Te parururaa i te ati purumu—Te hoê titauraa rû

TE PARAUHIA ra no nia i te faahororaa i te pereoo e“aita e vai ra te tahi atu â ohipa mai teie te huru o te faatupu hau atu i te mau tâpû ino mau e te mau mauiui, e mea iti mau hoi te faaineineraa e te iteraa i te amo i te hopoia e titauhia ra”. Ua ape aˈenei â outou i te hoê pereoo? Noa ˈtu e e taata haere noa na raro, aore ra horo patete, aore ra e taata faahoro pereoo, ua ite mata aˈenei â outou i te hoê ati purumu? Te haapeapea ra anei outou no te rahiraa taata e pohe nei i nia i te purumu?

I te fenua Beretane, “e pae matahiti i teie nei to te numera o te feia haere noa na raro teie e pohe nei aore ra tei pepe ino roa, maraa-noa-raa”. — The Times.

“I te mau matahiti atoa, fatata 4 000 tane, vahine e te tamarii teie e pohe nei i nia i te mau purumu i Canada.” — The Toronto Star.

I te mau Etats-Unis, ua pohe 233 200 taata na roto i te mau ati purumu na nia i te mau huru pereoo atoa, mai te matahiti 1981 e tae noa ˈtu i te matahiti 1985. — The World Almanac, 1987.

“I Rio de Janeiro, [Beresilia,] te haapohe nei te pereoo (...) hau atu i te taata i te maˈi tutoo, te mariri ai taata e te mau maˈi mafatu. ” — O Estado de São Paulo.

Eaha mau na te rahiraa o teie ohipa i roto i te ao taatoa nei?

Faahoro i te pereoo—Eaha te pau?

I te mau matahiti atoa, i te ao atoa nei, te pohe nei 250 000 taata na roto i te mau ati purumu. Ia au i te Toronto Star, “ua hau atu [teie numera] i te mau taata tei pohe i roto i te matahiti na roto i te mau tamaˈi, i te taparahiraa taata e te mau ati i tupu i nia i te vahi raveraa ohipa”.

I Beretane, te manaˈohia ra e no te taata tataitahi tei pohe i roto i te hoê ati purumu, ua pau fatata 2,5 milioni moni farani i te totaiete. No te aha teie rahiraa moni? Hau atu i te mau tino moni tei haamauˈahia no te haapiiraa i te taata, te ereraa i to ˈna mau faufaa e te mau ino i te pae materia, e tia atoa ia haapaohia te tahi atu â mau haamauˈaraa mai te mau pereoo faahoro maˈi e te faaearaa i te fare maˈi. Te haapao-ore-raa i te faahororaa i te pereoo, o te hoê ïa haamauˈaraa rahi roa.

“Ei taparahi taata mau”

Te ite nei o John Moore, papai parau tahito no te Hau beretane no te utaraa taata, ma te riaria e “e 5 000 taata teie e pohe nei [i nia i te purumu] i te mau matahiti atoa i te fenua Beretane — e mea iti roa to ratou parau e faahitihia i roto i te mau pu haaparareraa parau apî e no ǒ atoa mai i te huiraatira no Beretane”. Te parau nei te tahi mau taatiraa paruru no te faahoro-maitai-raa i nia i te purumu e ‘e nehenehe te haapoheraa na roto i te raveraa i te pereoo, e riro mai ei huru taparahiraa taata o te farii-noa-hia’.

Noa ˈtu â ïa teie huru haapao-ore-raa, eita e nehenehe e ape i te faaotiraa i muri nei: na roto i ta outou huru faahororaa, e nehenehe outou e haapohe ia vetahi ê, e peneiaˈe ia outou iho. Te faataa nei o Alex Miller, taata hiˈopoa matamua i roto i te hoê haapiiraa i te faahoro i te pereoo no te tuhaa no Strathclyde, i te fenua Ecosse, e: “Ua riro te mau pereoo atoa ei mauhaa taparahiraa taata tei faariro i te taata faahoro ei taparahi taata mau.”

