E nafea ia ite?
“Mea papu, ua fa noa mai te ao nui mai tera noa.”—Stephen Hawking e Leonard Mlodinow, aivanaa, 2010.
“I te haamataraa, poiete ihora te Atua i te raˈi e te fenua.”—Genese 1:1.
Ua fa noa mai anei te ao nui e te ora aore ra mea poietehia anei e te Atua? Mea taa ê roa te pahonoraa a na aivanaa i te omuaraa o teie tumu parau e te pahonoraa a te irava matamua o te Bibilia. Te turu papu nei vetahi i na manaˈo tataitahi, tera râ mea rahi â tei ore i papu. Ua riro roa ei aimârôraa i roto i te mau buka e i roto i te afata teata.
Ua haapii atu paha ta oe mau orometua e aita e Atua poiete, ua fa noa mai te ao nui e te ora mai tera noa. Ua horoa anei râ ratou i te mau haapapuraa e aita iho â e Atua poiete? Ua faaroo atoa paha oe i te mau tia haapaoraa ia poro e te vai ra te hoê Atua poiete. Ua horoa anei râ ratou i te mau haapapuraa? Aore ra ua parau mai ratou ia tiaturi noa i ta ratou mau parau?
Ua feruri aˈena paha oe i te reira a manaˈo atu ai aita e taata i papu e te vai mau ra anei te hoê Atua poiete. Teie nei râ: Mea faufaa mau anei ia ite i te pahonoraa?
Na mua roa, e faaite mai teie vea i te tahi mau haapapuraa tei turai i te taata e rave rahi ia tiaturi e te vai ra te hoê Atua poiete. E e hiˈo mai tatou no te aha mea faufaa ia ite nohea mai tatou.