Tei raro aˈe vau i te mana o te mau demoni
E TAATA taura vau e e hiˈohiˈo atoa hoi. I rave na vau i te ohipa pifao. I imi na vau i te mau tapao. I faaino na vau i te taata na roto i te faahitiraa i te mau parau e roohia ˈi ratou i te ati. I faaohipa na vau i te tahutahu ereere e e pǐpǐ vau na te vaudou. E, i rave na vau i te rahiraa o te mau ohipa tahutahu faautuahia e te Bibilia i roto i te Deuteronomi 18:10-12.
Ua papai o Luka, te hoa o te aposetolo Paulo i roto i to ˈna tere, e: “Ua farerei maira ia matou te hoê potii varua tairoiro, taoˈa rahi ta to ˈna ra mau fatu i noaa ia ˈna i te tairoiro.” (Ohipa 16:16). Mai teie atoa vahine, auaa te hoê demoni i ite ai au i te mau mea o ta ˈu e ore roa ˈtu e ite na roto i te mau ravea taata nei.
Ei hiˈoraa, na mua ˈˈe to ˈu mama ruau e pohe ai, ua ite aˈena vau e e pohe o ˈna. I te hapûraa te hoê o to ˈu mau fetii, o vau na tei ite na mua roa ˈˈe. E ere te reira i te manaˈo noa e e tupu te hoê ohipa; fatata e mea tano anaˈe te mau mea o ta ˈu i ite na mua ˈˈe. Ia hinaaro anaˈe au e ia pohehia te hoê o to ˈu mau hoa haapiiraa, te hoê o ta ˈu mau orometua aore ra te hoê o to ˈu mau fetii i te maˈi, e tupu mau iho â te reira.
I te hoê mahana, no te mea ua tamaˈi mai to ˈu mama ruau ia ˈu, hinaaro atura vau ia pepe o ˈna. Ua pii atura vau i te mau demoni e ua ani atura vau ia ratou ia mutu oia. — I tera iho â avatea, mutu atura oia i te tipi.
I te mea e te rave ra vau i te haamoriraa vaudou, ua hamani atura vau i te hohoˈa o to ˈu taeae i te mau huˈahuˈa ahu. Te hinaaro ra vau ia ore o ˈna e haere mai e faahuehue ia ˈu. I muri aˈe, ia tapiri mai o ˈna fatata e toru metera te atearaa ia ˈu, e ite oia i te mauiui i roto i to ˈna ouma e eita ïa oia e nehenehe faahou e huti i te aho. Ite atura ïa o ˈna e eiaha e tapiri mai i pihai iho ia ˈu.
I muri iho, ua faaooo mai hoê o to ˈu mau hoa ia ˈu na roto i te parauraa e eita ta ˈu e nehenehe e pii i te mau demoni. Ua ite au e taata hoo raau taero oia. Ua parau atura vau ia ˈna e e haruhia oia, e e tuuhia râ oia i muri iho. Ua rave iho â te mau demoni i ta ˈu i hinaaro. Fatata e piti avae i muri iho, ua tapeahia taua taata ra. I muri iho, ua faaorehia te mau pariraa no nia ia ˈna e ua tuu-faahou-hia mai o ˈna. Aita oia i faaooo faahou mai i to ˈu mau mana.
To ˈu haamataraa i te ohipa hiˈohiˈo
Te rave ra te mau melo o to ˈu utuafare ma te faatura i te mau peu moˈa a te haapaoraa etene i faatupuhia i nia i te mouˈa Ozark, i te fenua Marite. Te rave ra te mau taata o taua fenua ra i te raau no te faatupuraa i te here e te tahi atu â mau raau mai te reira te huru. Ua fanauhia vau i muri aˈe i to to ˈu na metua faaearaa ˈtu i San Francisco. Aita raua e hinaaro maitai ra ia noaa ta raua tamarii; ua riro to ˈu fanauraa ei haafifiraa i to raua huru oraraa haapeapea ore. Aita ˈtura ïa vau i haapaohia, i herehia, e inoino atura vau i te pae no te here. Riro mai nei au ei taata moemoe, tei î i te riri i te mau taata atoa.
