HAAPIIRAA 06
Mea nafea te ora i te haamataraa?
“Tei [te Atua] ra te ora.” (Salamo 36:9) Te tiaturi ra anei oe i te reira? Te manaˈo ra vetahi e aita e Atua i poiete i te mau mea ora atoa. Ahani tera iho â, e mea tupu noa mai ïa te mau mea atoa mai tera noa. Mai te peu râ ua poietehia tatou, e fa ïa to te oraraa.a E hiˈo anaˈe i te aamu o te Bibilia mea nafea te ora i te haamataraa e no te aha e nehenehe ai e tiaturi i te reira.
1. Nohea mai te fenua e te mau fetia?
Te parau ra te Bibilia: “I te haamataraa, poiete ihora te Atua i te raˈi e te fenua.” (Genese 1:1) Te farii ra te rahiraa o te mau aivanaa e e haamataraa to te ao nui. Mea nafea to te Atua poieteraa i te reira? Ua faaohipa oia i to ˈna “puai ohipa,” oia hoi to ˈna varua moˈa, no te poiete i te mau mea atoa i roto i te ao nui, mai te mau haapueraa fetia, te mau fetia e te mau paraneta.—Genese 1:2.
2. No te aha te Atua i poiete ai i te fenua?
Aita Iehova “i hamani i [te fenua] mai tera noa, ua hamani râ ia parahihia e te taata.” (Isaia 45:18) Ua poiete oia i to tatou fenua ia riro ei nohoraa au mau e ora ˈi tatou i nia iho e a muri noa ˈtu. (A taio i te Isaia 40:28; 42:5.) Te haapapu ra te mau aivanaa e mea taa ê te fenua. Inaha, teie anaˈe te fenua ta te taata e nehenehe e ora i nia iho.
3. No te aha te taata i taa ê ai i te animara?
I muri i to ˈna poieteraa i te fenua, hamani ihora Iehova i te mau mea ora atoa i nia iho. Na mua roa, ua hamani oia i te raau tupu e te animara. I reira, “poiete atura te Atua i te taata i to ˈna huru.” (A taio i te Genese 1:27.) No te aha te taata i taa ê ai? No te mea ua poietehia ratou i to te Atua huru, e nehenehe ïa ratou e faaite i to ˈna mau huru maitatai, mai te here e te parau-tia. Ua poiete atoa oia ia tatou ia nehenehe tatou e haapii i te reo, ia faahiahia i mua i te mau mea nehenehe aore ra ia faaroo tatou i te mau pehe navenave. E taa ê atu i te animara, e nehenehe tatou e haamori i to tatou Atua poiete.
A FAAHOHONU ATU Â
A hiˈopoa i te haapapuraa e mea ferurihia te hamaniraa o te mau mea ora atoa e no te aha e tiaturi ai i te aamu o te Bibilia no nia i te poieteraa. A hiˈo eaha ta te mau huru maitatai o te taata e haapii mai ra no nia i te Atua.
4. E mea ferurihia te hamaniraa o te mau mea ora atoa
E haapopouhia na te taata o tei hamani i te hoê mea ta ˈna i ite i roto i te natura. O vai râ te tia ia faahanahanahia no te poieteraa i te natura? A pata i te VIDEO, e a aparau i te uiraa i muri nei.
Eaha ta te taata i hamani ta ratou i ite i roto i te natura?
Ua ferurihia te hamaniraa e te paturaa i te mau fare atoa na te taata. Na vai râ i feruri i te hamaniraa e i te poieteraa i te mau mea e vai ra i roto i te natura? A taio i te Hebera 3:4, e a aparau i teie mau uiraa:
Eaha te mea ta oe e faahiahia ra i roto i te natura?
E nehenehe anei e tiaturi e mea ferurihia te hamaniraa o te ao nui e te mau mea ora atoa i roto? No te aha?
Ua ite anei oe?
E nehenehe oe e taio i te mau tumu parau e e mataitai i te video no nia i te poieteraa i nia jw.org i roto i te tuhaa “Mea poietehia anei?” e “Manaˈo no nia i te tumu o te ora.”
“E mea hamanihia hoi te fare e te taata, o tei hamani râ i te mau mea atoa, o te Atua ïa”
5. E nehenehe e tiaturi i te aamu o te Bibilia no nia i te poieteraa
I roto i te Genese pene 1, te faataa ra te Bibilia nohea mai te fenua e te mau mea ora i nia iho. E nehenehe anei oe e tiaturi i teie parau, aore ra e aai noa teie? A pata i te VIDEO, e a aparau i te mau uiraa i muri nei.
Te haapii ra anei te Bibilia e ua poietehia te fenua e te mau mea ora i nia iho i roto e ono mahana e 24 hora?
I to oe manaˈo, e nehenehe anei e tiaturi i te aamu o te Bibilia no nia i te poieteraa? No te aha oia, aore ra no te aha aita?
A taio i te Genese 1:1, e a aparau i teie uiraa:
Te parau ra te mau aivanaa e haamataraa to te ao nui. E nafea te reira e tuati ai e ta oe i taio iho nei i roto i te Bibilia?
Te uiui ra vetahi e aita anei te Atua i poiete i te hoê noa mea ora tei taui te huru, a riro atu ai ei mea ora e rave rau. A taio i te Genese 1:21, 25, 27, e a aparau i teie mau uiraa:
Te haapii ra anei te Bibilia e ua poiete te Atua hoê noa mea ora tei riro ei iˈa, ei animara e ei taata? Aore ra ua poiete oia i te mau mea ora atoa ia au i to ratou “huru”?
6. Mea taa ê te taata i te hamaniraahia e te Atua
E ere tatou mai te mau animara ta Iehova i poiete. A taio i te Genese 1:26, e a aparau i teie uiraa:
Inaha e mea hamanihia tatou i to te Atua ra huru, eaha te nehenehe e parau no nia i te huru o te Atua ia faaite tatou i te here e te aumauiui?
TE MANAˈO O VETAHI: “E aai noa ta te Bibilia e faatia ra no nia i te poieteraa.”
Eaha to oe manaˈo? No te aha?
HAAPOTORAA
Ua poiete Iehova i te ao nui e te mau mea ora atoa.
Haamanaˈoraa
Nohea mai te ao nui ia au i ta te Bibilia e haapii ra?
Ua poiete anei te Atua i te hoê noa mea ora tei riro ei mea ora e rave rau, aore ra ua poiete oia i te mau mea ora atoa?
No te aha e mea taa ê ai te taata?
HIˈOPOA
Teie te tahi mau hiˈoraa i roto i te natura o te haapapu ra e mea poietehia te reira e te Atua.
A hiˈo e nafea te hoê metua tane e faataa ˈi i te aamu o te Bibilia no nia i te poieteraa i ta ˈna tamaiti.
A hiˈo te tuea ra anei te haapiiraa e tupu noa mai te mau mea ora atoa e ta te Bibilia e haapii ra.
A hiˈo e te faaite ra anei te mau ivi tahito e ta te mau aivanaa i rave, e mea tupu noa mai te ora aore ra mea poietehia.
a E aparau tatou no nia i te opuaraa a te Atua no te huitaata i roto i te haapiiraa 25.