Te mau ravea no te hoê haapiiraa maitai

AITA i maoro aˈenei ua piahia i te api matamua o te vea ra The New York Times te aamu no nia ia Latoya, te hoê tamahine haere haapiiraa e 16 matahiti. Ua parau o ˈna e e 11 matahiti to ˈna i te haamataraa to ˈna metua tane e taparahi e e hamani ino ia ˈna i te pae taatiraa o te tino. Ua faarue mai to ˈna metua vahine, o tei faaohipa i te raau taero, i te utuafare. “Ua riro te fare,” o ta te vea ïa i tapao, “mai te hoê fare aita e taata, aita e fare pape, aore ra mai te hoê piha e mea riaria roa na ˈna ia taoto i reira.” Tera râ, e mea taa ê mau o Latoya. Noa ˈtu râ teie mau mea atoa, ua riro mai o Latoya i te omuaraa o teie matahiti, ei peretiteni no te Taiete faahanahanaraa a te hau i ta ˈna fare haapiiraa teitei e ua noaa ia ˈna te tapao B i nia i te mau tumu parau haapiiraa.

Na te aha e nehenehe e tauturu i te hoê tamarii no roto mai atoa i te hoê huru oraraa ino ia ohipa maitai i te fare haapiiraa? E mea pinepine, te hoê ravea no te fanaˈo i te hoê haapiiraa maitai o te hoê ïa taata paari haapao maitai—e mea hau aˈe hoê aore ra nau toopiti metua iho o te tamarii—o te turu mai e o te faaô roa mai i roto i te haapiiraa i te tamarii. Ua manaˈo te hoê tamahine haere haapiiraa tuarua e mea faufaa roa te reira i nehenehe ai o ˈna e parau: “Mea na roto anaˈe i te turu a te mau metua e nehenehe ai te mau tamarii e ora mai i te fare haapiiraa.”

Te farii nei te rahiraa orometua haapii i te reira. Teie ta te hoê orometua haapii i te oire no New York i parau: “No te mau tamarii haere haapiiraa atoa o te ohipa maitai ra e o te manuïa ra i roto i te porotarama haapiiraa—e e mea rahi hoi ratou—te vai ra ïa te hoê metua o te turu noa ra.”

Te turu a te mau metua, te hoê ravea faufaa

Ua tuatapapa te vea ra Reader’s Digest i te matahiti i mairi aˈenei i te uiraa, “No te aha e mea maitai aˈe te tahi mau tamarii haere haapiiraa i te tahi atu?” Hoê o te mau faaotiraa oia hoi e “te horoa nei te mau utuafare papu maitai i te mau tamarii i te hoê tuhaa maitai i roto i te fare haapiiraa.” Te horoa nei te mau metua i roto i teie huru utuafare na ta ratou mau tamarii i te ara-maite-raa here e te mau faufaa e te mau tapao maitatai. Teie râ ta te hoê metua tane i tapao: “Eita outou e nehenehe e horoa ˈtu i te aratairaa maitai mai te peu e aita outou e ite ra eaha te tupu ra i te fare haapiiraa.”

Te hoê ravea maitai no te ite ia haere ïa e mataitai. Teie ta te hoê metua vahine o tei haere e mataitai i papai: “I to ˈu haereraa na roto i te vahi haereraa taata i te fare haapiiraa a ta ˈu tamahine, ua faaroo vau i te parau ino, te parau faufau. I te mau vahi atoa te apapa haere ra te mau tamarii—ahiri e e hohoˈa tavirihia teie, e tapaohia ïa X.” E nehenehe teie mau mataitairaa e tauturu ia outou ia taa e mea fifi no te mau tamarii i teie mahana ia fanaˈo i te hoê haapiiraa maitai, a ora noa ˈi i te hoê oraraa maitai i te pae morare.

Teie ta te buka ra The American Teacher 1994 i tapao ma te papu maitai: “E mea papu e parau te mau tamarii haere haapiiraa o tei haavîhia, e mea varavara roa to ratou mau metua i te taai atu i te fare haapiiraa, mai te haereraa e farerei i te mau orometua haapii, te mau farereiraa metua aore ra pǔpǔ, aore ra te mataitairaa i te fare haapiiraa.”

