E haapiiraa manuïa na te ao nei

E ERE oia i te hoê fare haapiiraa moni taa ê aore ra te haapiiraa tuatoru tuiroo o te farii i te tahi noa mau taata. Eita, te ohipa nei teie haapiiraa ma te tamoni ore i nia i ta ˈna mau taata haapii. Peneiaˈe te faatupuhia ra ta ˈna mau rururaa i pihai iho noa i to oe faaearaa. Ua piihia oia te Haapiiraa o te taviniraa teotaratia, e te faaterehia ra oia i te mau vahi putuputuraa a te mau Ite no Iehova. Te tahi pae mirioni taata e ati aˈe te ao nei o te apiti nei i teie haapiiraa.

E uiui paha oe, ‘Eaha te mau titauraa no te apiti atu? Eaha te haapiihia ra i reira? Nafea oia ia arataihia? E nafea te mau taata ia faufaahia i te reira?’

Te mau titauraa

Noa ˈtu e te farii-popou-hia nei te mau taata atoa e haere mai i te Haapiiraa o te taviniraa teotaratia, e tia i te feia e apiti mai ia farii i te mau haapiiraa a te buka matamua o te haapiiraa, oia hoi te Bibilia. Te titauhia ra ia ratou ia ora i te hoê oraraa o te faaohipa ra i te mau titauraa i te pae morare a te Bibilia. No reira eita te feia haapii e nehenehe e ora i te hoê oraraa taiata. Eita ratou e nehenehe e eiâ, e inu hua i te ava, e faaturi, e puhipuhi i te avaava, e te vai atu â.—Korinetia 1, 6:9-11.

E rave rahi haapiiraa i teie nei o tei haapae i te mau ture no nia i te ahuraa, tera râ te titauhia ra i te feia haapii o te apiti mai i te Haapiiraa o te taviniraa teotaratia ia oomo mai i te ahu au e te mâ. (Timoteo 1, 2:9, 10) Aita e titauraa no nia i te faito matahiti i teie haapiiraa. Te apiti mai nei te mau tamarii e maha aore ra e pae matahiti o tei ite i te taio e te hohora tamau nei ratou i te mau tumu parau, mai te mau tane e te mau vahine i roto i te 90raa o to ratou matahiti.

Faanahoraa e te porotarama

No te faaohie i te mau taata ia putuputu mai, e faatupu-noa-hia na te putuputuraa no te Haapiiraa o te taviniraa teotaratia e 45 minuti te maoro i te hoê po i te afaraa o te hebedoma. I muri aˈe i te mau parau farii-popou-raa poto a te tiaau o te haapiiraa, na te taeae orero matamua no te po e hohora i te hoê tumu parau 10-15 minuti tei niuhia i nia i te hoê buka o te haapiiraa. I muri iho, e rave pinepine o ˈna e toru tae atu e pae minuti te maoro i te hoê hiˈo-faahou-raa i te tumu parau ta ˈna i hohora.

I muri iho, na te hoê taeae aravihi e vauvau i te mau tuhaa anaanatae o te taioraa bibilia, i te rahiraa o te taime e piti tae atu e maha pene o te Bibilia. E ono minuti ïa te maoro. E hope i te feia haapii o te apee tamau i teie tumu parau i te mau hebedoma atoa i roto i te hoê area taime, i te taio i te taatoaraa o te Bibilia.

I muri aˈe i te mau tuhaa anaanatae o te taioraa bibilia, e toru tumu parau te hohorahia, e pae minuti te taata haapii tataitahi. Te hoê taioraa bibilia ïa i te hoê tuhaa o te tumu parau. Ua niuhia nau tumu parau e piti taa ê atu i nia i te haapiiraa i te hoê tuhaa o te faaitoitohia ra i te taatoaraa o te feia haapii ia taio ei faaineineraa no te feia i putuputu mai. I muri aˈe i te tumu parau a te taata haapii tataitahi, e haapopou te tiaau no te haapiiraa e e horoa pinepine o ˈna i te mau manaˈo tauturu no te haamaitai atu â.

