Ia au i te Bibilia

Ta vai aratairaa ta outou e tiaturi?

“MAI! Haere tâua!” o ta te papa ïa e parau atu i ta ˈna tamaiti iti e pae matahiti. E faatoro atu te papa i to ˈna rima, e ma te ore e haamarirau, e haru atu te tamaiti ma te tapea maitai to ˈna rima iti i nia i te mau rimarii o to ˈna papa. Noa ˈtu eaha te vahi o ta raua e haere ra, e tiaturi iho â te tamarii i te aratairaa a to ˈna metua e e apee atu oia ia ˈna ma te tiaturi. Noa ˈtu eaha te ohipa e tupu, eita te tamarii e faarue i te rima o to ˈna papa.

I te mea e te ora nei tatou i roto i te papu-ore-raa i te pae faanavairaa, politita, e i te pae atoa o to tatou iho oraraa, eita anei outou e oaoa ia faatorohia mai i te rima no ǒ mai i te hoê pu o ta outou e nehenehe e tiaturi taatoa? Teie râ, te ora nei tatou i te hoê tau i reira te feia taiâ ore e taviri ai i te taata o te ore e haapao maitai. No reira, e mea tano roa ia ara maitai tatou i te feia o ta tatou e horoa ˈtu i to tatou tiaturi. Peneiaˈe ua mauiui aˈenei outou i te haamâuˈaraa mai te hoê taata o ta outou hoi i tiaturi e na ˈna e aratai mai ia outou.

Noa ˈtu râ, te faaitoito nei te Bibilia ia tatou ia tuu i to tatou tiaturi i roto i te Atua. Ua papai te peropheta ra o Isaia e: “O vau hoi to Atua ra, o Iehova, o tei mau ia oe i to rima atau ra; o tei parau atu ia oe e, Eiaha e mǎtaˈu; o vau hoi to oe tauturu.” (Isaia 41:13) E ua faaitoito atoa te aposetolo Petero e: “E tena na, e faahaehaa ia outou iho i raro aˈe i te rima mana o te Atua, ia faateitei oia ia outou i te tau mau ra. E huri i to outou ahoaho atoa i nia ia ˈna; oia hoi te tiai mai ia outou.”—Petero 1, 5:6, 7.

Noa ˈtu râ, e riro paha outou i te ani e, ‘No te aha râ vau e tiaturi ai i te aratairaa a te Atua?’ E itehia te mau tumu papu roa i roto i te aamu o te mau ati Iseraela no tahito ra.

Na te rima o te Atua i aratai i to ˈna nunaa

Na te mau ohipa e rave rau i tupu e tae roa ˈtu i te po o te 14 no Nisana 1513 hou to tatou tau, i ofati i te opuaraa etaeta a te Pharao faarave ohipa haavî ra e a to Aiphiti e inaha, tuu atura ratou i te nunaa o te Atua, te mau ati Iseraela, i faatîtîhia. (Exodo 1:11-13; 12:29-32) I te 15 no Nisana, ua taahi atura te nunaa umere ra no Iseraela na roto i te medebara no te haere atu i te Fenua Tǎpǔhia. Te eˈa afaro noa, na te pae apatoerau ïa o Memephi, na te pae miti o Mediteranea, tapiri atu ai i pihai iho i te fenua i parahihia e te mau ati Philiseti i mǎtaˈuhia ra, e tae roa ˈtu i roto i te Fenua Tǎpǔhia. Teie râ, e eˈa ê ta te Atua i manaˈo no ratou.—Exodo 13:17, 18; Numera 33:1-6.

Ua horoa mai te Atua i te hoê aratai ite-mata-hia na te nunaa o Iseraela no tahito ra, tei fa mai na roto i te hoê pou ata i te ao e te hoê pou auahi i te po. (Exodo 13:21, 22) Taa ê atu i teie faraa semeio, ua faaohipa Iehova i te taata haapao maitai ra o Mose ei tia no ˈna i nia i te fenua nei. (Exodo 4:28-31) Te vai ra ïa te haapapuraa te ore e nehenehe e faahapahia e, te aratai ra te rima o te Atua i te mau ati Iseraela.

