Tuhaa 7
Eaha te faahopearaa o te orureraa hau?
1-3. Mea nafea te roaraa o te tau i te haapapuraa e ua tano iho â Iehova?
NO NIA i te uiraa o te tiaraa o te Atua ia faatere, eaha te faahopearaa i noaa mai i muri aˈe i te mau senekele to te taata faatereraa ia ˈna iho ma te faataa ê i te Atua? Ua riro anei te mau taata ei mau faatere maitatai aˈe i te Atua? Mai te peu e e faito tatou ia au i te hamani-ino-raa te mau taata ia ratou iho, aita roa ˈtu ïa.
2 I te taime a patoi ai to tatou nau metua matamua i te faatereraa a te Atua, ua ino roa te mau ohipa. Ua hopoi mai raua i te mauiui i nia ia raua iho e i nia i te fetii taata taatoa o ta raua i fanau mai. Aita ˈtu taata ta raua e nehenehe e faahapa maoti râ o raua iho. Te na ô ra te Parau a te Atua e: “Ua ino ratou, e ere hoi to ratou ra tapao i to ta ˈna ra tamarii, e ui faefaea e te piˈo ra.”—Deuteronomi 32:5.
3 Ua haapapu mai te aamu i te parau mau o te faaararaa a te Atua ia Adamu raua o Eva oia hoi ia faarue noa ˈtu raua i te faanahoraa a te Atua, e paruparu ïa raua e a pohe atu ai. (Genese 2:17; 3:19) E ua faarue raua i te faatereraa a te Atua, e inaha, ua paruparu aˈera e ua pohe atura raua.
4. No te aha tatou i fanauhia ˈi ei feia tia ore, o te roohia i te maˈi e te pohe?
4 Te faataa ra te Roma 5:12 i te ohipa i tupu i muri iho no ta raua huaai: “No te taata hoê ra [o Adamu, te upoo o te fetii taata nei] i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe.” No reira, i te taime a patoi ai to tatou nau metua matamua i te aratairaa a te Atua, ua riro maira raua ei feia hara tia ore. Ia au maite i te mau ture o te mau tapao no ǒ mai i te tupuna, e nehenehe noa ïa ta raua e horoa ˈtu na ta raua huaai i to raua huru taata tia ore. No reira ïa tatou paatoa i fanauhia ˈi ei feia tia ore, o te roohia i te maˈi e te pohe.
5, 6. Eaha ta te aamu i faaite mai no nia i te mau tutavaraa a te taata no te afai mai i te hau e te ruperupe mau?
5 E rave rahi mau senekele o tei mairi. Ua tia mai e ua aramoina te mau hau emepera. Ua tamatahia te mau huru faatereraa atoa. Tera râ, ua tamau noa na te mau ohipa riaria i te roohia i te fetii taata nei. I muri aˈe e ono tausani matahiti, e nehenehe hoi e manaˈo e e haere te taata i mua e tae roa ˈtu i te faito e manuïa ˈi oia i te haamau i te hau, te parau-tia, e te ruperupe na te fenua atoa nei e i teie nei, ua naeahia ia ratou i te faatupu i te mau huru au mau o te hamani maitai, te aroha, e te au-maite-raa.
6 Mea taa ê roa râ te tupuraa mau. Aita hoê faatereraa taata o tei tamatahia aˈenei i afai mai i te hau e te ruperupe mau no te taatoaraa. I teie noa senekele 20, ua ite tatou i te haapoheraahia te mau mirioni taata i roto i te Taparahiraa o te mau ati Iuda e te poheraa hau atu i te 100 mirioni taata i roto i te mau tamaˈi. I to tatou nei tau, e mau rahiraa taata eita e pau ia taio o tei hamauiuihia, o tei taparahihia, e o tei tapeahia no te aroha ore e te mau taa-ê-raa i te pae politita.
Te huru tupuraa i teie mahana
7. Eaha te huru o te fetii taata nei i teie mahana?
7 Hau atu, a hiˈo na i te huru o te fetii taata nei i teie mahana. Ua rahi roa te taparahiraa taata e te haavîraa puai. Ua riro te raveraa i te raau taero ei maˈi pee. Ua parare roa te mau maˈi e tupu na roto i te mau taatiraa i te pae tino. Te tairi nei te maˈi riaria o te SIDA i te mau mirioni taata. E mau ahuru mirioni taata o te pohe nei i te poia aore ra i te maˈi i te mau matahiti atoa, area te hoê pǔpǔ iti ra, e faufaa rahi ïa ta ratou. Te haaviivii nei e te haapau nei te taata i te fenua. Ua topatari roa te oraraa utuafare e te mau ture morare na te mau vahi atoa. Oia mau, te faahohoˈa ra te oraraa no teie nei mahana i te faatereraa hairiiri a ‘te atua o teie nei ao,’ oia hoi o Satani. Te ao o ta ˈna e faatere ra, e ao etaeta ïa, te aroha ore, e te ino rahi.—Korinetia 2, 4:4.
