Tuhaa 2
Te hoê fenua aore e mauiui faahou
1, 2. Eaha te huru hiˈoraa taa ê o vetahi pae?
TERA RÂ, te vai ra te mau mirioni taata na te ao nei e manaˈo taa ê roa to ratou. Te tiaturi nei ratou i te hoê oraraa faahiahia roa e tiai maira i te huitaata nei. Te parau nei ratou e, i nia i te fenua nei, e tupu te hoê ao aore roa e ino e e mauiui faahou. Te tiaturi papu nei ratou e fatata roa te ino i te tumâ-roa-hia e e haamauhia te hoê ao apî roa. Te faaite atoa nei ratou e te faaineinehia ra te niu o teie ao apî i teie nei iho â!
2 Te tiaturi nei teie mau taata e, i roto i te ao apî, e ore roa te tamaˈi, te peu taehae, te taparahiraa taata, te parau-tia ore, e te veve. O te hoê ïa ao aita faahou te maˈi, te oto, te roimata, e tae noa ˈtu te pohe. Ia tae i taua tau ra, e haere tia ˈtu te taata i te faito taata tia roa e e ora ratou e a muri noa ˈtu i roto i te oaoa i nia i te hoê fenua tei riro ei paradaiso. E te feia o tei pohe, e faatia-faahou-hia mai ïa ratou e e fanaˈo ratou i te ravea no te ora e a muri noa ˈtu!
3, 4. No te aha teie mau taata e tiaturi ai i teie huru hiˈoraa?
3 Ua riro noa anei teie huru hiˈoraa i te tau a muri aˈe ei moemoeâ, te hoê noa opuaraa e titauhia eita râ e naeahia? Eita, eita roa ˈtu. Ua niuhia râ i nia i te hoê faaroo papu maitai e e tupu mau â teie Paradaiso e fatata maira. (Hebera 11:1) No te aha râ ratou e tiaturi papu ai? No te mea ïa e na te Poiete mana hope o te ao taatoa nei i tǎpǔ mai i teie parau.
4 No nia i te mau parau tǎpǔ a te Atua, te na ô ra te Bibilia e: “Aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia; ua hope roa i te tupu ia outou, aore roa te hoê i toe.” “E ere te Atua i te taata, a haavare mai ai oia . . . ua parau anei oia, e eita oia e rave? ua parau anei oia, e eita oia e faatupu i te reira?” “Ua tǎpǔ hoi Iehova sabaota ra, na ô maira: o ta ˈu mau i imi ra, o te reira te tupu; e o ta ˈu i opua ra, o te reira te mau.”—Iosua 23:14; Numera 23:19; Isaia 14:24.
5. Eaha te mau uiraa te tia ia pahonohia?
5 Teie râ, mai te peu e te opuaraa a te Atua, o te haamauraa ïa i te hoê paradaiso i nia i te fenua aore e mauiui, no te aha ïa oia i faatia ˈi e ia tupu te mau ohipa iino? No te aha oia i tiai ai e ono tausani matahiti e tae roa mai i teie nei no te faatitiaifaro i te ino? Te faaite ra anei teie mau senekele mauiui atoa e aita te Atua e haapao mau ra ia tatou, aore ra e aita o ˈna e vai ra?