Ua faaite te hoê metua vahine e haapeapea ra eaha te tia i te mau metua ia rave. “A haere e mataitai i te fare haapiiraa!” o ta ˈna ïa i parau. “A faaite atu i te faatere o te fare haapiiraa e te anaanatae ra outou i ta outou tamarii e haapii ra. Te haere pinepine nei au e mataitai i te fare haapiiraa e e tomo roa vau i roto i te mau piha.” Ua haapapu te tahi atu metua vahine i te faufaaraa ia riro ei paruru no te hoê tamarii. Teie ta ˈna i faataa: “Ua haere ta ˈu tamarii i te piha ohiparaa i te fare haapiiraa no te paraparau i te hoê taata aˈo e aita roa ˈtu ratou i tâuˈahia mai. I to ˈu haereraa na muri iho i ta ˈu tamarii i te mahana i muri iho, ua ohipa ratou hau atu â i ta ratou e nehenehe no te tauturu ia ˈu—e ta ˈu tamarii.”

Ua haapapu atoa teie metua vahine e maha tamaroa ta ˈna i te faufaaraa ia anaanatae i te mau ohipa a te fare haapiiraa o te mana roa ra i nia i te haapiiraa a ta outou tamarii. “A haere i te mau putuputuraa i faataahia e te fare haapiiraa, i te faaiteiteraa o te mau ohipa aravihi a te mau tamarii haere haapiiraa—i te mau mea atoa o ta outou mau tamarii e rave ra e ua titau-manihini-hia te mau metua,” o ta ˈna ïa i parau. “Te reira ïa te mau taime faahiahia no te farerei atu i te mau orometua haapii a ta outou tamarii. Te hinaaro ra ratou e ite e te faariro nei outou i te haapiiraa i ta outou tamarii mai te hoê tuhaa faufaa roa o to ˈna oraraa. Ia ite te mau orometua haapii i te reira, e hau atu â ratou i te horoa i te taime e te tutavaraa hau no ta outou tamarii.”

Te rave-amui-raa te ohipa e te mau orometua haapii

Te manaˈo ra te tahi mau metua e mau ohipa faufaa roa ˈtu â ta ratou e rave i te mau po i faanaho-taa-ê-hia e te mau fare haapiiraa ia farerei te mau metua i te mau orometua haapii. E ere anei i te mea faufaa roa ˈˈe ia haavata mai ia outou iho no te feia e tamata ra i te tauturu i ta outou mau tamarii ia fanaˈo i te hoê haapiiraa maitai? E mea faufaa roa ia rave amui te mau metua e te mau orometua haapii i te ohipa!

I Rusia te vai ra te hoê faanahoraa maitai no te haamaitai i te ohipa rave-amui-hia e te mau metua e te mau orometua haapii. Ua tapaohia te mau ohipa haapiiraa atoa i roto i te mea tei piihia te hoê Dnievnik—te hoê tapaopaoraa ohipa i te mau mahana atoa o tei tuatihia e te hoê kalena. E tia i te hoê tamarii haere haapiiraa ia afai mai i ta ˈna Dnievnik i te haapiiraa tataitahi e ia faaite atu ia anihia mai e te orometua haapii. E tia atoa i te mau tamarii ia faaite i te Dnievnik i to ratou mau metua, o te anihia ia tarima i te hebedoma tataitahi. Mai ta Victor Lobachov, te hoê metua tane no Moscou e te haere noa ra ta ˈna mau tamarii i te haapiiraa, i tapao, “e tauturu teie haamaramaramaraa i te mau metua ia ite i te mau ohipa e te mau nota a ta outou mau tamarii.”

Te amuamu pinepine nei râ te mau orometua haapii i teie mahana e aita te mau metua e anaanatae ra i te haapiiraa a ta ratou mau tamarii. Ua parau te hoê orometua haapii no te hoê fare haapiiraa teitei i te mau Hau Amui no Marite e ua hapono o ˈna i te hoê taime e 63 rata i te mau metua no te faaara ia ratou e ere ta ratou mau tamarii i te mea aravihi roa i te pae haapiiraa. E toru anaˈe metua tei pahono mai ma te taniuniu mai ia ˈna!

E mea peapea mau iho â! E tia i te mau metua ia faaô roa mai i roto i te haapiiraa a ta ratou tamarii, te reira hoi ta ratou hopoia matamua. Teie ta hoê taata haapii i parau ma te tano maitai no nia i te tumu parau: “Te tapao matamua o te haapiiraa o te tururaa ïa i te mau metua ia tauturu i te feia apî ia amo i te mau hopoia.”

