Te papai mai nei te feia taio

Aua nehenehe ati aˈe te ao nei E tia ia ˈu ia haamauruuru ia outou no te mau tumu parau ra “Aua nehenehe, ati aˈe te ao nei—E moemoeâ noa anei aore ra e tupu mau anei?” (8 no Eperera 1997) Oia, e nehenehe te mau aua nehenehe e te mau peni e ohipa i nia i to tatou oraora-maitai-raa e e faaoaoa ia tatou. Ua au roa vau i te tumu parau ra “Te ravea e noaa faahou mai ai te Paradaiso.” E mea faaitoito roa teie mau parau rii—mai te hoê titau-manihini-raa e na ô ra, “Teie te eˈa.” Auê te oaoa e ia rave i te ohipa mai te hitiraa e tae atu i te taperaa mahana no te faariro i te fenua ei paradaiso i te hoê mahana! I te mea e mea au na ˈu e peni e e papai i te mau hohoˈa, e te ohipa rima î, mea au atoa ïa na ˈu te mau hohoˈa atoa i roto i te mau vea.

V. R., Auteralia

Te hinaaro nei au e haapopou ia outou no te mau tumu parau. Ua au roa vau i te reira. Fatata to ˈu e 80 matahiti, e te au noa ra vau e rave i te ohipa i roto i to ˈu aua. Eita e noaa mai i ta ˈu mau tiare e mau maa tupu te re matamua, tera râ, mea au na ˈu e faaea i rapae e e atuatu ia ratou. Mai to ˈu taioraa mai i te mau tumu parau, te taa maitai aˈe ra ia ˈu e no te aha e mea au na te taata e rave i te ohipa i roto i te aua.

R. R., Hau Amui no Marite

E afaro faahou anei na hoa faaipoipo? I to ˈu taioraa i te tumu parau ra “E nehenehe anei na hoa faaipoipo e afaro faahou ia faaturi te tahi?” (8 no Eperera 1997), mai te mea ra e ua hapono mai o Iehova i te hoê rata na ˈu. Ua faataa oia i te mea iho â o ta ˈu i faaruru e i to ˈu mau manaˈo. Ua faaturi ta ˈu tane, tera râ, ua tatarahapa mau â oia. Mai ta te tumu parau i faahiti, mai te mea ra e tei roto vau i te hoê vero rorofai. Ua faaoti au e faaore i ta ˈna hara, i te tahi râ mau taime, e haama na vau i to ˈu mau manaˈo. Ua tauturu mai te tumu parau ia ˈu ia taa e mau manaˈo matauhia e te tano roa to ˈu. Ua tauturu rahi mai o Iehova i ta mâua mau tutavaraa, e ua afaro faahou mâua.

L. P., Farani

Noa ˈtu e aita mâua ta ˈu tane i afaro faahou, ua riro teie tumu parau ei haamaitairaa mau, no te mea ua faataa maitai oia i to ˈu mau manaˈo. Ua nehenehe mau â vau e faaau atu ia ˈu i te mau mea atoa i papaihia i roto i te tumu parau. Ua matau atoa vau i te tahi atu mau taata o tei fanaˈo i te reira. E mea fifi no te rahiraa ia taa i teie huru manaˈo, e riro ïa teie tumu parau ei tauturu rahi no te haamaramarama ia ratou.

M. C., Irelane

Ua faaipoipohia vau e iva matahiti te maoro i te hoê tane aita i roto i te parau mau, o tei faaturi hoi. I to ˈu râ taioraa i te mau paratarapha i raro aˈe i te tumu parau iti ra “E afaro faahou anei te faaipoiporaa?,” ua topa ˈtura to ˈu hau. Ua hinaaro ta ˈu tane e tapea noa i to mâua faaipoiporaa a tamau noa ˈi i to ˈna taairaa e tera vahine. No reira, te oaoa nei au i te faataaraa ia ˈna. I teie nei, e tia ia ˈu ia haamata faahou, e ia ora ei mama faaea taa noa.

M. S. B., Trinité

Mauruuru no te tumu parau au roa e te aupuru. E mea maitai roa ia faaohipa i te aˈoraa no te faaoti e e manuïa anei te faahau-faahou-raa. Ua manaˈo noa na vau e ia faaturi noa ˈtu ta ˈu tane, eita roa ˈtu vau e faaore i ta ˈna hara. Te taa nei ia ˈu i teie nei e e ere noa te reira i te pahonoraa maitai. E mea peapea e ua riro te reira ei fifi o te rahi noa ˈtura, tera râ, mauruuru no te haamaramaramaraa ia au i te mau Papai e nafea tatou e nehenehe ai e tauturu ia tatou iho. Ua tauturu mai to ˈu turuiraa i nia ia Iehova ia ˈu i roto i te hepohepo rahi, e ua noaa mai ia ˈu i te puai no te faaore i te hara a ta ˈu tane, i te mea e ua tatarahapa hohonu (e te na reira noa ra) oia.

S. N., Hau Amui no Marite

Te arue ra te feia tariˈa turi ia Iehova I to ˈu taioraa i te tumu parau ra “Te feia tariˈa turi—Te arue nei ratou ia Iehova” (8 no Eperera 1997), ua hiˈo noa vau i te hohoˈa o te feia atoa i tae i te rururaa. Auê te faaroo i te faaitoitohia e i te ite-noa-raa ˈtu i te mau taeae e te mau tuahine e rave rahi roa ia faaohipa i te reo aparaa rima no te arue ia Iehova! Ua tahe to ˈu roimata e rave rahi taime, i te mea e te haapopou rahi nei au i to ratou itoito, manaˈo papu, e te pûpûraa ia ratou. Mauruuru no teie mau tumu parau.

R. H., Hau Amui no Marite