Te uiui nei te mau taurearea . . .

Nafea vau ia riro ei hoa no te Atua?

“TAIVA-ORE-RAA.” “Ati-maite-raa.” E mau parau teie e faaohipa-pinepine-hia nei e te taata no te faataa i to ratou here i to ratou mau hoa rahi. Ua ite anei outou e e tano atoa teie mau parau no te faataa i te here i te Poiete Rahi o teie ao hau aˈe i te faahiahia—e e nehenehe te Atua iho e riro ei hoa no outou? Oia mau, te faahiti ra te Bibilia i te parau no te paieti, aore ra te ati-maite-raa ˈtu i te Atua, e ere noa ïa te auraroraa te matara ra na roto i teie pereota, te here-atoa-raa râ i te Atua, te hoê taairaa piri roa no roto mai i te hoê mafatu mehara.

Ua faaite mai te mau tumu parau na te mau taurearea i neneihia aˈenei e, e nehenehe teie huru here e tupu e e mea maitai atoa.a Tera râ, nafea e naeahia ˈi ia outou teie auhoaraa piri roa e te Atua? Eita outou e fanauhia mai e taua huru ra, aore ra eita e noaa noa mai na roto i te mau metua paieti. E noaa mai râ na roto anaˈe i te tutavaraa mau. Ua parau te aposetolo Paulo i te taurearea ra o Timoteo ‘e haamataro hua ia ˈna i te paieti.’ Oia mau, ua tia ia ˈna ia tutava mai te maona e tutava i te haamataroraa! (Timoteo 1, 4:7, 8, 10) E tia atoa ia outou ia na reira, ia hinaaro outou e faahoa ˈtu e te Atua. Tera râ, nafea outou ia haamata i te haamataro i roto i teie nei tuhaa?

Ia ite tatou tataitahi i te Atua

I te mea e e tupu te ati-maite-raa i te Atua i roto i te mafatu, e tia ia outou ia faaî i to outou mafatu i te ite o te Atua. E mea peapea ia parau e, i te uiuiraahia hau atu i te 500 taurearea e, “Ehia taime outou e taio ai i te Bibilia o outou anaˈe?” e 87 % o tei pahono mai e, “i te tahi taime,” “mea varavara roa,” aore ra “aita roa ˈtu.” Te manaˈo nei ïa te rahiraa o te mau taurearea e, mea haumani e mea fiu atoa ia taio i te Bibilia. E ere râ! A feruri na: No te aha vetahi mau taurearea e tamau aau ai i te mau huru numera atoa i te pae tuaro, aore ra e haapii ai i te mau himene au-roa-hia e ratou? No te mea te anaanatae nei ratou i teie mau mea. Mai te reira atoa, e nehenehe outou e anaanatae i te haapii i te Bibilia, mai te peu e e tae to outou manaˈo i nia i teie ohipa. (Timoteo 1, 4:15) Ua faaitoito te aposetolo Petero e: “A faatupu i te hiaai no te û anoi-ore-hia e au i te parau ra.” (Petero 1, 2:2, MN) Oia mau, e tia ia outou ia faatupu i teie huru anaanatae i te mau Papai. E titau paha te reira i te mau tutavaraa, e mea hoona râ ia hiˈohia te mau haamaitairaa e noaa mai.

A tahi haamaitairaa, e faaite mai te taioraa e te haapiiraa i te Parau a te Atua e te mau buka niuhia i nia i te Bibilia, i “te maitai o Iehova.” (Salamo 27:4) Ua haamau te hoê tamahine kerisetiano ra o Amber te iˈoa, ei fa na ˈna, ia taio i te Bibilia taatoa. Ua hope ia ˈna i te taio i roto fatata hoê matahiti. “Ia manaˈo anaˈe au, aita i rahi te mau mea i roto i to ˈu oraraa, o te titau i teie rahiraa taime e teie mau tutavaraa atoa, o te hopoi mai râ i te mau haamaitairaa e rave rahi,” o ta Amber ïa i faaite. “Ia ˈu i taio i te Bibilia, mai te mea ra e te parahi ra vau i nia i te turi o Iehova, e au oia i te hoê metua tane o te haapii maira ia ˈu. Mea rahi ta ˈu i haapii no nia ia Iehova—e mau mea o tei haafatata roa ˈtu â ia ˈu ia ˈna, e o tei turai ia ˈu ia hinaaro e mǎtaˈu ia ˈna i to ˈu oraraa taatoa.”