Mea apî roa vau i to ˈu haamataraa i te rave i te ohipa hiˈohiˈo. E hiˈo vau i te mau hohoˈa teata atoa e te mau hohoˈa tele atoa no nia i taua ohipa ra. I te onoraa o to ˈu matahiti, te hauti tamau ra vau i te iri oui-ja. Ua hinaaro mau vau e ua tiai onoono vau i te mau aparauraa e te ao varua. Ua tiaturi papu vau e te vai ra iho â te mau demoni e mea au roa na ˈu ia aparau e o ratou. Ua horoa mai ratou i te ite e te mana hau aˈe i te taata nei no ˈu.
Haamata ˈtura vau i te taio i te mau buka atoa no nia i te ohipa hiˈohiˈo o te noaa mai ia ˈu. E haere au e tii i te reira i roto i te piha vairaa buka a te oire e i roto iho â râ i te mau fare hooraa buka. Ua ite au i te hoê fare toa na te hoê taata taura, e haere mai te feia e faaohipa ra i te peu tahutahu, aore ra tahutahu ereere i reira e hoo ai i te mau buka. I to ˈu taioraa i te mau buka tahito no nia i te ohipa hiˈohiˈo, ite atura vau i te mau iˈoa o te mau demoni tei ohipa aˈena mai e te tahi mau taata tahutahu i tahito ra.
Mai reira mai, ua faaohipa atura vau i taua mau iˈoa ra ia aparau anaˈe au e te mau demoni. Mai te mea ra e i te mau taime atoa ia aparau anaˈe au i te hoê demoni o mâua anaˈe, e mea taa ê iho â to ˈna huru e ta ˈna mau ravea i ta te tahi atu mau demoni. Ite atura vau i te iˈoa o te mau demoni e rave rahi.
Ia au i te mea o ta ˈu i taio no nia i te ohipa hiˈohiˈo, ua ite au e te mau demoni, e mau melahi ïa tei erehia i te haamaitairaa a te Atua, e ere râ i te mau varua aore ra te mau nephe (âmes) o te feia pohe. Ua aroha roa vau i taua mau melahi ra, ia Satani iho â râ. Riro atura vau ei hoê o to ˈna mau taata haamori, noa ˈtu â ïa e i taua taime ra, eita hoi e tano, te pure noâ ra vau i te Atua. I te pahonoraahia mai ta ˈu pure, manaˈo atura vau e na te Atua i pahono mai. Ua haavarehia râ vau e Satani. — Korinetia 2, 11:14.
Oia mau, ua horoa mai te mau demoni i te mana faahiahia no ˈu, aita râ ratou i tauturu mai ia ˈu ia riro vau ei taata maitai. Teie râ, ua faahuru ê roa ratou i ta ˈu huru feruriraa; ua faaî ratou ia ˈu i te riri eiaha râ i te aroha. I te maororaa, ua riro mai au ei taata taiata, eiâ, taero ava, rave i te raau taero e te mahu.
Ua pohe to ˈu mama ruau i te avae tenuare 1974. Ua peapea roa vau i te reira, no te mea o ˈna anaˈe te taata o ta ˈu i here aita ˈtu ai. Te haamanaˈo ra vau e i to ˈu nainairaa e taio oia i te Bibilia e o vau e e parau mai o ˈna ia ˈu no nia i te tia-faahou-raa. I teie nei, te hinaaro ra vau e haapii hau atu â no nia i taua tumu parau ra. Mai to ˈu iho â tamariiraa ra, ua hinaaro iho â vau e ora e a muri noa ˈtu, e ua parau mai te mau demoni ia ˈu e e ora noa iho â vau mai te reira. Aita râ vau e ite ra e nafea râ ratou e nehenehe ai e haapao i ta ratou parau.
