Te paradaiso: e moemoeâ anei?

Faatiahia e to matou taata papai no te mau motu Vaihi

TE RAˈI ninamu, te mau tahatai one mahanahana, te mau are miti o te fafati maira... Mai te reira anei ta outou faahohoˈaraa i te paradaiso? Te mau tumu haari tei faahautiuti-marû-noa-hia e te mau mataˈi mahanahana, te mau mouˈa heeuri tei haaatihia e te ata, te mau toparaa pape te topa ma te haruru i roto i te pape toetoe o te mau hopuna rii moemoe, te mau anuanua e rave rahi mau peni unauna mau, te mau toparaa mahana nehenehe mau... Mea pinepine e e faahohoˈahia te paradaiso mai teie te huru.

Parau mau, aita te mau taata atoa e ite ra i te paradaiso mai te hoê motu no te mau tropiques. No reira, ua parau te hoê vahine e ora ra i teie nei i roto i te hoê motu no Patifita ma te manaˈonaˈo e: “Te mihi nei au i te mau mahana toetoe au noa o te tau haapoheraa raau, ia ahu te mau tumu raau i te mau peni taa ê mau. Te mihi atoa nei au i te mau pô o te tau toetoe, i reira te mau mea atoa e moe ai i raro aˈe i te hiona tei topa apî mai.”

Noa ˈtu â ïa e mea taa ê ta te hoê taata huru faahohoˈaraa i te paradaiso i ta te tahi, te vai ra te tahi mau mea ta te mau taata atoa e hinaaro nei. Ei hiˈoraa, te hinaaro pauroa nei ratou e ora i pihai iho i te feia ta ratou e here ra. Aore ra, e hinaaro ratou e oaoa i roto i te hau e te ino ore, oia mau, ia ore te mau haapeapearaa o te oraraa o teie nei tau.

Tera râ, mea tano anei ia tiaturi e e nehenehe te hoê paradaiso e tupu mai i teie mahana? Te ravea, o te revaraa anei i roto i te hoê fenua i reira e itehia ˈi te unauna o te natura tei ore â i faainohia?

Te “paradaiso no Patifita”

Noa ˈtu â ïa e i roto i te ao atoa nei, e rave rahi mau vahi unauna mau e nehenehe e parauhia e e paradaiso, o te mau motu Vaihi ïa tei mua roa no te reira tuhaa i roto i te manaˈo o te rahiraa o te mau taata. I teie mahana, te farii nei teie mau motu hau atu i te maha mirioni feia ratere i te matahiti hoê, e ua piihia taua pupu motu ra i te iˈoa nehenehe ra e “paradaiso no Patifita”.

E haafaahiahia roa te rahiraa o te feia e ratere nei i roto i teie mau motu i te mau mea ta ratou e ite ra. Te mau mouˈa, te mau mato e te mau toparaa pape, e mea unauna mau ïa e aita e faaauraa; te moana ninamu ateate, e te mau tahatai one uouo; te mau tiare e rave rahi e te mau tumu raau e horoa i te maa hotu; te haumarû o te matai; e tae noa ˈtu i te mau taata Vaihi, mea maitai roa hoi ratou.

I roto i te mau motu Vaihi, te vai ra iho â te hoê ohipa taa maitai no tera e tera motu. Ei hiˈoraa, i Kauai, “te motu aua tiare”, e nehenehe te feia ratere e mataitai atu i te “Cañon rahi no Patifita”, o te pii-atoa-hia e e Cañon no Waimea. Te mea faahiahia o te motu no Oahu, o to ˈna ïa tahatai tei tui te roo na te ao atoa nei, o Waikiki, tei pihai iho te Diamond Head. I te motu no Maui, te vai ra ïa te vaha o te mouˈa auahi ra Haleakala, te hoê vahi mataitairaa nehenehe e te maere mau i te aahiata. I nia i te motu no Hawaii, “te motu rahi”, e nehenehe e mataitaihia i te tahi mau taime, te pupuhiraa auahi o na mouˈa auahi rahi roa ˈˈe e piti o te ao nei oia hoi te Kilauea e te Mauna Loa. I reira, e ite-atoa-hia te mau tahatai one ereere. I te mau vahi atoa ta outou e haere, e maere roa outou e e oaoa atoa outou ia ite i te mau ohipa faahiahia e te nehenehe mau.

A tiai na râ maa taime iti! Na mua ˈˈe a faaineine ai i to outou mau tauihaa e a afai atu ai i to outou utuafare no te ora i reira e ta outou mau taoˈa, a feruri na mua: E horoa mau anei te mau motu Vaihi i te mau mea atoa no te hoê paradaiso? Mai te peu e aita e hiˈohia te nehenehe o te natura e te unauna o to ˈna mau vahi, e nehenehe mau anei e parauhia e e paradaiso te mau motu Vaihi?

