Hoˈiraa mai o te Mesia

Auraa: Hou a faarue ai i te fenua, ua tǎpǔ o Iesu Mesia e e hoˈi mai oia. E tahoêhia te mau tupuraa faufaa i taaihia e te Basileia o te Atua i taua parau tǎpǔ ra. E tia ia tapao e e ere hoê â auraa to te mau parau haereraa mai e vairaa mai. Oia mau, e tupu te haereraa mai te hoê taata (to ˈna taeraa mai anei aore ra to ˈna hoˈiraa mai) i te hoê taime i faataahia, e i muri iho e nehenehe to ˈna vairaa mai e maoro atu â e rave rahi matahiti. I roto i te Bibilia, te faataa ra te parau Heleni erʹkho·mai (oia hoi “haere mai”), tei faaauhia ia Iesu, e te aratai ra oia i to ˈna ara-maite-raa i nia i te hoê hopoia faufaa, i te hoê taime taa ê maitai i te roaraa o to ˈna vairaa mai, ia ohipa oia ei taata faatupu i te mau haavaraa a te Atua i te tamaˈi o te mahana rahi o te Atua Mana hope.

E tupu anei te mau ohipa i taaihia e te vairaa mai o te Mesia i roto i te hoê tau poto roa aore ra e rave rahi matahiti?

Mat. 24:37-39: “Mai tei te anotau ra ia Noa ra, oia atoa te haerea mai [“haereraa mai,” Jé, Sy; “vairaa mai,” MN; Heleni, pa·rou·siʹa] o te Tamaiti a te taata nei. Mai tei te anotau i mua iho i te diluvi ra, te amu ra ratou i te maa e te inu ra, te faaipoipo ra e te horoa ra ia faaipoipohia, e tae roa aˈera i te mahana i tomo ai Noa i roto i te pahi; aore roa i ite, e roohia noa ihora ratou e te diluvi, pau roa ˈtura ratou; oia atoa te haerea mai o te Tamaiti a te taata nei.” (E rave rahi matahiti te maororaa o te mau ohipa i tupu i te ‘anotau o Noa’ e i faahitihia i ǒ nei. Te faaau ra o Iesu i to ˈna vairaa mai e tei tupu i reira ra.)

I roto i te Mataio 24:37, te itehia ra te parau Heleni ra pa·rou·siʹa. To ˈna auraa mau, oia hoi “tei pihai iho i te.” Te horoa ra te Dictionnaire grec-français a Bailly (Paris, 1963) i te auraa matamua o te parau pa·rou·siʹa: “Vairaa mai.” Mea papu te auraa o teie parau i roto i te Philipi 2:12, i reira Paulo e faataa ê ai i to ˈna vairaa mai (pa·rou·siʹa) e to ˈna mairiraa (a·pou·siʹa). I roto râ i te Mataio 24:30, o te parau ra e “te Tamaiti a te taata i te haerea mai na nia i te ata o te raˈi ra, ma te mana e te hanahana rahi” no te faatupu i te mau haavaraa a te Atua i te tamaˈi o Aramagedo, ua faaohipahia te parau Heleni ra er·khoʹme·non. Te tatara nei vetahi feia huri i teie nau parau Heleni na roto i te mau parau “haerea mai” e ‘haere mai,’ area te faataa ê maitai ra te feia e mea haapao maitai aˈe ratou i taua nau parau ra.

E ite-mata-hia anei te hoˈiraa mai o te Mesia?

Ioa. 14:19: “E ia roovau iti aˈe, e ore to te ao e hiˈo faahou mai ia ˈu; e hiˈo mai râ outou [te mau aposetolo haapao maitai a Iesu] ia ˈu; no te mea e ora vau, e ora atoa hoi outou.” (Ua tǎpǔ o Iesu i ta ˈna mau aposetolo e e haere faahou mai oia e e afai oia ia ratou i nia i te raˈi i pihai iho ia ˈna. E nehenehe ratou e ite ia ˈna no te mea e mau varua ratou mai ia ˈna. Eita râ te ao e ite faahou ia ˈna. Hiˈo Timoteo 1, 6:16.)

Ohi. 13:34: “I faatia mai oia [te Atua] ia ˈna [Iesu] mai te pohe maira, eiaha oia e hoˈi faahou i te [“tahuti,” MN].” (Mea tahuti noa te tino taata nei. No reira i faaauhia ˈi te parau “tahuti” i te parau “tino taata” i roto i te Korinetia 1, 15:42, 44. Eita Iesu e fanaˈo faahou i taua huru tino ra.)

