Te maimiraa i te hoê paradaiso aita e fifi faahou

“TE HINAARO noa nei mâua e faatupu i te hoê oraraa peapea ore e peneiaˈe, e oraraa mai te tau matamua ra, i reira te taata e haapao mau ai i te tahi e te tahi,” o ta te tahi feia faaipoipo Beretane ïa i faataa mai. Ua opua hoi raua e imi i te hoê paradaiso i nia i te hoê motu veavea, e e haamau i te hoê pǔpǔ taata o te ora amui ma te hau. Te papu ra paha ia outou i to raua hinaaro. O vai hoi te ore e farii oioi noa i te ora i roto i te hoê paradaiso aita e fifi faahou?

O te hoê vahi moemoe anei te paradaiso?

E rave rahi feia imi paradaiso, o te moemoeâ nei e ora i nia i te hoê motu, no te mea ua riro te vahi moemoe ei vahi paruruhia. Te maiti nei vetahi i te mau motu i te Pae Patitifa no Panama aore ra te mau motu Antilles, mai tei pihai iho ia Belize. Te fariu nei vetahi i nia i te mau motu haviti mau o te Moana Inidia—mai te mau Seychelles.

Eita e noaa ia feruri i te fifi o te mau faanahonahoraa e titauhia no te haamau i te hoê pǔpǔ taata i te hoê vahi moemoe. Noa ˈtu e te vai ra te moni, eita paha te mau ture a te hau e faatia ia hoo oioi mai i te fenua. Noa ˈtu râ, a feruri na e e itehia mai ia outou te hoê motu veavea tei au i te paradaiso, e oaoa anei outou i reira? E paruruhia anei to outou paradaiso i te fifi?

I teie nei, te rahi noa ˈtura te taata e haere nei e faaea i te mau motu moemoe na te pae no Beretane. Teie mau taata e haere apî maira, te rahiraa, e mau taata ïa e imi nei i te vahi moemoe e te hau. Te na ô ra te hoê taata e faaea ra o ˈna anaˈe i nia i te motu no Eorsa 100 tâ to ˈna rahi, i te pae tooa o te râ no Ekosia, e aita roa ˈtu oia e moemoe ra, no te mea mea rahi ta ˈna ohipa no te haapao i ta ˈna nǎnǎ hoê hanere mamoe. Area vetahi ra, o tei imi i te faaatea ê ia ratou i nia i te hoê motu, e haumani oioi noa ïa ratou. Ua tamata vetahi i te haapohe ia ratou e ua hinaaro hoi i te tauturu.

E rave rahi mau taata e tiaturi nei e, te paradaiso, o te hoê ïa motu veavea e te nehenehe roa. Te hiaai nei ratou e ora i te hoê vahi haumǎrû, mea au noa te anuvera. Tera râ, e rave rahi feia no te mau motu o te haapeapea nei i te parau no te mahanahanaraa o te fenua e te maraaraa o te miti e nehenehe e tupu mai. Te mǎtaˈu atoa nei te huiraatira no te mau motu haehaa no Tokelau i Patitifa Tooa o te râ, e tae noa ˈtu to te mau motu purara ê no Maldives i te Moana Inidia, e mau motu te faura mai e piti noa metera i nia ˈˈe i te faito o te miti i te taime nanuraa miti.

Fatata e 40 hau faatere taa ê tei tahoê i roto i te amuitahiraa piihia te mau Hau no te mau Motu Iti Navai ore, no te tauturu ia ratou. Noa ˈtu e te ora maoro nei te feia no te mau motu iti e tei raro roa te faito tamarii e pohe nei i ǒ ratou, te farerei noa nei ratou i te mau fifi rahi i te pae no te natura. Te haafifi nei te mau taheraa mori arahu e te viivii o te moana i te faanavairaa faufaa a te tahi mau motu. Area vetahi ra, ua riro mai ïa ei vahi faarueraa pehu taero na te mau nunaa rarahi.

