A paruru i to outou tariˈa!

UA UIUIHIA iho nei e 400 taurearea i Farani, e ua itehia 1 taurearea i nia i te 5 o tei turi te tariˈa. Ua ravehia te hoê â maimiraa tau ahuru matahiti na mua ˈtu, e ua itehia 1 noa taata apî i nia i te 10 o tei turi te tariˈa. No te maraaraa rahi o te tariˈa turi i ǒ te feia apî, ua faaoti te Apooraa Rahi no Farani i te matahiti i mairi aˈenei, ia taotia i te faito puai o te taˈi o te mau upaupa i te 100 décibel.

Te faahapa-rahi-hia ra te mau faito taˈi puai o te mau taoˈa faaroo e tamauhia i nia i te tariˈa, o te mau upaupa, i turi ai te tariˈa. Te parau ra te taote tâpû i te tariˈa ra o Jean-Pierre Cave e e nehenehe te mau faito puai hau atu i te 100 décibel e faaino roa i muri iho tau hora noa. E tupu teie huru faainoraa i roto noa tau minuti ia hau atu te faito puai i te 115 décibel. Te parau ra te FNAC, te hoê fare toa hoo rahi i te mau tauihaa uira no Farani, e te rahiraa o ta ˈna mau upaupa ua hau atu ïa i te 100 décibel. E nehenehe te tahi mau upaupa e naeahia 126 décibel, oia hoi 400 taime puai aˈe i te 100 décibel!

E nehenehe atoa te mau hautiraa upaupa rock e faaino rahi atu â i te feia apî i te mau upaupa iho, ia au i te taote aravihi no te tariˈa no Farani, o Christian Meyer-Bisch. Oia mau, ua turi rahi aˈe te tariˈa o te feia e haere tamau ra i te mau hautiraa upaupa rock, ia faaauhia e te mau taurearea oraora maitai 18 matahiti. E ere i te mea maere i faaara ˈi te tepute o te Apooraa Rahi no Farani, o Jean-François Mattei e: “Te faatupu nei tatou i te hoê ui tariˈa turi.”

No reira no te paruru i to outou tariˈa, a ara i te faito puai!