Te mau tavini o te haamoriraa a Satani—Te mau raau taero e te upaupa Heavy-Metal

UA PAPAI o Carl A. Raschke, faatere o te pu maimiraa no nia i te huitaata no te Haapiiraa tuatoru no Denver e: “A tomo noa ˈtu ai tatou i roto i te toruraa o natau ahuru matahiti o te tau a Satani, aita i maerehia e e riro te raau taero, te upaupa heavy metal, te hamani-ino-raa e te haavîraa uˈana arai-ore-hia mai te tahi tapao haamǎtaˈuraa e tahiri ra i nia i te huru inoraa o te huitaata.” Ua parau atoa o ˈna e: “E nehenehe e parauhia e mai te taairaa i rotopu i te huru upaupa i te pae faaroo i taaihia i te evanelia e te kerisetianoraa oia atoa ïa i rotopu i te upaupa heavy metal e te haamoriraa ia Satani. E mea iti roa te mau taata o tei riro mai ei kerisetiano na roto i te faaroo-noa-raa i te huru upaupa i te pae faaroo i taaihia i te evanelia i roto i te radio. E haapaariraa puai mau râ to te upaupa heavy metal. E faatiamâ oia i te mau ohipa faufau atoa o ta te mau tamarii e rave noa ra.”

E pariraa paari te reira i te mau mea o ta te mau taurearea e farii ra mai te tahi mau tauiraa tano o te mau fifi o te oraraa—te upaupa heavy metal e te raau taero. Ua tano anei teie mau pariraa? E nehenehe anei te raau taero e te upaupa heavy metal e riro ei tapao no te haamoriraa ia Satani? E hiˈopoa anaˈe na i te mau tatararaa a te feia i faaruru i te haavîraa uˈana a te mau taata haamori ia Satani e a te feia i tuatapapa i te reira.

“Ma te maere-ore-hia, e auraa ‘paieti’ to te poroi atâta a te upaupa haevy metal—i te mea e te faahanahana ra oia i te hoê mana teitei aˈe e aratai ra i te ao nei. E ere râ o te Atua taua mana ra,” ta Raschke ïa i papai i roto i ta ˈna buka ra Painted Black. “Ua . . . faanahonahohia râ te reira e Satani iho.” Hau atu, ua parau oia e: “Te mana e te haavîraa uˈana no ǒ mai ia Satani ra o te mea ïa ta te mau taurearea i erehia i te tiaturiraa, e ma te hoê haava manaˈo mahora maitai, e pee ohie nei. . . . Te tiaturi ra taua mau taurearea ra i haapeapeahia e i hamani-ino-hia, na roto i te ino o ta ratou i faaruru i to ratou apîraa ra, e e riro atoa e mea ino te Mana Teitei. Te haapapu ra te upaupa heavy metal i taua ‘haapiiraa faaroo ra’ e te faatupu ra oia i te reira i roto i te upaupa.”

Ia au i te Taote Paul King no te Haapiiraa Tuatoru no Tennessee, o tei tia ˈtu i mua i te Apooraa rahi iriti ture no Marite no nia i te upaupa heavy metal, ua niuhia te upaupa au-rahi-hia e te rahiraa o te mau taurearea feruriraa tano ore i nia i te “tumu parau o te haavîraa uˈana, te au-ore-raa, te orureraa hau, te taatiraa pae tino etene, te maferaraa vahine e te faahanahanaraa ia Satani. Ia amui anaˈe te raau taero i roto i te huru oraraa o te hoê taurearea, e mea papu ïa e ua hau atu taua anaanataeraa ra.” Te faateitei e te arue ra te heavy metal i te hoê mana ino, ta King ïa i parau. Na roto i te upaupa heavy metal, “ua faateitei-taa-ê-hia te mau ohipa iino i roto i te mau hautiraa upaupa,” o ta ˈna ïa i parau.

E hiˈo anaˈe i te mau hotu o te parau rahi faaite o te upaupa heavy metal i roto i te tabula i muri nei.

I te matahiti i mairi aˈenei i New Jersey, i te fenua Marite, ua haapohe taue e piti na taurearea 15 matahiti i te mau fanauˈa o te hoê uri ufa Labrador piihia Princess. “E tusia na Satani,” o ta raua ïa i parau. Ua tarî raua i te uri ma to ˈna iho fifi, ua tue raua ia ˈna e pohe noa ˈtu ai, ua tâpû i to ˈna arero e ua faaohipa i te reira i roto i te hoê peu tusia ia Satani. Ua faatautau raua i te tino tâpûpûhia o te uri i nia i te hoê auri e ua faatarere atura i roto i te aua o te taata tapiri. Ua itehia te tahi mau tapao peu demoni i nia i te afii o te uri, e ua nanaˈohia i nia i te repo i pihai iho i te tino o te urî te hoê tapao (hoê fetia e pae amaa i roto i te hoê ohuraa—tapao no te haamoriraa a Satani). I taua po taparahiraa ra, ua faaroo raua i te hoê pehe rock Deicide (taparahiraa a te Atua) e te faateniteni ra te taata himene matamua i te hamani-ino-raa e te taparahiraa animala.

