Tuhaa 3
Nafea tatou e ite ai e te vai ra te hoê Atua
1, 2. Eaha te ture o te tauturu ia tatou ia haapapu e te vai ra anei te hoê Atua?
HOÊ ravea no te faataa ahiri e te vai mau ra te hoê Atua, o te faaohiparaa ïa i teie ture papu: Mai te peu e te vai ra te hoê taoˈa hamanihia, te vai ra ïa to ˈna taata hamani. Rahi noa ˈtu te fifi o te taoˈa i hamanihia, rahi atu ïa te aravihi o te taata hamani.
2 Ei faahiˈoraa, a rave na i to outou fare. Te mau amuraa maa, te mau parahiraa, te mau iri papairaa, te mau roi, te mau farii, te mau faraipani, te mau mereti, e te tahi atu mau taoˈa tamaaraa, te vai ra ïa te hoê taata o tei hamani i teie mau tauihaa, e tae noa ˈtu te mau pǎpai, te tahua, e te aroaro fare. Inaha hoi, e ere teie mau taoˈa i te mea fifi roa ia hamani. Mai te peu e e titau te mau tauihaa ohie roa i te hoê taata hamani, e ere anei i te mea tano ia feruri e e titau atoa te mau taoˈa fifi roa i te hoê taata hamani maramarama roa ˈtu â?
Te ao faahiahia o te reva
3, 4. Mea nafea te ao o te reva e tauturu ai ia tatou ia ite e te vai ra te Atua?
3 Te uati, te vai ra ïa te hoê taata o tei hamani i teie taoˈa. Eaha ïa no te faanahoraa fifi roa ˈtu â o te Mahana e ta ˈna mau palaneta e ohu ra na te hiti ia ˈna ma te tetoni tia tera senekele i muri aˈe i tera senekele? Eaha ïa no te haapueraa fetia faahiahia i reira tatou e ora ˈi, tei parauhia te Eˈa fetia Uouo, e amui ra hau atu i te 100 miria fetia? Aita anei outou i tapea i te hoê rui no te mataitai i te Eˈa fetia Uouo? Aita anei outou i putapû roa? I teie nei, a feruri na i te reva maere rahi o te amui ra ehia rahiraa miria haapueraa fetia mai to tatou nei Eˈa fetia Uouo! Oia atoa, no te tereraa hape ore o te mau taoˈa o te reva tera senekele i muri aˈe i tera senekele, inaha, ua faaauhia ratou i te mau uati tia roa.
4 Ahiri e e titau te hoê uati, e taoˈa ohie roa hoi te reira, i te hoê taata hamani uati, mea papu maitai ïa e e titau te ao fifi e te faahiahia roa ˈtu â o te reva i te hoê taata o tei faanaho e o tei hamani ia ˈna. No reira ïa te Bibilia e titau ai ia tatou ia ‘nânâ i to tatou mata i nia e ia hiˈo,’ e te ani ra oia i muri iho e: ‘Navai i hamani i te reira?’ Teie te pahonoraa: “[Na te Atua,] te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana: no to ˈna ra puai rahi e te mana rahi ra, i ore ai te hoê i toe ai i te haere mai.” (Isaia 40:26) No reira, te vai nei te ao o te reva maoti te hoê mana maramarama itea-ore-hia e faatere ra ia ˈna—oia hoi te Atua.
Te fenua—Mea taa ê roa to ˈna hamaniraahia
5-7. Eaha te mau tupuraa no nia i te fenua e faaite ra e te vai ra te hoê Taata i hamani ia ˈna?
