

I te mea e mea ino roa vau, ua haere maira ta ˈu mau tamaroa mai te mataeinaa mai, ma te hinaaro e faahoˈi ia ˈu i roto i to ˈu oire iti ia pohe vau i reira. I te mea e aita vau i nehenehe e tere no to ˈu paruparu rahi, ua patoi aˈera vau. Tera râ, i to ˈu iteraa e ua fatata roa vau i te pohe, ua pii aˈera vau i te Ite no Iehova no te aroha ˈtu ia ˈna. Ua faataa ihora o Meena ia ˈu na roto i te tauturu a te Bibilia e noa ˈtu e e pohe atu vau, te vai ra te tiaturiraa no te hoê faatia-faahou-raa i te feia pohe.

“Te hoê faatia-faahou-raa mai i te feia pohe? Eaha te auraa?”

“E nehenehe te Atua e faaora faahou mai ia oe i roto i te Paradaiso”, ta ˈna ïa i pahono mai. Ua puta maira te hoê tiaturiraa i roto i te poiri!

I taua noâ po, ua haru aˈera te demoni ia ˈu. [En transe], ua manaˈo ihora vau e te ite ra vau i te koenoe tei apeehia e te hoê nahoa taata. Ua faaooo aˈera oia ia ˈu: “Te manaˈo ra oia e e faatia-faahou-hia mai oia!” Paaina aˈera te ata a te nahoa taata. Rave ihora vau i te hoê ohipa aitâ vau i rave aˈenei na mua ˈˈe. Ua pii atura vau: “Iehova! Iehova!” Tera noa hoi ta ˈu i ite. Ua horo ê ihora te demoni!

Ua hoˈi faahou maira ta ˈu mau tamaroa ma te ani onoono mai e: “Mama, eiaha oe e pohe i roto i te oire. A vaiiho na ia matou ia faahoˈi ia oe i roto i te oire iti.” Ua patoi ihora vau, no te mea te hinaaro ra vau e haapii hau atu â no nia ia Iehova. “Parau mau, ta ˈu ïa i parau atu, peneiaˈe e pohe vau, teie râ, ua tavini râ vau i te Poiete.”

Te hoê pare etaeta

Ua tamau noa aˈera o Meena e te tahi â mau Ite i te haere mai e farerei ia ˈu. Ua haapii maira ratou ia ˈu ia pure ia Iehova. Ua paraparau atoa mai ratou no nia i te tumu parau rahi e faataa ê ra ia Iehova e o Satani e i te hiˈoraa a Ioba ta te Diabolo i faahepo na i te mau mauiui no te turai ia ˈna ia faarue i te Atua. Ua haapuai te mau mea ta ˈu i haapii i to ˈu hinaaro papu eiaha roa ˈtu e haamori i te demoni. Ua taio maira te mau Ite i te hoê irava tei riro ei irava faufaa roa no ˈu: “Te iˈoa o Iehova ra, e pare etaeta ïa; te horo nei te parau-tia i reira e ua ora ihora.” — Maseli 18:10.

Ua hoˈi mǎrû noa maira to ˈu mau puai. I to ta ˈu tamaiti hoˈiraa mai e hiˈo ia ˈu, ua parau atura vau ia ˈna ia tiai maa taime iti i muri mai i te opani. Ua faanehenehe ihora vau ia ˈu, ma te tuu atu i to ˈu ahu oomo na roto i to ˈu piritoti no te faaite ia ˈna e ua fatata roa to ˈu oru i te ore roa. Haere atura vau i rapae.

“Mama Lintina, o oe iho â tera?” ta ˈna ïa i tuô.

“E, o vau iho â teie — auaa hoi o Iehova, to ˈu Atua!”

Te tia nei au no Iehova

I to ˈu haamataraa i te taahi, haere ihora vau i te Piha o te Basileia a te mau Ite no Iehova. I reira, no te rahi o te mau faaitoitoraa tei horoahia mai e te tahi â mau Ite, aita ˈtura vau i faaea i te amui atu i roto i te mau putuputuraa. Tau avae i muri aˈe, ua apee atura vau i te mau Ite i roto i te pororaa. I muri noa iho, ua bapetizo atura vau e ua riro aˈera vau ei tavini na Iehova, to ˈu Faaora tei î i te aroha. E 58 matahiti ïa to ˈu.