Te hoê anei paradaiso mau?

“Peneiaˈe paha e i te tau tahito ra”, ta te hoê ïa taata no tapone, no roto mai i te piti o te ui tei fanauhia i Vaihi, i pahono mai. “I teie nei râ mahana, te ite nei matou hoê â huru fifi e to te mau fenua atoa oia hoi: te faaapiapiraahia te mau poromu no te rahi o te pereoo, te maraa-rahi-roa-raa te taata, te haaviiviiraa i te reva e te fenua e te taparahiraa taata.” E metua tane oia no te hoê utuafare fetii e toru tamarii, e te parau ra oia e: “No te fifi o te ohipa ore e te maraaraa te hoo o te oraraa, mea fifi roa ïa ia faaamu e ia atuatu maitai i to ˈna utuafare. E hau atu â, te haapeapea atoa nei te mau eiâraa e te mau peu ino i te taata.”

Te pahono ra te hoê taata tei roto i te ohipa tapi hooraa tauihaa, afa tinito e afa vaihi tei ratere rahi na te pae Hitia o te râ o te ao nei, i te fenua Marite e i roto i te Patifita e: “Oia mau, e paradaiso iho â teie mau motu ia faaau-anaˈe-hia i te mau vahi ta ˈu i ratere aˈenei”. “Teie râ, aita ïa e ite-faahou-hia ra te oraraa ohie, hau e te haapeapea ore o te feia Vaihi no mutaa ihora.” A haamanaˈo noa ˈi oia, te parau faahou nei â oia e: “I to ˈu tamarii-rii-raa ra, e haere noa ïa vau i ô te feia tapiri mai i ô matou. E opere noa ïa matou i te mau mea atoa na te tahi e te tahi, e aita te taata e ponao i to ratou fare. I teie nei râ mahana, ua ore ïa taua peu ra. I teie nei, te ora nei te taata i roto i te mataˈu.” Ma te faahiti i te hoê tumu parau aita e faahiti-pinepine-hia, te parau faahou ra oia e: “Te hoê o te mau ati no te mau motu Vaihi i teie mahana, oia ïa te ao o te raau taero o te ohi rahi nei i te taata. Ua taaihia paha te reira i nia i te huru o te mahana, e i te mau fifi o te totaiete taata o to tatou nei tau teie e haapuai nei i te hinaaro i te tahi atu mau mea.”

Te haapapu maitai maira teie mau parau i te huru mau e itehia ra i te mau motu Vaihi, e mai roto atoa i te mau vahi tei parauhia e e paradaiso. No to ratou hoi hiaai i te ora i roto i te hoê ‘vahi aita e fifi’, e rave rahi ïa te mau taata tei horo atu i roto i taua mau motu nehenehe mau ra. Te itehia ra te reira i te fenua Vaihi, eiaha noa na roto i te hoê maraaraa rahi o te taata e te haereraa i mua i te pae faanavairaa faufaa aita i itehia aˈenei — ma te amuihia mai e te mau fifi i te pae totiale — na roto atoa râ i te faainoraa i te natura.

Inaha, te itehia ra te haaviiviiraa o te fenua, e te tahi atu mau fifi i te pae no te natura, i roto i te mau vahi atoa o te fenua nei. Te haapeapea nei te taparahiraa taata, te fifi o te raau taero e te rahi-roa-raa te taata i te mau oire atoa o te ao nei. Te roohia nei te mau taata atoa i te maˈi, te ruhiruhia e te pohe, noa ˈtu e eaha te vahi ta ratou e ora ra.

Mea papu maitai, e ere noa ïa te hoê paradaiso mau i te hoê vahi nohoraa nehenehe mau. Na te mau taata e ta ratou mau peu i roto i te oraraa e faariro i te hoê vahi nehenehe maitai ei paradaiso. E nehenehe outou e ora i roto i te vahi nehenehe roa ˈˈe o te ao nei, teie râ, mai te peu e te itehia ra te taparahiraa taata, te ereraa i te ohipa, te hoo rahi e te tahi atu mau fifi ino mau, aita ïa outou e ora ra i roto i te hoê paradaiso mau.

E tia anei ia parauhia e ua riro te oraraa i roto i te hoê paradaiso mau ei moemoeâ noa? E itehia anei ia tatou i te hoê mahana i te hoê paradaiso mau i nia i te fenua nei — i te ao atoa nei?