5 Rahi noa ˈtu te mau aivanaa i te tuatapapa i te fenua, rahi noa ˈtu ratou i te ite e ua hamani-taa-ê-hia oia ei vahi nohoraa no te taata. Ua tano maitai te atearaa i rotopu i te fenua e te mahana ia naeahia te faito maramarama e te veavea e au. Hoê taime i te matahiti, e haaati oia i te mahana, ia au i te oparaa tano maitai, ia nehenehe te mau tau e tupu i roto e rave rahi mau tuhaa o te fenua nei. E ohu atoa te fenua i nia ia ˈna iho i te mau 24 hora atoa, ia faito noa te ao e te po. Te fanaˈo ra oia i te hoê reva mataˈi, tei aifaito maitai te anoiraa o te mau mǎhu, ia nehenehe tatou e huti i te aho e ia paruruhia i te mau hihi iino no ǒ mai i te reva teitei. Te vai atoa ra te pape ora e te repo e titauhia no te faatupu i te maa.
6 Ahiri e aita teie mau tuhaa atoa, e vetahi atu â, o te ohipa ma te au maite, aita ïa e ora. Ua tupu noa mai anei te reira ma te opua-ore-hia? Te na ô ra te vea ra Science News e: “E au ra e eita roa ˈtu teie mau tuhaa taa ê e te tia roa e nehenehe e tupu matapo noa mai.” Eita iho â. Te titau ra teie mau tuhaa i te hoê faanahoraa tei opuahia e te hoê Taata hamani aravihi rahi.
7 Ahiri e e haere atu outou i roto i te hoê fare nehenehe a ite atu ai e te pue noa ra te maa, ua tuuhia te matini haaveavea e te faatoetoe mataˈi, ua tamauhia te mau auri faataheraa pape, eaha ïa to outou manaˈo? Ua tupu noa mai anei mai te reira? Aita, e parau iho â ïa outou e na te hoê taata maramarama i opua e i hamani i te reira ma te nahonaho maitai. Oia atoa te fenua, ua opuahia e ua hamanihia oia ma te nahonaho maitai ia fanaˈo te feia e ora i nia ia ˈna i te mea o ta ratou e hinaaro, e ua hau roa ˈtu oia i te fifi e ua pue atu â ta ˈna mau taoˈa i te tahi noa ˈˈe fare.
8. Eaha ˈtu â te tahi tupuraa no nia i te fenua e faaite ra i te aupururaa mai te Atua ia tatou?
8 A feruri atoa na i te mau mea e rave rahi e faaoaoa ra i to tatou oraraa. A hiˈo na i te mau tiare huru rau peni unauna e to ratou noanoa ta te mau taata e oaoa nei. Te vai atoa ra te mau rahiraa maa huru rau monamona roa ia amu. Te vai ra te mau ururaau, te mau mouˈa, te mau pape roto, e te tahi atu mau ohipa poietehia nehenehe roa ia mataitai atu. Eaha ïa no te mau toparaa mahana unauna mau e faaoaoa ra i to tatou nei oraraa? I rotopu i te mau animala, aita anei tatou e oaoa ra i te iteraa ˈtu i te mau hautiutiraa e te haviti o te mau urî fanauˈa, te mau mimi iti, e te tahi atu mau animala nainai? No reira, te pûpû maira te fenua e rave rahi mau ohipa maere oaoa o tei ore hoi i titauhia ia ora tatou. Te faaite maira te reira e ua opuahia te fenua ma te manaˈo aupuru, ma te feruri i te mau taata, ia ore noa ratou ia ora tera râ ia oaoa atoa ratou i te fanaˈoraa i te ora.
9. Na vai i hamani i te fenua, e eaha te tumu oia i hamani ai?
9 No reira, te faaotiraa tano roa ˈˈe, o te fariiraa ïa e te vai ra te hoê Pu o tei horoa mai i teie mau mea atoa, mai ta te papai bibilia i parau no nia i te Atua ra o Iehova e: “Na oe i hamani i te mau raˈi, e te fenua atoa.” Eaha te tumu? Te horoa ra oia i te pahonoraa na roto i te faataaraa i te Atua mai “Tei rave i te fenua e na ˈna i hamani; e na ˈna hoi i haamau: aita râ oia i hamani ia vaiiho-taata-ore-noa-hia, ua hamani râ oia ia taatahia.”—Isaia 37:16; 45:18.
