A faatere i to outou oraraa i teie nei iho!
UA FANAˈO rahi tatou i te mau maimiraa a te mau aivanaa no nia i te haerea e te tumu e ohipa ˈi te taata. Peneiaˈe ua tauturuhia tatou ia faaruru i te hoê maˈi no te mea ua rahi atu to tatou ite i teie maˈi. I te hoê â taime, mea tano ia haapao maitai i te mau parau rii huru ê roa, te mau parau iho â râ e au ra e aita e tuea ra e te mau faaueraa tumu papu.
No nia i te mau tapao tupuna e te haerea, teie ïa te mau uiraa: E nehenehe anei tatou e haapae i ta tatou mau hopoia ma te ore e farii i te hape no ta tatou mau ohipa e rave? E nehenehe anei tatou e ani ia faatiamâhia tatou aore ra e faahapa ˈtu i te tahi atu taata aore ra i te tahi atu mea, no te hoê hape aore ra te hoê ohipa ino ta tatou i rave, inaha hoê â ïa tatou e te feia no te ui “e ere na ˈu te hape” e rahi noa ˈtura? Eita. Te farii oioi nei hoi te rahiraa o te taata i te mau manuïaraa atoa o te oraraa, no te aha ïa ratou e ore ai e farii oioi atoa i te hopoia no ta ratou mau hape?
E nehenehe ïa tatou e ani e, Eaha ta te Parau a te Atua, te Bibilia Moˈa, e parau ra no nia i te taata aore ra te mea e faatere ra i to tatou oraraa i teie nei mahana?
Eaha te manaˈo o te Bibilia?
Te mea matamua te tia ia tatou ia farii oia ïa, ua fanauhia mai tatou paatoa i roto i te hara no ǒ mai i to tatou na metua matamua ra o Adamu raua o Eva. (Salamo 51:5) Hau atu, te ora nei tatou i roto i te hoê tau taa ê, tei piihia te “anotau hopea,” i reira te taata e faaû ai i te tau “ati rahi.” (Timoteo 2, 3:1) Te faaite ra te reira e, i roto i te hoê auraa rahi, mea fifi aˈe no tatou ia faatere maitai i to tatou oraraa, i to tatou mau tupuna.
Noa ˈtu râ, e tiamâraa to te taata atoa ia maiti, e nehenehe hoi ratou e rave i ta ratou iho mau faaotiraa. I roto i teie tuhaa, na ratou mau ïa e faatere ra i to ratou oraraa. Mai te reira te huru mai te tau mai â e te itehia ra na roto i te mau parau ta Iosua i faatae i te nunaa o Iseraela ra: “E faataa [“maiti,” MN] na outou i teie nei mahana i ta outou e haamori.”—Iosua 24:15.
Te faaite ra te Bibilia e ua tiavaruhia te Diabolo ra o Satani i rapae i te raˈi e i teie nei, hau atu i mutaa ihora, te faaohipa nei oia i te hoê mana ino puai roa i nia i te fetii taata atoa nei. Te faaite atoa maira te Bibilia e i te tau o te aposetolo Ioane ra, tei raro aˈe te ao atoa i te mana o taua varua ino ra. (Ioane 1, 5:19; Apokalupo 12:9, 12) Teie râ, mai ta te Atua Mana hope ra e ore e faatere i ta tatou mau ohipa atoa aore ra e faataa aˈena e ia roohia tatou i te ohipa o ta ˈna anaˈe i ite, eiaha tatou e faahapa noa ˈtu ia Satani no ta tatou mau hape atoa aore ra to tatou mau manuïa-ore-raa atoa. Te parau mau aifaito a te mau Papai oia ïa e “ua haavarehia râ te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara.” (Iakobo 1:14, 15) Ua papai te aposetolo Paulo i teie mau parau i faauruahia mai: “Eiaha e vare, e ore te Atua e noaa i te haavare, o ta te taata e ueue ra, o ta ˈna â ïa e ooti mai.”—Galatia 6:7.
No reira, te titau nei te Atua ra o Iehova ia tatou tataitahi i te hopoia no ta tatou mau ohipa e rave. E tia ia tatou ia haapao maitai ia ore tatou ia imi i te mau otohetoheraa ma te faahiti i to tatou mau tapao tupuna anei aore ra te mau huru tia ore no ǒ mai i to tatou tupuna. Ua titau te Atua i te hopoia i te huiraatira haavî uˈana e te mahu o te mau oire no Sodoma e no Gomora i tahito ra, no ta ratou mau ohipa faufau. Oia mau, aita oia i hiˈo i te feia o taua mau oire ra, mai te mau taata rii haihai te tia ia arohahia, e no te tahi paruparu i faataa-aˈena-hia i roto i to ratou mau tapao tupuna, tei ore i nehenehe e ape i te rave i te ino. Oia atoa, te feia i ora na i te tau o Noa, e rave rahi mana iino na te hiti ia ratou; tera râ, e maitiraa tei tuuhia i mua ia ratou, na ratou iho e faaoti ahiri e e hinaaro ratou e ora ˈtu i te Diluvi tei fatata i te tupu. Mea iti roa te feia i rave i te maitiraa maitai. Aita te rahiraa i na reira.
