TUHAA 5
E nafea ia vai hau noa e te fetii?
‘Ei aau aroha noa to outou, e te hamani maitai, e te haehaa, e te mǎrû, e te faaoromai.’—Kolosa 3:12
A faaipoipo ai, ua riro oe e to hoa ei utuafare apî. E faatura e e here noa iho â oe i to oe na metua, tera râ i teie nei, o to hoa faaipoipo te taata faufaa roa ˈˈe no oe i te fenua nei. E ere i te mea ohie no vetahi fetii ia farii. Ma te haapao i te mau aratairaa Bibilia, e nehenehe oe e vai hau noa e to fetii e i te hoê â taime e haapao i to oe utuafare apî a oaoa ˈtu ai.
1 TE MANAˈO TANO NO NIA I TE FETII
TA TE BIBILIA E PARAU RA: “E faatura ˈtu i to metua tane e to metua vahine.” (Ephesia 6:2) Noa ˈtu ehia matahiti to oe, e titauhia ia haapao e ia faatura noa i to oe na metua. A farii e no to hoa faaipoipo, mai tera atoa ïa. Te parauhia ra e: “E ore te aroha e feii,” eiaha ïa e manaˈo ino i to hoa ia tapea i te taairaa maitai e to ˈna fetii.—Korinetia 1, 13:4; Galatia 5:26.
TA OE E NEHENEHE E RAVE:
A haapae i te mau parau mai teie te huru, “Hopea ore to oe fetii i te faaino ia ˈu” aore ra “Aita iho â to oe metua vahine e mauruuru i te tahi noa ˈˈe ohipa ta ˈu e rave”
A tamata na i te feruri i te huru o to oe hoa a faahiti ai oe i tera mau parau
2 IA TITAUHIA, A FAAITE PAPU I TE MANAˈO
TA TE BIBILIA E PARAU RA: “No reira e faarue ai te taata i tana metua tane e tana metua vahine, a ati atu ai i ta ˈna vahine, e e riro hoi raua ei hoê.” (Genese 2:24) No to oe na metua, na raua noa ra paha e haapao ia oe noa ˈtu e ua faaipoipo oe. I to raua manaˈo, e parau atoa ïa ta raua i to orua oraraa.
Tei ia oe e to hoa faaipoipo atura ïa te faaotiraa eaha to ratou otia a faaite atu ai i te reira ma te here. E nehenehe e faaite papu i te manaˈo ma te ore e tuhi. (Maseli 15:1) E tauturu atu te haehaa, te mǎrû e te faaoromai ia haamaitai i to orua taairaa e te fetii a tamau noa ˈi i “te faaoromairaa te tahi i te tahi ma te aroha.”—Ephesia 4:2.
TA OE E NEHENEHE E RAVE:
Ia haapeapea oe no te mea te faaô pinepine ra te fetii i roto i to orua oraraa, a tauaparau e to hoa i te taime aita orua i riri
Ia hoê to orua manaˈo no te faaafaro i te mau fifi atoa e nehenehe e tupu e te fetii