No reira, e tia i te mau metua ia haamatau i te mau orometua haapii a ta ratou mau tamarii. Mai ta te hoê metua vahine i parau, “te hinaaro ra te mau orometua haapii e taniuniu ia outou ma te haapeapea ore i te mau taime atoa.” E e tia i te mau metua ia farii—ia faaitoito atoa—ia paraparau tahaa mai i te mau orometua haapii no nia i ta ratou mau tamarii. E tia i te mau metua ia ui i teie mau uiraa taa ê: Te vai ra anei to outou mau fifi e ta ˈu tamarii? E mea faatura anei o ˈna? Te haere ra anei o ˈna i te mau haapiiraa atoa? Te tae maira ra anei o ˈna na mua ˈˈe i te hora haamataraa?

Eaha ïa mai te peu e e parau mai te mau orometua haapii i te tahi ohipa au ore no nia i ta outou tamarii? Eiaha tatou e manaˈo e ere i te parau mau. Ma te peapea, e rave rahi taurearea e mea maitai ratou i te fare aore ra i ta ratou vahi haamoriraa, tera râ te ora nei ratou e piti huru oraraa. No reira a faaroo maitai i te orometua haapii, e a titorotoro e mea tano anei ta ˈna e parau ra.

Ia hoˈi mai ta outou tamarii i te fare

Eaha to outou huru ei metua ia hoˈi anaˈe outou i te fare mai te ohipa mai? Hepohepo? Taiâ? E mea ino roa ˈtu paha ïa ta outou tamarii ia hoˈi mai o ˈna mai te fare haapiiraa mai. Teie ïa ta te hoê metua tane i faaitoito: “Ia haamaitaihia to ˈna hoˈiraa mai. Ua faaruru na paha ratou i te hoê mahana fifi roa.”

Ia nehenehe, e mea au aˈe no te hoê metua ia faaea i te fare ia tae anaˈe mai te tamarii. Mai ta te hoê metua vahine i tapao, “eita te mau tamarii e nehenehe e faaite mai ia outou eaha te huru mai te peu e aita outou i reira no te paraparau atu ia ratou. No reira a rave i te hoê tutavaraa papu ia faaea i reira ia tae mai te mau tamarii.” Te hinaaro ra te hoê metua e ite eiaha noa i ta ta ˈna tamarii i rave i to ˈna atoa râ manaˈo e to ˈna huru. Te titau ra te iteraa i te reira e rave rahi taime, te tutavaraa, e te uiuiraa maitai. (Maseli 20:5) E mea faufaa te hoê tauaparauraa i te mau mahana atoa.

Teie ta te hoê orometua no te fare haapiiraa tuatahi i te oire no New York i tapao: “I te hoê mahana taa ê, e nehenehe te mau faaueraa tumu i te pae morare a te hoê porotarama haapiiraa i roto i te ati e ô roa i roto i ta outou tamarii.” No reira teie ta ˈna i faaitoito: “A haapao maitai i te mea e tupu ra i roto i te mafatu o ta outou tamarii. A rave i te taime, noa ˈtu e ua rohirohi outou, ia haamahora mai o ˈna i to ˈna mafatu e ia mono te mau faufaa ino na roto i te mea tia.”—Maseli 1:5.

Teie atoa te aˈoraa a te hoê orometua tahito no te fare haapiiraa teitei: “Maoti râ i te ani noa ˈtu eaha tei tupu i te fare haapiiraa, e mea maitai aˈe ia tuu atu i te mau uiraa papu e te taa ê no nia i te mahana e ta ˈna mau ohipa. Eita e tia ia ravehia te reira ma te etaeta aore ra ma te hiˈopoa, na roto râ i te tauaparauraa ma te faanaho-ore-hia e te tamarii.”

Teie ta Richard W. Riley, te papai parau no te haapiiraa i te mau Hau Amui no Marite, i faaue: “A paraparau roa ˈtu i ta outou mau tamarii, i ta outou iho â râ mau taurearea, no nia i te mau fifi atâta o te raau taero e te ava e te mau faufaa o ta outou e hinaaro e ia tapea mai ta outou mau tamarii. E nehenehe teie mau aparauraa omoe, e mea huru ê rii paha no outou, e faaora mai ia ratou.”

