Faaoreraa i te mau manaˈo hape no nia i te mau Ite no Iehova

A RAVE noa ˈi raua i ta raua ohipa pororaa na te mau fare, ua farerei e piti Ite no Iehova i te hoê taata tei parau mai e aita o ˈna e anaanatae ra. Haere mǎrû noa ˈtura nau Ite ra, tera râ, a haere noa ˈi raua na te hiti purumu, ite atura raua e te apee maira taua taata ra ia raua. “E e, eiaha na e ru!” o ta tera taata ïa i tuô mai. “Te hinaaro nei au e tatarahapa. Aita vau i ite e o vai te mau Ite, e te manaˈo nei au e e rave rahi taata tei ore i haamaramarama-maitai-hia no nia ia outou.”

I muri iho, ua faaite mai taua taata ra e o Renan Dominguez to ˈna iˈoa, te peretiteni o te porotarama no te Rotary Club no San Francisco Apatoa, i Kalifonia. Ua ani mai oia e e haere mai anei te hoê Ite i te taatiraa e horoa i te hoê oreroraa parau no nia i te mau tiaturiraa e te mau ohipa a te mau Ite no Iehova. Ua faanahohia te hoê tabula ohipa. E paraparau te Ite e 30 minuti te maoro e i muri iho e pahono o ˈna i te mau uiraa a te feia i putuputu mai. Ua anihia ia Ernest Garrett, e Ite oia e rave rahi matahiti i te tuhaa fenua no San Francisco, e paraparau i te Rotary Club i te 17 no Atete 1995, e teie ta ˈna i parau:

“Ua uiui au e ua pure noa vau e eaha ta ˈu e parau i mua i te mau melo o te Rotary Club, e mau raatira tapihoo e o te oire ratou, mai te feia rave ohipa i te fare moni, te mau paruru, e te mau taote. Ua rave au i te tahi maimiraa e ua ite au e te tapao i faaitehia a te Rotary Club, o te haapuairaa ïa i te huiraatira. Ua faaite atura ïa vau i te haamaramaramaraa i te api 23 o te vea iti ra Te mau Ite no Iehova o te senekele 20 (Farani), i te tumu parau ra ‘Te mau tauiraa ta te parau apî maitai e nehenehe e faatupu i ǒ te mau taata atoa.’”a

“Ua faataa vau e te ohipa nei te mau Ite no Iehova i roto i taua tuhaa ra. I te mahana taitahi o te hebedoma, te haere nei te mau Ite no Iehova e patoto na te mau uputa o to ratou vahi. To ratou hinaaro, o te faaitoitoraa ïa i to ratou mau taata tapiri ia ohipa no te fanaˈo i te hoê utuafare puai—e te faatupu ra te hoê utuafare puai i te hoê huiraatira puai. A rahi noa ˈtu â te mau taata e te mau utuafare o ta te mau Ite no Iehova e faaitoito nei ia ora ia au i te mau faaueraa tumu kerisetiano, e iti mai ïa te mau ohipa iino, te taiata, e te taparahiraa taata i rotopu i te huiraatira. Ua farii maitai mai te mau melo i teie haamaramaramaraa, no te mea te tuea ra te reira e te mau tapao a te Rotary Club.”

“No te aha outou e ore ai e faaô i roto i te mau ohipa politita?”

“I te matararaa te putuputuraa no te mau uiraa, teie te hoê o te mau uiraa matamua: ‘No te aha outou e ore ai e faaô i roto i te mau ohipa politita e i roto i te faatereraa?’ Ua na ô â te taata i ui mai i teie uiraa e: ‘Ua ite oe, te parau ra te Buka Moˈa: “E hopoi maori i ta Kaisara ia Kaisara ra.”’ Ua parau atura vau ia ˈna e te tu taatoa nei to matou manaˈo e taua mau parau ra e te farii taatoa nei matou i te reira. Ua faaite au e te rahiraa o te mau taata o ta ˈu i faaroo i te faahitiraa i taua irava ra, aita roa ˈtu ïa ratou e faahiti ra i te tahi atu tuhaa o te irava, e na ô ra: ‘Ta te Atua ra, e hopoi â ïa i te Atua ra.’ (Mataio 22:21) No reira, e tia ia tatou ia faaoti e e ere na Kaisara te mau mea atoa. Te vai ra te tahi mau mea, na te Atua ïa. To mua tatou i te tupuraa ia ite eaha te mau mea a Kaisara e eaha te mau mea a te Atua.