Ia taio anaˈe outou i te Bibilia, e haapii outou e rave rahi tupuraa i reira to Iehova tururaa i to ˈna mau hoa ma te taiva ore. (Salamo 18:25; 27:10) E ite outou e e mea maitai anaˈe ta ˈna mau ture e e faufaahia tatou e a muri noa ˈtu. (Isaia 48:17) Ia taio outou no nia i te mau huru hau aˈe i te maitai o te Atua, mai to ˈna here e to ˈna paari, e faaitoitohia outou ia hinaaro atoa e pee i to ˈna hiˈoraa. (Ephesia 5:1) Tera râ, ia nehenehe teie mau parau e haaputapû i to outou mafatu, e tia atoa ia outou ia feruri hohonu. Ia taio anaˈe outou, a aniani ia outou iho: ‘Eaha ta teie parau e haapii maira ia ˈu no nia ia Iehova? Nafea vau ia faaohipa i te reira i roto i ta ˈu huru feruriraa e ta ˈu mau ohipa? Nafea te reira ia faaite e, o te Atua te hoa maitai roa ˈˈe o ta ˈu e nehenehe e fanaˈo?’

E tauturu te ite e noaa mai ia outou no nia i te Atua, na roto i te haapiiraa tataitahi e i roto atoa i te amuiraa, ia outou ia haafatata ˈtu â ia ˈna, i roto i te tahi atu tuhaa. Te na ô ra te hoê parau paari Farani e: “E tu te manaˈo o te mau hoa mau.” Tera râ, nafea to outou ‘manaˈo ia tu’ e to te Atua? Te faataa ra te tamahine ra o Denise e: “Ia rahi noa ˈtu oe i te haapii e i te maimi no nia i te hoê tumu parau, i reira oe e ite ai i te manaˈo o Iehova no nia i te reira. E tauturuhia oe ia ite anaˈe oe e eaha to ˈna manaˈo no nia i te hoê mea.”

Mea faufaa roa te haerea parau-tia

Te maiti nei te Atua ei hoa no ˈna, te feia anaˈe e faatura nei i ta ˈna mau ture morare. Te na ô ra te Maseli 3:32 e: “Tei te feia parau-tia ra ta ˈna parau moe.” ‘E haapao hua’ te hoê taurearea e tutava ra i te pee i te haerea parau-tia, i te haere ma ‘te ture a Iehova.’ (Te mau arii 2, 10:31) I roto i teihea faito te hoê taata mai teie te auraro, e haafatata ˈtu ai i te Atua? Ua parau o Iesu Mesia e: “E here mai hoi tau Metua ia ˈna; e e haere atu hoi mâua ia ˈna ra e parahi mau atu i ǒ na ra.” (Ioane 14:21-24) E manaˈo mahanahana mau teie! A feruri na, na taata rahi roa ˈˈe e piti i te ao nei, o te manaˈonaˈo e o te aupuru tamau mai i te hoê taata! O outou ïa taua taata ra, mai te peu e e haapao outou i te haere ma te ture a Iehova.

Te peeraa i te haerea parau-tia, te auraa anei e, eiaha roa ˈtu outou e hape? Eita ïa! Ia hape noa ˈtu outou no te tahi paruparu, e ere ïa te auraa e ua faarue outou i ‘te eˈa o te mau faaueraa a te Atua.’ (Salamo 119:35, MN) A hiˈo na eaha ta te Bibilia e parau ra no nia i te Arii ra o Davida. Noa ˈtu e e hoa taiva ore oia no te Atua, ua rave oia i te mau hapa iino mau no to ˈna paruparu. Noa ˈtu râ, ua parau o Iehova e, ua haere oia “ma te haapao maitai o te aau, e ma te parau-tia.” (Te mau arii 1, 9:4) Ua faaite noa te Arii ra o Davida i te aau tatarahapa no te mau hapa atoa o ta ˈna i rave, e ua tutava puai oia i te rave i te mea i auhia e te Atua.—Salamo 51:1-4.

Noa ˈtu e ua here o Davida i te Atua, ua ite oia e mea fifi roa i te tahi mau taime, ia rave i te mea tia. No reira oia i taparu ai i te Atua e: “E faaite mai oe ia ˈu i te parau mau na oe ra.” Oia, ua faatupu oia i te riaria haavare ore, aore ra te mǎtaˈu, i te raveraa i te hapa i mua i te Atua. No reira o Davida i parau ai e: “Te parau moe a Iehova ra, tei te feia ïa i mǎtaˈu ia ˈna ra.” (Salamo 25:5, 14) E ere te reira i te mǎtaˈu ino, e faatura hohonu râ i te Poiete, e e riaria tano atoa i te haapeapearaa ia ˈna. O teie mǎtaˈu paieti te niu o te haerea tia. E rave anaˈe na i te hiˈoraa o te hoê taurearea kerisetiano o Iosua te iˈoa.

