Te hae na nia i te purumu—Nafea outou ia faaruru i te reira?

NA TE PAPAI VEA A A ARA MAI NA! I BERETANE

TE FAAHITI-RAHI-NOA-HIA ra te parau no te iria e to ˈna mau faahopearaa haavî, na roto i te mau vea a te ao nei. I muri aˈe i te hae na roto i te fare toa (a turai noa ˈi te feia hoohoo i ta ratou pereoo maa, e taora parau atu ratou i te tahi e te tahi i roto i te fare toa) e te hae na roto i te niuniu paraparau (no te mau niuniu apî hoi e faatia ra i te taata pahono niuniu ia tâpû i ta outou reni no te pahono i te tahi atu taata e taniuniu maira), o te hae na nia i te purumu ïa tei huti i te ara-maite-raa o te huiraatira i Beretane.

No te mea e ua parare roa te hae na nia i te purumu, ua faahiti te hoê tumu parau piahia i te matahiti 1996 no nia i te mau peu a te feia faahoro pereoo e, i Beretane, e au roa teie hae “i te maˈi pee ra te huru, fatata hoi te afaraa o te feia faahoro atoa o tei roohia i te tahi huru o teie hae aore ra te tahi hamani-ino-raa i roto i te matahiti i mairi aˈenei”! Ua faaite te hoê titorotororaa a te Taatiraa Pereoo uira e mea ino roa ˈtu â, inaha, “e iva feia faahoro pereoo i nia i te ahuru o tei parau e ua faainohia ratou na roto i te hae na nia i te purumu.” Te vahi anaanatae, ua faaite atoa mai taua fafaraa manaˈo ra e, “e ono anaˈe [feia faahoro] i nia te ahuru o tei farii e ua riri ratou a faahoro ai ratou i te pereoo.”

Eaha te tumu o te hae na nia i te purumu? Mai te peu e e faainohia mai outou, eaha ta outou e nehenehe e rave no te paruru ia outou? Ia riri anaˈe outou i te huru faahoro a te tahi atu taata, eaha te tia ia outou ia rave? Oia mau, a parare oioi ai te hae na nia i te purumu ati aˈe te ao nei, nafea outou ia faaruru i te reira?

Te tumu e te faahopearaa

E ere no teie nei te feia faahoro iria. O te rohipehe Beretane ra o Lord Byron, te tahi taata i riri na i nia i te purumu. I te matahiti 1817 ra, ua papai oia i te hoê rata e faatia ra i te hoê peapea i tupu i nia i te purumu. Inaha, ua “haavahavaha” te tahi taata na nia i te purumu, i te puaarehenua a Byron. No reira, ua poara ˈtura te rohipehe i te tariˈa o taua taata ra.

I roto i te rahiraa o te mau fenua, ia rahi noa ˈtu te mau tereraa pereoo, e rahi atoa ˈtu ïa te iria o te feia faahoro pereoo. I te mau matahiti 1980 ra to te mau vea Marite piiraa i te tumu o te mau peapea iino mau i rotopu i te feia faahoro pereoo, “te hae na nia i te purumu.” Noa ˈtu e eita te reira e faautuahia e te ture, te haapapu maitai ra te hae na nia i te purumu, i te mau horuhoru iino tei riro ei tumu no te mau ohipa haavî e rave rahi e ravehia nei e te feia faahoro o tei riri i te huru faahoro a te tahi atu taata.

Ua apǐ roa to tatou mau purumu i te feia e hinaaro nei e o ratou te na mua. Ua faaoti te feia maimi no nia i te mau peu a te feia faahoro pereoo e, “fatata i te mau taime atoa, e tiaturi te feia e rave nei i te mau ohipa haavî aore ra hamani ino, e o ratou tei tano e o ratou tei fifihia na roto i te haerea au ore o te tahi atu taata,” o ta te vea ra The Times no Lonedona ïa e tapao ra. Mai te peu e na ˈna e faahoro maamaa i te pereoo, e manaˈo iho â te taata faahoro e ua tano oia. Mai te peu noa ˈtu râ e na te tahi atu taata faahoro e hape rii i nia i te purumu, e hae roa ïa oia.

O te maraaraa atoa o te raveraa i te raau taero, i rotopu iho â râ i te mau taurearea, te tumu i rahi roa ˈi te hae na nia i te purumu. Ia au i te hoê taata aravihi i te pae no te fare maˈi, hoê â huru te raveraa i te raau taero cocaine e “te faahororaa i te pereoo ma te taero i te ava.” E pinepine te feia faahoro pereoo o te rave i te raau taero, i te tiaturi rahi roa i to ratou aravihi. No reira, e faahoro puai roa vetahi i to ratou pereoo. Area vetahi ra, e tioioi noa ïa to ratou pereoo, no te mea aita ratou e taa ra i ta ratou ohipa e rave ra.