Te mau tumu no te tiaturi

Oia mau, e rave rahi te mau taata e tiaturi papu nei i te hoê paradaiso no te ao atoa nei. Ua putapû roa ratou i te mau parau ta Iesu i faaite tau senekele i teie nei, i to ˈna na ôraa e: “Ei paradaiso ïa oe e o vau atoa.” — Luka 23:43.

E moemoeâ anei ta teie mau taata e tiaturi ra, noa ˈtu e eaha te mau tupuraa? Eaha mau na taua paradaiso ra ta Iesu i tapu maira? Nafea oia e riro mai ai ei ohipa mau?

Ua tapu o Iesu i teie mau parau i te hoê taata ohipa iino tei tatarahapa râ, e tei faautuahia i te utua pohe i nia i te hoê pou haamauiuiraa. Ma te mafatu tatarahapa, ua parau ihora taua taata ra e: “E te Fatu, e haamanaˈo mai oe ia ˈu ia tae oe i to oe ra basileia.” Ei pahonoraa, ua parau atura Iesu e: “Ei paradaiso ïa oe e o vau atoa i teie nei â mahana, oia mau ta ˈu e parau atu ia oe nei.” — Luka 23:40-43.

I roto i teie tauaparauraa, ua tapao anei outou e eaha ra te taviri o te Paradaiso? Aita roa ˈtu o Iesu i parau atu i te taata ohipa iino e, te vai ra to ˈna hoê varua pohe ore o te haere, i taua mahana ra, i roto i te hoê paradaiso i roto i te hoê ao ê atu i to tatou nei. Inaha, ua tiai o Iesu ia faatiahia mai oia e te Atua e toru mahana i muri aˈe i to ˈna pohe. Te parau ra ïa oia no te hoê paradaiso e haamauhia a muri atu i nia i te fenua nei ia horoahia mai ia ˈna ra te faatereraa arii. E, te taviri o te Paradaiso, o te Basileia ïa o te Atua, ta Iesu i haapii atu i ta ˈna mau pǐpǐ ia pure e: “Ia tae [mai] to oe ra hau.” — Mataio 6:10.

Nafea râ te Basileia o te Atua ia haamau i te hoê paradaiso i te ao atoa nei? Mea tano anei ia tiaturi e e nehenehe oia e faatupu i te reira i te mea e aita te mau basileia e te mau faatereraa atoa i manuïa i roto i taua tuhaa ra?

E ohipa mai te Basileia o te Atua

Te faaite papu mai nei te Bibilia i te mau raveraa taa ê ta te Basileia o te Atua e faaohipa no te haamau-faahou-raa mai i te Paradaiso i nia i te fenua nei. I roto i te hoê orama tei faaitehia mai i te tau tahito ra, te faataa maira ïa te buka Apokalupo i te ohipa matamua e tupu na roto i teie mau parau e: “I riri na te mau fenua, e ua itea mai to oe riri, e te taime (..) e pohe [haamou] ai ia oe te feia i pohe [ino] ai to te ao ra.” — Apokalupo 11:17, 18.

Ia ite anaˈe te Atua ra o Iehova i te haaviiviiraa o te reva, te pape e te fenua ta te mau nunaa i faatupu na roto i ta ratou faaohiparaa ma te miimii i te mau faufaa o te fenua nei e tae noa ˈtu i te mau tamaˈi ino mau e te taparahi taata, e papu ïa ia tatou e no te aha oia e riri ai e e hinaaro ai e ohipa ia faaea te haerea maamaa o te mau nunaa. No reira oia e ‘haamou ai i te feia e faaino ra i te fenua nei’ na mua ˈˈe a ino roa ˈi. E nehenehe atura ïa te fenua e faaapî maitai ia ˈna iho no te tatairaa i te mau vahi i faainohia e ia riro faahou mai oia ei paradaiso.

E ohipa atoa mai te Basileia i nia i te taparahiraa taata e te feia taparahi taata e faaino nei i te oaoa e te ino ore, mau mea hoi e hinaaro-mau-hia i roto i te Paradaiso. Te parau ra te papai salamo e: “E riro hoi te feia hamani ino ra i te tâpû-ê-hia, o te feia râ i tiaturi ia Iehova ra, no ratou ïa te fenua.” I raro aˈe i te faatereraa a taua Basileia ra, e riro te mau taata atoa ei hoa e ei taata-tupu mau. Eita e ite-faahou-hia te mau ponao, te mau matini faaararaa no te feia eiâ e te mau mutoi. Inaha te tapu maira te Bibilia e: “E oaoa ratou i te rahi o te hau ra”. — Salamo 37:9, 11.

