E apiti anaˈe i te Haapiiraa o te Taviniraa Teotaratia
1 Auaa te Haapiiraa o te Taviniraa Teotaratia, e mau mirioni Ite no Iehova o te faaineinehia ra no te riro ei mau tavini no te parau apî maitai. Te haamanaˈo ra paha te rahiraa i rotopu ia tatou, i to tatou mǎtaˈu e to tatou manaˈo aravihi ore i to tatou haamataraa i roto i teie haapiiraa; e i teie nei, ua mauruuru tatou i ta ˈna tuhaa i rave i roto i to tatou tupu-maitai-raa i te pae varua, e i te pae no te paraparauraa e te haapiiraa i te taata i te Parau a te Atua. (Hiˈo Ohipa 4:13.) Ua tapao anei outou i to outou iˈoa i roto i teie haapiiraa faahiahia mau?
2 O vai te nehenehe e haere atu e tapao? Te pahono ra te buka ra Organisés pour bien remplir notre ministère i te api 73 e: “E nehenehe te feia atoa e apiti nei i roto i te mau ohipa a te amuiraa e tapao i to ratou iˈoa, e tae noa ˈtu te feia aita i maoro roa to ratou haereraa mai i te mau putuputuraa, mai te peu râ e aita to ratou oraraa e ofati ra i te mau faaueraa tumu a te Bibilia.” Te ani nei matou i te feia atoa e faaî nei i te mau titauraa e anihia ra—te tane, te vahine e te tamarii—ia haere e farerei i te tiaau no te haapiiraa no te tapao i to ratou iˈoa.
3 Porotarama no te haapiiraa 1997: I roto i te Porotarama no te Haapiiraa o te Taviniraa Teotaratia 1997, e tuatapapahia e rave rahi haapiiraa e te mau taata no roto i te Bibilia, e tae noa ˈtu te aamu o te faanahonahoraa. Eita noa tatou e haamaitai atu â i to tatou aravihi i te pae no te oreroraa e te haapiiraa i te taata, e haapii atoa râ tatou e rave rahi tuhaa, na roto i te mau faufaa pae varua e vai ra i roto i teie porotarama i te mau hebedoma atoa. (Mas. 9:9) Mai te peu e e faaineine tatou no te haapiiraa, na roto i te taioraa tahebedoma o te Bibilia, e e tae tamau atu tatou, e hoona-rahi-hia ïa tatou i te pae varua.
4 I te matahiti 1997, ua haapotohia te pae rahi o te mau tuhaa taioraa Bibilia no te tumu parau n° 2 ia faaauhia i mutaa ihora. Ia faaineine oia i ta ˈna tumu parau, e ara te taata haapii i te taio uati i ta ˈna taioraa, ia nehenehe oia e ite ehia taime ta ˈna e horoa no ta ˈna omuaraa parau e ta ˈna faaotiraa i nia i na minuti e pae i faataahia no ˈna. E faaohipa maitai ïa oia i to ˈna taime e e haamaitai oia, eiaha noa i to ˈna aravihi no te taio, i to ˈna atoa râ aravihi no te paraparau ma te ore e hiˈo i te papie.—Tim. 1, 4:13.
5 Ua tuu-atoa-hia te pororaa ma te faanaho-ore-hia i roto i te mau huru tupuraa e nehenehe e maitihia no te tumu parau n° 3, niuhia i nia i te buka ra Te ite. E nehenehe ïa te hoê tuahine e maiti ei huru tupuraa, i te hoê hoˈi-faahou-raa e farerei, te hoê haapiiraa Bibilia aore ra te pororaa ma te faanaho-ore-hia. E tia râ ia tuu-noa-hia te tapao i nia i te haapiiraa, eiaha râ i nia i te huru tupuraa.
6 Noa ˈtu e e fanaˈo tatou i te haamaitairaa e vauvau i te hoê oreroraa parau haapiiraa, te mau tuhaa anaanatae o te taioraa Bibilia aore ra te hoê tumu parau a te taata haapii, e nehenehe tatou e faaite i te faufaaraa ta tatou e horoa nei no te Haapiiraa o te Taviniraa Teotaratia na roto i te ohiparaa e te faaineine-maitai-raa i ta tatou tumu parau, te vauvauraa ma te manaˈo papu e te aau tae, te oreraa e mairi i te taime i faataahia, te faarooraa e te faaohiparaa i te mau aˈoraa a te tiaau no te haapiiraa, e na roto atoa i te tutava-noa-raa i te haapao maitai i ta tatou hopoia. E riro ïa to tatou apitiraa ˈtu i te haapiiraa ei haamaitairaa no tatou iho, e tae noa ˈtu no te feia e faaroo mai.