TUHAA 3
E nafea ia faaafaro i te fifi?
“Te aroha, ia uˈana maite ïa ia outou outou iho: e moe hoi te hapa e rave rahi i te aroha.”—Petero 1, 4:8
I te haamataraa o to orua faaipoiporaa, e rave rau fifi te tupu. Mea taa ê paha to orua feruriraa, huru e manaˈo no nia i te oraraa. Aore ra no te tahi atu taata e no te tupuraa manaˈo-ore-hia paha orua e fifi atoa ˈi.
Mea ohie aˈe paha ia ore e haapao i to tatou mau fifi, te aˈo maira râ te Bibilia ia faaafaro i te reira. (Mataio 5:23, 24) Ma te pee i te mau aratairaa Bibilia, e nehenehe oe e ite e nafea ia faaafaro maitai i te fifi.
1 A PARAPARAU NO TE FAAAFARO I TE FIFI
TA TE BIBILIA E PARAU RA: “E taime to te parau.” (Koheleta 3:1, 7) A haapao maite e te paraparau ra orua no te faaafaro i te fifi. Ia taa maitai i to hoa faaipoipo i to oe manaˈo e huru i mua i tera tupuraa e a faaite noa atoa i te “parau mau.” (Ephesia 4:25) Noa ˈtu e e riri aore ra e mauiui roa oe, eiaha e imi ia tatamaˈi orua. Ia pahono oe ma te mǎrû, eita te tauaparauraa e riro ei taoraraa parau.—Maseli 15:4; 26:20.
Noa ˈtu e aita oe i mauruuru, a faaite noa i te mǎrû ma te tamau i te here e faatura i to hoa faaipoipo. (Kolosa 4:6) A faaafaro oioi i te fifi e eiaha e mamû noa, a paraparau râ.—Ephesia 4:26.
TA OE E NEHENEHE E RAVE:
A faataa i te taime no te paraparau ia faaafarohia te fifi
Ia paraparau to oe hoa, a faaroo ia ˈna e eiaha e tâpû i te parau. Ia oti, o oe ïa te paraparau
2 A FAAROO NO TE TAA I TO ˈNA MANAˈO
TA TE BIBILIA E PARAU RA: “Ei atiraa aroha mau to outou ia outou iho, . . . i te faaturaraa ˈtu te tahi i te tahi.” (Roma 12:10) Mea faufaa roa te huru o ta oe faarooraa. A tutava i te taa i te manaˈo o to hoa ma te aau aroha e te haehaa. (Petero 1, 3:8; Iakobo 1:19) Eiaha e faahua faaroo. Ia nehenehe, a vaiiho i ta oe ohipa e a faaroo maite ia ˈna aore ra a ani e e nehenehe anei e tiai maa taime iti. Ia faariro oe i to hoa ei apiti eiaha râ ei enemi, eita oe e ‘ru noa i te riri.’—Koheleta 7:9.
TA OE E NEHENEHE E RAVE:
A faaroo maite i te taatoaraa o ta ˈna mau parau, noa ˈtu e aita oe e au ra i ta oe e faaroo ra
A faaroo no te ite i te poroi ta ˈna e hinaaro ra e faaite atu. A hiˈopoa i to ˈna hohoˈa mata e toparaa reo
3 A RAVE MAI TA ORUA I FAAOTI
TA TE BIBILIA E PARAU RA: “E taoˈa anaˈe â tei te mau ohipa atoa ra; tei te paraparau noa râ te veve.” (Maseli 14:23) Eita e navai ia rave i te faaotiraa maitai, e titau-atoa-hia râ ia rave mai ta orua i faaoti. E ere ïa i te mea ohie, e tia hoi ia tutava mau, e hoona râ to orua taime. (Maseli 10:4) Ma te haa amui, e haamaitaihia orua.—Koheleta 4:9.
TA OE E NEHENEHE E RAVE:
A faaoti i ta orua e rave no te faaafaro i te fifi
A hiˈopoa pinepine e ua rave anei te tahi e te tahi i ta ˈna tuhaa