Te oaoa nei au i te oraraa i teie nei!

“Ua ite anei oe e e pohe oe?” o ta te taote ïa i ani mai. Te vahi arearea, e piti taime na mua ˈˈe, ua hinaaro mau â vau e pohe. Eiaha faahou râ i teie nei taime. Na ˈu ïa e faatia ˈtu.

UA PAARI au i te tuhaa oire no Long Island, i New York, e taata tataˈu pereoo tuiroo to ˈu papa i reira. E taata etaeta roa oia e mea puai oia i te ohipa tataˈu. E taata iria atoa oia, e mea fifi roa ia faaoaoa ia ˈna. I to ˈna aˈe pae, e vahine hau e te mǎrû o Mama, e no to ˈna mǎtaˈu rahi i te ohipa tataˈu a Papa, eita ta ˈna e nehenehe e haere atu e mataitai ia ˈna ia tataˈu anaˈe.

Ua haapii oioi noa to ˈu tuaane e o vau nei ia mâmu noa i te fare inaha, ohipa matarohia hoi te reira e Mama. E ere râ i te mea ohie. Ua ora noa matou pauroa ma te mehameha ia Papa. Ua ohipa atoa te reira i nia i to ˈu nei huru, e ua tae roa vau i te manaˈo e aita iho â ta ˈu e ohipa maitai aˈe. Ua ere-roa-hia vau i te faatura ia ˈu iho i te taime a mafera ˈi te hoê “hoa” o to ˈu utuafare ia ˈu, i to ˈu taurearearaa ra. I te mea e aita i maraa ia ˈu ia faaruru i to ˈu hepohepo, ua tamata ˈtura vau i te haapohe ia ˈu. O te taime matamua hoi te reira to ˈu manaˈoraa e mea maitai aˈe te pohe.

Ua manaˈo vau e e vahine faufaa ore roa vau, tei ore i herehia, e roohia ˈtura vau i te fifi no te oreraa e amu i te maa, e maˈi e tupu pinepine hoi i nia i te mau vahine apî tei erehia i te faatura ia ratou iho. Ua haamata ˈtura vau i te ora i te hoê oraraa tei î i te faanavenaveraa, te raveraa i te raau taero, te taiataraa, e i te haamaruaraa tamarii—“ma te imi i te here i te mau vahi hape atoa,” ia au i te hoê himene. Ua rave atoa vau i te ohipa faahoro moto, te tataˈuraa pereoo, e te hopuraa i raro i te miti, e ua haere tamau vau i Las Vegas no te pere moni. Ua uiui atoa vau i te hoê taura e ua hauti au i te iri Ouija, aita râ vau i ite i te atâtaraa o te peu hiˈohiˈo.—Deuteronomi 18:10-12.

Hau atu, no to ˈu hinaaro e arearea, ua rave atoa vau i te mau ohipa opanihia e te ture, mai te hooraa i te raau taero e te eiâraa i roto i te fare toa. Ua aratai to ˈu maimiraa i te here e te manaˈo farii o vetahi ê, ia ˈu ia haamatau e rave rahi hoa tane e mau tane momoˈa. Ia anoihia teie mau ohipa atoa, ua noaa mai te hoê huru oraraa atâta aˈe i ta ˈu i manaˈo na.

I te hoê po, i muri aˈe i te inuraa i te ava anoihia e te raau taero i roto i te mau aua o te hoê tahua tataˈuraa, ua faatia ˈtura vau, e ohipa maamaa hoi, i to ˈu hoa tane ia faahoˈi ia ˈu i te fare na nia i te pereoo. I muri aˈe i te moeraa to ˈu hiroa, tei mua vau i te parahiraa, papu maitai ua moe atoa to ˈna hiroa. Ua ara taue noa mai au i te ûraa to mâua pereoo. Ua tapeahia vau i te fare maˈi e mea rahi to ˈu mau pepe, tera râ, ua ora mai au e to ˈu turi atau anaˈe tei ino.