Te taoˈa tahi ora maere mau
10, 11. Eaha te vahi faahiahia o te hoê taoˈa tahi ora?
10 Eaha ˈtura no te mau taoˈa ora? Te vai ra anei te hoê taata o tei hamani ia ratou? Ei hiˈoraa, e rave anaˈe na i te tahi mau huru taa ê o te hoê taoˈa tahi ora. I roto i ta ˈna buka Te tupu-noa-raa te mau mea: Te hoê tatararaa e farerei nei i te fifi (beretane), te faataa ra te taata tuatapapa i te ihiora o te huˈa taoˈa, o Michael Denton, e: “E tae noa ˈtu te mea ora haihai roa ˈˈe i nia i te fenua i teie mahana, oia hoi te taoˈa tahi ora parauhia bateria, e taoˈa fifi rahi roa ïa te reira. Noa ˈtu te nainai o te mau taoˈa bateria huˈa roa ˈˈe, . . . ua riro te bateria tataitahi ei vahi hamaniraa tauihaa i nia i te hoê faito nainai, e vai ra i roto e mau tausani tuhaa o te huˈa taoˈa hamaniraa aravihi . . . hau aˈe i te fifi i te tahi noa ˈˈe matini hamanihia e te taata e eita roa ˈtu e nehenehe e faaauhia e te mau mea aita to ratou e ora.”
11 No nia i te mau huru tupuna i tapaohia i roto i te taoˈa tahi ora tataitahi, te na ô ra oia e: “Ua hau aˈe te aravihi o te ADN no te haaputu i te mau haamaramaramaraa, i to te tahi atu faanahoraa matauhia; no to ˈna aravihi rahi, te taatoaraa o te mau haamaramaramaraa e titauhia no te faataa i te mau tuhaa atoa o te hoê mea ora fifi roa mai te taata ra te huru, eita ïa e naeahia tau tausaniraa mirioni tuhaa o te hoê garame te teiaha. . . . Ia faaauhia i te faito ite e te fifi o te faanahoraa o te hoê huˈa taoˈa ora, mea mâuˈa roa ïa ta tatou mau [tauihaa] aravihi roa ˈˈe. E tia mau â ia tatou ia farii i to tatou haihai.”
12. Eaha ta te hoê aivanaa i parau no nia i te tumu o te taoˈa tahi ora?
12 Te na ô faahou ra o Denton e: “No te rahi o te fifi o te faanahoraa o te taoˈa tahi ora ohie roa ˈˈe i itehia mai, eita e nehenehe e farii e e nehenehe teie huru taoˈa e anoi-noa-hia na roto i te tahi tupuraa taue e te papu ore roa.” Mea titauhia râ te hoê taata opua e te hoê taata hamani.
To tatou roro maere mau
13, 14. No te aha te roro e riro ai ei mea faahiahia roa ˈtu â i te hoê taoˈa tahi ora?
13 Te na ô ra teie aivanaa i muri iho e: “Ia hiˈohia te fifi o to ˈna hamaniraa, eita ïa te hoê taoˈa tahi ora taitahi e nehenehe e faaauhia e te hoê faanahoraa mai te roro. Te vai ra i roto i te roro o te taata tau ahuru tausani mirioni taoˈa tahi uira. E toro atu te taoˈa tahi uira tataitahi i te hoê vahi i rotopu hoê ahuru tausani e hoê hanere tausani tuatiraa mea na reira oia e tapiri atu ai e te tahi atu mau taoˈa tahi uira i roto i te roro. Ia amui-paatoa-hia te mau tuatiraa atoa i roto i te roro o te taata, e naeahia ïa . . . hoê tausani mirioni mirioni.”
