Ueue ma te roimata, ooti ma te oaoa

“A OAOA i ta outou tau tatuhaaraa i te fenua mahana ra no Paniora!” E mau mirioni taata Europa o tei farii i teie poroi faatianianiraa, e o tei haere e faaea i Paniora. I te 59raa o to ˈu matahiti, ua faaoti atoa vau e hoo i ta ˈu mau taoˈa atoa, e faarue atu ai ia Beretane no te haere i Paniora, e ere râ te mahana e te faafaaearaa o ta ˈu e tapapa ra.

Ua maiti au i te haere i Santiago de Compostela—hoê o te mau oire i te pae tooa o te râ roa no Paniora—no te mea te hinaaro ra vau e tavini ei tiaau ma te taime taatoa, eiaha râ e taraˈi i te mahana. E 22 matahiti na mua ˈtu, ua faahepo te tahi fifi ia ˈu ia vaiiho i ta ˈu taviniraa poro evanelia i Paniora, i reira hoi to ˈu haereraa no te mea te hinaaro-rahi-hia ra taua huru taviniraa ra i reira. Ua opua noa na vau e hoˈi i Paniora, e ua manuïa teie opuaraa i teie nei.

E ere râ i te mea ohie ia haamatau i te oraraa i ǒ nei, mai ta ˈu i manaˈo na. E atiraa to ˈu i te avaˈe matamua! Aita vau e haamanaˈo ra i teie huru rohirohi i to ˈu oraraa taatoa. Tei te pae o te tahua to ˈu faaearaa, e aita e piha hiviraa taata. I te mau mahana atoa, e rohirohi na vau i te haere na nia i te mau aroâ haapaiuma no Santiago, ma te tauma e rave rahi eˈa no te tamata i te poro i te parau apî maitai i te rahiraa taata e nehenehe. I muri aˈe i taua avaˈe rohirohi mau ra, ua haamata ˈtura vau i te feaa. Ua tano anei ta ˈu faaotiraa? Ua ruau roa anei au no teie huru ohipa?

I te piti râ o te avaˈe, ua hoˈi faahou mai to ˈu puai. Mai te aho apî ïa o te hoê taata horo atea. Inaha, ua riro atura ei hoê o te mau taime oaoa roa ˈˈe o to ˈu oraraa. Ua haamata vau i te ite i te oaoa o te ootiraa, i muri aˈe e rave rahi matahiti to ˈu ueueraa ma te roimata. (Salamo 126:5) E faatia ˈtu na vau.

E taime oaoa

Ua haere mâua ta ˈu vahine ra o Pat, e faaea i Paniora i te matahiti 1961 ra. I taua tau ra, aita te taviniraa a te mau Ite no Iehova i roto i tera fenua, i faatiahia e te ture. Noa ˈtu râ, ua tonohia mâua no te poro i te oire mahana ra o Séville, i reira tau 25 anaˈe taata e poro ra.

I roto i ta mâua taviniraa i te hoê mahana, ua paraparau vau e te hoê taata Farani e peni ra i te hoê fare. I te mahana i muri iho, ua haere mai te hoê vahine e farerei ia mâua ta ˈu vahine, e ua ani mai oia e, ua paraparau anei mâua i te hoê taata peni fare i te mahana na mua ˈtu. Ua parau mai oia e, o ta ˈna ïa tane, o Francisco. Ua faataa pauroa mai ta ˈna tane i to mâua hohoˈa e ua taa oioi noa oia ia mâua. “Tei te fare oia i teie nei mai te peu e e hinaaro orua e farerei ia ˈna,” o ta ˈna ïa i parau mai.