E outou te feia faahoro pereoo, eaha to outou manaˈo? E ere anei te reira te hoê ohipa te tia ia ferurihia? Teie râ, e rave rahi mau taata faahoro pereoo teie e ore e tauˈa nei i te reira, te feia iho â râ e inu nei hou ratou e tere atu ai.

I te Repubilita amuiraa hau no Helemani, “40 332 ati purumu tei haapepe i te taata e 20 000 tei faaino rahi roa i te pereoo, e na te feia faahoro taero ava i faatupu i te reira i te matahiti 1984 ra”. I te fenua Beretane, ua riro te ava ei tumu no te hoê tuhaa i nia i te toru o te mau ati purumu pohe roa.

Te faataui ra anei teie mau numera i te manaˈo o te feia e inu nei hou ratou a tere atu ai? Aita. Ua horoa mai te hoê afai parau no te mutoi beretane i teie manaˈo: “Ua ineine noa te hoê rahiraa feia haapao ore i te faahoro noa ˈtu eaha te ati e tupu mai no ratou iho, no to ratou utuafare e to te tahi atu feia i nia i te purumu.” Te haapapu nei o Robert Kendell, orometua no te haapiiraa tuatoru no Edimbourg, e “i te fenua Beretane, fatata 10 % o te mau tane teie e faahoro nei i to ratou pereoo hoê taime i roto i te hebedoma ma te faito ava i roto i te toto hau atu i te faito i faatiahia”. E ere anei te reira i te haapao-noa-raa ia ˈna iho?

I Beretane, te tamata nei te tahi feia hamani i te ava ia faaafaro rii i teie tupuraa na roto i te faaohiparaa i te hoê tabula utaraa taata i te mau fare inuraa ava. Teie ïa: e anihia i te tahi mau taiete e horoa tarahu ra i te pereoo rarahi aore ra i te pereoo noa no te afai i te hoê taata inu i te fare inuraa ta ˈna i matau e ia faahoˈihia ˈtu o ˈna, noa ˈtu eaha to ˈna huru. Mai te peu mea tapǔpǔ ratou, no te paruru i te mau ati, e faaoti te tahi feia faahoro, tei au hoi i te inu, o vai te faaea noa ma te ore e inu i te ava, e inu noa oia i te mau inu aita e ava to roto, e na ˈna ïa e faahoˈi atu ia ratou i te fare. Noa ˈtu e e nehenehe e haapopouhia te reira, ua manuïa anei teie mau tutavaraa? Ia au i te vea ra Glasgow Herald, “aita te reira i navai no te faaiti rii noa i te numera o te feia faahoro pereoo taero ava”.

Eaha mau na te ravea no te tatara i te fifi tei faatupuhia e te feia taero ava e faahoro nei i te pereoo? Mai ta Peter Joslin, faatere no te mau mutoi no te Warwickshire i parau: “E tia ia tatou ia rave e ia ore te faahororaa i te pereoo e te inuraa i te ava, e tuea.” Ua parau faahou oia e: “Hoê noa teie aˈoraa: ‘Eiaha roa e inu hou a faahoro ai i te pereoo.’”

E aˈoraa feruri-maitai-hia anei teie? Te haavî nei te tahi mau fenua ia faaturahia te mau ture purumu na roto i te faautua-teimaha-raa i te feia faahoro taero ava. Te faatia nei te ture o te fenua Tuete ia tapea-roa-hia te pereoo o te hoê taata faahoro haapao ore mai te tapea-atoa-hia te tipi e te pupuhi a te hoê taata taparahi taata ino mau. Te ani roa nei te Taatiraa o te mau haava no Beretane ia iriti-roa-hia te parau faatia a te feia faahoro pereoo mai te peu e itehia te ava i roto i te toto, i te mau taime atoa e manaˈohia e e nehenehe ratou e na reira faahou hou te haavaraa.

Tera râ, aita i ravai te inu-ore-raa ia nehenehe tatou e faahoro papu aˈe.

[Hohoˈa i te api 3]

I roto i te ao nei, ua rahi aˈe te numera o te mau taata e pohe nei i te mau matahiti atoa i nia i te purumu i te huiraatira no Islande.