A rave atoa na i te huru o te hoê taata faahoro tei hepohepo roa. Te faahapa nei te Orometua Cary Cooper no te Fare haapiiraa tuatoru Manchester, i te mau hepoheporaa e te mau papu-ore-raa o te oraraa o te mau matahiti 1990, ei tumu no te hae na nia i te purumu. “Te rahi noa ˈtura te hepohepo o te feia faahoro e te maraa noa ra te numera o te mau ohipa haavî,” o ta te auvaha ïa a te hoê taatiraa pereoo uira, te Royal Automobile Club, i parau. Te faˈi ra te hoê vahine tuati ohipa roa, o te faahoro nei i te pereoo e rave rahi mau hora no te haere e no te hoˈi mai i ta ˈna ohipa, e eita oia e faaoromai faahou mai i mutaa ihora. “I teie nei, eita e maoro, e tuôtuô noa vau e e riri au no te tahi mau ohipa haihai roa o ta ˈu hoi i ore i tâuˈa na mua ˈˈe,” o ta ˈna ïa i parau ia au i te vea ra The Sunday Times. Peneiaˈe, mai te reira atoa outou. Eaha ïa ta outou e nehenehe e rave?

A ape i te faatupu i te hae na nia i te purumu

E tia ia outou ia farii e e hape iho â te tahi atu feia faahoro. I te tahi mau taime, e ofati ratou i te mau ture. A haamanaˈo i te reira ia faahoro anaˈe outou. A feruri atea. Ei hiˈoraa, tei nia paha outou i te reni i te hiti roa, oia te reni no te mau pereoo taere, i nia i te hoê purumu mea rahi te mau reni. Tera râ, te piri atura outou i te hoê vahi tuatiraa i reira te mau pereoo no te tahi atu purumu e tomo mai ai i nia i te purumu rahi. I mua ia outou, te faaineine ra te hoê pereoo i nia i te reni tuati i te faaô mai i nia i te purumu rahi. E manaˈo anei outou e, o outou tei tae mai na mua, e e tiaraa to outou no te faahoro i nia i tera reni? No te aha e vaiiho ai i tera pereoo ia tomo mai na mua ia outou? No te aha e haere ai i nia i te tahi atu reni mai te peu e aita e pereoo, ia nehenehe te tahi atu pereoo e tomo mai i nia i te purumu rahi? A feruri na râ, eaha te ohipa e tupu mai te peu e eita outou e tuu, e e faaea noa outou i nia i to outou reni i te hoê â tere? Peneiaˈe eita te tahi atu taata faahoro e tomo maira i nia i te purumu rahi, e hinaaro atoa e tuu. Ia tae i te hoê taime, e tia iho â i te tahi ia tuu; ahiri eita, e tupu ïa te fifi.

Ma te paari, e feruri atea te taata faahoro e hinaaro ra e ape i te faatupu i te hae na nia i te purumu, e e faahoro oia ma te faatura ia vetahi ê. E vaiiho oia i te tahi atu pereoo ia haere mai te peu e e nehenehe, e eita oia e riri mai te peu e eita te tahi atu taata faahoro e tâuˈa mai i te faatura ta ˈna i faaite atu. Ua numera te hoê tia a te Pu Beretane no te Feia Ite i te faahoro i te pereoo e, 1 i nia i te 3 o te feia faahoro, e haerea atâta roa to ratou. Noa ˈtu e mea ite ratou i te faahoro i te pereoo, aita râ ratou i ite i te peu. Te pii nei oia ia ratou “e feia faahoro maitatai, e fatu pereoo iino râ.”

I te tahi mau taime, aita te rahiraa o te feia faahoro pereoo e tâuˈa ra i te tahi atu feia na nia i te purumu. Eiaha ïa outou e na reira atoa. A feruri na i te mau faahopearaa e nehenehe e tupu mai. Papu maitai, aita outou e hinaaro ra e ia û te mau pereoo no to outou noa onoono. Eiaha e hema i to outou mau horuhoru iino. Te faaue ra te hoê taata aravihi i te pae no te faahoro pereoo e: “Eiaha e tâuˈa ˈtu aore ra e pahono atu ia faainohia mai outou i nia i te purumu.” Eiaha roa ˈtu e apee atu i te feia e hae nei na nia i te purumu!

Ua faainohia mai anei outou?

Fatata te feia faahoro atoa tei roohia na i te hae o te tahi atu taata na nia i te purumu. Te poro rima, te tuhi, te faahoro-ino-raa i te pereoo, e mea riaria iho â ïa. Te parururaa maitai roa ˈˈe, o te aperaa ïa i te peapea. Ua mehameha te hoê taata i to te hoê taata na muri mai hinaaroraa e hemo ia ˈna. I te pae hopea, ua hemo maira te taata faahoro iria ia ˈna, ua tâpû maira i mua ia ˈna, e ua haamǎrû roa ˈtura e inaha, ua mǎtaˈu te taata i hemohia e e û to raua pereoo. Na reira noa e tae roa ˈtu i te taime i tipuu ai te taata i hemohia i nia i te tahi atu purumu.