“Ua faaite au ia ˈna e i to Iesu aniraahia e ‘E mea au anei i te ture ia hopoi i te moni aufau na Kaisara, e aore anei?’ aita o ˈna i pahono e oia aore ra eita. Ua na ô oia e: ‘A faaite mai na i te moni aufau,’ te hoê moni veo no Roma. Ua ani oia e: ‘No vai teie nei hohoˈa e te parau?’ Ua pahono mai ratou e: ‘No Kaisara.’ Ua parau atura oia i muri iho e: ‘E hopoi maori i ta Kaisara ia Kaisara ra.’ (Mataio 22:17-21) Oia hoi, e aufau i te tute ia Kaisara ra, no te mea te fanaˈo nei tatou i te tahi mau tauturu no ǒ mai ia Kaisara ra e te aufau nei tatou i te mau tute e au no te reira. Ua faataa vau e te aufau nei te mau Ite no Iehova i ta ratou mau tute e aita ratou e eiâ ra i te mau mea iho â a te faatereraa.

“I muri iho, ua parau atura vau e aita te mau Ite no Iehova e manaˈo ra e tei ia Kaisara ra to ratou ora. Te manaˈo nei ratou e o te Atua ta ratou e haamori, e o te reira o ta ratou e faahoˈi ra ia ˈna ma te tano. No reira, ia rave anaˈe matou i teie tiaraa, aita matou e hinaaro ra e faaite i te faatura ore ia Kaisara. Te auraro nei matou i te mau ture atoa a Kaisara, ia tupu anaˈe râ te aimârôraa, te maiti nei matou ma te tura i te auraro i te Atua ei faatere eiaha râ te taata. Ua na ô atura te taata i ui mai i teie uiraa, i mua i te pǔpǔ taatoa: ‘Eita ta ˈu e nehenehe e patoi i te reira!’

“Ua nehenehe atoa matou e pahono e rave rahi uiraa no nia i ta matou ohipa pororaa. I muri aˈe i te putuputuraa, e rave rahi o te mau melo tei haere mai e farerei ia matou e tei aroha mai e ua parau mai e te farii taatoa ra ratou i to matou mau manaˈo—oia hoi o te utuafare te niu o te hoê huiraatira puai. Ua horoa ˈtura matou na te melo taitahi te vea iti ra Te mau Ite no Iehova o te senekele 20.

“I muri aˈe i teie putuputuraa, ua taniuniu mai te peretiteni o te porotarama ra o Dominguez Tane, e ua ani mai ia haere au i ta ˈna piha ohipa, no te mea e mau uiraa atu â ta ˈna no nia i ta matou mau tiaturiraa. Ua tauaparau maitai mâua i nia e rave rahi irava. Ua hinaaro iho â râ o ˈna ia faataa vau ia ˈna i to matou tiaraa no nia i te toto. O ˈna iho, aita o ˈna e farii i te pâmuraa, e no to ˈna faahiahia i te haamaramaramaraa o ta ˈu i horoa ˈtu no roto mai i te vea iti ra Nafea te toto ia faaora i to outou ora?, ua ani mai oia ia ˈu ia hoˈi faahou mai e ia paraparau i te mau melo o te taatiraa no nia i to matou tiaraa no nia i te toto. Ua ani au i te tahi atu Ite, o Don Dahl, ia apiti mai e o vau i roto i te porotarama. Te haere nei o ˈna i te mau fare maˈi no te paraparau i nia i te tumu parau e te mau taote ia tapeahia te mau Ite no te tâpû. Ua faataa taatoa mâua toopiti e mea nafea matou ia paraparau i te mau taote e te mau faatere o te fare maˈi no te haamaramarama i to matou tiaraa no roto i te mau Papai e no te pûpû atu i te mau ravea manuïa e mono i te pâmuraa toto.”—Levitiko 17:10-12; Ohipa 15:19-21, 28, 29.

‘Te auraa anei e vaiiho oe i ta oe tamaiti ia pohe?’

“I muri aˈe i te putuputuraa, ua haere mai te hoê taata e ua ani mai ia ˈu o mâua anaˈe: ‘Te auraa anei e vaiiho oe i ta oe tamaiti ia pohe ia farerei noa ˈtu o ˈna i te hoê ati e ia faahoro-ru-hia o ˈna i te fare maˈi, e te mâuˈa rahi ra to ˈna toto?’ Ua haapapu vau ia ˈna e te taa ra ia ˈu to ˈna peapea, no te mea e tamaiti atoa ta ˈu e ua pohe oia i roto i te manureva i paaina i nia ia Lockerbie, i Ekosia, i te matahiti 1988. No te pahono i ta ˈna uiraa, ua parau atu vau ia ˈna na mua e e eita vau e hinaaro ia pohe ta ˈu tamaiti.

