Na ravea e pae no te haamaitai atu â i to outou oraraa
NA TE PAPAI VEA A A ARA MAI NA! I TE REPUBILITA NO AFIRIKA I ROPU
TE MARAARAA o te hoo, te maˈi, te maitai ore o te maa, te veve—ua parare roa teie mau fifi i roto i te mau fenua e haere ra i mua. E aita e itehia ra te ravea fatata noa, ia au iho â râ i te hiˈoraa taata. Mai te peu e te ora ra outou i roto i te hoê fenua e haere ra i mua, te vai ra anei te hoê noa ˈˈe ohipa ta outou e nehenehe e rave no te haamaitai atu â i to outou oraraa? Oia, te vai ra! Teie na manaˈo e pae i muri nei e nehenehe e tauturu ia outou e te ohie ia faaohipa.
Numera 1: A tanu i te hoê faaapu iti
“O tei faaapu i to ˈna fenua, e maa ïa ta ˈna,” ta te Bibilia ïa e parau ra i roto i te Maseli 28:19. Oia mau, e maere outou ia ite outou ehia rahiraa maa e nehenehe e faatupuhia i nia i te hoê tâpû fenua nainai roa. I roto i ta ˈna buka Le jardin potager sous les tropiques, te parau ra te taata papai o Henk Waayenberg e e nehenehe te hoê tâpû fenua e 50 e tae atu i te 100 metera tuea e horoa mai i te mau maa tupu e navai no te faatamaa i te hoê utuafare e ono taata!
No te aha e haamâuˈa ˈi i ta outou moni no te hoo mai i te mau mea ta outou iho e nehenehe e faatupu? Ia au i te huru o te repo e te ahuaraˈi, e nehenehe e faatupu i te mau maa mai te gombo, te pepa, te fafa, te persil, te lemon-grass, te oniani matie, te maniota, te mautini, te umara, te to, te tomati, te totoma, e te to papaa i pihai noa i to outou fare. E nehenehe â ïa te hoê faaapu mai teie e faanavai i te maa a to outou utuafare, e peneiaˈe e roaa mai te tahi maa hau ta outou e nehenehe e hoo.
Mai te peu e e navai te fenua, e nehenehe atoa outou e feruri e tanu i te mau tumu maa rau. I te tahi taime, e nehenehe te hoê noa tumu maa e horoa mai i te maa hau atu i ta outou e ta to outou utuafare e nehenehe e amu. Te haapiiraa nafea ia hamani i te para—te ohipa haapêraa i te mau mea pohe e te faaohiparaa i te reira ei raau haamaitai repo—e tauturu ïa te reira ia outou ia haamaitai atu â i ta outou faahoturaa maa. E nehenehe te mau tumu raau e horoa mai hau atu â i te maa noa e te moni hau na to outou utuafare. E nehenehe te mau tumu raau i tanuhia i te vahi tano maitai e horoa mai i te mǎrûmǎrû, e tamâ i te mataˈi, e e faanehenehe e e faaau atu â i to outou vahi.
Nafea râ, mai te peu e aita outou i ite rahi i te ohipa faaapu? Te vai ra anei to outou hoa, to outou taata tapiri, aore ra ta outou feia matau mea ite ratou i te reira? No te aha ïa e ore ai e titau i ta ratou tauturu aore ra to ratou manaˈo? E nehenehe atoa outou e hoo mai aore ra e rave no te hoê taime poto i te tahi mau buka no nia i te ohipa faaapu.—A hiˈo i te tumu parau ra “No te aha e ore ai e tanu i te hoê faaapu iti maa tupu?” i roto i te A ara mai na! o te 22 no Atete 1974 (Farani).
Numera 2: A hoo rahi mai i te maa
E hoo itiiti noa mai anei outou i te mau mea hinaaro-rahi-hia mai te faraoa ota, te raiti, e te hinu? Mai te peu e e, peneiaˈe te haamâuˈa ra outou i te hoê tuhaa rahi o ta outou faufaa. A tamata na râ, mai te peu e e nehenehe, i te hoo rahi mai i teie mau maa, ma te aufau amui e na utuafare e piti, e toru, aore ra hau atu â. E nehenehe atoa te hoo-rahi-raa mai i te maa e faaherehere i ta outou moni ia hotu rahi te tahi mau maa hotu aore ra mau maa tupu. I te tahi taime, e nehenehe atoa outou e hoo tatatini mai i te mau mea.