Eiaha roa ˈtu te hoê metua, te hoê metua iho â râ e hopoia ta ˈna i roto i te hoê amuiraa kerisetiano, ia manaˈo noa ˈˈe e mea ohipa roa o ˈna no te faaroo atu i ta ˈna mau tamarii. Noa ˈtu e mea fiu ia faaroo i ta ratou e parau maira, a faaite atu ia ratou na nia i to outou hohoˈa mata e ta outou mau peu e te au nei outou ia paraparau tahaa mai ratou ia outou. Teie te aˈoraa a te hoê tamahine haere haapiiraa: “Eiaha roa ˈtu e huru ê ia paraparau noa mai ta outou tamarii no nia i te raau taero aore ra te taatiraa o te tino i te fare haapiiraa.”

No te mea e te amaha ra te oraraa utuafare, e rave rahi i teie mahana o te nehenehe e faaauhia i te mau “otare.” (Ioba 24:3; 29:12; Salamo 146:9) I roto i te hoê amuiraa kerisetiano, te vai noa ra iho â te tahi taata o te nehenehe e turu i te hoê taurearea o te hinaaro ra i te tauturu. O outou anei?

A faaitoito i te haapiiraa e te hopoia

Aita te rahiraa i faaô roa i roto i te ohipa haapiiraa mai ia Latoya, o tei faahitihia i te omuaraa. Te hinaaro nei te rahiraa e rave rahi faaitoitoraa no te haapii. No nia i ta ˈna iho mau tamarii, teie ta te faatere hau tahito no te haapiiraa i te oire no New York ra o Joseph Fernandez i parau: “Ua haamau matou i te mau tau haapiiraa titauhia i te fare. Ua horoa matou i te mau buka, ua faaitoito matou ia haere i te mau fare vairaa buka, e te mea titauhia na mua roa o te haereraa ïa i te haapiiraa e te apitiraa.”

Teie ta te tahi atu taata faatere haapiiraa i parau: “E tia ia tatou ia horoa na ta tatou mau tamarii i te mau buka e te mau aamu mai ta tatou e horoa nei na ratou te afata teata, te mau hohoˈa, te video e te mau fare hooraa taoˈa.” Ia faaineine anaˈe te mau tamarii i ta ratou parau tamau, e nehenehe te mau metua e faaea noa na pihai iho a rave noa ˈi i te tahi haapiiraa tataitahi aore ra a taio noa ˈi. E ite ïa ta outou mau tamarii e te haafaufaa nei outou i te haapiiraa.

I roto e rave rahi fare, te afata teata te fifi rahi roa ˈˈe no te haapiiraa. “I te 18raa o te matahiti,” o ta te hoê orometua haapii ïa i parau, “e parahi te feia apî i roto i te piha haapiiraa e 11 000 hora te maoro e e 22 000 i mua i te afata teata.” E tia i te mau metua ia faaiti mai i te taime e mataitai ai ta ratou mau tamarii i te afata teata, peneiaˈe ia mataitai anaˈe ratou iho i te tahi mau taime. Hau atu â, a haapii outou iho i te tahi mau ohipa e ta outou mau tamarii. A taio outou paatoa. A faanaho i te taime i te mau mahana atoa no te hiˈopoa i te mau parau tamau.

I te fare haapiiraa, e rave rahi parau tamau a ta outou tamarii. E faaineine anei ratou i te reira? E na reira paha ratou mai te peu e ua haapii outou ia ratou ia amo i te tahi mau hopoia i te fare. Te hoê ravea faufaa no te na reira o te horoaraa ïa na ratou i te hoê tereraa ohipa tamauhia i te mau mahana atoa. Te titauhia ra ratou ia rave i te reira ia au i te hoê porotarama taa ê. Parau mau, e anihia ia outou e rave rahi tutavaraa no teie huru faaineineraa, tera râ, e haapii te reira i ta outou mau tamarii ia amo i te mau hopoia o ta ratou e hinaaro ra no te manuïa i te fare haapiiraa e i roto i te oraraa a muri aˈe.