14 Te na ô faahou ra o Denton e: “Ahiri e e rave-noa-hia te hoê tuhaa i nia i te hanere o te mau tuatiraa i roto i te roro o tei faanaho-taa-ê-hia, e naeahia ïa te hoê faanahoraa o te amui mai i te mau rahiraa tuatiraa o tei hau atu i te taatoaraa o te mau ravea haapurororaa parau e vai ra i nia i te Fenua.” Te ui ra oia i muri iho e: “E nehenehe anei teie mau huru faanahoraa e tupu noa mai na roto i te tahi tereraa matapo?” E tia mau ia pahono e eita. Te vai ra te hoê Tumu o tei opua e o tei hamani i te roro ma te aupuru.
15. Eaha ta vetahi pae i parau no nia i te roro?
15 Ia faaauhia ratou i te roro o te taata, mea mâuˈa roa ïa te mau matini roro uira aravihi roa ˈˈe. Ua parau te aivanaa papai buka ra o Morton Hunt e: “Te haaputu nei to tatou feruriraa i te mau haamaramaramaraa e rave rahi miria taime hau aˈe i te hoê matini roro uira maimi rahi no teie nei tau.” Teie ïa ta te hoê taote tâpû roro, o Robert J. White, e faaoti ra: “Aita ˈtu ta ˈu e maitiraa maoti râ te fariiraa e te vai ra te hoê Maramarama hau aˈe i te teitei, na ˈna i faanaho e i faatupu i te taairaa maere mau i rotopu i te roro e te feruriraa—te hoê mea aore roa e naeahia i te taata ia ite. . . . Te tiaturi nei au e te vai ra te hoê tumu maramarama no teie mau mea atoa nei, e na te tahi Taata i hamani i te reira.” O te hoê atoa ïa Taata o tei aupuru ia tatou.
Te toto—Te hoê faanahoraa otahi roa
16-18. (a) Eaha te mau vahi taa ê o te faanahoraa o te toto? (b) Eaha ïa ta tatou parau faaotiraa?
16 A hiˈo atoa na i te faanahoraa otahi roa o te toto o te faauta ra i te mau taoˈa faaitoito e te mataˈi ora e o te paruru ra i te tino i mua i te maˈi. No nia i te mau toropuru uteute, te hoê tuhaa faufaa roa o teie faanahoraa, te faataa ra te Buka faahororaa no nia i te tino o te taata (beretane) e: “I roto i te hoê noa topata toto, te vai ra hau atu i te 250 mirioni toropuru taa ê . . . Te vai ra paha i roto i te tino tau 25 mirioni mirioni toropuru, e navai hoi te reira, ahiri e e haapurarahia, no te tapoˈi e maha tahua tairiraa popo. . . . Te monohia nei ratou i te vitivitiraa e 3 mirioni toropuru apî i te tetoni hoê.”
17 No nia i te mau toropuru uouo, te tahi atu tuhaa o te faanahoraa otahi o te toto, te na ô râ teie buka e: “Hoê anaˈe huru toropuru uteute, area ra, e rave rahi mau pǔpǔ toropuru uouo taa ê, e e nehenehe te pǔpǔ toropuru tataitahi e aro no te paruru i te tino na roto i te hoê ravea taa ê. Ei hiˈoraa, e haamou te hoê pǔpǔ i te mau taoˈa tahi pohepohe. E hamani te tahi atu pǔpǔ i te mau taoˈa aro tirotiro, e tamâ te tahi i te mau taoˈa ěê, aore ra e momi vetahi i te mau manumanu ino.”
18 E ohipa maere mau â e te faanahonaho-maitai-hia teie! Oia mau, te vai ra iho â te hoê taata opua maramarama roa e te haapao maitai o tei faatupu i teie ohipa nahonaho e te paruru—oia hoi te Atua.