I te piti o to ratou vahi puhaparaa, i Etama, “i te hiti o te medebara ra,” ua faaue ihora Iehova ia Mose ia hoˈi i muri e ia puhapa na te mau pae o te Miti Uteute, i Pi-hahirota. (Exodo 13:20) No teie tauiraa huru ê roa, ua manaˈo atura o Pharao e “ua fifi ratou i roto i te fenua.” Itoito ihora o Pharao e ua taui atura to ˈna mafatu. I teie nei, ua papu to ˈna manaˈo e faatîtî faahou i te mau ati Iseraela, ua haaputuputu ihora oia i to ˈna nuu e ua tapapa ˈtura ia ratou.—Exodo 14:1-9.

Na roto i te aratairaa i te nunaa i nia i te hoê eˈa ê, i roto i taua fenua haehaa ra e aratai tia ˈtu i te Miti Uteute, e au ra e ua tuu o Mose i te mau ati Iseraela i roto i te herepata, i ropu i te mau mouˈa i na pae o te puhapa i Pi-hahirota, te Miti Uteute, e te nuu a Pharao e haere maira. E au ra e e roaa ohie noa te mau ati Iseraela e eita e maoro ratou i te pau aore ra i te pohe.

Eaha ˈtura to ratou huru? E faaite anei ratou i to ratou tiaturi i te aratairaa a Iehova? E au ra hoi e aita e hororaa. No reira, ua mǎtaˈu roa ˈˈera vetahi. Area te tahi ra, ua haamata ratou i te amuamu ia Mose. Ua ineine atoa te tahi pae i te faarue no te hoˈi faahou ei tîtî i Aiphiti!—Exodo 14:10-12.

A tapea maitai i te rima o te Atua!

I roto i teie huru tupuraa, mea hinaarohia ia faaite te mau ati Iseraela i te tiaturi e au i to te tamarii ra i roto i te Puai hope. Ma te ore i itehia e te nunaa taatoa, e tumu papu maitai to Iehova i to ˈna faaueraa ia Mose ia na roto atu i te Miti Uteute i Pi-hahirota. I to ˈna faahaereraa i te mau ati Iseraela na te pae apatoa o te fenua a te mau ati Philiseti no te haere i te Fenua Tǎpǔhia, ua faaite Iehova i te maramarama î i te aroha. I muri aˈe e 215 matahiti i Aiphiti, aita hoi te mau ati Iseraela i ineine i te tamaˈi atu i te hoê nunaa aito puai. No reira Iehova i maiti ai i teie eˈa ia ore ratou ia aro atu i taua nunaa ra.a—Exodo 13:17, 18.

Ua riro te faaoraraahia mai te nunaa e te pauraa o Pharao e to ˈna nuu i te Miti Uteute ra, ei haapapuraa faahiahia mau o te puai faaora o te Atua. Hau atu, ua mauruuru roa te mau ati Iseraela i te mea e, noa ˈtu aita i papu ia ratou te tumu no reira te Atua i aratai ai ia ratou na nia i teie eˈa taa ê, aita ratou i faarue i te rima o te Atua! Ua tapea maitai ratou e ua ite ratou i te semeio i te vahiraa te Miti Uteute e te pohe-atoa-raa to ratou mau enemi. Ua haamauruuruhia to ratou tiaturi i te aratairaa a Iehova.—Exodo 14:19-31.

I teie nei â, e feruri anaˈe tatou i te hiˈoraa o te tamarii e tapea ra i te rima o to ˈna metua. Ia riaria anaˈe te hoê tamarii, eaha ta ˈna e rave? Eita oia e faarue aore ra eita ta ˈna tapearaa e mǎrû mai, tera râ, e haapuai atu â te tamarii i te tapea i te rima o to ˈna metua. Ia na reira oia, te faaite ra ïa oia i to ˈna tiaturi aueue ore e e horoa mau te metua i te aratairaa papu e te puai i te tau fifi.

Oia atoa, ia ahoaho anaˈe tatou i roto i to tatou oraraa, e tia ia tatou ia haapuai i te tapea, ma te tiaturi hau atu â i te aratairaa a te Atua! E nehenehe ta ˈna Parau, te Bibilia, e riro ei tiarama e aratai ia tatou. (Salamo 119:105) A haamanaˈo atoa e, apitihia e te tiaturi, e titauhia te faaoromai. No reira, e tia ia tatou ia vaiiho i te taime ia faatitiaifaro mai Iehova i te mau ohipa, noa ˈtu e, i te roaraa o te taime, eita tatou e papu maitai e no te aha oia e aratai ai ia tatou na nia i te tahi eˈa. Oia, e nehenehe mau â tatou e tiaturi i te aratairaa a te Atua.—Exodo 15:2, 6; Deuteronomi 13:4; Isaia 41:13.

[Nota i raro i te api]