Te titauraa a te tamarii haere haapiiraa, te ravea faufaa

Ua faataa te taata aˈo ra o Arthur Kirson i te tahi atu ravea faufaa no te hoê haapiiraa maitai i to ˈna faahitiraa i te hiˈoraa o Latoya, tei faahitihia i te omuaraa: “Te taime matamua to ˈu farereiraa ia ˈna i muri noa ˈˈe ïa i te hoê ati rahi tei tupu i te fare. Te parahi noa ra teie tamahine ma te hohoˈa mata oto [no te hamani-ino-raa i te pae taatiraa o te tino a to ˈna metua tane]. E te ohipa noa aita vau i ite aˈenei i nia ia ˈna o to ˈna ïa peapea no ta ˈna ohipa haapiiraa.”

E, te hoê ravea faufaa no te hoê haapiiraa maitai o te titauraa uˈana a te hoê tamarii ia haapii. Teie ta te hoê taurearea i te oire no New York i faaite: “I roto i te mau fare haapiiraa i teie mahana ua niu-taatoa-hia te hutiraa mai te feia haere haapiiraa i te faufaaraa o te haapiiraa, i nia i te faatupuraa i te hinaaro mau e te aˈoraa.”

Ei hiˈoraa, teie ta te hoê orometua haapii i parau atu i te hoê metua vahine o tei tapitapi no nia i te haapiiraa a ta ˈna tamarii: “Eiaha e haapeapea e Smith Vahine. E mea maramarama roa o Justin, aita e faufaa no ˈna ia haapii e nafea ia papai. E papai parau ta ˈna no te rave i te reira no ˈna.” Noa ˈtu eaha te maramarama o te hoê tamarii, e mea faufaa te haamaitairaa i te mau aravihi no te taio e no te papai, mai te hoê tumu parau taa maitai, te huru papairaa ohie ia taio, e te papairaa i te mau piapa ma te tano.

Ma te haama, aita te tahi mau orometua haapii i patoi noa ˈˈe i to te taata aravihi tuiroo i te pae feruriraa ra o Carl Rogers parauraa e: “Eiaha roa ˈtu te hoê taata e tamata i te haapii i te tahi ohipa o ta ˈna e manaˈo ra e mea faufaa ore.” Eaha te hape i roto i ta ˈna parau? Ma te papu, e pinepine eita te hoê tamarii e nehenehe e ite atea i te faufaaraa no a muri aˈe o te mea e anihia ra ia ˈna ia haapii. I roto e rave rahi tupuraa, eita te reira e taa-oioi-hia i roto i te oraraa. Ma te taa maitai, te hinaaro ra te hoê tamarii i teie mahana i te hoê titauraa no ˈna iho e fanaˈo i te hoê haapiiraa maitai!

O Cindy, e 14 matahiti i te faito iva, te hoê hiˈoraa maitai o te hoê taurearea tamahine o te faaite ra i teie huru titauraa. Teie ta ˈna i faataa: “E faaea noa vau i muri aˈe i te haapiiraa e e tauaparau vau e te mau orometua haapii e e haamatau vau ia ratou. E tamata vau i te taa e eaha ta ratou e hinaaro ia rave ta ratou mau tamarii haere haapiiraa.” E mea haapao maitai o ˈna i roto i te piha e e rave o ˈna na mua roa ta ˈna mau parau tamau. Ia faaroo maitai i roto i te piha aore ra ia taio, e haamatau te mau tamarii haere haapiiraa aravihi i te na reira e te hoê penitara e te hoê papie no te rave i te mau nota maitatai.

No te fanaˈo i te hoê haapiiraa maitai e mea faufaa te hoê titauraa e ape i te mau amuimuiraa iino. Teie ta Cindy i faatia: “Te imi noa ra vau i te hoê taata e mea maitatai ta ˈna mau peu morare. Ei hiˈoraa, e ani au i te mau hoa haapiiraa eaha to ratou manaˈo no nia i tera e tera raau taero aore ra te peu taiata. Ia pahono mai ratou mai teie e, ‘Eaha te inoraa?’ E taa ïa ia ˈu e ere ratou i te mau hoa maitatai. Mai te peu râ te haavahavaha mau ra te hoê taata i teie mau ohipa e te hinaaro ra o ˈna e faataa ê mai ia ˈna, e parahi ïa vau i pihai iho ia ˈna i te taime tamaaraa i mua.”

E rave rahi tautooraa taa maitai no te fanaˈo i te hoê haapiiraa maitai i teie mahana. E nehenehe râ teie huru haapiiraa e noaahia mai te peu e e faaohipa te feia haere haapiiraa e te mau metua i te mau ravea. I muri iho e hiˈo mai tatou i te tahi atu faanahoraa o te nehenehe e tauturu rahi mai ia outou ia fanaˈo i te hoê haapiiraa maitai.