Ioa. 6:51: “O vau te pane ora o tei pou mai mai te raˈi: o te amu i teie nei pane, e tia ïa i te oraraa; o ta ˈu pane e horoa ˈtu o to ˈu ïa tino, o ta ˈu ïa e horoa ei ora no to te ao.” (I te mea e ua horoa oia i to ˈna tino iˈo, eita Iesu e rave faahou mai i te reira. Eita ïa oia e faaere i te huitaata i te mau haamaitairaa o te tusia o to ˈna ora taata tia roa.)

Hiˈo atoa i te mau api 29, 30, i te tumu parau “Afai-ê-raahia te Ekalesia.”

Eaha te auraa e mai to ˈna revaraa ˈtu i nia i te raˈi, “mai te reira atoa” ia hoˈi mai Iesu?

Ohi. 1:9-11: “E te hiˈo noa maira ratou [te mau aposetolo a Iesu] ia ˈna, ravehia ˈtura oia i nia, e vehîa maira oia e te ata, moe atura oia i to ratou mata. E tei to ratou tiatonu-maite-raa i nia i te raˈi i te peeraa ˈtu oia i nia ra, inaha, te tia noa maira e toopiti pue taata i pihai iho ia ratou ma te ahu teatea; o tei parau mai ïa ia ratou e, E te mau taata o Galilea nei, eaha outou i tia noa ˈi e i tiatonu mârô ai i nia i te raˈi ra? o Iesu nei â, tei ravehia aˈenei i nia i te raˈi, e hoˈi mai ïa mai te reira atoa ra, mai ta outou i ite atu ia ˈna i te revaraa ˈtu i nia i te raˈi ra.” (A tapao na e te parauhia ra “mai te reira atoa,” eiaha râ i roto i te hoê â tino. Mea nafea Iesu i te revaraa i nia i te raˈi? Ia au i te irava 9, ua moe oia i te mata o ta ˈna mau pǐpǐ, o ratou anaˈe tei ite i to ˈna revaraa. Aita te ao nei i ite i te ohipa i tupu. Hoê â atoa no te hoˈiraa mai o te Mesia.)

Eaha te auraa e “te haere mai na oia i roto i te ata” e “e ite te mau mata atoa ia ˈna”?

Apo. 1:7: “Inaha, te haere mai na oia i roto i te ata; e ite te mau mata atoa ia ˈna, e te feia atoa i patia ia ˈna ra: e e auê te mau opu atoa o te ao nei ia ˈna.” (Hiˈo atoa Mataio 24:30; Mareko 13:26; Luka 21:27.)

Eaha ta te “ata” e faahohoˈa ra? Te itea-ore-raa. Ia tere te hoê manureva na roto aore ra na nia ê i te mau ata, eita te feia i raro nei e ite ia ˈna, noa ˈtu e te faaroo ra ratou i te haruru matini. Ua parau Iehova ia Mose e: “E haere atu vau ia oe na roto i te hoê ata meumeu ra.” Aita hoi Mose i ite i te Atua, ua faaite noa râ te ata e tei reira iho â o Iehova ma te itea-ore-hia. (Exo. 19:9; hiˈo atoa Levitiko 16:2; Numera 11:25.) Ahiri e e fa mai te Mesia ma te ite-mata-roa-hia i nia i te raˈi, papu maitai e eita “te mau mata atoa” e ite ia ˈna. Ei hiˈoraa, ahiri e e fa mai oia i nia mai ia Auteralia, eita ïa oia e itehia i Europa, i Afirika e i Marite ma.

Na roto i teihea auraa ‘e ite ai te mau mata atoa ia ˈna’? Oia hoi ia tupu te mau ohipa i nia i te fenua e nehenehe te mau taata e taa i to ˈna vairaa mai itea-ore-hia. I roto i te Ioane 9:41, te faahiti-atoa-hia ra te ite taipe e teie mau parau: “Ua parau atura Iesu [i te mau Pharisea], Ahiri outou e matapo ra, aita a outou hara, te parau mai na râ outou e, Ua ite matou, te vai na ïa ta outou hara.” (Hiˈo Roma 1:20.) I muri aˈe i te hoˈiraa mai o te Mesia, te faaohipa ra vetahi feia i te faaroo; te farii ra ratou i te tapao o to ˈna vairaa mai. Te patoi ra vetahi pae i te mau tupuraa, ia faatupu râ te Mesia i te haavaraa a te Atua i nia i te feia iino, e taa ia ratou ia au i te ohiparaa o to ˈna puai e e ere te haamouraa no ǒ mai i te taata ra, no nia mai râ i te raˈi. E taa ia ratou ta ratou e faaruru, no te mea ua faaara-aˈena-hia ratou. No te ohipa e tae mai i nia ia ratou, e “auê” ratou.

