Ta te mau aivanaa i ore i ite

Ua ite anei te mau aivanaa mea nafea te ao nui e te ora i te faraa mai? Aita. Te parau nei vetahi e nehenehe te mau aivanaa i te pae o te ao nui e faataa nohea mai tatou. Tera râ, teie ta te hoê orometua haapii i te pae o te ao nui i te fare haapiiraa teitei no Dartmouth o Marcelo Gleiser te iˈoa, e taata teie tei ore i papu e te vai mau ra anei te Atua: “Aita roa ˈtu matou e nehenehe e faataa mea nafea te ao nui i te faraa mai.”

Te parau atoa nei te vea Science News no nia i te tumu o te ora: “Eita e nehenehe e faataa mea nafea te ora i nia i te fenua i te faraa mai. E nehenehe te mau ofai i reira te mau huˈahuˈa tiare e animara i te mauraa e tauturu mai ia ite eaha tei tupu i te omuaraa roa. Tera râ, aita faahou te rahiraa o tera mau ofai.” Mea nafea ïa te ao nui e te ora i te faraa mai? Ia au i te mau faahitiraa i nia ˈtu, aita te ihi i pahono atura i teie uiraa.

E mai te peu e ua hamanihia te ora i nia i te fenua, na vai ïa i poiete i te reira? Ua ui atoa paha oe: “Mai te peu e te vai ra hoê Atua poiete î i te here e te paari, no te aha ïa o ˈna e vaiiho ai i te taata ia mauiui? No te aha o ˈna e vaiiho ai tera rahiraa haapaoraa taa ê? No te aha o ˈna e vaiiho ai i to ˈna feia haamori ia rave i te mau ohipa iino?”

Eita te ihi e nehenehe e pahono i teie mau uiraa. E ere râ te auraa e aita e pahonoraa. Mea rahi te taata tei ite i te mau pahonoraa papu i roto i te Bibilia.

Ia hinaaro oe e ite no te aha te tahi mau aivanaa tei haapii i te Bibilia e tiaturi ai i te hoê Atua poiete, a haere ïa i nia i te jw.org. A imi i te mau video o te anairaa Manaˈo no nia i te tumu o te ora.