Ia roohia oe i te maˈi

I Raparata, e taata oraora maitai o Mabel. E taote oia o te tauturu i te feia e mea paruparu to ratou tino. I 2007, ua haamata oia i te rohirohi roa ino e ua mauiui noa to ˈna upoo i te mau mahana atoa. Te na ô ra oia, “ua farerei au e rave rahi taote e ua amu e rave rau raau, aita râ te mauiui i ore.” I te pae hopea, ua hiˈopoahia i roto i te tino o Mabel e ua itehia e e maˈi mariri ai taata to ˈna i roto i te roro. Ua parau oia, “ua hitimahuta roa vau! Mea fifi no ˈu ia farii e ua ora noa vau e teie maˈi i roto ia ˈu.”

“I muri aˈe noa i to ˈu tâpûraahia i taa ˈi au e mea atâta to ˈu tupuraa. A ara mai ai, eita faahou ta ˈu e nehenehe e hauti. Ta ˈu anaˈe e tia ia rave, o te hiˈo-noa-raa ïa i nia. Hou vau a tâpûhia ˈi, e taata oraora maitai au e aita atoa i hinaaro na i te tauturu a vetahi ê no te rave i te tahi ohipa. Ua taui taue noa râ i muri aˈe. I te mau mahana a tapeahia ˈi au i raro aˈe i te hiˈopoaraa a te taote, ua hepohepo roa vau e ua faaroo noa i te maniania o te mau matini rapaauraa, te taˈi e faaara i te taote ia haere mai e te auê a te tahi atu mau taata maˈi. Ua haaatihia vau i te mauiui.”

“I teie mahana, ua maitai rii mai au. I te tahi taime, e nehenehe atoa ta ˈu e hahaere na rapae noa ˈtu eita te taata e tauturu mai. Te fifi noa ra râ to ˈu mata e mea paruparu atoa to ˈu mau uaua iˈo.”

A FAARURU AI I TE ATI

A tapea i te manaˈo maitai. I roto i te Maseli 17:22, te na ô ra te Bibilia: “E maitai to te aau rearea mai te raau maˈi atoa ra; e mǎrô râ te ivi i te aau taiâ.” Te haamanaˈo ra Mabel: “A tauturuhia ˈi au, ua faaruru vau i te mau fifi ta te feia maˈi ta ˈu i tauturu na i ite. Mea mauiui roa ia faahautiutihia te tino e ua manaˈo vau e taora i te tauera i te tahi taime. Ua haavî au ia ˈu eiaha ia manaˈo mai tera. Ua ite hoi e e faufaahia vau ia tutava.”

A feruri i te tauturu ia oe ia faaoromai. Te na ô ra Mabel: “Maoti te Bibilia, ua haapii au no te aha te mau ati e tupu ai. Ua ite atoa râ a mairi ai te hoê mahana, te piri roa ˈtura tatou i te taime e faaore-roa-hia ˈi te mauiui.”a

A haamanaˈo e te tâuˈa ra te Atua ia oe. (Petero 1, 5:7) Te faatia ra Mabel i tei tauturu ia ˈna: “I to ˈu afairaahia no te tâpû, ua ite mau vau i ta te Atua e parau ra i roto i te Isaia 41:10 a na ô ai: ‘Eiaha e mǎtaˈu, tei pihai-atoa-iho vau ia oe.’ Ma te haamanaˈo e te tâuˈa ra te Atua ra o Iehova i te tupu ra, ua ite au i te hau i roto ia ˈu.”

Ua ite anei oe? Te haapii ra te Bibilia e i te hoê mahana eita faahou te taata e roohia i te maˈi.—Isaia 33:24; 35:5, 6.