To ˈu hiaai i te tahi mea maitai aˈe

Noa ˈtu e aita vau i tâuˈa rahi roa i to ˈu iho ora, ua haapeapea rahi au no te maitairaa e te mau tiaraa o te mau tamarii e o te mau animala, e no te parururaa i te natura. Ua hiaai au i te ite i te hoê ao maitai aˈe e, no te tamata i te haamau i te tahi, ua turu vau e rave rahi faanahonahoraa ma te itoito. Na teie hiaai i te hoê ao maitai aˈe i aratai na mua ia ˈu ia faaroo i te mau parau a to ˈu hoa rave ohipa, e Ite no Iehova oia. Ua parau noa oia e “teie faanahoraa” ia iria anaˈe oia no te mea aita te ohipa i afaro. Ia ˈu i ani atu e eaha te auraa o teie parau, ua faataa maira oia e, fatata roa, e faaorehia te mau peapea atoa o te oraraa. No te mea e ua faatura rahi au ia ˈna, ua faaroo atura vau ia ˈna ma te anaanatae.

Tera râ hoi, aita mâua i farerei faahou, aita râ i moehia ia ˈu te mau mea o ta ˈna i parau mai. Ua taa ia ˈu e, i te hoê mahana, e tia ia ˈu ia taui roa i to ˈu oraraa no te faaoaoa i te Atua. Aitâ râ vau i ineine atura. Tera râ, ia haamatau noa ˈtu vau i te tahi mau hoa tane, e nehenehe e faaipoipo roa ˈtu, e faaite atu ïa vau ia ratou e ia tae i te hoê mahana, e riro mai au ei Ite no Iehova, e ia ore noa ˈtu ratou e au mai, e taime tano ïa no te faataa.

I te pae hopea, ua hinaaro atura to ˈu hoa tane hopea e ite hau atu â, ua parau mai hoi o ˈna e mai te peu e te anaanatae ra vau, e anaanatae atoa ïa oia. Ua haamata ˈtura mâua i te maimi i te mau Ite. Na ratou râ i ite mai ia mâua, i to ratou haereraa mai i to ˈu fare. Ua haamata ˈtura te hoê haapiiraa Bibilia, i te pae hopea râ, ua maiti to ˈu hoa tane e faaea i te haapii e e hoˈi i ta ˈna vahine ra.

Mea pinepine, e maumau noa ta ˈu haapiiraa Bibilia. Ua mairi te taime hou vau e ite papu ai i te manaˈo o Iehova no nia i te moˈaraa o te ora. I te papuraa râ ia ˈu, ua ite atura vau i te faufaaraa ia faaea i to ˈu mau tere ouˈa na nia mai i te manureva, e i te puhipuhi i te avaava. Ua haafaufaa rahi noa ˈtu â vau i te ora, e ua ineine atura vau i te faaafaro i to ˈu oraraa e i te ore e rave faahou i te mau ohipa atâta. I te 18 no Atopa 1985, ua faataipe au i ta ˈu euhe ia Iehova na roto i te bapetizoraa i roto i te pape. Aita râ vau i ite i taua taime ra e, e fifihia to ˈu oraraa.

Ua hinaaro â vau e pohe

Tau avaˈe i muri iho—i te po o te 22 no Mati 1986—tei mua vau i to ˈu fare, te rave maira vau i ta ˈu ahu tei oti i te puˈahia, no te fare puˈaraa ahu mai, i roto i to ˈu pereoo, i te tere-puai-raa mai te hoê pereoo, ua faaû maira ia ˈu e ua ume ia ˈu i nia i te hoê atearaa hau atu i te 30 metera! Aita râ te pereoo i tapea. Noa ˈtu e ua pepe to ˈu upoo, te ite noa ra vau i te haapaoraa i taua taime atoa ra.

Ma te huri te mata i nia i te repo, i ropu i te purumu i roto i te pouri, hoê noa mea o ta ˈu i mehameha, ia faaû-faahou-hia mai au e te tahi atu pereoo. Mea mauiui rahi mau, hau atu i ta ˈu i nehenehe e faaoromai. Ua pure noa ˈtura vau ia Iehova e vaiiho mai ia ˈu ia pohe. (Ioba 14:13) Ua haere maira te hoê vahine e utuutu maˈi oia. Ua ani atura vau ia ˈna ia faaafaro i to ˈu nau avae, no te mea ua tioi roa. Ua na reira ˈtura oia, e ua taamu haavî atoa oia i to ˈu avae i te hoê pae ahu to ˈna, ia faaea te toto i te tahe mai na roto i te mau fati e rave rahi. Ua itehia mai to ˈu tiaa i te tahi atu anairaa fare, ua î roa i te toto!