[Tumu parau tarenihia i te api 7]

Te aˈoraa faaherehere aore ra here?

Te faaara ra te Bibilia e tupu te ati ia faahereherehia te mau tamarii rii. (Maseli 29:21) Teie ïa ta Albert Shanker, peretiteni no te Amuitahiraa marite o te mau orometua haapii, i parau: “Te manaˈo ra te tahi mau metua e te rave ra ratou i te mau mea maitatai atoa no ta ratou mau tamarii mai te peu e e faatia noa ratou i to ratou mau hinaaro. E ua ite tatou e e mea ino.”

E rave rahi atoa tamarii tei ite e mea ino teie huru faaherehereraa. Teie ta te hoê vea Massachusetts i te omuaraa o teie matahiti i tapao: “I te titorotororaahia e 1 572 tamarii haere haapii i West Springfield i te mau faito matahiti 11 tae atu i te 18, ua itehia e te mana rahi nei te ‘faaherehere-noa-raa a te metua’ e eiaha râ te faaheporaa a te mau hoa, o te turai ra i te mau tamarii i teie huru faito matahiti ia faaohipa i te raau taero e te ava.”

Na teie huru faaherehereraa i te mau tamarii i turu atoa i te hoê tupuraa rahi o te peu taiata. Oia mau, mai ta te Bibilia e parau ra, e noaa te haama i te utuafare ia ore e aˈo.—Maseli 29:15.

[Tumu parau tarenihia i te api 10]

Ta te mau metua e rave

✔ A haamatau atu i te fare haapiiraa a ta outou tamarii, ta ˈna mau opuaraa, e to ˈna huru i nia i te mau faufaa e te mau tiaturiraa o ta outou e turu ra.

✔ A haere atu e farerei i te mau orometua haapii a ta outou tamarii, e a tamata i te haamau i te hoê taairaa maitai i te pae ohipa e o ratou.

✔ A anaanatae rahi atu i te parau tamau a ta outou tamarii. A taio tamau e o ˈna.

✔ A ara e eaha ta ta outou tamarii e mataitai ra i roto i te afata teata e ehia rahiraa taime.

✔ A haapao maitai i te mau maa matauhia a ta outou tamarii. E nehenehe te maa paia ore e haafifi i to ˈna aravihi e haamau i to ˈna feruriraa.

✔ Ia papu ia aa maitai te taoto o ta outou tamarii. Eita te mau tamarii rohirohi e haapii maitai.

✔ A tamata i te tauturu i ta outou tamarii ia maiti i te mau hoa maitatai.

✔ Ia riro outou ei hoa maitai roa ˈˈe no ta outou tamarii. Te hinaaro ra o ˈna i te mau hoa paari atoa o ta ˈna e nehenehe e fanaˈo.

Ta te mau tamarii e rave

✔ Maoti te tauturu a to outou mau metua, a faanaho i te mau fa e te mau ravea no te manuïaraa. A tauaparau no nia i teie mau fa e ta outou mau orometua haapii.

✔ A maiti maitai i ta outou mau tuhaa haapiiraa maoti te tauturu a ta outou mau orometua haapii e te mau metua. I te pae rahi te mau haapiiraa ohie i maitihia e ere i te mea maitai roa ˈˈe.

✔ A tamata i te haamau i te hoê taairaa maitai e ta outou mau orometua haapii. A ite e eaha ta ratou e tiai ra ia outou. A tauaparau no nia i to outou haereraa i mua e te mau fifi e o ratou.

✔ A faaroo maitai i roto i te piha haapiiraa. Eiaha e faahuehue.

✔ A maiti ma te paari i to outou mau hoa. E nehenehe ratou e tauturu aore ra e haafifi i to outou mau haereraa i mua i te fare haapiiraa.

✔ A rave maitai i ta outou mau parau tamau e te mau tumu parau. A horoa ˈtu i te hoê taime maitai no te reira. A ani atu i to outou mau metua aore ra i te tahi atu taata paari i te tauturu ia hinaaro outou.

[Hohoˈa i te api 8]

A faaroo maitai ia amuamu te orometua haapii no nia i ta outou tamarii

[Hohoˈa i te api 9]

A uiui i ta outou tamarii no nia i te haapiiraa i te mau mahana atoa