O vai ‘te feia i patia ia ˈna’? I te auraa mau, ua patiahia Iesu na te mau faehau Roma i to ˈna haapoheraahia. Ua pohe râ ratou e mea maoro i teie nei. No reira, e tano teie parau no te feia e faaino atoa ra aore ra ‘e patia ra’ i te mau Kerisetiano mau i “te mau mahana hopea.”—Mat. 25:40, 45.

E nehenehe mau anei e parau e ua ‘haere mai’ te hoê taata e te ‘vai mai’ ra oia noa ˈtu e eita o ˈna e ite-mata-hia?

Noa ˈtu e ‘aita oia i haere tino roa mai’ i roto i te amuiraa no Korinetia, ua faataa te aposetolo Paulo e ‘tei reira to ˈna varua.’—Kor. 1, 5:3, MN.

Ua faaite Iehova e e “haere” oia “i raro” no te haafifi i te reo o te feia patu i te pare o Babela. (Gen. 11:7) Ua tǎpǔ atoa oia e e “haere mai” oia “i raro” no te faaora ia Iseraela i te faatîtîraa i Aiphiti. E ua haapapu te Atua ia Mose e ‘e haere o ˈna iho’ e e aratai oia ia Iseraela i te Fenua Tǎpǔhia. (Exo. 3:8; 33:14, MN) Teie râ, aita hoê noa ˈˈe taata i ite i te Atua.—Exo. 33:20; Ioa. 1:18.

Te faatuea ra te Bibilia i te vairaa mai o te Mesia e teihea mau ohipa?

Dan. 7:13, 14: “E inaha, te hoê mai te Tamaiti a te taata ra [Iesu Mesia] i te haerea mai na roto i te mau ata o te raˈi ra; e ua haafatata ˈtura oia i To te mau mahana tahito ra [te Atua ra o Iehova], e tuuhia ihora i pihai iho ia ˈna. E ua horoahia maira te mana, e te hinuhinu, e te basileia no ˈna, ia auraro mai te taata atoa, e te mau fenua atoa, e te reo atoa ia ˈna; to ˈna mana, e mana mure ore ïa, e ore ïa e mou, e to ˈna basileia, e ore ïa e pau.”

Tes. 1, 4:15, 16; MN: “Teie ta matou e parau atu ia outou, i ta [Iehova] ra parau, o tatou o te feia e ora o te toe i te ao a roohia mai ai e te Fatu ra, e ore e na mua i te feia e taoto nei [i roto i te pohe]. O te Fatu iho hoi te pou mai mai te raˈi mai, ma te umere, ma te reo o te melahi rahi, e ma te pu a te Atua; e te feia i pohe i roto i te Mesia ra, o te tia mai na ïa i nia.” (E faatiahia mai te feia o te faatere e te Mesia no te apiti atu ia ˈna i nia i te raˈi, na mua roa te feia i pohe na mua ˈˈe i to ˈna hoˈiraa mai, e te feia o te pohe i muri iho.)

Mat. 25:31-33: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.”

Tes. 2, 1:7-9: “Area ia outou i tei hamani-ino-hia ra, o te ora ïa ta ˈna e tuu mai no tatou atoa nei, ia fa mai te Fatu ra o Iesu mai te raˈi mai, ma tana mau melahi mana atoa ra, ma te auahi ura ra, i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra: o te utuahia mai ïa i te pohe mure ore, mai te aro atu o te Fatu ra, mai te anaana o to ˈna ra mana.”

Luka 23:42, 43, MN: “Ua parau atura oia [te taata parau ino hiˈo aroha tei rîhia i nia i te hoê pou i pihai iho ia Iesu] e, E Iesu, e haamanaˈo mai oe ia ˈu ia tae oe i to oe ra basileia. E ua parau atura oia ia ˈna e, Oia mau, te parau atu nei au ia oe i teie nei mahana, Ei te Paradaiso oe e o vau atoa nei.” (I raro aˈe i te faatereraa a Iesu, e riro te fenua atoa ei paradaiso; e faatia-faahou-hia te feia pohe ta te Atua e haamanaˈo noa ra e e ora ratou e a muri noa ˈtu i nia i te fenua ma te tia roa.)

Hiˈo atoa i te mau api 211-216, i te tumu parau “Mahana hopea.”