Eiaha e taiva i to hoa faaipoipo

Te faaitoito maira o Iehova ia ‘hinaaro i te aroha [aore ra here taiva ore].’ (Mika 6:8) Mea faufaa roa iho â te reira i roto i te faaipoiporaa. Ia taiva hoê, eita te tahi atu e tiaturi faahou ia ˈna e e iti ïa to raua here.

Te iti noa ˈtura te hoa faaipoipo taiva ore i teie mahana. Ia oaoa noa orua i te faaipoiporaa, e mea tia ia faaoti papu e haapao i na manaˈo e piti i muri nei.

1 NA MUA ROA TO ORUA FAAIPOIPORAA

TA TE BIBILIA E PARAU RA: “Ia au atu hoi outou i te mau mea i hau i te maitai.” (Philipi 1:10) No oe, mea faufaa roa anei to orua faaipoiporaa? A haafaufaa ïa i te reira na mua roa.

Te hinaaro ra Iehova ia haapao noa oe i to hoa e ia “oaoa” amui orua. (Koheleta 9:9) Eiaha roa ïa e haafaufaa ore ia ˈna, e tia râ ia imi i te ravea ia oaoa orua toopiti. (Korinetia 1, 10:24) A faaite i to hoa faaipoipo e mea faufaa o ˈna no oe e te here mau ra oe ia ˈna.

TA OE E NEHENEHE E RAVE:

• A faataa i te taime no orua i te mau mahana atoa e a haapao noa i to hoa faaipoipo

• A manaˈo ia orua eiaha râ ia oe anaˈe

2 A TIAI I TO AAU

TA TE BIBILIA E PARAU RA: “O te hiˈo noa ˈtu i ta vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.” (Mataio 5:28) Ia manaˈo te hoê e rave i te peu faufau, ua taiva ïa oia i to ˈna hoa faaipoipo.

Te parau ra Iehova e e titauhia ia “tiai i to aau.” (Maseli 4:23; Ieremia 17:9) No te na reira, e mea tia ia haapao maitai i ta to mata e hiˈo ra. (Mataio 5:29, 30) A pee i te hiˈoraa o te patereareha Ioba tei faaau i te faufaa ia ore to ˈna mata e turai ia ˈna ia faahinaaro i te tahi atu vahine. (Ioba 31:1) A faaoti papu eiaha roa e mataitai i te hohoˈa faufau e ia faahinaaro i te tahi atu taata i to hoa faaipoipo.

TA OE E NEHENEHE E RAVE:

• A faaite ia vetahi ê e te here mau ra oe i to hoa faaipoipo

• A haapao i te huru e te manaˈo o to oe hoa, ia huru ê o ˈna i te tahi taata, a faaea oioi i te faahoa ˈtu