Mau patu e haafifi ra i te taairaa — VAIRAA PAPAI NATIRARA Watchtower

Mau patu e haafifi ra i te taairaa

ROBERT, e mitionare oia na te Taiete Watch Tower e noho ra i Sierra Leone, i Afirika Tooa o te râ. I te hoê mahana i muri noa ˈˈe i to ˈna taeraa i teie fenua, a haere noa ˈi oia na raro, ua faaroo atura o ˈna i te piiraa te mau tamarii no reira e: “Taata uouo! Taata uouo!” Ua hiˈo atura Robert, e Marite ereere oia, ati aˈe ia ˈna i te taata uouo, tera râ, o ˈna anaˈe to reira. I reira ïa to ˈna taaraa e o o ˈna ta te mau tamarii e pii ra!

E ere i te hoê himene faaino teie. Ua faaite noa te mau tamarii e te taa ra ia ratou e no roto mai o Robert i te hoê ihotumu taa ê i to ratou. Ua manaˈo ratou e ia pii ratou ia Robert e taata uouo, e ravea maitai aˈe ïa no te faaite i taua taa-ê-raa ra.

Nafea te ihotumu ia ohipa i nia ia tatou iho

Ua faataahia te ihotumu i roto i te hoê auraa rahi mai “te hoê haapueraa manaˈo tufahia, . . . te mau peu matauhia, te mau tiaturiraa, e te ite no nia i te hoê huru oraraa.” Te haapii nei tatou e rave rahi faufaa i te pae o te ihotumu, na roto i te haapii-roa-raa mai tera râ, e noaa atoa ia tatou te reira ma te ite ore. Teie ta te hoê taata maimi i parau: “Mai te taime e fanauhia ˈi [te hoê aiû], na te mau peu matauhia a to ˈna nau metua e tarai i to ˈna aravihi e to ˈna haerea. Mai te taime e nehenehe ai o ˈna e paraparau, ua riro ïa o ˈna ei hotu haihai o to ˈna ihotumu, e mai te taime o ˈna e paari ai e e nehenehe ai o ˈna e rave i te mau ohipa a to ˈna ihotumu, e fanaˈo ïa o ˈna i ta ˈna iho mau peu, to ˈna mau tiaturiraa, ta ˈna mau manuïa-ore-raa.”

Na roto e rave rahi ravea, te faaohie nei te ihotumu i to tatou oraraa. Ei tamarii, te haapii oioi ra tatou e nafea ia faaoaoa i to tatou mau metua. Na roto i te iteraa e tera te mea e fariihia e e ore e fariihia i roto i to tatou totaiete, e arataihia tatou ia rave i te mau faaotiraa no nia i te mau ohipa e rave, no nia i te ahu e oomo, e nafea ia taai ia vetahi ê.

Parau mau, aita e niuhia ra to tatou ihotaata i nia noa i to tatou ihotumu. I roto i te mau ihotumu atoa, te vai ra te mau tauiraa i rotopu i te mau taata. Na te mau tapao tupuna, te mau mea ta tatou i farerei i roto i te oraraa, e e rave rahi atu â mau tumu i faataa atoa e o vai mau tatou. Noa ˈtu râ, ua riro te ihotumu mai te hiˈo faarahi e ite ai tatou i te ao.

Ei hiˈoraa, aita to tatou ihotumu e faaoti noa ra i to tatou reo, i ta tatou huru paraparau atoa râ i taua reo ra. I roto i te tahi mau tuhaa i te pae Hitia o te râ no Ropu, te haafaufaa ra te mau taata i to ratou aravihi e paraparau na roto e rave rahi parau, ma te faahiti-noa-raa e te faahohoˈaraa. I te tahi aˈe râ pae, i roto i te tahi mau fenua i te pae Hiti Hitia o te râ, eita te mau taata e paraparau rahi roa. Te faaite nei te hoê parau paari Tapone i teie manaˈo e: “Na roto i to oe vaha, e pohe oe.”

Na to tatou ihotumu e faataa ra e eaha to tatou manaˈo no nia i te taime. I Helevetia, mai te peu e ua taerehia outou e ahuru minuti i te hoê farereiraa, e tia ia outou ia tatarahapa. I te tahi atu mau fenua, e nehenehe outou e tae mai hoê aore ra e piti hora i muri iho e eita outou e titauhia ia tatarahapa.

