Te papai mai nei te feia taio
Ereraa i te ohipa Mauruuru roa no te mau tumu parau ra “Ereraa i te ohipa—Te vai ra te ravea.” (8 no Mati 1996) Ua tae mai te reira i te taime te imi ra vau i te hoê ohipa, aita râ i itehia mai. Ua tamata vau i te imi i te ohipa na te fare, mai ta outou e faahiti ra i te api 11, e ua manuïa. Mauruuru ia Iehova no outou!
J. M., Guyane
Ua faataa mai te mau tumu parau i te huru tupuraa o ta ˈu i farerei iho nei. Tau avaˈe te maoro, ua tia ia ˈu ia faaau ia ˈu iho i te raveraa i “te mau huru ohipa atoa,” mai ta te hoê o te mau tumu parau i faahiti. Aita râ vau i haaparuparu. Ua tutava vau i te faatupu i te hoê huru hiˈoraa itoito, e i te pae hopea ua itea mai ia ˈu te hoê ohipa tamau. I roto i taua area taime ra, ua tauturu mai ta ˈu vahine ia ˈu, mea ite roa hoi oia i te faaravai i ta mâua moni ia haere oia e hoohoo. Mauruuru â no te mau haamaramaramaraa o te tauturu nei ia matou ia faaohipa i te mau faaueraa tumu a te Bibilia i roto i te mau tupuraa fifi.
U. C., Italia
Ua au roa vau i ta outou tumu parau ra “A imi i te ohipa na te fare.” E pionie tamau vau, oia hoi e poro evanelia ma te taime taatoa, e e piti matahiti to ˈu raveraa i te toroa haapao tamarii i te fare. Ua haapao vau i te tamarii na mua ˈˈe e ia oti te haapiiraa e mea maitai roa ta ˈu moni ohipa. Auaa teie ohipa, ua nehenehe au e haere e poro i te afaraa o te mahana, e ua rave au i te ohipa e maha noa hora i te mahana. E rave rahi metua o tei mauruuru no te mea e mea fifi roa ia ite mai i te taata haapao tamarii maitai. Te tiaturi nei au e e fanaˈo atoa te tahi atu mau taata i te ohipa o te tauturu ia ratou ia tavini ia Iehova.
T. K. L., Hau Amui no Marite
Te faahiti ra outou e e nehenehe te feia i erehia i te ohipa e rave i ǒ ratou iho i te ohipa tapoˈi parahiraa, tâpû rouru, tiai uputa, e vetahi atu â. Te parau atoa ra outou e, i roto i te tahi mau huru tupuraa, e nehenehe ratou e faaiteite haere i ta ratou ohipa ma te tamoni ore aore ra no te hoê tino moni haihai roa. Aita anei râ te reira i opanihia e te ture i Helemani?
R. T., Helemani
Mea ê te mau ture i tera e tera fenua, e peneiaˈe ua opanihia teie mau huru raveraa i roto i te tahi mau fenua. No reira, i te api 9, ua haapapu matou e e tia ia ite e ia auraro i te mau ture no nia i te mau tute hou e haamata ˈi i teie huru ohipa. Ua titauhia te mau Kerisetiano ia auraro i te mau ture o te mau fenua o ta ratou e faaea ra. (Roma 13:1)—Feia nenei.
Aua animala Ua faahiahia roa vau i te tumu parau ra “Haapiiraa i te Bibilia i te aua animala!” (8 no Mati 1996) Ua au roa vau i te mau haamaramaramaraa no nia i te mau animala i faahitihia i roto i te Bibilia. Aita vau i ite e ua faahitihia te mau asini oviri i roto i te Bibilia. Ua au roa atoa vau i te paratarapha no nia i te mau ro. Ua faaitoito te tumu parau ia ˈu ia maimi no nia i te hoê animala apî i te mau avaˈe atoa.
M. F., Hau Amui no Marite
To ˈu hoa here Te hinaaro nei au e faatae atu i te tapao o to ˈu mauruuru rahi no te tumu parau faahiahia “To ˈu hoa here.” (8 no Febuare 1996) Auê te au e ia taio e ua vai teie auhoaraa haviti mau noa ˈtu e mea paari roa hoê e mea apî roa te tahi. Te haapapu ra te reira e e ere i te mea titauhia ia maiti te mau taurearea i to ratou mau hoa piri roa ˈˈe i rotopu noa i te taurearea. E rave rahi feia paari aˈe e mea rahi ta ratou e nehenehe e horoa mai i te pae no te aravihi, te ite, e te parau hauti.
S. T., Beretane
Ua haapapu te tumu parau e e nehenehe te taurearea e te taata paari e afaro maitai e e nehenehe te ui apî e faufaahia na roto i te aravihi rahi o te ui paari aˈe. O vau iho nei, e rave rahi hora anaanatae e te au mau o ta ˈu i fanaˈo e te hoê hoa paari aˈe. Ua tauturu rahi mau â oia ia ˈu ia faatitiaifaro i te mau fifi mai te faaheporaa a te mau hoa.
W. S., Auteteria
E tae roa mai i teie nei, aita vau i tamata aˈe i te haapii i pihai iho i te feia paari aˈe. Auaa teie nei tumu parau, te taa ra ia ˈu i teie nei e eaha te mau mea o ta ˈu e nehenehe e haapii mai na roto ia ratou. Te hinaaro mau nei au e faahoa ˈtu i te feia paari aˈe o tei î i te ite.
R. K., Tapone