TUHAA 4
E nafea ia haapao i ta orua moni?
‘Ia rahi te aˈo e papu ai tei manaˈohia.’—Maseli 20:18
Mea faufaa te moni no tatou paatoa ia noaa mai te mau mea e hinaarohia e to tatou utuafare. (Maseli 30:8) Oia mau, e “haapuraa tei te moni.” (Koheleta 7:12) Ei tane e vahine faaipoipo, e ere paha i te mea ohie ia tauaparau no nia i te moni, eiaha râ e vaiiho i te reira ia haafifi i to orua faaipoiporaa. (Ephesia 4:32) E mea tia ia tiaturi te tahi i te tahi e ia faaoti amui orua e nafea ia haapao i ta orua moni.
1 A FERURI MAITE NA MUA
TA TE BIBILIA E PARAU RA: “O vai ïa taata i ǒ outou nei ia opua i te fare e faatia, e ore e mata na i te parahi i raro, a taio ai i te taoˈa e oti ai, i te navairaa ta ˈna taoˈa?” (Luka 14:28) Mea faufaa roa ia hoê to orua manaˈo no nia i te faaohiparaa i ta orua moni. (Amosa 3:3) A faaoti eaha te hoo mai na mua e ehia moni te titauhia no te aufau i te reira. (Maseli 31:16) E ere no te mea e te vai ra te moni, e tia iho â ïa ia haamâuˈa i te reira! Eiaha e tarahu e a hoo noa mai i te pee ia orua i te aufau.—Maseli 21:5; 22:7.
TA OE E NEHENEHE E RAVE:
A faaoti amui eaha te rave ia toe mai te moni i te hopea avaˈe
Ua rahi anaˈe te haamâuˈaraa i te moni e noaa mai ia orua i te avaˈe, a faaoti eaha te rave ia ore te reira e tupu faahou. Peneiaˈe, e nehenehe e tunu i te maa i te fare no te ore e haere e tamaa i rapae
2 A FAAITE I TE PARAU MAU E EIAHA E HAAMÂUˈA I TE MONI
TA TE BIBILIA E PARAU RA: “Te haapao-atea-maite-raa i te mea tia, eiaha i mua i te aro o te Fatu anaˈe ra, i mua atoa râ i te aro o te taata.” (Korinetia 2, 8:21) A faaite i te parau mau i to hoa faaipoipo ma te ore e huna ehia moni tei noaa mai ia oe, oia atoa tei haamâuˈahia.
A tauaparau noa e to hoa no te rave i te faaotiraa faufaa mau no nia i te faaohiparaa i ta orua moni. (Maseli 13:10) Ma te na reira, e vai hau noa orua a oaoa ˈtu ai i to orua faaipoiporaa. A faaite e e ere na oe tera moni, na te utuafare râ.—Timoteo 1, 5:8.
TA OE E NEHENEHE E RAVE:
A faaoti eaha te tino moni ta oe e ta ˈna e nehenehe e haamâuˈa ma te ore e ani i te manaˈo o te tahi
Eiaha e tiai ia tupu roa te fifi no te tauaparau no te moni