Vetahi atu mau ohipa faahiahia
19. Eaha te huru o te mata ia faaauhia oia e te mau tauihaa hamanihia e te taata?
19 Te vai râ vetahi atu mau ohipa faahiahia i roto i te tino taata nei. O te mata ïa te tahi, e no te faahiahia o to ˈna hamaniraa, aita te hoê aˈe pata hohoˈa e nehenehe e tapirihia ia ˈna. Ua faaite te taata tuatapapa reva ra o Robert Jastrow e: “Ua hamani-taa-ê-hia te mata; aita te hoê taata hamani taoˈa hiˈo reva e nehenehe e hamani i te hoê taoˈa hau aˈe i te faahiahia.” E te faataa ra te hoê buka (Popular Photography) e: “Mea rahi aˈe te mau taoˈa haihai e itehia e te mata ia faaauhia i ta te hoê ripene pata hohoˈa e ite ra. Te ite nei te mata i nia e toru faito, i nia i te hoê aanoraa rahi mau â, ma te ore e faatioi i te hohoˈa, ma te hautiuti tamau . . . Aita e faaauraa i rotopu i te pata hohoˈa e te mata taata nei. E au te mata i te tahi matini roro uira aravihi roa te vai ra to ˈna maramarama, te mau ravea no te tatara i te mau haamaramaramaraa, te vitiviti, e te mau huru raveraa tei hau aˈe i te tahi tauihaa hamanihia e te taata, te hoê matini roro uira aore ra te hoê pata hohoˈa.”
20. Eaha vetahi atu mau tuhaa maere o te tino taata nei?
20 A feruri atoa na e mea nafea te mau melo fifi atoa o te tino ia ati maite ma te ore tatou e feruri i te reira. Ei hiˈoraa, te tuu nei tatou e rave rau mau huru maa e te inu atoa i roto i to tatou vairaa maa, e na te tino e faaohipa i te reira no te hamani i te itoito. A tamata na i te tuu atu i te mau huru taoˈa atoa i roto i te vahi titoraa mori o te hoê pereoo uira e a hiˈo na e e tere anei oia! Te vai atoa ra te semeio o te fanauraa, te hamaniraahia te hoê aiû iti nehenehe roa—te hohoˈa o to ˈna nau metua—i roto noa e iva avaˈe. Eaha ïa no te aravihi o te hoê tamarii tau matahiti noa te paari o te haapii i te paraparau i te hoê reo fifi roa?
21. No nia i te mau tuhaa faahiahia o te tino, eaha ta te mau taata maramarama e parau ra?
21 Oia mau, ia ite tatou i te mau rahiraa mea maere e te fifi tei poietehia i roto i te tino taata nei, e î roa tatou i te faatura. Eita e naeahia i te hoê taata ia hamani i teie mau huru taoˈa. E nehenehe anei e parau e ua tupu noa mai na roto i te tahi tupuraa matapo? Eita roa. Maoti râ, ia hiˈopoahia te mau tuhaa faahiahia atoa o te tino o te taata, e riro te mau taata maramarama i te parau, mai te papai salamo e: “E haamaitai au ia oe [te Atua], ua taa ê hoi to ˈu hamaniraahia: e mea maerehia ta oe mau ohipa.”—Salamo 139:14.
Te Taata hamani hau aˈe i te teitei
22, 23. (a) No te aha tatou e farii ai e te vai ra te hoê Poiete? (b) Eaha ta te Bibilia e parau ra ma te tano roa no nia i te Atua?
22 Te na ô ra te Bibilia e: “E faatia hoi to te mau fare atoa nei, o te faatia râ i te mau mea atoa ra, o te Atua ïa.” (Hebera 3:4) Mai te peu e te vai ra te hoê taata hamani i te hoê fare, noa ˈtu e mea ohie roa, te vai atoa ra ïa te hoê taata hamani i te ao o te reva fifi roa ˈtu â, e tae noa ˈtu te mau taoˈa ora huru rau i nia i te fenua nei. E mai te peu e e farii tatou e te vai ra te mau taata o tei hamani i te mau tauihaa mai te mau manureva, te mau afata teata, e te mau matini roro uira, eita anei ïa e tia ia tatou ia farii e te vai ra te hoê Taata o tei horoa mai i te roro na te taata ia nehenehe oia e hamani i teie mau taoˈa atoa?