Te hoê farereiraa faahiahia mau
I muri noa ˈˈe i te hunaraa o to ˈu mama ruau, ua parau vau ia Gwen, te hoê vahine rave ohipa e o vau, e te fatata maira te hopea o teie nei ao aita râ hoê aˈe taata e tiaturi ra i te reira. Ua pahono mai o Gwen e te tiaturi ra oia e ua maere o ˈna i te mea e ua ite au i te reira. Na te mau demoni i faaite mai ia ˈu, ua faaite mai râ o Gwen ia ˈu i te reira i roto i te Bibilia.
E parau tamau noa o Gwen no Iehova e te na ô ra oia e na Iehova e haamou i teie faanahonahoraa no te mau mea e vai nei. Ua parau atura vau ia ˈna e e riaria roa vau ia faaroo i taua iˈoa ra, Iehova, e ua taparu atura vau ia ˈna eiaha e faahiti faahou i taua iˈoa ra. Ua inoino roa ˈtura oia i ta ˈu parau, e ua pahono maira oia e mai te peu e eita ta ˈna e nehenehe e faahiti i te iˈoa o te Atua ta ˈna i here rahi roa ˈˈe, mea au aˈe ïa na ˈna eiaha e paraparau faahou ia ˈu, no te mea o Iehova te iˈoa ïa o te Atua.
Ua maere roa vau i ta ˈna pahonoraa. No reira, i to ˈu hoˈiraa i te fare i taua ahiahi ra, ua rave au i te Bibilia a to ˈu mama ruau, oia hoi te tatararaa a te roi Jacques, e ua hurihuri au i te mau api no te paimi i te iˈoa Iehova. Ua ite au e mai te peu e e itehia ia ˈu te reira i roto i teie Bibilia, ua tano iho â ïa o Gwen: o Iehova iho â te iˈoa o te Atua. Ua papu râ ia ˈu e eita e itehia ia ˈu. Ua hiti mauhuta vau i te taioraa i roto i te Exodo 6:3 e: “I fa ˈtura hoi au ia Aberahama, e ia Isaaka, e ia Iakoba ma te iˈoa ra, o te Atua manahope ra; aore râ vau i itea ia ratou i tau iˈoa nei o IEHOVA.”
Taa oioi atura ia ˈu e o Iehova iho â te Atua e ia faaau-anaˈe-hia O ˈna ia Satani, aita ïa to Satani hoê aˈe puai! I te mea hoi e ua ite au i roto i te Bibilia te iˈoa o ta ˈu i riri noa na e ua faaroo hoi au i te parau no te tiaturiraa i te tia-faahou-raa, ua haamata ˈtura vau i te haapii e te mau Ite.
Ua matara mai au mai raro aˈe i te mana o te mau demoni
I muri iho, ua afai o Gwen ia ˈu i te hoê o te mau putuputuraa a te mau Ite a Iehova. Te parauhia ra i roto i te oreroraa parau no nia i te puaa oviri e faaitehia ra i roto i te buka bibilia ra Apokalupo, te puaa tei nia ia ˈna te numera 666. Ua horoa pinepine mai te mau demoni i te mau haamaramaramaraa hape ia ˈu no nia i taua tumu parau ra, e ua maere roa vau i te mea e ua papaihia te reira i roto i te Bibilia. Ua huti mau te putuputuraa i to ˈu manaˈo i opua ˈi au i te haapii tamau i te Bibilia e te mau Ite a Iehova i te hebedoma i muri aˈe.
Oia mau, aita te mau demoni i hinaaro ia haapii au i te Bibilia. Ua ite râ vau e e parau mau ta ˈu e haapii ra, e ua opua mau vau eiaha e faarue, noa ˈtu te mau faaitoitoraa a te mau demoni no te tapea i te reira. E tairi ratou ia ˈu ia taoto anaˈe au. I te hoê taime, ua tairi puai roa ratou i to ˈu upoo e mauiui noa ˈtura vau e rave rahi hora te maoro. E pure au ia Iehova e tauturu mai ia ˈu, e e tiahi ïa oia ia ratou i rapae i to ˈu piha.
Aita râ te mau demoni i faarue. Na rapae mai i to ˈu piha, e tupaipai tamau noa ratou i nia i te haamaramarama, no reira ˈtura, tau hora noa ta ˈu e nehenehe e taoto i te po. Ua tamata ratou i te haaparuparu ia ˈu. Ua pure tamau noa râ vau ia Iehova, e ua haere au i te mau putuputuraa atoa a te mau Ite, e ua tauturu mai Iehova ia ˈu.