Te haapii atoa maira to tatou ihotumu i te mau faufaa. A feruri na eaha to outou huru ia parau mai te tahi taata ia outou e: “Ua poria-roa-hia oe. Te fati maira oe!” Mai te peu e ua paari outou i roto i te hoê ihotumu Afirika i reira mea au-roa-hia te feia poria, e oaoa paha ïa outou i taua parau ra. Mai te peu râ e ua paari outou i roto i te ihotumu no te pae Tooa o te râ o te haafaufaa rahi ra i te tino pararai, e inoino paha outou i taua parau tahaa ra.

‘Mea maitai aˈe ta matou!’

Te mea e haafifi pinepine ra i te taairaa i rotopu i te feia mea taa ê to ratou mau ihotumu, oia hoi i te mau vahi atoa te manaˈo nei te mau taata e ta ratou iho ihotumu te mea maitai aˈe. Te manaˈo ra te rahiraa o tatou e mea tia aˈe, mea tano aˈe, e mea maitai aˈe to tatou mau tiaturiraa, mau faufaa, mau tutuu, huru ahuraa, e mau manaˈo no nia i te haviti i ta vetahi ê. Te haava atoa ra tatou i te tahi atu mau ihotumu ia au i te mau faufaa o ta tatou iho ihotumu. Te piihia ra teie huru feruriraa, te manaˈo e mea teitei aˈe to ˈna iho opu fetii. Teie ta Te buka parau paari Britannica apî (beretane) e faaite ra e: “Te manaˈo e mea teitei aˈe to ˈna opu fetii . . . e nehenehe e parauhia e ua ati aˈe i te ao nei. Te faariro nei te mau melo fatata o te mau ihotumu atoa na te ao nei i to ratou iho huru oraraa ei mea teitei aˈe i to te feia tapiri atoa.”

E piti hanere matahiti i teie nei, ua parau roa te hoê taata no te opu hui mana no Beretane e: “[Ia au i] ta ˈu e ite ra, e feia maamaa te feia ěê.” Teie ta te taata nenei i te buka ra i roto te faahitiraahia teie mau parau, i papai e: “E mea papu paha e e [teie] te manaˈo o te taatoaraa o te taata.”

Mea rahi te mau hiˈoraa no nia i te farii-ore-raa i te feia o te tahi atu mau ihotumu. Noa ˈtu e ua papaihia teie faahitiraa i muri nei na te hoê Helemani papai aamu i te mau matahiti 1930, te parau-pinepine-hia ra e na te raatira Nazi ra o Hermann Göring i faahiti e: “Ia faaroo anaˈe au i te parau ra ihotumu, e haru vau i ta ˈu pupuhi.”

E nehenehe te mau manaˈo puai e mea teitei aˈe to ˈna iho opu fetii e faatupu i te hiˈo-ino-raa, o te aratai roa paha i te au-ore-raa e te aroraa. O Richard Goldstone te auvaha ture no te Tiribuna Haavaraa ohipa ino na te ao nei o tei titorotoro i te mau taparahiraa taata i roto i te tamaˈi i Rwanda e i Yugoslavia tahito. No nia i teie mau ohipa taehae tei ravehia i roto i nau aroraa e piti, teie ta ˈna i parau: “E nehenehe teie huru ohipa e tupu na te mau vahi atoa. I ǒ nei, te vai ra e piti fenua taa ê, e ta raua iho mau ihotumu e mau aamu, teie râ, hoê â ohipa hairiiri [te] ravehia ra i rotopu noa i te feia tapiri. Ua riro noa teie huru tamaˈi uˈana i rotopu i te mau opu aore ra i te pae faaroo ei hiˈo-ino-raa o tei riro mai ei haavîraa uˈana. Te pǔpǔ taata tei hamani-ino-hia, e feia aroha ore ratou aore ra ua uruhia. Ia rave-anaˈe-hia te reira, eita te mau taata e tapea-faahou-hia e te mau otia morare e opani ra hoi ia ratou [ia] rave i teie mau ohipa riaria.”