23 Te farii nei te Bibilia i te reira, e te parau nei oia e na “te Atua ra, o Iehova, o tei hamani i te mau raˈi, e na ˈna hoi i haamanina; o tei hohora hoi i te fenua e tei tupu i nia ihora; o tei horoa mai i te aho no te mau taata i nia ihora.” (Isaia 42:5) Te faaite ra te Bibilia ma te tano roa e: “E au te hanahana ia oe, e [Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.”—Apokalupo 4:11.
24. Nafea tatou e ite ai e te vai ra te hoê Atua?
24 Oia mau, e nehenehe tatou e ite e te vai ra te hoê Atua na roto i te mau taoˈa o ta ˈna i hamani. ‘Te ite-papu-hia ra te mau huru itea-ore-hia o te Atua mai te hamaniraa mai â o teie nei ao, no te mea ua iteahia na roto i te mau mea ta te Atua i hamani.’—Roma 1:20.
25, 26. No te aha e ere te faaohipa-hape-raa i te hoê taoˈa i te hoê haapapuraa e aita to ˈna taata hamani?
25 E ere no te mea e te faaohipa-hape-hia ra te hoê taoˈa, aita ïa to ˈna taata hamani. E nehenehe te hoê manureva e faaohipahia no te mau opuaraa maitatai, ei manureva faauta taata. E nehenehe atoa râ e faaohipahia no te haapohe, mai te hoê manureva topita. E ere no te mea e e faaohipahia oia no te taparahi i te taata, aita ïa to ˈna e taata hamani.
26 Oia atoa, e ere no te mea e ua riro pinepine mai te taata ei feia iino, te auraa ra aita e Taata o tei hamani ia ratou e aita atoa e Atua. Tera râ, te faaite ra te Bibilia ma te tano roa e: “O te huru ïa o to outou manaˈo tia ore! e faafaitohia anei te potera i te araea? E parau anei hoi te ohipa i te taata i rave e, E ere oia i hamani ia ˈu? e parau anei tei hamanihia i tei hamani ia ˈna e, Aita o ˈna e ite?”—Isaia 29:16.
27. No te aha tatou e tiaturi ai e e pahono mai te Atua i ta tatou mau uiraa no nia i te mauiui?
27 Ua faaite te Poiete i to ˈna paari na roto i te hamaniraa maere e te fifi o te mau taoˈa o ta ˈna i rave. Ua faaite oia e te haapao mau ra oia ia tatou na roto i te hamaniraa i te fenua mai tei titauhia ia nehenehe tatou e ora i nia iho, na roto i te hamaniraa i to tatou tino e to tatou feruriraa ma te aravihi rahi, e na roto i te hamaniraa i te mau mea maitatai atoa ia oaoa tatou. Oia mau, e faaite atoa ïa oia i te paari e te haapao maitai na roto i te faataaraa mai i te pahonoraa i te mau uiraa ra: No te aha te Atua i faatia noa ˈi i te mauiui? Eaha ta ˈna e rave no te arai i te reira?
[Hohoˈa i te api 5]
Ua riro te fenua, maoti te paruru o to ˈna reva mataˈi, ei vahi nohoraa otahi roa ta te hoê Atua i faaineine ma te aupuru ia tatou
[Hohoˈa i te api 6]
Ua hamanihia te fenua ma te aupuru ia nehenehe tatou e fanaˈo i te oraraa ma te oaoa
[Hohoˈa i te api 7]
‘Ua hau aˈe te mau tuatiraa e vai ra i roto i te roro ia faaauhia i te taatoaraa o te mau faanahoraa haapurororaa i nia i te Fenua nei.’—Te hoê aivanaa tuatapapa ihiora
[Hohoˈa i te api 8]
“Ua hamani-taa-ê-hia te mata; aita te hoê taata hamani taoˈa hiˈo reva e nehenehe e hamani i te hoê taoˈa hau aˈe i te faahiahia.”—Te hoê taata tuatapapa i te reva