Aita mâua i faataere e ua haere atura mâua, e aita i maoro i muri iho, ua haapii te utuafare taatoa i te Bibilia e o mâua. Tau taime i muri iho, ua hoˈi atura o Francisco i Farani no te tahi mau tumu i te pae moni. Ua haapeapea mâua. E faaea anei oia i te farerei i te mau Ite no Iehova? Aita râ i maoro i muri aˈe i to ˈna revaraa, ua papai mai oia i te hoê rata o tei faatopa i to mâua hau. Te na ô ra oia e, ua uiui mai ta ˈna paoti ohipa apî ia ˈna e ehia haapaoraa i Paniora.

“E piti, te Katolika e te Porotetani,” o ta Francisco ïa i faataa ˈtu ma te haapao maitai i ta ˈna parau. No te mea aitâ ta matou ohipa i faatiahia ˈtura e te ture, ua manaˈo oia e e mea hau aˈe ia ore ia faarahi roa i te parau.

“Ua papu ia oe e aita ˈtu?” o ta ta ˈna paoti ohipa ïa i ani mai.

“I te parau mau, e toru,” o ta Francisco ïa i pahono atu, “e no roto vau i te toru—te mau Ite no Iehova.”

“Maitai roa,” o ta ta ˈna paoti ohipa ïa i parau. “E tavini au i roto i te amuiraa o to oe vahi!” I taua po iho ra, ua haere atura o Francisco i te putuputuraa i te amuiraa a te mau Ite no Iehova.

I te matahiti 1963, ua tonohia mâua mai Séville mai i Valence, e i muri noa iho, i Barcelone. I reira, ua faaineinehia vau no te tavini ei tiaau ratere. E ua tono-faahou-hia ˈtura mâua i Valence no te tavini i roto i te ohipa tiaau ratere i taua vahi ra. Tau matahiti râ i muri aˈe i to mâua raveraa i taua ohipa faahiahia mau ra, ua haamata ˈtura o Pat i te fifihia no te haere afaro. E i muri iho, ua fifihia o ˈna no te haere. I reira te haamataraa te tau ‘i ueue ai mâua ma te roimata.’—Salamo 126:5.

E taime taˈiraa

Ma te aau tae ore, ua faarue atura mâua ia Paniora no te rapaau ia Pat i Beretane. Eaha hoi to ˈna maˈi? Te maˈi parauhia sclérose en plaques, e maˈi ino roa teie o te haaparuparu mǎrû noa i te hoê taata. No te mau faahopearaa e te mau fifi o teie maˈi, e pohe te taata i muri iho.

Mea fifi roa no mâua ia faatano i to mâua oraraa e no te farii i taua maˈi ra. I roto râ i teie ati taatoa, ua haapii mâua i te parau mau o te faaiteraa a te papai salamo: “Na Iehova e faaetaeta mai ia ˈna [te taata o te hamani maitai i te taata riirii ra] i tana roi maˈi ra.”—Salamo 41:3.

Tau ahuru matahiti to mâua tauiui-noa-raa i te fare. Mea fifi roa hoi no Pat ia faaoromai i te maniania, no reira, ua tamata mâua i te imi i te tahi vahi maitai aˈe no ˈna—ua papu râ ia mâua i te pae hopea e, aita iho â e vahi maitai aˈe. Ua tia ˈtura ia Pat ia haamatau i te haere na nia i te hoê pereoo turairai. Noa ˈtu e e nehenehe ta ˈna e tunu i te maa e e rave i te tahi atu mau ohipa, ua hepohepo roa oia no te mea eita ta ˈna e nehenehe e haere maitai. E vahine ohipa roa hoi oia na mua ˈˈe, e ua peapea noa oia i to ˈna hapepa.

Te puai ma te roimata

Ua haapii au nafea ia tauturu ia Pat ia tia mai i nia, ia parahi, ia faanehenehe ia ˈna, ia faahopu ia ˈna i te pape, e ia paiuma e ia pou mai nia mai i te roˈi. E mea fifi mau te haere-tamau-raa i te mau putuputuraa kerisetiano. E tutavaraa rahi hoi no mâua ia faaineine. Ua ite râ mâua e, hoê anaˈe ravea no te vai puai noa i te pae varua, te tahoêraa ˈtu ïa e to mâua mau taeae kerisetiano.