E ore atoa te ruhiruhia, te maˈi e te pohe, te mau enemi ino mau o te oaoa. Te haapapu ra o Isaia e: “E ore hoi to reira e parau e, Ua paruparu vau i te maˈi.” Te tapu atoa maira te Bibilia e: “E e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” — Isaia 33:24; Apokalupo 21:4.

Eaha te nehenehe e parauhia no te mau hinaaro o te taata nei no te oraraa: oia hoi, te maa, te nohoraa e te hoê ohipa maitai? I teie mahana, e mau mirioni taata teie e mauiui nei i te mau ereraa i te pae no te maa e i te oˈe. Te hoê tuhaa rahi roa o te huitaata nei, e oraraa veve roa ïa to ratou e te erehia nei ratou i te ohipa. No te haamau i te hoê paradaiso i te ao atoa nei, e tia ïa ia faaorehia teie mau fifi atoa. E nehenehe anei ta te Basileia e faatupu i te reira? A hiˈo anaˈe na outou i teie faaiteraa faahiahia mau no te oraraa e itehia ˈtu i raro aˈe i ta ˈna faatereraa:

“E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu; mai te mau mahana o te raau nei te mau mahana o to ˈu ra mau taata, e vai taiata te aho o to ˈu ra feia i maitihia i to te mau mea ta ratou i hamani. E ore hoi ratou e ohipa faufaa ore noa; e ore ratou e faafanau i te tamarii pohe noa: e tamarii hoi ratou na tei haamaitaihia mai e Iehova: ratou, e ta ratou atoa ra mau tamarii.” — Isaia 65:21-23.

E ere anei mai teie te huru to outou hiˈoraa i te Paradaiso? Eita teie mau ohipa faahiahia atoa e te vai atura tei faaitehia i roto i te Bibilia e riro ei moemoeâ! Ia parau anaˈe oia no nia i te mau haamaitairaa ta te Basileia e hopoi mai, e haapapu pinepine mai te Bibilia i ta ˈna mau faataaraa na roto i teie mau parau e: “Na te itoito o Iehova sabaota ra teie e rave.” (Isaia 9:7; 37:32). Te haapapu maitai maira te reira e te hinaaro mau ra te Atua ra o Iehova, tei ia ˈna hoi te mana e te puai no te ‘haamâha i te hiaai o te mau mea ora atoa nei’, ia na reira (Salamo 145:16). Oia mau, na roto i te hinaaro o Iehova, ua fatata roa mai te taime e riro mai ai to tatou tiaturiraa i te hoê paradaiso no te ao atoa nei ei ohipa mau.

A ohipa anaˈe na no te Paradaiso

Parau mau, mea fifi rii paha no outou ia faaohipa i teie tiaturiraa faahiahia mau no nia i te hoê paradaiso i nia i te fenua nei. E riro atoa paha outou i te manaˈo e eita te reira e nehenehe e tiaturihia. Tera râ, na te hinaaro i te hau e te oaoa mau tei haamau-hohonu-hia i roto ia tatou iho, e turai ia tatou ia manaˈo e e nehenehe mau tatou e tiai i te Paradaiso. Ua faaite mai te Poiete, tei haamau i roto ia tatou te hinaaro uˈana i teie mau mea, e e niu papu to teie tiaturiraa e e tupu mau oia.

Te haapapu maira te tereraa o te mau ohipa o te ao nei e te tupuraa o te mau parau tohu o te Bibilia e ua fatata roa mai te taime i reira te Atua e haamau faahou ai i te Paradaiso i nia i te fenua taatoa nei. No reira, maoti i te moemoeâ-noa-raa i te hoê paradaiso aore ra i te faaohiparaa i to tatou taime e ta tatou mau faufaa no te tamata i te faatia i to tatou iho paradaiso haavarevare, a rave na i te taime e a faaitoito na no te tuatapapa i ta te Bibilia e parau ra no nia i taua tumu parau ra.

Ua faaite mai Iesu Mesia e eaha te niu no te hoê oraraa oaoa i roto i te hoê paradaiso mau, i te na ôraa oia e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3). Na roto noa ïa i te noaaraa mai te hoê ite papu no nia i te hinaaro o te Atua e i te faaauraa ˈtu i to ˈna oraraa i nia i te reira, e nehenehe ia tatou e ite atu ai i te faatupuraahia taua tiaturiraa ra no te ora i roto i te Paradaiso. Te ohipa ra anei outou no te reira ra mea?

[Hohoˈa i te api 29]

Te ore nei te nehenehe o te paradaiso no Vaihi no te tauiraa rahi o te mau peu e te mau feruriraa.

[Faaiteraa i te fatu o te hohoˈa i te api 29]

Photos Hawaiian Visitors Bureau