Aita te feia i tapea mai i taa e mea na raro noa vau, e ua ani noa mai ratou e teihea roa to ˈu pereoo. Aita vau i ite e mea atea to ˈu umeraahia, ua manaˈo hoi au e tei pihai iho noa vau i to ˈu pereoo! I te taeraa mai te feia utuutu maˈi matamua, ua manaˈo ratou e e pohe au. No reira, ua faaara ˈtura ratou i te mau mutoi, no te mea e hara rahi te haapoheraa i te taata ma te faaû i te pereoo. Ua noaa mai i muri aˈe te taata i faaû mai ia ˈu. Ua taotia ratou i taua vahi ra i te taura ei vahi taparahiraa taata, e ua tavere atura i to ˈu pereoo ei taoˈa haapapuraa. Ua mahuti na opani atoa ra i te hoê pae.

Te faarururaa i te ati

I muri iho, i to ˈu tapaeraa i te fare maˈi, aita vau i faaea i te parau, na roto atoa i te tapoˈi hutiraa mataˈi, e: “Eiaha te toto, eiaha te toto. E Ite no Iehova vau!” Te mea hopea o ta ˈu e haamanaˈo ra, o te paotiraahia ïa to ˈu ahu i muri i to ˈu tua e te faarooraa i te pǔpǔ utuutu maˈi i tuôtuô noa i te mau faaueraa.

I to ˈu araraa mai, ua maere au i te mea e te ora noa ra vau. Ua ara mai au e ua moe faahou to ˈu hiroa. I te mau taime atoa e ara mai ai au, ua ani au i to ˈu utuafare ia faaara i na taata o tei haapii i te Bibilia na muri iho ia ˈu. Aita to ˈu utuafare i mauruuru i to ˈu riroraa mai ei Ite, no reira ua haavare “haamoe” ratou i te faaara ia raua. Ua onoono noa râ vau—tera hoi te mea matamua o ta ˈu i ani i te mau taime atoa e araara mai ai to ˈu mata. I te pae hopea, ua manuïa to ˈu onoono-noa-raa, e i te hoê mahana, i to ˈu araraa mai, tei pihai iho raua ia ˈu. Ua topa to ˈu hau! Ua ite te mau tavini a Iehova e teihea roa vau.

Aita râ to ˈu oaoa i vai maoro inaha, ua haamata to ˈu faito toto i te topa, e ua tupuhia vau i te fiva puai. Ua iritihia te mau ivi i manaˈohia e na ratou e faatupu ra i te haapêraa, e ua tuuhia e maha auri i roto i to ˈu avae. Ua puai faahou râ te fiva, e ua ereere-roa-hia to ˈu avae. Ua pê ïa, e ua titauhia ia tâpûhia to ˈu avae ia ora mai au.

Ua faahepohia vau e farii i te toto

I te mea e ua topa roa to ˈu faito toto, ua manaˈohia e eita e nehenehe e tâpû ia ˈu, mai te peu e aita e pâmuraa toto. Ua faahaerehia mai te mau taote, te mau utuutu maˈi, te mau fetii, e te mau hoa tahito, no te faahepo ia ˈu. Ua faaroo atura vau i te omuhumuhu i muri mai i to ˈu opani. Ua faaroo vau e te opua ra te mau taote e rave i te tahi mea, aita râ vau i papu e eaha râ. Auaa râ, ua faaroo te hoê Ite tei haere mai e hiˈo ia ˈu i taua taime ra, i ta ratou opuaraa e tamata i te pâmu ia ˈu i te toto, noa ˈtu e aita vau i farii. Ua faaara oioi noa ˈtura oia i te mau matahiapo kerisetiano, e ua haere mai ratou e tauturu ia ˈu.

Ua anihia te hoê taote rapaau feruriraa ia haere mai e hiˈopoa i to ˈu feruriraa. Te mea i opuahia, ia faaotihia ïa e aita ta ˈu e parau e nehenehe atu ai ratou e ofati i ta ˈu aniraa. Aita râ i manuïa. I muri iho, ua afaihia mai te hoê ekalesiatiko, o tei farii na i te hoê pâmuraa toto, no te faatiaturi ia ˈu e aita e fifi ia farii i te toto. I te pae hopea, ua titau aˈera to ˈu utuafare i te hoê faaueraa na te tiribuna no te faahepo e pâmu ia ˈu i te toto.