Ua tae mai ta Iosua rata no ǒ mai i te hoê hoa tamahine i te fare haapiiraa, o tei papai mai e mea au roa na ˈna ia Iosua, e te hinaaro ra oia e ia “haamatau” raua. Noa ˈtu e mea au atoa na Iosua teie tamahine, ua taa râ ia ˈna e, e nehenehe te faahoaraa ˈtu e te hoê tamahine no teie nei ao, e aratai i te taiataraa, e e faaino i to ˈna auhoaraa e o Iehova. No reira, ua parau atura oia i teie tamahine ma te huna ore i te parau e, eita oia e hinaaro e haamatau ia ˈna! I muri iho, faatia ˈtura oia i to ˈna mama e mea nafea to ˈna faatitiaifaroraa i teie ohipa, e ua parau aˈera to ˈna mama ma te feruri ore e: “E hoa Iosua, ua mauiui roa paha teie tamahine!” Ua pahono atu râ o Iosua e: “Peneiaˈe, Mama. Mea au aˈe râ na ˈu ia mauiui oia, eiaha râ o Iehova.” Na to ˈna mǎtaˈu paieti, to ˈna riaria e haapeapea i to ˈna Hoa i nia i te raˈi ra, i turai ia ˈna ia tapea noa i to ˈna haerea parau-tia.

Te imiraa i te mau hoa maitatai

Area te tamahine ra o Lynn ra, ua roo-noa-hia oia i te fifi. No te aha hoi? No ta ˈna ïa mau amuimuiraa iino. (Exodo 23:2; Korinetia 1, 15:33) Eaha te ravea? Te imiraa ïa i te mau hoa apî! “Mai te peu e tei rotopu oe i te mau hoa o tei here ia Iehova,” o ta Lynn ïa i faaoti, “e tauturu te reira ia vai araara noa to oe haava manaˈo, e e paruruhia oe i te fifi. Ia parau anaˈe ratou e, aita ratou i au i te tahi ohipa ino, e pee atoa ïa oe i to ratou manaˈo.”

Inaha, ia maiti outou i te mau hoa iino, e riro te reira ei tapeapearaa rahi roa ˈˈe no te faahoa ˈtu e te Atua. Ua farii te potii 18 matahiti ra o Ann: “E mana rahi to te mau hoa i nia ia oe. E riro mai iho â oe mai ia ratou a muri aˈe. E turai ratou ia oe ia feruri mai ia ratou. Te rahiraa o te taime, e paraparau noa ïa ratou no nia i te taatiraa i te pae tino. E hinaaro atoa ïa oe e ite. E hinaaro oe e ite e mai te aha te huru.” Ua haapii o Ann, e ua roohia oia i te fifi. Te na ô ra oia e: “Ua ite au e, e parau mau iho â. Ua taoto hoi au i te hoê tamaroa, e hapû atura vau i te 15raa o to ˈu matahiti.”

I te pae hopea, ua papu ia Ann i te parau mau o teie faaiteraa a te Bibilia: “O te hinaaro e riro ei hoa no teie nei ao, e riro ïa oia ei enemi no te Atua.” (Iakobo 4:4, MN) Oia, ua hinaaro o Ann—e ua imi oia i te ravea—ia riro oia ei hoa no teie nei ao. Tera râ, ua mauiui noa o Ann. Auaa râ, ua faaea o Ann i ta ˈna mau haerea maamaa. Ua tatarahapa hohonu oia i ta ˈna ohipa i rave, e ua ani oia i te tauturu i to ˈna mau metua e i te mau matahiapo o ta ˈna amuiraa. Ua imi atoa oia i te mau hoa apî. (Salamo 111:1) Ma te tutava rahi, ua manuïa o Ann i te riro faahou ei hoa no te Atua. I teie nei, tau matahiti i muri iho, te parau ra oia e: “Ua fatata roa ˈtu â to ˈu mau taairaa e o Iehova.”

Na roto i te haapiiraa tataitahi i te Bibilia, te feruri-hohonu-raa, te haerea parau-tia, e te mau amuimuiraa maitatai, e nehenehe atoa outou e atuatu i te mau taairaa piri roa e te Atua. E tia atoa râ ia tapea noa i taua auhoaraa ra. Nafea e nehenehe ai, noa ˈtu te mau fifi e to tatou mau paruparu? Na te hoê tumu parau i mua nei e tatara mai i te reira.

[Nota i raro i te api]

[Hohoˈa i te api 30]

E tauturu anei to ˈu mau hoa ia ˈu ia riro ei hoa no te Atua?