Hoê ahuru ma hoê matahiti to ˈu haapaoraa ia Pat i te fare, a rave noa ˈi au i te ohipa ei taata papai hohoˈa fare i te ao. I te pae hopea, ua taa ˈtura ia mâua e, no te ino o to ˈna maˈi, e tia ia ˈna ia fanaˈo i te tahi utuuturaa taa ê, o te ore e maraa ia ˈu ia horoa. No reira, ua faaea ˈtura oia i te fare maˈi i te hebedoma, e na ˈu i haapao ia ˈna i te fare i te mau hopea hebedoma.

I te mau Sabati atoa i muri aˈe i te taime tamaaraa, e afai na vau ia Pat i te Putuputuraa Huiraatira e te Haapiiraa o Te Pare Tiairaa, i taua taime ra, tera anaˈe hoi te mau putuputuraa o ta ˈna e nehenehe e haere. I muri iho, e faahoˈi ïa vau ia ˈna i te fare maˈi. Mea rohirohi roa no ˈu, tera râ, mea hoona, no te mea na te reira i haapuai noa ia Pat i te pae varua. I te tahi mau taime, ua aniani au e ehia maororaa ta ˈu e nehenehe e tapea, ua horoa mai râ o Iehova i te puai no te haere noa i mua. I te mau poipoi Mahana maa atoa, e aratai na vau i te hoê pǔpǔ i roto i te pororaa, e i muri iho, e haere atu ïa vau e tii ia Pat i te fare maˈi. I taua taime hepohepo atoa ra, ua ite au e na ta ˈu mau peu kerisetiano matauhia i tauturu ia ˈu ia haere noa i mua.

I taua taime atoa ra, ua rave o Pat i tei maraa ia ˈna no te poro i te parau apî maitai. I te fare maˈi, ua haamata oia e piti haapiiraa Bibilia e te mau vahine utuutu maˈi o tei haapao ia ˈna. Hoê, o Hazel te iˈoa, ua haere roa oia i mua e tae roa ˈtu i te pûpûraa ia ˈna iho no Iehova. Tera râ hoi, aita o Pat i tae i te bapetizoraa o Hazel no te mea ua pohe oia na mua iti noa ˈˈe, i te 8 no Tiurai 1987.

Ua riro te poheraa o Pat ei tamǎrûraa e ei otoraa atoa. E tamǎrûraa no te mea aita oia e mauiui faahou ra, tera râ, e oto rahi to ˈu i te moeraa to ˈu hoa. Ua moemoe roa vau i to ˈna poheraa.

E oaoa apî

Mea huru ê paha ia hiˈohia, tera râ, ua faaoti aˈena mâua o Pat e eaha ta ˈu ohipa e rave i muri iho. Ua ite hoi mâua e, ua fatata roa oia i te pohe, e ua paraparau mâua e nafea vau ia tavini maitai aˈe ia Iehova i muri aˈe i to ˈna poheraa. Ua faaoti amui mâua e, e hoˈi atu vau i Paniora, te tuhaa taviniraa o ta mâua i faahepohia ia faarue.

E toru avaˈe i muri aˈe i te poheraa o Pat, ua tere atu vau i te amaa a te mau Ite no Iehova i Paniora, no te ani ihea vau e nehenehe ai e tavini. Ua nominohia vau ei pionie taa ê e ua tonohia vau i te oire tahito e mea ûa hoi no Santiago de Compostela.

