Na te aha e faatere ra i to outou oraraa: na te mau peu aore ra te mau faaueraa tumu a te Bibilia?
UA MAERE ROA teie tapone, tei ratere i roto i te tahi atu fenua no Asia. Ua maiti aˈera te taata i farii mai ia ˈna, ma te rave hoi i ta ˈna iho mau patia tinito, i rotopu i te mau tâpû iˈo e vai ra i roto i te meleti, i te hoê tâpû nehenehe maitai e ua tuu atura i roto i te auˈa raiti a ta ˈna manihini. I to ˈna fenua i Tapone, e ere roa ˈtu te reira i te peu maitai. Eita roa ˈtu te hoê taata e rave i ta ˈna iho patia, ia huri râ oia na mua e nehenehe ïa, ia ore te muaraa e tuuhia ˈtu i roto i te vaha ia û atu i nia i te maa. Aita hoi te taata i farii ia ˈna e hinaaro ra e faainoino ia ˈna, te hinaaro ra râ oia e faahanahana ia ˈna. Ua riro te hoê ohipa au-ore-hia i te fenua Tapone ei tapao no te faatura i roto i taua fenua ra!
Mea rahi mau te taa-ê-raa i roto i te mau peu! Mea rahi atoa hoi te mau fifi i roto! E o vai te nehenehe e parau e tei hea te mea maitai roa ˈˈe? Teie râ, ua niuhia vetahi i nia i te tahi mau tiaturiraa tupapau aore ra te tahi mau haapiiraa hape. No te mau taata tei haapiihia to ratou haava manaˈo e te Bibilia, aita e feaaraa e e tia mau taua mau peu ra ia faaruehia. Na te aha e nehenehe e tauturu i te hoê taata e hinaaro ra ia farii mai te Atua ia ˈna, ia maiti i te mau peu te tia ia haapaohia, e i roto i tei hea faito? Na te mau faaueraa tumu ïa a te Bibilia, no te mea e farii te hoê kerisetiano i taua buka nei ei aratai no ˈna, noa ˈtu eaha te vahi ta ˈna e faaea ra.
Te faaohiparaa i te tahi mau faaueraa tumu o te Bibilia
Ua faatupu te Parau a te Atua i te mana rahi i nia i te mafatu o te hoê taata haehaa e ua faariro i to ˈna oraraa o te tuati maite atu i nia i te mau haerea o te Atua, ua ite-papu-hia ïa te reira. Ua faaite mai te aposetolo Paulo e ua farii te mau kerisetiano no Tesalonia i te Parau a te atua ‘i ta ratou i ite ei parau na te Atua e oia mau â hoi o tei rave puai hoi i roto ia ratou, i tei faaroo ra’. (Tesalonia 1, 2:13.) No te puai taua Parau ra, mai ta te Korinetia 1, 6:9-11 e faahiti ra, i aratai ai oia e rave rahi mau taata o te oire tahito no Korinetia, tei tui te roo no to ˈna mau haerea viivii, ia faarue i ta ratou mau peu tahito oia hoi: te eiâ, te poreneia, te inu-hua-raa i te ava e te mahu (pâiˈa). Te ohipa atoa ra anei te parau a te Atua i roto ia outou? Te faatere ra anei ta ˈna mau faaueraa tumu i to outou oraraa i roto i te faito rahi roa ˈˈe, ia nehenehe outou ia ite e nafea outou i mua i te tahi mau peu o te fenua iho?
E ite-atoa-hia i te tahi taime e eita te hoê peu e tano e te mau faaueraa tumu o te Bibilia. Mai te peu mai te reira ra, te taata i ite i te mau faaueraa a Iehova e o te hinaaro ia au mai oia ia ˈna, e faarue mau â ïa oia i te hoê peu mai te reira te huru. Ei hiˈoraa, e nehenehe taua peu ra e titau ia tutuihia te mea noˈanoˈa ia pohe noa ˈtu te hoê taata, no te tamǎrû i te “nephe” o taua taata ra aore no te faaoaoa ia ˈna ma te horoa ˈtu i te hoê “revaraa” maitai. E riro atoa paha i te tutuihia te tahi mau hohoˈa fare, mau hohoˈa afata teata, pereoo, e rave rau atu â, ia nehenehe te taata pohe ia oaoa i roto i te aorai o te mau varua. Inaha, ua ite te kerisetiano e tiaturi i te irava bibilia e parau ra e “aita râ a te feia i pohe ra e parau itea” e ua niuhia taua mau peu ra i nia i te mau tiaturiraa hape, e no reira oia e faarue ai i te reira. — Koheleta 9:5, 10; Salamo 146:4.
Teie râ, ia ore te hoê peu ia patoi tia ˈtu i te mau faaueraa tumu a te Bibilia e te haafifi noa ra râ hoi ia tavini taatoa tatou i te Atua ra o Iehova, e ere ïa i te mea ohie ia haamau i te hoê huru haerea e ia faaite e te faatere ra te mau faaueraa tumu a te Bibilia i to tatou oraraa. Tei roto te titauraa i te mau haapiiraa teitei e te manuïaraa i te pae materia, te auraroraa ˈtu i te mau metua i roto i te oraraa taatoa, te maitiraa te mau metua i te hoê hoa faaipoipo, i te mau peu parare roa ˈˈe o te nehenehe e haafifi i to tatou mau auraa e o Iehova. Nafea tatou e nehenehe ai e faaohipa i te mau faaueraa tumu o te Bibilia i roto i taua mau huru tupuraa ra?
[Hohoˈa i te api 3]
Mau hohoˈa tei tutuihia ia pohe te hoê taata.