45 PETERO
‘E taata hara vau’
UA ROHI Petero ei taata ravaai e te tahi atu mero o to ˈna utuafare. E taata itoito e pinepine o ˈna, i te faaite i to ˈna manaˈo e i te rave i ta ˈna e hinaaro. I te hoê mahana, ua haere mai to ˈna taeae o Anederea e ua parau: “Ua itehia ia mâua te Mesia.” Ua riro oioi Petero ei pǐpǐ na Iesu.
Tau avaˈe i muri iho, ua haere mai Iesu i Kaperenaumi, i reira Petero i ora ˈi. Ua taiˈa Petero i te po taatoa, aita râ i noaa mai te iˈa. Ua parau atu Iesu ia haere i te vahi mea hohonu te miti e ia tuu faahou i ta ˈna upeˈa. Aita Petero i tiaturi, ua matauhia hoi ia taiˈa i te ao aita e noaa mai te iˈa. Ua parau o ˈna: “Ua taiˈa matou e ao noa ˈtura e aita hoê aˈe iˈa.” Ua auraro râ Petero, aita i maoro ua î e piti poti i te iˈa e ua haamata ratou i te paremo! Ua riaria roa o Petero, ua tuturi i mua ia Iesu e ua parau: “E te Fatu, eiaha e tapiri mai ia ˈu, e taata hara hoi au.” Ua manaˈo Petero e taata hara rahi o ˈna, oia hoi mea faufaa ore, no te apiti i te Tamaiti a te Atua tei faatupu i teie semeio. Ua haapapu Iesu ia ˈna: “Eiaha e mǎtaˈu faahou. Mai teie atu nei, te taata te noaa mai ia outou eiaha râ te iˈa.”
Ua tapao Iesu i te mau huru maitatai o Petero, e i muri iho, ua riro mai Petero hoê o na 12 aposetolo. Ua faaite Petero i te itoito i roto e rave rahi tupuraa. Ei hiˈoraa, ia parau Iesu i te tahi ohipa aita te mau pǐpǐ i taa, pinepine Petero i te ani ia Iesu ia faataa mai i te auraa. I to Iesu haereraa na nia i te miti, o Petero anaˈe tei tamata i te haere ia Iesu ra.
Pinepine Petero i te paraparau oioi, ua titauhia ïa ia ˈna i te itoito no te farii i te aˈoraa e no te rave i te mau tauiraa
Ua faaite atoa Petero i te itoito i to Iesu aˈoraa ia ˈna. Taa ê atu i te rahiraa o te taata, ua farii ohie Petero i to ˈna mau hape e i te rave i te mau tauiraa. I te hoê mahana, i to Iesu parauraa e haapohehia o ˈna, ua parau atu Petero: “E te Fatu, eiaha oe e na reira i te parau.” Ua aˈo etaeta ˈtu Iesu no to Petero paraparauraa mai ia Satani ma te patoi i to te Atua hinaaro. Ma te haehaa ua farii Petero i te aˈoraa.
I te po hou Iesu a pohe ai, ua hinaaro o ˈna e haapii i ta ˈna mau aposetolo, ia faatupu ratou i te haehaa. Ua haamata ïa o ˈna i te horoi i to ratou avae, mai te hoê tavini e na reira. Ua tamata Petero i te tapea ia Iesu e ua parau: “Eiaha oe e horoi i to ˈu avae.” Ua aˈo etaeta Iesu ia ˈna. I muri iho ua taui Petero i ta ˈna i parau e ua ani ia Iesu ia horoi eiaha noa i to ˈna avae oia atoa râ to ˈna rima e upoo. Ua aˈo faahou Iesu ia ˈna. I muri iho ua tohu Iesu, e faarue ta ˈna mau aposetolo taatoa ia ˈna. Ua onoono Petero e aita o ˈna e faarue ia Iesu, noa ˈtu e na reira te tahi atu mau pǐpǐ. Ua pahono Iesu e e parau Petero e toru taime aita o ˈna i ite o vai Iesu i tera po.