Aita i maoro i muri iho, ua tae mai ta ˈu rata no ǒ mai i te amaa, e ua horoa mai ratou i te vahi nohoraa o te hoê taata anaanatae, o Maximino te iˈoa. E toru hebedoma to ˈu tamata-noa-raa i te farerei ia ˈna i to ˈna fare, e i te pae hopea, ua farerei atura mâua. Ua noaa ta Maximino, e rave ohipa oia i te hoê fare maˈi, te api parau iti ra Te hoê oraraa hau i roto i te hoê ao apî e ua ani atura oia i te buka ra E nehenehe oe e ora e a muri noa ˈtu i roto i te paradaiso i nia i te fenua nei.a I to ˈu farereiraa ia ˈna, ua taio aˈena oia i te buka e toru taime. Ua tatarahapa oia no te mea aita oia i taio rahi roa i te Bibilia—hoê noa taime to ˈna taioraa i te ‘tuhaa tahito’ e e piti taime te ‘tuhaa apî.’ Ua rave oia i teie mau taioraa atoa, a tiai noa ˈi e ia haere mai te hoê taata e hiˈo ia ˈna.

Ua parau atoa mai oia e, ua haere oia i te Piha no te Basileia ma te hinaaro e haere i te hoê o ta matou mau putuputuraa. Tera râ, no to ˈna mamahu, aita oia i tomo atu i roto i te vahi putuputuraa. Ua haamata ˈtura vau i te hoê haapiiraa Bibilia e o ˈna, e ua haere mai oia i te mau putuputuraa i taua hebedoma ra. Ua farii oioi noa oia i te parau mau, tera râ, mea fifi roa na ˈna ia faaea i te puhipuhi i te avaava. Auaa râ te tauturu a Iehova, ua manuïa ˈtura oia i te faaea i taua peu puhipuhi avaava ra, e e Ite bapetizohia oia i teie nei.

Te oaoa rahi i muri aˈe i te roimata rahi

Hoê noa matahiti i muri aˈe i to ˈu hoˈiraa mai i Paniora, ua anihia vau ia tavini faahou ei tiaau ratere. Tera râ, hou vau a haamata ˈi i teie taviniraa, ua tupu te hoê tauiraa manaˈo-ore-hia i roto i to ˈu nei oraraa. Ua farerei au i te hoê pionie o Paquita te iˈoa, te tavini ra oia i pihai iho i Santiago. E vahine ivi oia, e rave rahi matahiti to ˈna taviniraa ma te taime taatoa. Ua ite aˈera mâua e mea afaro roa mâua. I te matahiti 1990, e ono noa avaˈe i muri aˈe i to ˈu haamataraa i te ohipa tiaau ratere, ua faaipoipo atura mâua—e oaoa faahou â ïa.

Mai ia ˈu atoa, ‘ua ueue’ o Paquita ‘ma te roimata.’ Ua roohia oia i te ati i te tau a rave ai oia i te taviniraa pionie taa ê no te taime matamua. A afai ai oia i te mau tauihaa fare i to ratou vahi faaearaa apî i Orense, ua pohe ta ˈna tane i roto i te hoê ati purumu—ua û oia i nia i te hoê pereoo utaraa rahi i tere mai i to ˈna pae. Ua tae aˈena o Paquita e ta ˈna tamahine hoê ahuru matahiti, i Orense i te faaararaahia mai e ua pohe ta ˈna tane. Noa ˈtu teie moeraa mauiui mau, e piti mahana i muri aˈe i te hunaraa maˈi, ua haamata o Paquita i ta ˈna taviniraa mai tei opuahia.

A mairi noa ˈi te mau matahiti, ua tamau noa o Paquita i ta ˈna taviniraa ma te taime taatoa. I muri aˈe, ua tupu faahou te ati. Ua pohe ta ˈna tamahine e 23 matahiti i tera taime, i roto i te tahi â ati purumu. E mauiui rahi ïa, e mea maoro to ˈna otoraa. Mai i mutaa ihora, na ta ˈna mau peu kerisetiano matauhia e te turu no ǒ mai i te mau hoa kerisetiano, i tauturu ia ˈna ia tamǎrû i to ˈna mauiui. Ua farerei au ia Paquita i te matahiti 1989, e piti noa matahiti i muri aˈe i te poheraa ta ˈna tamahine.

