Te tapitapi nei to tatou Poiete Rahi ia tatou!
1 Ma te haaferuri i te Iseraela faaroo ore, ua ani Iehova e: “Aitâ oe i ite, aitâ oe i faaroo, e e parahiraa mure ore to te Atua, to Iehova, o tei hamani i te fenua e tae noa ˈtu i te hopea ra.” (Isa. 40:28) Ua ite tatou i to tatou Poiete Rahi, e to ˈna anaanatae î i te here no tatou. Teie râ, e mau mirioni taata te feaa nei no nia i to ˈna vai-mau-raa aore ra aita to ratou manaˈo e tuea ra i nia i ta te Bibilia e haapii ra. Nafea ia tauturu ia ratou?
2 Ua faataahia teie buka apî ra Y a-t-il un Créateur qui se soucie de vous? no ratou. Te titau manihini nei oia i te mau taata manaˈo maitai ia feruri i nia i te mau tupuraa. E huti to ˈna mau manaˈo anaanatae e ta ˈna mau parau tano i te ara-maite-raa o te feia taio.
3 E haamatau anaˈe e te buka ra Créateur: E haamanaˈo anaˈe i te mau manaˈo rarahi e vai ra i roto. Te faataa nei te mau pene 2 e tae atu i te 5 i te faraa mai o te ao taatoa, o te ora e o te taata e nohea mai ratou. Te tuatapapa nei te mau pene 6 e tae atu i te 9 i te Bibilia e to ˈna Fatu e te haamatara nei te reira i te tano-raa-mau o te parau o te poieteraa i papaihia i roto i te Genese. Te horoa nei te pene 10 i te pahonoraa e au no nia i te hoê o te mau uiraa peapea roa ˈˈe ta te taata e uiui nei: “Mai te peu e te vai ra te hoê Poiete o te tapitapi nei ia tatou, no te aha ïa e rahi roa ˈi te mauiui?”
4 E tamata anaˈe i te haaferuri i te feia o te feaa ra: Te horoa mai nei te mau api 78-79 o te buka ra Créateur i te hoê haaferuriraa ta tatou e nehenehe e faaohipa no te tauturu i te mau taata ia huti ratou i te faaotiraa maitai no nia i te Atua. E ui anaˈe ia ratou i teie uiraa: “E haamataraa anei to te ao taatoa?” E pahono te rahiraa e, e. E ui anaˈe i muri iho e: “Ua faatupuhia anei te haamataraa aore ra aita?” E faˈi e rave rahi e ua faatupuhia te reira, e nehenehe ïa tatou e ui i teie uiraa hopea: “Na te tahi mea mure ore anei aore ra na te hoê taata mure ore i faatupu i teie haamataraa?” E tauturu paha teie huru paraparau no nia i teie uiraa i te rahiraa ia ite e te vai mau ra te hoê Poiete.
5 O te buka ra Créateur mau tei hinaarohia e te taata e rave rahi. E pûpû anaˈe i te mau melo o to tatou utuafare, i te mau hoa rave ohipa, i te mau hoa haapiiraa e i te tahi atu mau taata ta tatou e matau. E afai anaˈe i te tahi i roto i te pororaa, ia nehenehe tatou e vaiiho na te feia e feaa ra no nia i te vai-mau-raa o te Atua. Rahi noa ˈtu tatou i te matau maitai i teie buka, e puai noa ˈtu â ïa to tatou here i te Poiete, o te turai hoi ia tatou ia tamau i te haere ia au i ta ˈna mau faaueraa tumu teitei.—Eph. 5:1; Apo. 4:11.