Tuhaa 6
No te aha te Atua i faatia ˈi i te mauiui
1, 2. Mea nafea to tatou nau metua matamua i te faainoraa i te omuaraa maitai ta te Atua i horoa na raua?
EAHA te ohipa i hape? Eaha te ohipa i tupu i ino ai te omuaraa maitai ta te Atua i horoa ˈtu na to tatou nau metua matamua i roto i te Paradaiso i Edene ra? Eaha te tumu te ino e te mauiui i rahi mai ai i roto i te roaraa o te mau tausani matahiti maoti hoi i te hau e te au-maitai-raa o te Paradaiso?
2 Te tumu, oia hoi ua faaohipa hape o Adamu raua o Eva i to raua tiamâraa ia maiti. Ua moehia ia raua e aita raua i poietehia no te ora ma te tuu i te Atua e ta ˈna ra mau ture i te hiti. Ua opua raua e faataa ê mai ia raua i te Atua, ma te tiaturi e e maitaihia to raua oraraa. No reira, ua taahi atura raua i rapaeau i te mau otia i faauehia mai e te Atua no nia i to raua tiamâraa ia maiti.—Genese, pene 3.
Te uiraa no nia i te mana arii i nia i te ao nei
3-5. No te aha aita te Atua i haamou ia Adamu raua o Eva a haamata apî atu ai?
3 No te aha te Atua i ore ai e haamou atu ia Adamu raua o Eva e a haamata faahou ai e te hoê tane e te hoê vahine apî? No te mea ua patoihia to ˈna mana arii i nia i te ao nei, oia hoi to ˈna tiaraa aueue ore no te faatere.
4 Teie atura ïa te uiraa: Tei ia vai ra te tiaraa no te faatere, e tavai te faatereraa tia? I te mea e o ˈna te Mana hope e te Poiete o te mau mea ora atoa, tei te Atua iho â ïa te tiaraa no te faatere ia ratou. I te mea e tei ia ˈna ra te paari hau aˈe, ta ˈna ïa te faatereraa maitai roa ˈˈe no te mau mea ora atoa. Teie râ, ua patoihia te faatereraa a te Atua. Te vai ra anei te tahi mea hape i roto i ta ˈna poieteraa—oia hoi te taata? E tuatapapa tatou i muri aˈe e mea nafea te uiraa no nia i te tiaraa taiva ore o te taata e ô mai ai i roto i teie ohipa.
5 I to te taata faataa-ê-raa mai ia ˈna i te Atua, ua faahitihia ˈtura te hoê uiraa ê atu: Mea maitai aˈe anei te faatereraa a te taata ma te haapae i te Atua? Ua ite ê na te Poiete i te pahonoraa, tera râ, te ravea papu roa ˈˈe ia ite te taata i teie pahonoraa, o te horoaraa ˈtu ïa i te tiamâraa taatoa o ta ratou e hinaaro ra. Ua maiti ratou i te faaohipa i to ratou iho tiaraa ia maiti, e ua faatia te Atua i to ratou manaˈo.
6, 7. No te aha te Atua i horoa ˈi na te taata i te tiamâraa otia ore i roto i teie area taime maoro?
6 Na roto i te vaiihoraa na te taata i te taime navai maitai no te tamata ma te tiamâ taatoa, e faatitiaifaro ïa te Atua e a muri noa ˈtu i te uiraa ra e mea maitai aˈe anei no te taata ia auraro i te faatereraa a te Atua aore ra i ta ratou iho. E e tia ia vaiiho i te hoê maororaa navai maitai ia naeahia i te taata i te faito e faarirohia e ratou ei manuïaraa i te pae politita, i te pae tapihaa, i te pae no te ite aivanaa, e te pae rapaauraa.
7 No reira, ua vaiiho te Atua na te taata i te tiamâraa taatoa e tae roa mai i teie nei tau no te haapapu ma te feaa ore ahiri e e manuïa anei te faatereraa taata ma te haapae ia ˈna. E nehenehe ïa ta te taata e maiti i rotopu i te hamani maitai e te peu taehae, i rotopu i te here e te riri, i rotopu i te parau-tia e te parau-tia ore. Teie râ, ua faaruru atoa oia i te mau faahopearaa o ta ˈna maitiraa: te maitai e te hau aore ra te ino e te mauiui.
Te orureraa hau a te mau taata varua
8, 9. (a) Mea nafea te orureraa hau i te haamataraa i roto i te ao varua? (b) Taa ê atu ia Adamu raua o Eva, o vai ta Satani i turai atoa ˈtu ia orure i te hau?