I Kalifonia, ua taparahi pohe roa e piti taurearea tane e vahine, e ia au i te mau hoa, o tei pee rahi i te haamoriraa a Satani, i te metua vahine o taua tamahine ra ma te patia ia ˈna i te tipi e ma te tairi ia ˈna i te hoê tauihaa auri. I roto i taua noâ vahi ra, ua pure te hoê taurearea ia Satani e i muri aˈe ua pupuhi pohe oia i to ˈna metua tane. Ua papu roa i te mau mutoi i titorotoro i nia i taua ohipa ino ra e o te upaupa heavy metal te tumu o te reira. “Inaha, te haapii ra te upaupa ia outou e e aita e faufaa no outou ia faaroo i to outou mau metua, e ia ora noa outou mai ta outou i hinaaro,” o ta te hoê ïa vahine mutoi i parau.

I te fenua Beretane, ua faahiti te feia i hamani-ino-hia e e rave rahi taata no te hoê pǔpǔ ohipa maferaraa i te mau mutoi e te vai ra i nia i te hoê o taua mau taata haru vahine ra te mau nanaˈo, tapao o te hoê pǔpǔ upaupa heavy metal o te faaitoito ra i te maferaraa e te haavîraa uˈana i roto i ta ratou mau pehe.

I roto i te mataeinaa o Arkansas, i te fenua Marite, ua taparahi pohe te hoê taurearea, 16 matahiti, i to ˈna ra nau metua e te hoê raau, e i muri iho, ua tâpûpû oia ia raua e te hoê tipi tâpû iˈo. Ua ite te mau mutoi i roto i ta ˈna faataˈi upaupa i ineine noa no te pata te hoê pehe upaupa heavy metal, “Fata tusiaraa,” e faaroohia i roto i te mau reo himene ra e: “Te tahuˈa rahi e tiai ra, te tipi i to ˈna rima, te toto parare o te hoê paretenia. Te pahono ra te taparahiraa a Satani, te mau peu haapoheraa, i taua mau faaueraa ra. A faaô i roto i te ao a Satani . . . A haapii i teie mau pure moˈa, ‘Manava e Satani.’”

Area râ te mau parau o te tahi mau pehe e himenehia ra e te mau melo o te pǔpǔ heavy metal—mea pinepine e apiti-atoa-hia mai ratou e to ratou feia apee i roto i ta ratou mau himeneraa maamaa, aore ra e faaroohia ra e rave rahi taime i roto i te faataˈiraa upaupa—eaha te faahopearaa o taua mau huru parau ra i nia i te mau taurearea aitâ i paari te feruriraa? Ei hiˈoraa, e rave anaˈe na i te mau taˈo o teie himene: “Te aratai nei Satani to tatou fatu o te mau mea ino ra i to tatou taahiraa avae matamua,” e “A haamanii i to outou toto, a vaiiho ia tahe mai i nia ia ˈu. A rave i to ˈu rima e a vaiiho ia oe ia pohe . . . E haamanii oe i te toto. E noaa to oe nephe ia ˈu.”

“Mai te peu e e farii tatou i te faaotiraa e e nehenehe te mau hohoˈa taatiraa pae tino e turai i te hoê tamarii ia manaˈo ino,” ta Carl Raschke i papai, “no te aha e ore ai e huti i te feruriraa i nia i te manaˈo e e nehenehe te mau parau haapohe, tâpûpû, tâpû, hamani ino, haamoe, himenehia e turai i te hoê taata upoo ino ia faatupu maitai i taua mau ohipa ra?

Te manaˈo râ o te feia tuatapapa no te mau vahi atoa oia ïa te haere apipiti noa ra te raau taero e te haamoriraa ia Satani. Te autâ ra te taata titorotoro tahito ra o David Toma e “aita aˈenei o ˈna i farerei aˈenei i te hoê taata haamori ia Satani e aita i rave i te raau taero.” Ua faataa te vea ra Teen e, te faaino nei te raveraa i te raau taero i te ohipa a te mau taurearea “o te pee ra i te haamoriraa a te diabolo, na roto i te haafifi-paari-raa i to ratou ite i te mau mea mau e te mau mea e huru mau to ratou ia hiˈo-anaˈe-hia na roto i te haapouriraa a te raau taero e a te ava.”

“E taairaa piri roa to te upaupa heavy metal e to te raau taero paari mai te taairaa atoa i rotopu i te mau taviriraa e te feia hauti rahi i te moni,” ta Raschke ïa i parau. “E rave te taurearea i topa i raro aˈe i te ohiparaa a te raau ra i te hoê huru oraraa faaahaaha, hamani ino, eiâ e te hinaaro rahi i te pae taatiraa tino—turuhia te taatoaraa e te mau taˈi paaina e te taˈi haruru ore o te mau pǔpǔ upaupa heavy metal.”

Ma te feaa ore, e riro ohie noa te hoê taurearea i te ainu a Satani mai te peu e e erehia o ˈna i te feruriraa tano e ia ô mai te mau manaˈo iino e te haavîraa uˈana.

[Parau iti faaôhia i te api 16]

E riro ohie noa mai te hoê i te ainu a Satani mai te peu e e erehia oia i te feruriraa tano e ia ô mai te ino e te haavîraa uˈana i roto ia ˈna

[Hohoˈa i te api 15]

Eaha ta outou e tuu nei i roto i to outou feruriraa?