“E ere matou i te feia patoi i te taote, i te rapaauraa, aore ra i te fare maˈi. E ere matou i te mau taata faaroo o te faaora i te maˈi. Te hinaaro nei matou i te mau tauturu a te mau taote. Te tuu nei matou i to matou tiaturi i nia i te Atua e te tiaturi nei matou e te horoa maira o ˈna i ta ˈna mau aratairaa no nia i teie tumu parau o te toto no to matou maitai mure ore. Ua faataahia te Atua i roto i te Bibilia mai ‘tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.’ (Isaia 48:17) Ua horoa o ˈna i ta ˈna Tamaiti ra te mana no te faatia faahou mai i te feia pohe. Teie ta Iesu i parau: ‘Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa. E te taata ora atoa nei e faaroo ia ˈu ra, e ore roa ˈtu ïa e pohe. Ua faaroo oe i te reira?’—Ioane 11:25-27.

“Ta matou noa e hinaaro ra ia taa te mau taote e to matou tiaraa tei te haava manaˈo ïa o te taata e eita e ravehia te mau faaauraa parau. Eita ta matou e nehenehe e rave i te mau faaauraa parau no nia i teie tumu parau, mai ta matou atoa e ore e nehenehe e na reira i nia i te ture a te Atua no nia i te faaturi. Eita ta matou e nehenehe e faaau atu i te parau e te Atua e e ani atu ai: ‘Te Atua e, te vai ra anei te tahi huru tupuraa e nehenehe ta ˈu e faaturi?’ Na ô atura vau i teie taata e: ‘Ua ani mai oe ia ˈu e e vaiiho anei au i ta ˈu tamaiti ia pohe na roto i te patoiraa i te hoê pâmuraa toto. Eiaha oe e inoino mai, te hinaaro nei au e ui atu, e vaiiho anei oe i ta oe tamaiti ia pohe ei faehau no te tahi fenua?’ Ua pahono oioi mai oia ma te papu, ‘E! No te mea e hopoia na ˈna te reira!’ Na ô atura vau e: ‘E vaiiho oe i ta oe tamaiti ia pohe no te hoê tumu o ta oe e tiaturi. A vaiiho atoa ïa ia ˈu ia na reira atoa e ta ˈu tamaiti.’

“Te hoê nota anaanatae o teie mau mea atoa, ua titau manihini mai ïa te peretiteni o te porotarama ra o Dominguez Tane ia mâua ta ˈu vahine ia tamaa e o ˈna e ta ˈna vahine. Ua manaˈo o ˈna e aita ta ˈna vahine i haamaramarama-maitai-hia no nia i te mau Ite no Iehova. Ua tano oia. Aita ta ˈna vahine i maramarama maitai. Mea au roa to matou tamaaraa i taua po ra, e ua ui mai ta ˈna vahine e rave rahi uiraa no nia ia matou e ta matou ohipa, e ua vaiiho o ˈna ia pahono huˈahuˈa roa mâua. I te mahana i muri iho, ua taniuniu mai te tane e ua parau mai e ua oaoa roa ta ˈna vahine i te farereiraa ia mâua ta ˈu vahine e te manaˈo ra o ˈna e mau taata maitatai roa mâua.

“Ua tamau noa vau i te haere e farerei ia Dominguez Tane, e te anaanatae rahi ra oia i te Bibilia. Ua na ô mai o ˈna ia ˈu e: ‘Eita vau e haamarirau i te faaitoito ia oe ia haere e farerei i te mau peretiteni o te porotarama o te mau Rotary Club taatoa i te mau oire e haaati ra ia San Francisco e ia horoa oe i roto i ta ratou taatiraa i te hoê oreroraa parau mai ta oe i vauvau i roto i ta matou taatiraa. E nehenehe oe e faahiti i to ˈu iˈoa, e ia taniuniuhia mai au, e oaoa vau i te horoa ˈtu i te haamaitairaa rahi roa ˈˈe ei taata orero manihini.’

“Te mau Rotary Club, e taatiraa ïa na te mau fenua atoa. E nehenehe anei ta te tahi atu mau taatiraa i te mau Hau Amui no Marite e ati aˈe te ao nei e farii i te mau faaiteraa a te mau Ite no Iehova?”

[Nota i raro i te api]

[Hohoˈa i te api 28]

Renan Dominguez Tane, pae aui, e Taeae Ernest Garrett