I te area o te hora piti i te aahiata, ua tomo maira te hoê pǔpǔ taote, te hoê patapata parau a te tiribuna, te hoê uitie, te mau paruru a te fare maˈi, e te hoê haava, i roto i to ˈu piha fare maˈi. Ua ravehia ˈtura te haavaraa. Aita vau i faaarahia, aita ta ˈu e Bibilia, aita e auvaha no te paruru ia ˈu, e ua horoa-rahi-hia mai te raau tamǎrû i te mauiui. Eaha te faaotiraa? Ua patoi te haava i te faaueraa a te tiribuna, ma te parau e ua rahi roa ˈtu â hoi to ˈna maere i te taiva ore o te mau Ite no Iehova.

Ua farii te hoê fare maˈi i Camden, i New Jersey, i te tâpû ia ˈu. I te mea e ua riri te mau raatira o te fare maˈi no New York, aita ratou i horoa faahou mai i te huru rapaauraa atoa, e tae noa ˈtu i te raau tamǎrû i te mauiui. Aita atoa ratou i faatia i te manureva tautau ia tau, ia afaihia ˈtu vau i te fare maˈi no New Jersey. Auaa râ, ua ora mai au i te tere na nia i te pereoo fare maˈi. I to ˈu tapaeraa ˈtu, ua faaroo atura vau i te mau parau i faahitihia i te omuaraa o teie aamu: “Ua ite anei oe e e pohe oe?”

Ua manuïa te tâpûraa

No to ˈu paruparu rahi, ua tauturu mai te hoê utuutu maˈi ia ˈu ia tarima i te hoê X i nia i te parau fariiraa i te tâpûraa. Ua tâpûhia to ˈu avae atau i nia ˈˈe i te turi. I muri iho, ua topa to ˈu faito toto i raro mai i te 2, e ua manaˈo te mau taote e ua inohia to ˈu roro. Te tumu, no te mea ïa e aita vau i pahono atu i to ratou piiraa mai i roto i to ˈu tariˈa e, “Virginia, Virginia”—te iˈoa ïa i nia i ta ˈu mau parau fare maˈi. I to ˈu râ faarooraa i te iˈoa ra, “Ginger, Ginger,” i te pii-mǎrû-noa-raahia mai tau taime i muri aˈe, ua araara maira to ˈu mata e ite atura vau i te hoê tane o ta ˈu i ore i ite aˈenei.

E melo o Bill Turpin no te hoê amuiraa a te mau Ite no Iehova i New Jersey. Ua noaa mai ia ˈna i to ˈu iˈoa pii o Ginger—o to ˈu ïa iˈoa i to ˈu oraraa taatoa—i pihai iho i te mau Ite no New York. Ua faahiti oia i te mau uiraa ia nehenehe au e pahono na roto i te amoraa mata, no te mea ua tamauhia vau i nia i te hoê matini hutiraa aho e eita ta ˈu e nehenehe e paraparau. Ua ani mai oia e: “E hinaaro anei oe e ia tamatâ vau i te haere mai e hiˈo ia oe, e ia faaite au i te mau Ite no New York e eaha to oe huru?” Aita vau i faaea i te amoamo i te mata! E mea atâta roa no Taeae Turpin i to ˈna haere-tapuni-raa mai i roto i to ˈu piha, no te mea ua faaue to ˈu utuafare e eiaha e faatia i te mau Ite ia haere mai e hiˈo ia ˈu.

I muri aˈe e ono avaˈe i te fare maˈi, e nehenehe noa ta ˈu e rave i te mau ohipa matauhia i te mau mahana atoa, mai te amuraa i te maa e te purumuraa i to ˈu niho. I te pae hopea, ua tamauhia te hoê avae haavare e ua nehenehe atura vau e hahaere rii e te hoê turutootoo. I to ˈu faarueraa mai i te fare maˈi i te avaˈe Setepa 1986 e to ˈu hoˈiraa ˈtu i to ˈu fare, e ono â avaˈe te maororaa, ua faaea mai te hoê vahine tauturu i pihai iho ia ˈu i te fare.

