Vavahiraa i te mau patu no te mono e te mau eˈaturu
AITA tatou i maiti i te utuafare aore ra te nunaa i reira tatou i te fanauraahia, aita tatou i faataa e teihea ihotumu e tarai i to tatou huru feruriraa. Aita to tatou e mana i nia i teie mau mea. Ua taotia-paatoa-hia tatou e te taime e te huru tupuraa. E mana râ to tatou i nia i to tatou mau manaˈo e ta tatou mau ohipa i nia ia vetahi ê.
Te faataa ra te Bibilia e nafea tatou. E hiˈo mai na tatou i te tahi mau faaueraa tumu o te tauturu mai ia tatou ia patu i te mau eˈaturu o te taairaa e te feia no roto mai i te hoê ihotumu taa ê roa i to tatou nei.
“O te Atua i hamani i teie nei ao, e te mau mea atoa i roto ra, . . . e na ˈna i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei.” (Ohipa 17:24, 26) E melo tatou pauroa no te hoê â fetii taata e e rave rahi ïa tuearaa i rotopu ia tatou. Na roto i te imiraa i te mau mea ta tatou paatoa e au, e ohie ïa te taairaa. Te hinaaro nei tatou pauroa i te mau hoa maitatai e ia herehia e ia faaturahia mai tatou. Te imi nei te mau taata atoa ia ore e haamauiui i te pae tino e te manaˈo hohonu. Mea au na te mau taata no te mau ihotumu atoa i te upaupa e te ohipa aravihi, e parau hauti, e faaite i te peu maitai i nia ia vetahi ê, e e imi i te mau ravea no te oaoa.
“Eiaha roa ei mea e ravehia ma te mârô e te teoteo faufaa ore ra; ei aau haehaa râ, i te manaˈo haamaitairaa ˈtu te tahi i te tahi eiaha ia ˈna iho.” (Philipi 2:3) Aita e parauhia ra e e tia ia tatou ia faateitei ia vetahi ê i nia aˈe ia tatou i roto i te mau mea atoa. E tia râ ia tatou ia taa e i roto i te tahi mau tuhaa o te oraraa, mea teitei aˈe vetahi ê. Eiaha tatou e manaˈo e ta tatou anaˈe aore ra ta to tatou ihotumu anaˈe te mau mea maitatai atoa.
“E teie nei, te vai nei ta tatou ravea, e hamani maitai tatou i te taata atoa.” (Galatia 6:10) E nehenehe te faaiteraa i te huru auhoa e te tauturu ia vetahi ê, noa ˈtu eaha to ratou ihotumu, e tauturu rahi mai ia haapaiuma i te ereraa i te taairaa.
“E teie nei, e au mau taeae here e, ia ru te taata atoa i te faaroo, ia haere maine i te parau, ia haere maine hoi i te riri.” (Iakobo 1:19) E ore te feia faatupu i te taairaa maitai e paraparau noa; e tia ia ratou ia faaroo ma te taa i te huru o vetahi ê.
“Te parau i roto i te aau taata, mai te moana ïa; e noaa mai râ taua parau ra i te taata i ite.” (Maseli 20:5) Ia oioi outou i te ite i te mau manaˈo e te mau fifi i muri mai i te haerea o te hoê taata. A haamatau maitai aˈe i te taata.
“Eiaha hoi te taata atoa e haapao i ta ˈna anaˈe ihora, e haapao atoa râ i ta vetahi ê ra maitai.” (Philipi 2:4) A taa i te huru o vetahi ê na roto i te hiˈoraa i te mau fifi ma te manaˈo o te tahi atu taata. A riro ei taata miimii ore.
E rave rau ihotumu i rotopu i te mau Ite no Iehova
Te itehia ra e te manuïa nei teie mau faaueraa tumu na roto i te tahoêraa faahiahia o te mau Ite no Iehova e ohipa nei i roto e 232 fenua. No roto mai ratou i “te mau fenua atoa, e te mau opu atoa, e te mau nunaa atoa, e te mau reo atoa” e ua faaoti ratou e pee i te aratairaa î i te here a Iehova i roto i te mau mea atoa.—Apokalupo 7:9; Korinetia 1, 10:31-33.
Aita te mau Ite tataitahi e haavahavaha ra i te ihotumu o vetahi ê. Aita atoa te feia tei riro mai ei Ite e haapae ra i te ihotumu i reira ratou i te paariraa mai, taa ê noa ˈtu mai te peu e aita te reira e tu ra i te mau faaueraa tumu i roto i te Bibilia. I roto i teie mau huru tupuraa, te rave nei ratou i te mau tauiraa i roto i to ratou oraraa. Te farii nei ratou e i roto i te mau ihotumu atoa, te vai ra te mau tuhaa faahiahia, e te rahi atoa maira te reira i roto i te mau taata e farii ra i te haamoriraa mau.
Te tutava nei ratou i te hiˈo i to tatou palaneta ia au i te huru hiˈoraa a te Atua—anaana e te ninamu e te haviti—e ohu noa ra i roto i te reva teitei. E palaneta teie e ua rau te haviti o te mau taata e te mau ihotumu. Te tiai nei te mau Ite no Iehova i te taime e fanaˈo ai te taatoaraa i nia i te fenua nei i te oraraa mai te hoê utuafare tahoê mau.
[Hohoˈa i te api 8]
Ua haapii te mau Ite no Iehova e nafea ia vavahi i te mau patu i te pae o te ihotumu