E mana rahi mau to te mau demoni. E nehenehe ta ratou e haapohe i te taata, mai ta ratou i haapohe i te mau tamarii hoê ahuru a Ioba (Ioba 1:18, 19). Ua papu roa ia ˈu e te hinaaro ra ratou e haapohe ia ˈu, no te mea noa ˈtu e ua riro vau ei tavini no ratou e ua horoa mai hoi ratou i te mana hau aˈe i te taata nei no ˈu, ua faarue râ vau ia ratou no te tavini atu i to ratou enemi, o te Atua ra o Iehova. I te mea e ua nehenehe ia Iehova i te paruru mai ia ˈu, na te reira e haapapu mai ia tatou e eiaha tatou e mataˈu i te mau demoni.
I te matahiti 1974, ua haere au i te tairururaa mataeinaa a te mau Ite a Iehova tei tupu i roto i te tahua taaro no County i Oakland-Alameda. I roto i taua tairururaa ra to ˈu opuaraa e bapetizo ia ˈu i te tairururaa mataeinaa i mua ˈˈe. Mea na reira ïa vau i te bapetizoraa i roto i teie iho â tahua taaro, i te 18 no tiurai 1975. I te avae atopa o taua matahiti ra, ua faaipoipo vau i te hoê kerisetiano Ite a Iehova.
I muri aˈe i to ˈu faaipoiporaa e o Marie, ua tamau noâ te mau demoni i te faahuehue ia mâua. Ua faariaria ratou i ta ˈu vahine i te tahi mau taime. No roto o Marie i te amuiraa o te putuputu ra i roto i te Piha o te Basileia i reira to ˈu haere-matamua-raa i te putuputuraa. Ua ite oia i te mau ohipa atoa no nia ia ˈu na mua ˈˈe i to mâua faaipoiporaa. Ua parau roa mai o ˈna ia ˈu e ua manaˈo iho â oia e e taata tahutahu vau i to ˈna ite-matamua-raa mai ia ˈu i te Piha o te Basileia. E tia iho â râ ia parau e mea ê roa vau: e oomo noa vau i te ahu ereere e eita vau e paraparau haere noa i te taata. E tomo noa vau i roto i te piha e parahi.
I te hoê taime, ua manaˈo mâua e eita te mau demoni e vaiiho ia mâua na mua ˈˈe e taorahia ˈtu ai ratou i roto i te abuso e o Satani (Apokalupo 20:1-3). No te mea râ e ua tamau noa mâua i te haafatata ˈtu ia Iehova na roto i te pure e i te huti mai i te mau tauturu pae varua o ta ˈna e horoa mai nei na roto i te ravea o ta ˈna faanahonahoraa, e rave rahi matahiti i teie nei aita te mau demoni e haapeapea faahou mai nei ia mâua mai te matamua ra.
Ua oaoa roa mâua i te mea e e toru ta mâua tamahine nehenehe, e te tavini nei o Marie ei pionie tamau e maha matahiti i teie nei. Te tiai nei mâua ma te faaoromai i te mahana i reira o Satani e ta ˈna mau melahi e haamou-roa-hia ˈi. I teie nei, noa ˈtu â ïa e aita tatou e haafifi-tahaa-hia mai nei e te mau demoni, eiaha ia moe ia tatou e e tamaˈi ta tatou e haa nei e o ratou, ia au i teie mau parau a te aposetolo Paulo e: “E ere hoi i te taata anaˈe ra ta tatou e to nei o te (...) mau tavana o teie nei ao pouri, e te mau varua ino o te reva nei.” (Ephesia 6:12). — Faatiahia e Ralph Anderson.
[Parau iti faaôhia i te api 25]
I te mau taime atoa ia aparau anaˈe au i te hoê demoni o mâua anaˈe, mea taa ê iho â to ˈna huru e ta ˈna mau ravea i ta te tahi atu mau demoni.