Numera 3: A haapii nafea ia rapaau i te maa
E faahiti te hoo-rahi-raa mai i te maa i te uiraa e nafea ia atuatu i te mau mea e pê haere noa. Te taraˈiraa i te maa, o te hoê ïa ravea auhia e te taata e te ohie ia rave. E rave rahi mau vahine i Afirika e ora nei na roto i te taraˈiraa i te maa hotu, te okra, te pipi, te courge, te huero mautini, e te faanoˈanoˈa maa. Eita te taraˈiraa e titau i te hoê aˈe mauhaa taa ê. E nehenehe te maa e tuuhia i nia i te hoê vahi mâ aore ra e faatarerehia, peneiaˈe ma te tapoˈihia i te hoê ahu rairai no te faaatea ê i te mau raˈo. Na te mataˈi e te mahana e rave i te toea.—A hiˈo i te tumu parau ra “E nehenehe anei ta outou e faaite mai i ta outou haamâuˈaraa moni?” i roto i te A ara mai na! o te 8 no Titema 1975 (Farani).
Numera 4: A tamata i te hoê faaamuraa animala nainai
E nehenehe anei ta outou e faaamu i ta outou iho moa, te puaaniho, te uupa, aore ra te tahi atu animala? I te mau vahi e rave rahi, ua riro te inaˈi ei maa faahiahia. Ma te tauturuhia râ e vetahi ê, e nehenehe outou e haapii nafea ia faaamu i te hoê nǎnǎ iti animala. Mea au anei na outou i te amu i te iˈa? Inaha, e nehenehe outou e tamata i te haapii nafea ia hamani i te hoê aua iˈa nainai. E auri, e taratiumu, e vitami, e minéral, e e poroteina tei roto i te inaˈi, te huero moa, e te iˈa—mau mea maitai anaˈe no te oraora-maitai-raa o to outou utuafare.
Numera 5: A atuatu i te vai-mâ-raa tano
Mea faufaa atoa te vai-mâ-raa no te oraora-maitai-raa o to outou utuafare. E aratai mai te huru reporepo i te iore, te raˈo e te popoti—mau tumu o te mau huru maˈi atoa. E titau te atuaturaa i te vai-mâ-raa ia outou i te taime e te rohiraa. Mea mâmâ aˈe râ te haamâuˈaraa no te tamâraa i te haamâuˈaraa no te raau e te taote. E taa ê rii paha te mau faito mâ ia au i te tahi e te tahi taata e ia au i te tahi e te tahi fenua. Teie râ, te vai ra te tahi maa manaˈo tumu e nehenehe e faaohipahia i te mau vahi atoa.
A rave na, ei hiˈoraa, i te fare haumitiraa. Na te mau mataeinaa, mea pinepine te reira i te vaiiho-noa-hia ia faarepohia e ia pê roa e ia riro ei tumu rahi no te mau maˈi. E nehenehe paha te mau rave ohipa no te pae o te oraora-maitai-raa o to outou vahi e haapii mai ia outou nafea ia faatia i te hoê fare haumitiraa mâ aore ra i te hoê fare iti mâmâ roa.
E to outou iho fare? Mea mâ e mea atuatu-maitai-hia anei? Mea hauˈa noˈanoˈa anei? E to outou fare utuutu? Mea faanaho-maitai-hia e mea mâ anei? E tia ia mâ e ia ama maitai te maa no te oraora-maitai-raa. E rahi roa te mau manumanu ino i roto i te pape viivii. No reira, a titia aore ra a haapihaa i te pape a faaohipa ˈtu ai. A horoi i ta outou mau farii maa i te pape pihaa, e a horoi maitai i to outou rima a rave ai i te maa. A vaiiho i te pape i roto i te mau farii mâ e te tapoˈi-maitai-hia.
Eiaha te urî, te mimi, te moa, e te puaaniho ia vaiihohia ia tomo noa mai i roto i te fare utuutu—ia hinaaro iho â râ outou e atuatu i te vai-mâ-raa. Eiaha atoa e vaiiho i te iore ia horo na nia iho i te mau pani, a haaviivii ai i ta outou maa. E nehenehe te hoê noa pata iore e faaore i teie fifi.—A hiˈo i te tumu parau ra “Te hoê fifi te tia ia faaruruhia—Te vai-mâ-raa” i roto i te A ara mai na! o te 8 no Setepa 1988.
I te pae hopea, na te Basileia a te Atua noa e faaore roa i te mau fifi atoa o te huitaata. (Mataio 6:9, 10) No teie nei râ, e nehenehe teie mau manaˈo ohie e tauturu ia outou ia haamaitai atu â i to outou oraraa.
[Hohoˈa i te api 22]
A tanu i te hoê faaapu iti
[Hohoˈa i te api 23]
A hoo rahi mai i te maa
[Hohoˈa i te api 23]
A haapii nafea ia rapaau i te maa
[Hohoˈa i te api 24]
A tamata i te hoê faaamuraa animala nainai
[Hohoˈa i te api 24]
A atuatu i te vai-mâ-raa tano