Ia ere oe i te faufaa

I te Mahana pae 11 no Mati 2011, ua tupu te tahi aueueraa fenua faito 9 i Tapone. Ua pohe hau atu 15 000 taata e ua hau atu i te 200 miria tara Marite te haamâuˈaraa o te mau mea i ino. A faaarahia ˈi e e tupu te miti faaî, ua haere oioi Kei e 32 matahiti i te vahi teitei aˈe. Te na ô ra oia, “i te poipoi aˈe, ua hoˈi au i to ˈu fare no te ohi mai i te tauihaa. Aita hoê noa ˈˈe mea i toe i te miti, na reira atoa to ˈu fare, te niu anaˈe te itehia.”

“Ua titauhia te taime no te taa aita noa vau i ere vetahi tauihaa, i te mau mea atoa râ e haaati ra ia ˈu. Aita faahou e pereoo, e matini roro uira no ta ˈu ohipa, e airaa maa, e parahiraa, e tofa no te farii i te manihini, e piana, e tita, e ukulele, e vivo e ta ˈu mau tauihaa mai te mau peni û huru rau e hinu; pauroa ta ˈu mau tauihaa no te peni e papai.”

A FAARURU AI I TE ATI

A feruri noa i te vai ra ia oe, eiaha râ ta oe i ere. Te na ô ra te Bibilia: “Rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15) Ma te haamanaˈo i ta ˈna i faaruru, te faatia ra Kei: “I te haamataraa, ua papai vau i te mau mea atoa ta ˈu e hinaaro, ua haamanaˈo noa mai râ te reira i ta ˈu i ere. Ua faaoti au i te papai i te mau mea anaˈe ta ˈu e titau ia rave mai e i muri aˈe, e tapao vau i tei noaa mai. Na te reira i tauturu mai ia faaitoito.”

Eiaha e haapao noa ia oe, a tamahanahana ia vetahi ê. Te na ô ra Kei: “Ua fanaˈo vau i te tauturu rahi a te hau e a to ˈu mau hoa. A pinepine ai râ vetahi ê i te horoa mai, ua haamata vau i te haafaufaa ore ia ˈu. Haamanaˈo atura vau i ta te Bibilia e parau ra i roto i te Ohipa 20:35, ‘e mea maitai i te horoa ˈtu i te rave mai.’ I te mea aita faahou ta ˈu e taoˈa, ua faaoti au i te horoa ma te faaitoito i te feia e faaruru ra i tera ati. Ua faufaa-mau-hia vau i te faaiteraa i te aau horoa noa.”

A pure i te Atua ia horoa ˈtu oia i te paari no te faaoromai i te ati. Te na ô ra te Bibilia no te Atua, “e haapaohia e ana te pure a tei ati ra” e ua tiaturi Kei i tera parau tamahanahana. (Salamo 102:17) E nehenehe atoa oe e na reira.

Ua ite anei oe? Te fafau ra te Bibilia e i te hoê mahana eita roa te taata e haapeapea i te ere i ta ˈna faufaa no te tahi ati natura.a—Isaia 65:21-23.