‘O ta ˈu hoi i paimi noa na’

E nehenehe te huru o te hoê oraraa e tauihia na roto i te hoê mea iti haihai roa. Tei itehia ïa e te hoê potii no te fenua La Plata Raparata tei papai mai i te pû rahi a te Taiete Watch Tower, i Brooklyn (New York):

“E te feia nenei,

“E nehenehe anei ta outou e faaite oioi mai nafea e noaa mai ai ia ˈu ta outou vea ra Te Pare Tiairaa? Ua horoa mai te vahine e tapiri mai i to ˈu vahi faaearaa i te tahi na ˈu, e ua itea ia ˈu i roto i to ˈna mau api te mea ta ˈu i paimi noa na mea maoro i teie nei. Ua tamarû mau te reira ia ˈu! Ua tamahanahana mau hoi ia ˈu. 15 to ˈu matahiti e o vau anaˈe to ˈu oraraa nei, aita e taata e haapeapea maira no ˈu. Ua horoa mai râ ta outou vea i te tiaturiraa no ˈu. Ua ani faahou mai te vahine tapiri i to ˈu vahi faaearaa i te vea, no te mea na to ˈna metua vahine, tei pohe aita i maoro aˈenei, i vaiiho mai na ˈna.”

Te faaoti ra taua potii nei i ta ˈna rata ma te parau e noa ˈtu e ere oia i te mea navai roa, e faaitoito oia i te aufau i te mau vea. Ua faataehia ˈtu ta ˈna rata i te fenua La Plata Raparata, e ua haere oioi atura te hoê tia a te Taiete Watch Tower e farerei ia ˈna. Ua tamatahiti oia ia ˈna te mau vea ra Te Pare Tiairaa e te A ara mai na! e ua haere oioi aˈera oia i mua i roto i te ite i te Bibilia. Ua bapetizohia o ˈna i teie nei e te apiti ra oia i roto i te taviniraa kerisetiano i pihai iho i to ˈna mau taeae e tuahine aretetina e rave rahi tausani.

Outou atoa, e nehenehe e noaa ia outou i Te Pare Tiairaa e te A ara mai na! i ô outou na, na roto i te rata. No te reira, ia faaî noa ïa outou e ia faahoˈi mai i te parau-pahonoraa nei.

A tamatahiti na ia ˈu i te mau vea ra Te Pare Tiairaa e te A ara mai na! E hapono atu vau i te tino moni ra 1 000 farane.