Te faaaanoraa i ta tatou huru hiˈoraa

Te feia o ta tatou e maiti ei hoa no tatou, o te feia ïa mai ia tatou atoa ra, e hoê â to tatou haerea e mau faufaa. Te tiaturi nei e te taa ra tatou ia ratou. Mea au na tatou e amuimui atu e o ratou. Ia ite anaˈe tatou e mea huru ê aore ra aita i tano te huru o te tahi taata, e tu te manaˈo o to tatou mau hoa e to tatou iho no te mea te tufa nei to tatou mau hoa i ta tatou huru hiˈoraa.

Eaha ïa te noaa ia tatou na roto i te tauaparauraa ia vetahi ê, mea taa ê to ratou ihotumu i to tatou? E tauturu te taairaa maitai ia tatou ia taa i te mau tumu e manaˈo ai e e ohipa ˈi vetahi ê mai tei au ia ratou. Teie ta Kunle, te hoê taata Afirika no Tooa o te râ, e parau ra: “E rave rahi tamarii i Afirika tei opani-etaeta-hia ia paraparau ia tamaa anaˈe ratou. I roto râ vetahi mau fenua no Europa, te faaitoitohia ra te tauaparauraa i te taime tamaaraa. Eaha te tupu ia tamaa anaˈe te taata Europa e te taata Afirika? Te uiui nei te taata Europa e no te aha te taata Afirika e amu noa ˈi i ta ˈna maa ma te paraparau ore. I to ˈna aˈe pae, te uiui atoa ra te taata Afirika e no te aha te taata Europa e paraparau noa ˈi mai te hoê manu!” Papu maitai, i roto i teie huru tupuraa, e nehenehe te taaraa i te ihotumu o te tahi e te tahi e faaore i te faainoraa i te pae totiale.

A haamatau ai tatou i te mau taata no te tahi atu mau ihotumu, aita tatou e haamaitai noa ra i to tatou taaraa ia vetahi ê, te taa maitai atoa nei râ tatou ia tatou iho. Teie ta te hoê taata tuatapapa i te ihihuitaata i papai: “Te ohipa hopea roa ta te mea ora no te moana hohonu e ite, o te miti ïa. E taa ia ˈna e te vai ra te miti i te taime o ˈna e hoˈi ai i nia no te tahi ati e e ô ai o ˈna i roto i te reva mataˈi. . . . Ia nehenehe te hoê taata e ite i te ihotumu o to ˈna iho totaiete i roto i to ˈna taatoaraa . . . e tia ia ˈna ia noaa i te tahi manaˈo paetahi ore varavara roa ia naeahia, aore ra te ore roa ˈtu e naeahia.” Noa ˈtu râ, na roto i te anaanataeraa i te tahi atu mau ihotumu, ua riro tatou mai te mea ora no te moana o te ite i te mataˈi no te taime matamua; e ite tatou i te faufaaraa o te “mau miti” ihotumu i reira tatou i te oraraa. Teie ta te taata papai ra o Thomas Abercrombie i faahiti ma te nehenehe no nia i te reira: “Eita te taata i ore i aratohia aˈenei e te ihotumu ê e nehenehe e taa i te taotiaraa o to ˈna iho ihotumu.”

Ei haapotoraa, e nehenehe te auraa i te tahi atu mau ihotumu e haafaufaa i to tatou oraraa na roto i te faaaanoraa i ta tatou huru hiˈoraa, e taa maitai aˈe ïa tatou ia tatou iho e ia vetahi ê. Noa ˈtu e e nehenehe te tufaa ihotumu e te manaˈo e mea teitei aˈe to ˈna iho opu fetii e riro ei patu e haafifi ra i te taairaa, e nehenehe te reira e apehia. E nehenehe taua mau patu ra e vavahihia.

[Parau iti faaôhia i te api 6]

“Te faariro nei te mau melo fatata o te mau ihotumu atoa na te ao nei i to ratou iho huru oraraa ei mea teitei aˈe i to te feia tapiri atoa.”—Te buka parau paari Britannica apî

[Hohoˈa i te api 7]

E nehenehe tatou e haapii i te fanaˈo i te mau ohipa maitatai o te tahi atu mau ihotumu

[Faaiteraa i te fatu o te hohoˈa i te api 6]