Te haapeapea-atoa-hia ra te hau o te mau motu e faahema nei hoi i te feia imi paradaiso. Nafea? Na roto i te mau ratere e haere rahi mai nei i te mau pae tahatai mahana, e maraa rahi roa ïa te taata i nia i taua mau motu ra e e pau ta ratou mau faufaa haihai. Te faaino roa atoa nei teie mau ratere i te fifi o te haaviiviiraa. Ei hiˈoraa i te mau motu Antilles, hoê noa tuhaa i nia i te ahuru o te mau pape iino e faatupuhia nei e te mau 20 mirioni ratere i te mau matahiti atoa, o te rapaauhia nei.

Mai te reira atoa i te tahi atu mau vahi haviti mau. A rave na i te fenua no Goa i te pae miti tooa o te râ no Inidia. Ua faahiti te vea ra Independent on Sunday no Lonedona e, “‘Te haaviivii nei’ te maraaraa o te mau ratere ‘i te hoê paradaiso.’” Te faaite ra te mau numera i noaa mai, i te hoê maraaraa mai te 10 000 ratere i te matahiti 1972 e hau atu i te hoê mirioni i te omuaraa o te mau matahiti 1990. Te faaara ra te hoê pǔpǔ e te haafifihia ra te natura ino ohie noa no Goa e to ˈna hiroa tumu otahi roa, e te nounou o te mau fatu hotela o te hiaai nei e ia monihia ratou na roto i te haere-rahi-raa mai te mau ratere. Te haapapu ra te hoê tumu parau a te hau Inidia e, ua faatiahia vetahi mau hotela i te pae tahatai, noa ˈtu e ua opanihia e te ture. Ua heruhia te one, ua tâpûhia te mau tumu raau, e ua haamararihia te mau pueraa one. Te faaruehia nei te mau pape iino i nia i te pae tahatai aore ra e tahe atu i roto i te mau vahi varivari e parare atu ai te viivii.

Aita anei e ohipa ino faahou?

Te faaino nei te maraaraa o te ohipa ino i te roo o te mau vahi hau roa ˈˈe o te ao nei. Teie te hoê tumu parau “Taparahiraa taata i te Paradaiso” no ǒ mai i te motu iti no Barbade, i Antilles ma. Ua vauvau huˈahuˈa mai oia i te taparahiraa hairiiri o na taata toomaha i nia i te hoê pahi moni rahi o tei tutauhia i te pae miti o taua motu ra. Na roto i te mau ohipa mai teie te huru, ua rahi atu te tapitapiraa no nia i te parareraa o te ohipa ino i taua mau motu ra.

“O te raau taero te tumu o te mau aroraa i rotopu i te mau pǔpǔ ohipa ino i te ‘Paradaiso,’” o te upoo parau ïa o te hoê tumu parau a te vea ra The Sunday Times no Lonedona no nia i te hoê fenua no Marite no Ropu. Ua autâ te hoê taata nenei vea no taua vahi ra e aita e hau faahou, i te na ôraa e: “I teie nei, e ohipa matauhia ia tia mai oe i te poipoi e ia ite atu oe i nia i te purumu, i te hoê taurearea 16 matahiti e tarava noa ra i roto i to ˈna toto.”

Te feia e tutava nei i te ora amui i roto i te hoê vahi paradaiso, te tiaturi nei ïa ratou e haaputu mai i te feia e farii i te ora ma te hau. Mai te reira mau anei râ? Ua ite na feia faaipoipo Beretane i faahitihia i te omuaraa ra, e aita i maoro roa, ua tupu mai te mau peapea. Ua hinaaro hoi vetahi o te feia i tahoê mai i roto i ta raua opuaraa, ia monihia ratou. “Aita matou e hinaaro nei i te mau raatira,” o ta te tane ïa i parau. “Ta matou fa, o te tahoêraa ïa i ta matou moni ia tere maitai ta matou opuaraa. Te pii nei au i teie faanahoraa, te pǔpǔ taata Utopia.” E ere râ hoi a tahi ra teie huru opuaraa e ravehia ˈi.—A hiˈo i te tumu parau “Mau tamataraa no te ora amui i roto i te Paradaiso.”