Tau hora i muri iho, ua tapeahia, taamuhia e afaihia Iesu. Ma te itoito ua pee Petero na te atea. Ua afai ratou ia Iesu i te fare o te tahuˈa rahi, i reira te taata i te hamani-ino-raa e haavaraa ia Iesu no te mau ohipa aita o ˈna i rave. I tera taime, tei rapae Petero i te aua o teie fare. Ua taa râ i te feia mataitai o Petero hoê o te mau pǐpǐ a Iesu. Ua parau râ Petero e toru taime aita o ˈna i ite o vai Iesu, mai ta Iesu iho â i tohu.
I taua taime ra, ua haere mai Iesu i rapae i te fare e ua hiˈo ia Petero. Ua oto roa Petero no te ohipa ta ˈna i rave e “haere atura oia i rapaeau e taˈi ihora no te peapea rahi.” Tau hora i muri iho, i te haapoheraahia i to ˈna Fatu here, ua ino atu â te oto o Petero mai tei ore i itehia aˈenei e o ˈna. Noa ˈtu râ te mau hape ta Petero i rave, aita oia i tuu. Ua tamau o ˈna i te tavini ia Iehova e i te farerei i te mau aposetolo. I muri iho i to Iesu faatia-faahou-raahia, ua fa o ˈna ia Petero i te taime o Petero anaˈe. Aita te Bibilia e faaite ra i ta Iesu i parau ia Petero, ta tatou noa i ite, ua itoitohia Petero, ua faaore hoi Iesu i ta ˈna hara.
Tau hebedoma i muri iho, ua farerei Iesu i ta ˈna mau aposetolo i te miti o Galilea, e ua horoa o ˈna i te hoê ô faufaa mau ia Petero. I te mea e, ua parau Petero e toru taime aita o ˈna i ite o vai Iesu, ua horoa Iesu ia ˈna e toru ravea no te faaite i to ˈna here i to ˈna Fatu. I muri iho, ua horoa Iesu ia Petero i te hoê hopoia faufaa: “A faaamu i ta ˈu mau fanauˈa mamoe.” I te pene 49, e haapii mai tatou mea nafea Petero i te auraroraa ia Iesu e faaiteraa i te itoito i te toea o to ˈna oraraa.
A taio i te aamu Bibilia:
A aparau:
Mea nafea to Petero faaiteraa i te itoito i tera taime o to ˈna oraraa?
A faahohonu atu â
1. Mai te aha te ohipa ravaai i tahito ra? (it “Aˈuaˈu e taiˈa” par. 6-7) A
Hohoˈa A
2. No te aha Iesu i horoa ˈi ia Simona te iˈoa Kepha (Petero)? (Ioa. 1:42; w24.06 28 par. 11)
3. Eaha ta Iesu i hinaaro e faaite i to ˈna titauraa ia Petero e Anederea no te riro ei “ravaai taata”? (Mat. 4:18-20; w16.05 10 par. 3-4) B
Hohoˈa B
4. Hou Iesu a hoˈi ai i te raˈi, ua ani oia ia Petero: “Mea here anei na oe ia ˈu hau aˈe i teie mau mea?” Eaha paha te auraa o te uiraa a Iesu? (Ioa. 21:15; w17.05 21 par. 2)
A feruri i te mau haapiiraa
Eaha ta oe e haapii mai i te hiˈoraa o Petero no nia i te tamauraa i te tavini ia Iehova noa ˈtu te hoê paruparu? C
Hohoˈa C
Ia haamanaˈo oe mea nafea Iehova e Iesu i te faaore-oioi-raa i te hara a Petero, e nafea te reira e tauturu ai ia oe?
E nafea oe ia pee i te itoito o Petero i roto i teie aamu?
A huti mai i te haapiiraa
Eaha ta teie aamu e haapii mai no nia ia Iehova?
E nafea teie aamu e tuati ai i te opuaraa a Iehova?
Eaha ta oe i haapii mai no nia ia Petero i roto i teie aamu o te faaoaoa ia oe e ua maitihia o ˈna no te faatere e te Mesia i nia i te raˈi?
A haapii hau atu â
E nafea te mau metua e faaohipa ˈi i te hiˈoraa o Petero no te haapii i ta ratou tamarii no nia i te aroha hamani maitai o Iehova?
A hiˈo mea nafea Petero i te vai-taiva-ore-raa i to te rahiraa faarueraa ia Iesu.
“Ua tapea oia i to ˈna taiva ore tei tamatahia” (ia 188-195)