Te haapapu ra te peropheta Hebera ra o Ezekiela e mea titauhia i te taata tataitahi ia maiti, ia hinaaro tatou e fanaˈo i te farii maitai o te Atua: “Ia aˈo râ oe i taua taata parau ino ra, e aore oia i fariu mai i taua parau ino na ˈna ra, e te haerea ino no ˈna ra, e pohe oia i ta ˈna ra hara; ua ora râ oe ia oe iho.”—Ezekiela 3:19.
Te tauturu maitai roa ˈˈe e vai ra
Parau mau, te hinaaro nei tatou paatoa i te tauturu no te rave i teie maitiraa tataitahi i roto i to tatou oraraa i te mau mahana atoa, e no te rahiraa o tatou, e mea fifi roa te reira. Eiaha râ e haaparuparu. Noa ˈtu e eita te Atua e farii i to tatou mau hinaaro rave hara no ǒ mai i to tatou tupuna ra, ia hinaaro tatou e taui i to tatou haerea, e horoa mai oia i te tauturu maitai roa ˈˈe e vai ra—to ˈna varua moˈa e ta ˈna parau mau i faauruahia mai. Noa ˈtu te tahi hinaaro no roto i to tatou mau tapao tupuna e te tahi mau mana rapaeau o te ohipa i nia ia tatou, e nehenehe ta tatou ‘e haapae i te taata tahito e ta ˈna atoa ra mau parau, e e faa-taata-apî, o tei faahouhia i te ite ra, mai te huru atoa o tei hamani ia ˈna ra.’—Kolosa 3:9, 10.
E rave rahi Kerisetiano i roto i te amuiraa no Korinetia o tei taui roa i to ratou haerea. Te na ô ra te faatiaraa i faauruahia mai e: “E ore hoi te taiata, e te haamori idolo, e te faaturi, e te mahu, e te paia, e te eiâ, e te nounou taoˈa, e te taero ava, e te faaino, e te haru e ore anaˈe ïa e parahi i te basileia o te Atua. Mai te reira hoi te hoê pae o outou na, ua horoihia râ outou, ua faataahia râ outou, ua tiahia râ outou i te iˈoa o te Fatu ra o Iesu, e te [v]arua o to tatou Atua.”—Korinetia 1, 6:9-11.
No reira, mai te peu e te aro nei tatou i to tatou mau huru tia ore, eiaha e hema ˈtu. E rave rahi Kerisetiano no teie nei tau o tei haapapu e, na roto i te tauturu a Iehova, ua nehenehe ratou e ‘faahuru-ê-hia i te faahouraa i to ratou aau, ia ite ratou i taua hinaaro tia o te Atua ra, e te au, e te maitai hoi.’ Te faaamu nei ratou i to ratou feruriraa i te mau mea haavare ore, te tia, te viivii ore, te au, te tura, te popou; e ‘te haamanaˈo noa nei ratou i taua mau mea ra.’ Te rave nei ratou i te maa paari i te pae varua e na roto i te faaohiparaa i te reira, te haamataro nei ratou i te aravihi o to ratou feruriraa no te faataa ê i te maitai e te ino.—Roma 12:2; Philipi 4:8; Hebera 5:14.
Mea tamahanahana mau â ia ite i ta ratou mau aroraa, to ratou mau topatoparaa, e i te pae hopea to ratou manuïaraa, na roto i te tauturu a te varua moˈa o te Atua. Te haapapu maira te Atua e, no te tauiraa i to tatou haerea, e titauhia ia ohipa i nia i te mafatu e to ˈna hiaai: “Ia ô mai te paari i roto i to aau na, e ia riro te ite ei mea maitai ia oe ra; na te haapao maitai e tiai ia oe i reira; e na te ite e faaora ia oe, ia ore oe e hape i te eˈa o te feia parau ino ra; i te mau taata e parau i te parau piˈo ra.”—Maseli 2:10-12.
No reira, ia hinaaro outou e faariro i te ora mure ore ei fa na outou—oia hoi te ora e aita faahou te mau fifi o te ao ino ma te tiamâ i te mau huru tia ore haaparuparu—a “faaitoito hua” i te faatereraa i to outou oraraa i teie nei iho e ia arataihia outou e te paari no nia maira. (Luka 13:24) A farii i te tauturu a te varua moˈa o Iehova ia nehenehe outou e faatupu i te hotu o te hitahita ore. Ia riro ei hiaai no to outou mafatu ia faaau i to outou oraraa i te mau ture a te Atua, e a pee i teie aˈoraa: “E faaitoito i te tiai i to aau na; o te tumu hoi te reira o te ora.” (Maseli 4:23) Te fanaˈoraa i “te ora” mau i roto i te ao apî a te Atua—i reira te Atua ra o Iehova e faatitiaifaro ai i te mau tapao tupuna hapepa atoa na nia i te faaroo i roto i te tusia o te hoo a Iesu Mesia—no te reira, mea hoona te mau tutavaraa atoa ta outou e rave ra no te faatere i to outou oraraa i teie nei iho i roto i teie ao!—Timoteo 1, 6:19; Ioane 3:16.
[Hohoˈa i te api 9]
E nehenehe te haapiiraa i te Bibilia e horoa mai i te puai no te faaore i te mau paruparu i aa hohonu roa
[Hohoˈa i te api 9]
E nehenehe te haapiiraa Bibilia e tauturu ia tatou ia tapea maite i te mau ture morare a te Atua