Te haapoheraa ia ˈna iho—Te hoê ati rahi no te feia apî

E AU ra e aita i navai te tamaˈi, te taparahiraa taata, e te mau ohipa riaria no te haamou i ta tatou mau taurearea, i teie nei, te vai ra te hoê haamouraa na roto i te haapoheraa te feia apî ia ratou iho. Te faaino ra te rave-hua-raa i te raau taero e te ava i te feruriraa e te tino o te mau taurearea, ma te faatupu e rave rahi poheraa i rotopu i te feia apî. Teie te parau hevaraa matau-roa-hia no nia i te feia i pohe, e ua pohe ratou i te raveraa te hoê faito raau taero rahi roa, ma te opua mau aore ra ma te manaˈo-ore-hia.

Ua parau te Tabula hebedoma Rahiraa feia maˈi e Rahiraa taata pohe na nia i te huiraatira (Beretane) o te 28 no Eperera 1995 e o te “haapoheraa ia ˈna iho te toru o te tumu haapoheraa i rotopu i te mau taurearea e 15 tae atu i te 19 matahiti i te mau Hau Amui.” Te papai ra te Taote ra o J. J. Mann i roto i Te ahururaa matahiti o te Roro (Beretane) e: “Hau atu i te 30 000 [i te matahiti 1995 e 31 284 ïa te rahiraa] Marite tei haapohe ia ratou iho i te mau matahiti atoa. Ma te ati, o te feia apî te roo-rahi-hia i te reira . . . Ua hau atu i te tataiahuru te 30 000 taata tei tamata i te haapohe ia ratou, ua ora mai râ. . . . E tautooraa matamua a te fare maˈi te iteraa i te feia maˈi o te nehenehe e haapohe ia ratou iho no te mea eita te mau taote e ite ohie noa i te faataa ê i te feia e ahoaho roa ra e o te tamata i te haapohe ia ratou e te feia o te ore e na reira.”

Ua tapao o Simon Sobo, raatira no te rapaauraa i te feruriraa a te Fare maˈi New Milford, Connecticut, Hau Amui no Marite, e: “Mea rahi aˈe te mau tamataraa i te haapohe ia ˈna iho i teie tau tupuraa raau [1995] i ta ˈu i ite na i roto i na 13 matahiti faaearaa i ǒ nei.” I te mau Hau Amui, e mau tausani taurearea o tei tamata i te haapohe ia ratou i te mau matahiti atoa. Ua riro te mau tamataraa atoa ei piiraa ia tauturuhia e ia haapaohia ratou. O vai to reira no te turu atu hou e maoro roa ˈi?

Te hoê fifi na te ao nei

E ere te tupuraa i te mea taa ê roa i roto e rave rahi atu mau vahi o te ao nei. I Inidia, ia au i te India Today, maa 30 000 feia apî tei haapohe ia ratou i te matahiti 1990. I Kanada, i Farani, i Filelane, i Helevetia, i Holane, i Iseraela, i Niu Zelani, i Paniora, e i Tailane, ua maraa te rahiraa haapoheraa ia ˈna iho i rotopu i te feia apî. Te faˈi ra te hoê tabula no te matahiti 1996 a te Afata a te mau Nunaa Amui no te mau Tamarii (UNICEF) e tei Filelane, Lettonie, Lituanie, Niu Zelani, Rusia, e Solovenia te numera rahi roa ˈˈe taurearea tei haapohe ia ratou iho.

Tei Auteralia atoa te mau numera rahi roa ˈˈe o te feia apî tei haapohe ia ratou. I roto i teie fenua i te matahiti 1995, 25 % o te taatoaraa o tei pohe tei rotopu ïa i te mau taurearea e 17 % tei rotopu i te mau potii te haapoheraa ia ratou iho, ia au i te hoê tabula a te vea ra The Canberra Times. Te numera o te mau haapoheraa ia ratou iho o tei “manuïa” i rotopu i te mau tamaroa Auteralia fatata e pae taime hau atu i to te mau tamahine. Hoê â faito te itehia ra i roto i te rahiraa o te mau fenua.