Te tiaturi nei vetahi atu feia imi paradaiso e e naeahia ta ratou fa, ia tano ratou i te taviriraa. Mea varavara râ te moni e noaa mai na roto i teie ravea, i te horoa mai i te oaoaraa. I te avaˈe Febuare 1995, ua faatia te vea ra The Sunday Times e, ua farerei te utuafare i tano i te taviriraa moni rahi roa ˈˈe i itehia aˈenei i Beretane, i te mau feiiraa i rotopu ia ratou iho; aita ˈtu apî i noaa mai ia ratou maoti râ “te inoino, te tatamaˈiraa e te oreraa ta ratou moemoeâ i tupu.” E ere hoi i te mea varavara i roto i teie mau huru tupuraa.

I roto i te hoê maimiraa no nia i te tapaparaa te taata i te Utopia, ua vauvau te papai vea ra o Bernard Levin i te “moemoeâ o te ona-oioi-raa,” e ua haapapu oia e: “Mai te rahiraa o te mau moemoeâ, e ohie roa te reira i te riro mai ei moemoeâ riaria. Ehia rahiraa taata o tei ona-oioi-hia e i muri iho, ua farerei ratou i te ati (e ua haapohe atoa ia ratou), e no reira, eita e nehenehe e parauhia e e tupuraa hape noa.”

E te mau pǔpǔ faaroo amaha e tohu nei i te hopea o te ao nei?

Mea riaria roa ˈtu â vetahi mau opuaraa e haamau i te paradaiso. No nia i te haaatiraa te mau mutoi a te hau i te fare a te pǔpǔ Amaa a Davida i te oire no Waco, i te hau no Texas, i te matahiti 1993 ra, ua faataa mai te hoê vea i te “anoiraa atâta roa o te mau pupuhi, te ravea haruraa i te feruriraa, e te hoê peropheta i tohu i te hopea o te ao nei” o tei aratai i taua ati ra. E ere râ hoi i te tupuraa varavara.

Ua faanaho te mau pǐpǐ a Bhagwan Shree Rajneesh, e raatira faaroo Inidia tei pohe iho nei, i te hoê pǔpǔ taata i te hau no Oregon, tera râ, ua faaturori ta ratou mau peu i te manaˈo morare o te huiraatira no taua vahi ra. Inaha, ua faahapa te oraraa moni rahi o to ratou raatira e ta ratou mau peu taiata, i ta ratou parau e ua haamau ratou i “te hoê vahi haapuraa haviti mau.”

E rave rahi mau pǔpǔ faaroo e arataihia nei e te mau taata e titau nei i te paradaiso, o te titau nei e ia rave ta ratou mau pǐpǐ i te tahi mau peu huru ê roa, e i te tahi mau taime, e tupu roa mai te mau faaûraa uˈana. Te faataa ra te papai vea ra o Ian Brodie e: “Te pûpû nei te mau pǔpǔ faaroo i te hoê vahi paruruhia e te hoê totaiete nahonaho maitai, no te feia e manaˈo nei e ua tuuhia ratou i te hiti, aore ra eita ta ratou e nehenehe e faaruru i te mau faaheporaa a teie nei ao.” Noa ˈtu râ, te haapapu ra te mau parau a Brodie e, e rave rahi mau taata o te hiaai rahi nei e ora i roto i te hoê paradaiso.

Te hoê paradaiso aita e fifi faahou

E au ra e eita te mau fifi e pau ia taio: haaviiviiraa, ohipa ino, raau taero, maraaraa o te huiraatira, aroraa nunaa, huenaneraa politita—taa ê atu i te mau fifi matauhia e te huitaata nei, oia hoi te maˈi e te pohe. E faaoti paha vetahi e, aita hoê vahi i nia i teie palaneta, tei riro ei paradaiso aita roa ˈtu e fifi. Mai ta Bernard Levin e faˈi ra: “E au ra e te vai ra te hoê tapao ino i nia i te huitaata nei, e te reira, mai te omuaraa mai â o te huitaata nei. Taua tapao ino nei, o te oreraa ïa e nehenehe e ora amui ma te oaoa ia hau atu i te tahi tau taata noa.”