Mai to mâua faaipoiporaa mai â i te matahiti 1990 ra, ua tavini mauâ i roto i te ohipa tiaau ratere i Paniora. Noa ˈtu e ua riro teie mau matahiti hopea nei, ei hoê o te mau tau oaoa roa ˈˈe o to mâua oraraa, aita mâua e tatarahapa ra i te faarururaa i te mau tamataraa. Te tiaturi nei mâua e ua riro te reira ei haamataroraa maitai no mâua.—Iakobo 1:2-4.

Te mau haapiiraa o ta ˈu i huti mai

Te tiaturi nei au e e vahi maitai iho â to te mau tamataraa iino roa ˈˈe, no te mea e haapiiraa ta tatou e nehenehe e huti mai. Hau atu râ, ua haapii mai te mau tamataraa ia ˈu i te faufaaraa o te iteraa i te huru o vetahi ê, e huru faufaa roa hoi no te hoê tiaau kerisetiano. Ei hiˈoraa, aita i maoro aˈenei, ua paraparau vau e te hoê taeae kerisetiano e tamarii huma ta ˈna. Ua taa maitai ia ˈu i te tutavaraa rahi o ta ˈna e rave ra i te mau hebedoma atoa, no te afai mai i ta ˈna tamaiti i te mau putuputuraa atoa. I muri aˈe i ta mâua aparauraa, ua haamauruuru mai oia ia ˈu e ua parau mai oia e, a tahi ra te hoê taata i taa maitai ai i te mau fifi o ta ˈna e ta ˈna vahine e farerei ra.

Te tahi atu haapiiraa faufaa roa o ta ˈu i huti mai, o te turuiraa ïa i nia ia Iehova. Ia tere maitai te mau ohipa atoa, e tiaturi iho â tatou i to tatou iho puai e to tatou iho aravihi. Tera râ, ia tamau noa te hoê tamataraa tera matahiti i muri aˈe i te tahi, eita ta oe e nehenehe e faaruru na nia i to oe iho puai, i reira ïa oe e haapii ai i te turui i nia ia Iehova. (Salamo 55:22) Auaa te rima tauturu a te Atua i nehenehe ai au e haere noa i mua.

Parau mau, e ere te auraa e e mea ohie i te mau taime atoa. E tia ia ˈu ia farii e, i te poheraahia ta ˈu vahine matamua i te maˈi, ua riri roa vau i te tahi mau taime, e ua inoino atoa vau i to ˈu huru tupuraa, ia rohirohi iho â râ vau. I muri aˈe râ, e tatarahapa vau no teie mau manaˈo to ˈu. Ua paraparau atu vau e te hoê matahiapo hamani maitai o tei rave i te ohipa i te pae no te rapaauraa i te feia i roohia i te mau maˈi maoro. Ua haapapu mai oia e mea maitai roa ta ˈu huru raveraa, ia hiˈohia to ˈu mau huru tupuraa e, e mea matauhia ia iria te mau taata tia ore, ia faaruru anaˈe ratou i te hepohepo rahi i roto i te hoê tau maoro.

Noa ˈtu e te oaoa rahi nei mâua o Paquita i ta mâua taviniraa ma te taime taatoa, aita vau e manaˈo ra e e hiˈo mâua i ta mâua mau haamaitairaa mai te mea e mea topa noa mai. Ua haamaitai mai Iehova ia mâua na roto e rave rau mau ravea, e ua horoa mai oia i te hoê ohipa anaanatae mau, o ta mâua e nehenehe e rave amui. I te roaraa o te mau matahiti, ua ueue mâua toopiti atoa ra ma te roimata, i teie nei râ, auaa o Iehova, te ooti nei mâua ma te pii oaoa.—Faatiahia e Raymond Kirkup.

[Nota i raro i te api]

[Hohoˈa i te api 27]

Te oaoa amui nei mâua o Paquita i ta mâua taviniraa