8. No te aha tatou e nehenehe ai e parau e ere te manuïaraa o te huitaata nei i te haereraa i mua mau?
8 Ua vaiiho te Atua i te taime navai maitai ia naeahia i te taata te hoê faito teitei i te pae no te ite aivanaa e te haereraa i mua i te pae materia. Tera râ, e nehenehe anei e parau e haereraa i mua papu teie inaha, ua mono mai te mau pupuhi, te mau pereoo pa auri, te mau manureva taora paura, e te mau topita pao atomi, i te fana e te teˈa? Ua haere anei tatou i mua inaha te haere nei te taata na roto i te reva teitei tera râ eita ta ratou e nehenehe e ora ma te hau i nia i te fenua nei? Ua haere anei tatou i mua inaha te mǎtaˈu nei te taata i te haere na roto i te mau aroâ i te po, e tae noa ˈtu i te ao i te tahi mau vahi?
Eaha ta te roaraa o te tau i faaite mai
9, 10. (a) Eaha ta te mau senekele i mairi aˈenei i faaite ma te papu maitai? (b) No te aha eita te Atua e faaere i te taata i te tiamâraa ia maiti?
9 Ua faaite te maororaa o te mau senekele e eita ta te mau taata e nehenehe e faaafaro i to ratou mau taahiraa avae ia tuu ratou i te faatereraa a te Atua i te hiti. Eita ratou e manuïa mai ta ratou e ore e nehenehe e ora ma te ore e tamaa, e inu, e e huti i te aho. Mea papu maitai te mau ohipa: Ua hamanihia tatou no te titau i te aratairaa a to tatou Poiete mai to tatou poieteraahia no te titau i te maa, te pape, e te mataˈi.
10 Na roto i te faatiaraa i te ino, ua haapapu te Atua i teie taime e a muri noa ˈtu i te mau faahopearaa peapea o te faaohipa-hape-raa i te tiamâraa ia maiti. E no te faufaa rahi o te te tiamâraa ia maiti, maoti hoi i te faaere i te taata i teie ô, ua vaiiho te Atua e na ratou iho e ite e eaha te noaa mai ia faaohipa-hape-hia teie ô. E parau mau roa ta te Parau a te Atua ia faaite oia e: “E ere hoi tei taua taata e haere ra i te haapao i to ˈna taahiraa.” E parau mau atoa ta ˈna ia faaite oia e: “Ta te taata nei faaheporaa ˈtu i te taata e pohe atura ei pohe no ˈna iho.”—Ieremia 10:23; Koheleta 8:9.
11. Ua manuïa anei te tahi faatereraa a te taata i te arai i te mau ati?
11 Ua haapapu maitai te vaiihoraa te Atua i te taata ia faatere i roto e ono tausani matahiti, e eita ta ˈna e nehenehe e arai i te mau ati. Aita oia i manuïa i te hoê noa ˈˈe taime. Ei hiˈoraa, i to ˈna ra tau, aita te Arii ra no Iseraela o Solomona, noa ˈtu to ˈna paari, ta ˈna faufaa, e to ˈna puai, i manuïa i te faatitiaifaro i te peapea no roto mai i te faatereraa taata nei. (Koheleta 4:1-3) Oia atoa, i teie nei tau, noa ˈtu te mau ravea apî aravihi roa ˈˈe, aita te mau raatira o te ao nei i manuïa i te arai i te mau ati. Tera râ, ua faaite mai te aamu e ua faarahi atu â te taata o tei faataa ê mai i te faatereraa a te Atua i te mauiui maoti hoi i te arai i te reira.
Te hiˈoraa atea a te Atua
12-14. Eaha te mau haamaitairaa e noaa mai a muri aˈe ei faahopearaa o te fariiraa te Atua i te mauiui?
12 Ua mauiui tatou na roto i te faatiaraa te Atua i te ati. Teie râ, ua hiˈo atea oia i te mau ohipa, ma te ite e e noaa mai te mau faahopearaa maitatai i te pae hopea. E haamaitai te opuaraa a te Atua i te mau mea ora, eiaha noa no te tahi tau matahiti aore ra te tahi tau tausani matahiti, tera râ, no te mau mirioni matahiti, oia mau, e a muri noa ˈtu.
13 Ia riro noa ˈtu te hoê taata a muri aˈe i te faaohipa hape i to ˈna tiamâraa ia maiti no te patoi i te huru raveraa a te Atua, eita ïa e faufaa faahou ia horoa ˈtu i te taime no te tamata i te haapapu i to ˈna manaˈo. I te mea e ua vaiiho ê na oia tau tausani matahiti na te feia orure hau, ua haamau te Atua i te hoê hiˈoraa papu o te nehenehe e faaohipahia e a muri noa ˈtu i roto i te ao taatoa nei.
14 No te mea ua faatia Iehova i te ino e te mauiui e tae roa mai i teie nei taime, ua faaite-papu-hia ïa e eita roa ˈtu te hoê huru raveraa o te ore e fariihia e ana e manuïa. Ua haapapuhia hoi e eita te hoê faanahoraa ê atu a te taata aore ra a te taata varua e nehenehe e hopoi mai i te mau haamaitairaa mure ore. E tiaraa papu ïa to te Atua no te haamou oioi noa i te tahi taata orure hau. “Area te feia paieti ore ra, e haamouhia ïa e ana.”—Salamo 145:20; Roma 3:4.
[Hohoˈa i te api 15]
I muri aˈe i to raua maitiraa i te faataa ê mai ia raua i te Atua, ua roohia ˈtura to tatou nau metua matamua i te ruhiruhiaraa e te pohe
[Hohoˈa i te api 16]
Ua faatupu te faatereraa a te taata ma te faataa ê i te Atua i te ati
[Faaiteraa i te tumu]
U.S. Coast Guard photo