Teie râ, e tupu mau te hoê paradaiso aita e fifi faahou i nia i te fenua atoa nei. E vai maoro oia auaa maoti te hoê mana hau aˈe i te taata nei. Oia mau, hau atu i te pae mirioni taata o tei haamata ê na i te ohipa e naeahia ˈtu ai taua fa ra, e te fanaˈo nei ratou i teie nei iho i te tahoêraa faufaa rahi e te hoê vahi paruruhia i te fifi i rotopu ia ratou iho. Teihea roa ratou? Nafea outou ia fanaˈo atoa i taua tiaturiraa ra e i te mau haamaitairaa o ta ratou e ite nei i teie taime? E eaha te maororaa o taua Paradaiso i mua nei?

[Tumu parau tarenihia i te api 6]

Mau tamataraa no te ora amui i roto i te Paradaiso

I te omuaraa o te senekele 19, ua haamau te socialiste Farani ra o Étienne Cabet (1788-1856) e e 280 hoa to ˈna i te hoê oire iti i Nauvoo, i te hau no Illinois, ia au i ta ˈna mau fa. Tera râ, e vau matahiti i muri iho, ua peapea ino roa e ua amahamaha ˈtura taua pǔpǔ ra, e mai te reira atoa no te tahi atu mau pǔpǔ i te mau hau no Iowa e no Kalifonia.

Ua faatupu te tahi atu Farani, o Charles Fourier (1772-1837), i te mau manaˈo no te haamau i te hoê pǔpǔ faaapu amui, ma te tauiui to ˈna mau melo atoa i te ohipa. E aufauhia te melo tataitahi ia au i te apî i noaa mai i te taatoaraa o te pǔpǔ. Aita râ i maoro, ua moe atura taua mau pǔpǔ i haamauhia ia au i taua mau reni nei, i Farani e i te fenua Marite atoa.

I taua tau atoa ra, ua faaau te hoê taata no Galles o tei titau i te tauiraa totiale, o Robert Owen (1771-1858), e ia tahoêhia te mau oire iti i reira te mau hanere taata e ora amui ai e e faaohipa ˈi i te hoê â fare utuutu e te hoê â fare tamaaraa. E ora te mau utuafare i roto i to ratou iho fare e e haapao ratou i ta ratou mau tamarii e tae noa ˈtu i te toruraa o te matahiti. I muri iho, na te pǔpǔ taatoa e haapao ia ratou. Aita râ te mau tamataraa a Owen Tane i manuïa, e ua pau te rahiraa o ta ˈna moni.

Na John Noyes (1811-1886) i haamau i te pǔpǔ ta Te buka parau paari Britannica apî (Beretane) e pii ra “te pǔpǔ faufaa amui tei titau i te Utopia, e tei manuïa roa ˈˈe i te fenua Marite.” I te taime râ a faarue ai ta ˈna mau pǐpǐ i te mau faaipoiporaa e te hoê anaˈe hoa, e to ratou faatiaraa e ia taati i te pae tino te feia e farii i roto i ta ratou pǔpǔ, ua tapeahia ˈtura o Noyes Tane ma te parihia i te faaturi.

Laissez Faire City, e “Utopia ona” no Marite no Ropu, o te tahi ïa tamataraa apî no te haamau i te tahi pǔpǔ titau i te Utopia, o ta te vea ra The Sunday Times no Lonedona ïa i faaite. Ua imihia te feia e turu mai i teie opuaraa i te pae moni. Faatianianihia e te tiaturiraa e ora i roto i “te oire semeio o te senekele 21,” ua titauhia ˈtura te feia imi paradaiso ia hapono mai e 5 000 dala Marite e ia imi atoa ratou i te tahi atu feia hoê â opuaraa o te tuu atoa mai i ta ratou moni. Te parauhia ra e, teie moni, no te aufau-noa-raa ïa i te hoê titeti manureva no te haere atu e hiˈo i teie oire, “ia hinaaro noa ˈtu te hoê fenua e horoa mai i te tahi fenua no te paturaa, e te hoê hotela iti e patuhia i reira,” o ta te vea ïa i faataa mai. Eita e nehenehe e tiaturi e e haamauhia te hoê “paradaiso” i reira.

[Hohoˈa i te api 7]

Mea rahi te feia imi paradaiso e moemoeâ nei i te hoê motu. Tera râ, te faaino nei te ohipa ino i teie mahana i te mau vahi hau roa ˈˈe o te ao nei