8 Te vai ra te tahi atu tuhaa te tia ia hiˈopoahia. E ere to tatou nau metua matamua anaˈe o tei patoi atu i te faatereraa a te Atua. O vai râ te ora atoa ra i taua tau ra? O te mau taata varua ïa. Hou te Atua i poiete ai i te mau taata, ua poiete oia i te mau mea ora teitei aˈe, e rave rahi mau melahi, no te ora i nia i te raˈi. Ua poiete-atoa-hia ratou ma te tiamâraa ia maiti e oia atoa ma te titauraa ia auraro i te faatereraa a te Atua.—Ioba 38:7; Salamo 104:4; Apokalupo 5:11.
9 Te faaite ra te Bibilia e ua tupu na mua te orureraa hau i roto i te ao varua. Ua titau te hoê taata varua i te tiamâraa otia ore. Ua hinaaro atoa oia e ia haamori te mau taata ia ˈna. (Mataio 4:8, 9) Ua riro maira teie taata varua patoi ei mana o tei turai ia Adamu raua o Eva ia orure i te hau, ma te haavare e te faaere ra te Atua ia raua i te tahi mea maitai. (Genese 3:1-5) No reira oia e parauhia ˈi te Diabolo (Faaino) e o Satani (Patoi). I muri aˈe, ua turai atoa ˈtura oia i te tahi atu mau taata varua ia orure i te hau. Ua riro maira ratou ei mau demoni.—Deuteronomi 32:17; Apokalupo 12:9; 16:14.
10. Eaha tei noaa mai na roto i te orureraa hau o te mau taata e te mau taata varua?
10 Na roto i te patoiraa i te Atua, ua hema ˈtura te mau taata i te mana o Satani e ta ˈna mau demoni. No reira te Bibilia e parau ai ia Satani “te atua o teie nei ao,” o ‘tei haapouri i te feruriraa o te feia faaroo ore.’ Te na ô atoa ra te Parau a te Atua e “te vai noa nei to te ao atoa i raro aˈe i taua varua ino ra.” Ua pii o Iesu iho ia Satani “te arii o teie nei ao.”—Korinetia 2, 4:4; Ioane 1, 5:19; Ioane 12:31.
E piti uiraa
11. Ua patoi Satani i te Atua i nia i teihea uiraa ê atu?
11 Ua faahiti Satani i te tahi atu uiraa o tei patoi atu i te Atua. Inaha, ua pari oia e ua hape te Atua i To ˈna poieteraa i te taata e eita hoê e hinaaro i te rave i te parau-tia ia farerei oia i te tamataraa. Inaha, ua haapapu oia e ia faahepo-noa-hia ˈtu ratou, e faaino ratou i te Atua. (Ioba 2:1-5) I to ˈna na reiraraa i te parau, ua faahapa ïa o Satani i te tiaraa taiva ore o te taata.
12-14. Mea nafea te roaraa o te tau e faaite mai ai i te parau mau no nia i teie na uiraa toopiti i faahitihia e Satani?
12 No reira, ua vaiiho atura te Atua i te taime navai maitai na te mau mea ora maramarama atoa o ta ˈna i poiete, no te ite e mea nafea teie uiraa e tae noa ˈtu te uiraa no nia i te mana arii o te Atua ia faatitiaifarohia. (A faaau e te Exodo 9:16.) E faaite mai te mau tupuraa o te aamu taata nei i te parau mau no nia i teie nau uiraa e piti nei.
13 A tahi, eaha ta te roaraa o te tau e faaite mai no nia i te uiraa o te mana arii i nia i te ao nei, te parau-tia o te faatereraa a te Atua? Mea hau aˈe anei te faatereraa a te taata i ta te Atua? E faatupu anei te faatereraa taata nei taa ê atu i te Atua i te hoê ao oaoa aita e tamaˈi, e taparahiraa taata, e e parau-tia ore? E faaore anei te tahi i te veve e e horoa mai anei i te ruperupe no te mau taata atoa? E arai anei hoê i te maˈi, te ruhiruhiaraa, e te pohe? E nehenehe hoi te faatereraa a te Atua e rave i teie mau ohipa atoa.—Genese 1:26-31.
14 No nia i te piti o te uiraa, eaha ta te roaraa o te tau e faaite no nia i te faufaaraa o te taata? Ua hape anei te Atua i te poieteraa i te taata mai ta ˈna i rave? E turu anei te tahi i te parau-tia i roto i te tamataraa? E faaite anei vetahi pae taata e te hinaaro ra ratou i te faatereraa a te Atua maoti i te faatereraa tiamâ a te taata?
[Hohoˈa i te api 13]
Ua vaiiho te Atua i te taime ia naeahia i te taata to ratou faito manuïaraa
[Faaiteraa i te tumu]
Manureva: Ia au i te hoê hohoˈa a te NASA