Ia ite anaˈe outou e te hinaaro ra te tahi atu feia faahoro e hemo ia outou, a vaiiho atu ïa. Eiaha e onoono i nia i to outou tiaraa ia tere i te vahi tei reira outou i nia i te purumu. Mai te peu e ua ite outou e ua faairia outou ia vetahi ê, a tatarahapa ˈtu. A tarape atu no te faaite i to outou tatarahapa noa ˈtu e aita outou i opua e haafifi atu ia ratou. A haamanaˈo e e nehenehe te hoê parau mǎrû e faatopa i te riri.

Mai te peu râ e, no te tahi tumu, e faainohia mai outou e te tahi atu taata faahoro pereoo, eiaha e tahoo atu. “Eiaha e faahoˈi mai tei ravehia i nia ia outou,” o ta te vea ra Focus ïa e faaue ra. “Eiaha e faauta i roto i to outou pereoo i te tahi taoˈa o te nehenehe e faaohipahia ei mauhaa atâta.” Teie te tahi atu mau manaˈo: A ponao i to outou mau opani pereoo e a taviri i te mau hiˈo i nia. Eiaha e hiˈo atu i te taata faaino.

E ere te mau manaˈo i nia nei no nia i te faarururaa i te hae na nia i te purumu, i te mea apî. Ua horoa atoa hoi te Arii no Iseraela ra o Davida i te hoê â huru aˈoraa i mutaa iho: “Eiaha oe e inoino i te feia parau ino ra,” o ta ˈna ïa i aˈo. “Eiaha e feii i tei rave i te hara ra; faarue i te tairoiro, eiaha te riri.”—Salamo 37:1, 8.

Noa ˈtu e te rahi noa ˈtura te hae na nia i te purumu, eiaha e vaiiho i teie hae ia tupu atoa i roto ia outou!

[Tumu parau tarenihia/Hohoˈa i te api 15]

Te haavîraa i te hae na nia i te purumu

Te tapao ra te Taatiraa Pereoo uira e, no te faaoreraa i te hae na nia i te purumu, “hoê â faufaaraa te tauiraa i to ˈna haerea, e te mau ravea arairaa na nia i te purumu.” E mea faufaa roa ia faito i to outou iho ite i te faahoro i te pereoo, e to te tahi atu feia faahoro, no te faaruru i te hae na nia i te purumu. Te ite papu ra paha outou i te mau hapa a vetahi ê, eiaha râ ia tapo i to outou mata i nia i to outou iho mau hapa i te pae no te faahororaa i te pereoo. A farii e te vai ra te feia faahoro o te ofati i te mau ture purumu. Ia faahoro anaˈe outou, a haapao e ia araara maitai outou. E faatupu atoa hoi te rohirohi i te hepohepo. Ia ere-noa-hia ˈtu outou i te ara-maite-raa i te hoê noa taime iti, e nehenehe ïa te ati e tupu.

A hiˈo atoa na i te mau aˈoraa i muri nei, e a tapao na i te tuearaa e te mau maseli a te Arii paari ra o Solomona.

• Te ite ra anei te feia i roto i to outou pereoo e ua riri outou? Peneiaˈe te parau noa maira ratou e ia tamǎrû ia outou. Eiaha e patoi atu i ta ratou parau ma te pahono atu e e ere na ratou e faahoro ra. A haamanaˈo, mea hau aˈe no te oraora-maitai-raa ia vai hau noa, e e nehenehe mau â te reira e faaroa ˈtu i to outou oraraa! “Te hoê mafatu hau, o te ora ïa o te tino.”—Maseli 14:30, MN.

• A feruri i te tahi atu taata faahoro, e a ape i te fifi. “Te mǎtaˈu ra te taata paari e te faarue ra i te ino; te faateoteo noa ra râ te maamaa e te itoito noa ra.”—Maseli 14:16.

• A faatopa i te riri ma te faaite i to outou tatarahapa na roto i te hoê taraperaa aore ra i te hoê parau. “O te parau mǎrû ra tei faaore i te riri.”—Maseli 15:1.

• E riro vetahi ê i te riri vave noa, eiaha râ outou ia na reira atoa. “Eiaha e faataua ˈtu i te taata iria.”—Maseli 22:24.

• Eiaha e faaô atu i roto i te mau tatamaˈiraa a vetahi ê. “Hou te aimârôraa e tupu ai, a faarue.”—Maseli 17:14, MN.