Tera râ, te vai râ te hoê ohipa te tia ia ˈu ia rave. Tau matahiti na mua ˈˈe, i roto i to ˈu fare iti aretu i te oire iti, ua faatia na vau i te hoê fata i reira vau e pûpû ai i te mau tusia i ta ˈu mau tupuna. Ia mâ vau i te pae varua, e tia ïa ia ˈu ia tuparari i taua fata ra. Ua ani aˈera vau ia Iehova ia tauturu mai ia ˈu, no te mea e faatupu mai teie ohipa i te hoê aueueraa rahi i rotopu i te feia e ora ra i reira. I te taime a tae ai au i mua i to ˈu fare iti aretu e a tatara ai au i te opani, ua tuô aˈera te hoê taata: “Pingos!” (Te mau puaa oviri!) Te haere maira te hoê nǎnǎ taatoa; ua haere maira ratou na ropu i te motu iti e e ouˈa ˈtu ai i roto i te anavai pape no te tapae atu i nia i te tahi pae. Ua horo ê aˈera te mau taurearea e te feia paari i te oire iti no te haru ohie mai i teie mau animala oviri. Ma te oaoa rahi, tuturi atura vau e ua haamauruuru aˈera ia Iehova no te tereraa o te mau ohipa. Ma te ore e tiai, ua huti aˈera vau i te fata i rapae, ua pipi ihora i te mori e ua tutui atura. I to te feia no te oire iti hoˈiraa mai, ua papaa aˈena ïa te fata. Oia mau, ua iteahia mai ia ratou te mau rehu, aita râ ratou i nehenehe faahou e ohipa mai. Inaha, ma te topa roa hoi te hau, hoˈi atura vau i te oire rahi.

Mai te peapea rahi e tae atu ai i te oaoa

E ite mai â vau i te tahi mau haamaitairaa ê atu. Aita ta ˈu tamaiti no te fenua Pays-Bas i tiaturi na i te mau mea atoa tei faatiahia ia ˈna no nia ia ˈu iho; ua rave aˈera ïa oia i te manureva no te haere mai i Suriname no te ite mata roa i te tupuraa. No to ˈna oaoa rahi i to ˈna iteraa mai ia ˈu tei oraora maitai, ua hoo ihora oia i te hoê fare nehenehe roa i roto i te oire iti, i reira vau e ora ˈi i teie nei. Auê ïa tauiraa i roto i to ˈu oraraa e: mai to ˈu huru ino roa ei vahine tîtî a te mau demoni, ua riro roa mai au ei tavini a Iehova tei oaoa roa!

Ahuru ma hoê matahiti i muri aˈe i to ˈu bapetizoraa, ua hau roa ˈtu â te mau tumu e mauruuru ai au. No to ratou putapû i te iteraa e ua haamaitai-rahi-hia vau, ua anaanatae atoa maira e toru o ta ˈu mau tamarii e hoê a ta ˈu mau hunoa i te Bibilia e ua pûpû ihora i to ratou ora no Iehova. Hau atu, te haere pinepine nei au na muri iho i te tahi o ta ˈu mau taeae e mau tuahine i te pae varua i ô te mau taata e haapii nei i te Bibilia e o ratou e o te ere nei i te itoito no te faaora mai ia ratou i te mana a te mau demoni. E faatia ˈtu vau ia ratou mea nafea to ˈu haaparariraa i te mau fǐfǐ o te faatîtîraa a te mau demoni. Na roto i teie ravea, e nehenehe atura ïa taua mau matahiti hamani-ino-raa mehameha mau ra e faaohipahia no te pororaa i te Basileia.

Te ere nei au i te mau parau no te faaite i to ˈu mauruuru rahi ia Iehova, to ˈu Atua. Eita e feaaraa e ua ohipa mai to ˈna rima puai no te tauturu ia ˈu. Oia mau, ua haamaitai mai Iehova ia ˈu! — Hiˈo Salamo 18:17-19.

[Hohoˈa i te api 7]

I to ˈna tiamâraa mai i te ohipa tahutahu, ua haapii o Lintina van Geenen “te iˈoa o Iehova ra, e pare etaeta ïa”.

[Hohoˈa i te api 9]

Te ropuraa o te Suriname, i reira e rave rahi mau taata tei faatîtîhia e te ohipa tahutahu.