Te tauturu a to tatou mau taeae

Na mua ˈˈe atoa vau i hoˈi ai i te fare, ua ite mau â vau e eaha te auraa ia riro ei melo no te autaeaeraa kerisetiano. (Mareko 10:29, 30) Ma te here, ua haapao te mau taeae e te mau tuahine, eiaha noa i to ˈu mau hinaaro i te pae tino, i to ˈu atoa râ mau hinaaro i te pae varua. Na roto i ta ratou tauturu here mau, ua nehenehe atura vau e haere faahou i te mau putuputuraa kerisetiano e, i muri iho, e rave atoa i te taviniraa parauhia pionie tauturu.

Ua haavahia te taata i faaû mai ia ˈu i roto noa te tahi tau avaˈe, e ia au i tei matauhia e titauhia e pae matahiti aore ra hau atu, hou e tabulahia ˈi te haavaraa—e ua maere roa to ˈu paruru. E te moni i noaa mai i taua haavaraa ra, ua nehenehe au e haere e faaea i te hoê fare nahonaho aˈe. Hau atu, ua hoo mai au i te hoê pereoo e matini hivi parahiraa huira to roto, e te mau pitopito pata-rima-hia. E, i te matahiti 1988, ua haamata ˈtura vau i te taviniraa pionie tamau, ma te horoa 1 000 hora i te matahiti i roto i te pororaa. I te roaraa o te mau matahiti, ua oaoa vau i te pororaa i te mau tuhaa fenua i te mau hau no Dakota Apatoerau, Alabama, e Kentucky. Ua hemo ia ˈu e 150 000 kilometera na nia i to ˈu pereoo, e te rahiraa, i roto ïa i te taviniraa kerisetiano.

E rave rau ohipa arearea tei tupu i to ˈu faahororaa i to ˈu pereoo uira iti e toru huira. E piti taime to ˈu pereoo i te taahuriraa a poro ai au na muri iho i te mau vahine a te mau tiaau ratere. I te hoê taime, i Alabama, ua hape au i te manaˈoraa e e nehenehe ta ˈu e ouˈa na nia i te hoê apoo pape iti e to ˈu pereoo uira iti, ua marua râ vau e ua î roa vau i te vari. Teie râ, na te manaˈo ataata e te oreraa e manaˈo rahi ia ˈu, i tauturu ia ˈu ia tapea noa i te hoê feruriraa maitai.

Faaitoitohia e te hoê tiaturiraa papu

I te tahi mau taime, mea teimaha mau to ˈu mau maˈi. Ua tia ia ˈu ia faaea i te taviniraa pionie e piti taime tau matahiti i teie nei, no te mea e au ra e ua titauhia ia tâpû atoa i te tahi atu avae to ˈu. E nehenehe â to ˈu avae e tâpûhia, e i roto i na matahiti e pae i mairi aˈenei, ua titauhia vau ia parahi noa i roto i te hoê parahiraa huira. I te matahiti 1994, ua fati to ˈu rima. Ua titau vau i te tauturu no te hopu i te pape, no te oomo i to ˈu ahu, no te tunu i te maa, e no te tamâ, e ua hinaaro vau i te faurao no te haere i te mau vahi atoa. Teie râ, auaa te tauturu a te mau taeae, ua nehenehe au e tamau noa i te taviniraa pionie noa ˈtu teie haafifiraa.

I te roaraa o to ˈu oraraa, ua maimi au i ta ˈu i manaˈo e e oaoaraa rahi, ua taa râ ia ˈu i teie nei e, tei muâ te mau taime oaoa roa ˈˈe. Te tiaturiraa e e faaora te Atua i te mau maˈi atoa e faaruruhia nei i teie tau, i roto i te ao apî e fatata oioi maira, o te mea ïa e faaoaoa ia ˈu ia ora i teie nei. (Isaia 35:4-6) I roto i taua ao apî ra, te tiai ru nei au i te au e te mau tohora e te mau ouˈa, i te haereraa na roto i te mau mouˈa e te liona e ta ˈna mau fanauˈa, e te raveraa i te tahi ohipa ohie roa, mai te hahaereraa na te pae tahatai. Te oaoa nei au ia feruri au i te mau mea atoa ta tatou e fanaˈo e no reira te Atua i poiete ai ia tatou, i roto i te Paradaiso i nia i te fenua nei.—Faatiahia e Ginger Klauss.

[Hohoˈa i te api 17]

I te tau a riro ai te pere moni ei tuhaa no to ˈu oraraa

[Hohoˈa i te api 19]

Na te mau parau tǎpǔ a te Atua e faaitoito ra ia ˈu