Ua niuhia te mau aˈoraa a te tiaau no te haapiiraa i nia i te Buka no te Haapiiraa o te taviniraa teotaratia (farani), o te titauhia i te taata haapii tataitahi ia tuatapapa maitai. No te haamaitai i te hoê huru oreroraa taa ê no ta ˈna tumu parau a muri aˈe, e anihia i te taata haapii ia hiˈo faahou i te hoê pene o te buka, mai teie “Taairaa e te feia e faaroo ra e faaohiparaa i te mau nota,” “Faahohoˈaraa tano,” “Faahiti-faahou-raa e aparaa rima,” e “Aravihi o te oreroraa e tauiuiraa i te reo.”

I roto i te tahi mau oire, te vai ra te tahi atu piha taa ê i te Haapiiraa o te taviniraa teotaratia no te haamaitai atu â i te papai e i te taio. Te tahi tau ahuru tausani taata tei haapii aore ra tei haamaitai i ta ratou taioraa i roto i teie mau piha haapiiraa. Ei hiˈoraa, i Mexico i rotopu i te mau matahiti 1946 e 1994, hau atu i te 127 000 tei tauturuhia ia ite i te papai e i te taio.

Mau mirioni o te apiti ra

E ati aˈe te ao nei, te turu nei te Haapiiraa o te taviniraa teotaratia i te mau tutavaraa a te mau metua no te horoa i te haapiiraa maitai no ta ratou mau tamarii. Teie ta Moriah e ahuru ma ono matahiti, i parau: “Ua haapii au i te maimi i te mau haamaramaramaraa e i te hohora i ta ˈu mau tumu parau. I teie nei e mea ohie ta ˈu mau tumu parau atoa i te fare haapiiraa teitei.”

Teie ta Matthew e ahuru ma pae matahiti, tei apiti i roto i te Haapiiraa o te taviniraa i te hituraa o to ˈna matahiti, i tapao: “E mea rahi aˈe ta ˈu haamaitairaa i ta to ˈu mau hoa ia hope anaˈe te haapiiraa. Ua noaa ia ˈu i te haapiiraa e te mau aravihi no te faaroo e te neheneheraa e hohora i te mau tumu parau ma te ohie.” Teie ta to ˈna tuaane Phil e 17 matahiti, i parau faahou: “Ua faarahi te Haapiiraa o te taviniraa teotaratia i to ˈu tiaturiraa. Ua ite au e ia hohora noa ˈtu vau i te hoê tumu parau, e nehenehe au.”

Ua haapii atoa te Haapiiraa o te taviniraa teotaratia i te feia paari. Teie ta Michael, o tei naea i te tahi mau fa mai te hohoraraa i te mau tumu parau i mua i te tino paoti ohipa, i faataa: “E taata mamahu roa vau i to ˈu apitiraa i te Haapiiraa o te taviniraa. Aita vau e haama faahou ra. Ua horoa mai te haapiiraa i te hoê huru paruru, te ite, te mau aravihi, e te faaitoitoraa taa ê ta ˈu i hinaaro no te haapaiuma i to ˈu mamahu.” Teie ta te hoê metua tane i parau: “Te manaˈo nei au e te faahoˈi nei au i te mau taime atoa i mâuˈa no te haapii i to ˈu apîraa ra.”

I roto i te hoê oire iti i Marite Latino, ua haere te mau melo o te Tuhaa no te haapiiraa i te Haapiiraa o te taviniraa teotaratia. I muri aˈe i to ˈna faarooraa i te hoê taeae orero no reira, teie ta te hoê o te feia ratere, te hoê faatere haapiiraa i parau ma te maere: “E mea fifi roa ia tiaturi e ua nehenehe teie taata o ta matou i matau noa e aita o ˈna i ite i te papai e i te taio, e paraparau mai na roto i te reo paniora [maoti râ na roto i to ˈna iho reo tumu], e i mua atoa i te mau taata i putuputu mai, ua nehenehe râ o ˈna.”

Oia mau, ua riro te Haapiiraa o te taviniraa teotaratia ei haapiiraa maitai roa ˈˈe i te ao nei! E nehenehe oia e tauturu i te taata apî e te ruhiruhia ia fanaˈo i te hoê haapiiraa maitai. Mai ta te hoê taurearea i parau, “E titau vau i te taata atoa o te hinaaro ra e apiti mai i te haapiiraa ia apiti oioi mai.”

[Hohoˈa i te api 13]

Te tauturu nei te Haapiiraa o te taviniraa teotaratia i te mau mirioni taata ia fanaˈo i te hoê haapiiraa maitai