Teie anei te auraa e ohie aˈe te tamaroa i te tamata i te haapohe ia ratou i te mau tamahine? E ere. Te faaite ra te mau numera e vai ra e mea iti te taa-ê-raa i rotopu i te tane e te vahine i te tamataraa i te haapohe ia ratou iho. Teie râ, “fatata e maha taime rahiraa taurearea e potii atoa te haapohe ia ratou iho i te mau fenua maona ia au i te mau numera hopea no ǒ mai i te OMS [Faanahonahoraa o te Oraora-maitai-raa o te Ao nei].”—The Progress of Nations, neneihia e te UNICEF.

Eita râ teie mau numera riaria e faaite ra i te taatoaraa o te rahi o teie fifi. Te mau numera o te mau taurearea tei haapohe ia ratou iho, tuuhia na roto i te mau parau a te taote e te mau tatararaa, e mea ohie mau â ia taiohia te reira. Teie râ, pinepine te mea o te ore i taahia aore ra i itehia i muri i te mau numera noa o te mau utuafare motu e te mauiui o te mafatu, te ahoaho, te oto, e te taiâ o te feia e ora mai, a imi ai ratou i te mau tumu o te reira.

No reira, e nehenehe anei teie mau tupuraa riaria mai te haapoheraa te mau taurearea ia ratou iho e araihia? Ua itehia vetahi mau ravea faufaa o te nehenehe e tauturu i te aperaa i teie tupuraa peapea.

[Tumu parau tarenihia i te api 5]

Te mau tumu no te haapoheraa ia ˈna iho

Mea rahi te mau manaˈo no nia i te mau tumu no te haapoheraa ia ˈna iho. “No roto mai te haapoheraa ia ˈna iho i te huru o te hoê taata i mua i te hoê fifi e au ra e aita e ravea faahou, mai te manaˈoraa e ua tuuhia oia i te hiti o te totaiete, te poheraa tei herehia (te hoa faaipoipo iho â râ), te amahamaharaa te utuafare i te tamarii-rii-raa ra, te hoê maˈi ino mau, te paariraa mai, te ereraa i te ohipa, te mau fifi i te pae o te moni e te rave-hua-raa i te raau taero.”—The American Medical Association Encyclopedia of Medicine.

Ia au i te parau a te taata ihitotaiete ra o Emile Durkheim, te vai ra e maha tapao matamua no te haapoheraa ia ˈna iho:

1. Haapoheraa ia ˈna iho no te manaˈo o vau anaˈe—“Te manaˈohia ra e e tupu mai [te reira] i ǒ te hoê taata o te ore e faaô ia ˈna i roto i te totaiete. Ma te vaiiho-rahi-hia i te hiti, aita te taata e haapohe ia ˈna iho no te manaˈo e o ˈna anaˈe, e taairaa, aore ra e tiaturi ra i to ratou huiraatira.” E ohie ïa i te faaea hoê noa.

2. Haapoheraa ia ˈna iho i te haapeapearaa no vetahi ê—“Ua mau roa teie taata i roto i te hoê pǔpǔ a manaˈo ai oia e aita e vai ra te hoê faatusiaraa rahi roa ˈˈe.” Te mau hiˈoraa e horoahia ra o te mau pairati Tapone kamikaze i roto i te Piti o te Tamaˈi Rahi e te feia faaroo etaeta o te ineine i te paaina a pohe ai te feia o ta ratou i manaˈo e mau enemi. Te tahi atu mau hiˈoraa o te feia ïa tei pohe i to ratou faauraraa ia ratou iho no te huti mai i te ara-maite-raa i nia i te hoê taatiraa.

3. Haapoheraa ia ˈna iho no te papu-ore-raa te oraraa—“Eita teie huru taata e nehenehe e faaruru i te hoê ati ma te hoê haerea tano e e maiti oia e haapohe ia ˈna iho ei ravea no to ˈna fifi. E tupu [te reira] ia ino anaˈe ma te taue e ma te huru ê mau te taairaa matauhia a teie taata e te totaiete.”

4. Haapoheraa ia ˈna iho no te manaˈo e ua faataa-aˈena-hia—“Te manaˈohia ra e e tupu [te reira] na roto i te faatureraa rahi a te totaiete o te taotia roa i te tiamâraa a te hoê taata.” “Te manaˈo ra [teie huru taata] e aita to ratou e oraraa papu a muri aˈe.”—Adolescent Suicide: Assessment and Intervention, a Alan L. Berman e a David A. Jobes.

[Hohoˈa i te api 5]

Vetahi mau ohipa iino o te aratai i te haapoheraa te feia apî ia ratou iho