Te mau taurearea o teie nei tau—E ainu ohie anei no te haamoriraa a Satani?

“UA PARARE roa te haamoriraa a Satani i roto i te mau ui apî,” ta te hoê vea Finlandais ïa o te 27 no te febuare 1993 e parau ra. Ia au i te mau haamaramaramaraa i noaa mai no roto mai i te mau mutoi no Tampere, i Finlande, te aratai nei te mau taata taparahi taata e ô nei i roto i te tuhaa o te raau taero, i te mau taurearea, te mau tamahine iho â râ, i roto i te haamoriraa a Satani. I roto e rave rahi mau tupuraa, e mau tamarii mai te 10 e tae atu i te 15 matahiti ta ratou mau tusia e ta ratou mau melo apî. “Ua itea i te haamoriraa a Satani i te hoê repo hotu mau i roto i te ui apî o teie nei tau,” ta te vea ïa e faaite ra.

“E ere te tae-apî-raa mai te haamoriraa a Satani, i te hoê ohipa e tupu noa i Finlande,” ta te vea ïa e faaara maira. “Ei hiˈoraa, aita i maoro aˈenei ua faaara mai te vea no te mau pae Afirika Apatoa, te Johannesburg Star e te faaitoito ra te haamoriraa a Satani i te mau ui apî uouo moni roa o te fenua.” Parau mau, ua riro te haamoriraa a satani ei huru tupuraa riaria mau no te mau metua e no te mau tamarii atoa i roto e rave rahi mau fenua.

Te vahi matamua, e tǎpǔ mai te haamoriraa a Satani ma te haavare hoi, e e haamaitairaa rahi te noaa mai ia outou i te hoê mea iti haihai roa no roto mai ia outou. “A haamori i te diabolo; a rave i ta ˈna ohipa hairiiri, e ei faahoˈiraa, e horoa mai o ˈna i te mea ta outou e hinaaro. E tera te tumu vetahi mau tamarii e faariro ai i te haamoriraa a Satani ei ohipa faahiahia mau,” ta te vea ’Teen ïa e faataa ra.

“Te tiaturi nei vau i te oraraa i roto i to ˈna taatoaraa,” ta te hoê ïa taurearea 17 matahiti e parau ra e o tei farii hoi i te riro ei melo no te pǔpǔ a Satani. “E piti puai ta ˈu e ite nei i roto i te natura: te maitai e te ino. Te mau mea atoa ta te mau taata e parau e mea ino o te mau mea ïa e faaoaoa ia outou. E aratai te mau hara i te mauruuru-roa-raa i te pae no te mau manaˈo horuhoru, i te pae tino e i te pae no te feruriraa,” o ta ˈna ïa i parau.

A anihia ˈtu ai i te hoê mutoi huna no Denver, Colorado, i te fenua Marite, e taata aravihi tuatapapa i te parau no te mau haamoriraa a Satani e no te aha oia e manaˈo ai e e ohie aˈe te mau ui apî i te riro i te haamoriraa a Satani, ua pahono atura oia e: “Eita roa ˈtu e moehia ia ˈu eaha ta te hoê taurearea e haamori ia Satani, i parau mai ia ˈu. Teie hoi ta ˈna i parau, ‘Eaha te mea e tia ˈi tatou ia ora? E ora matou no teie nei mahana e e rave hoi i te mea o ta matou e hinaaro. Aita to a muri aˈe taio.’”

Te faataa ra te taote Khalil Ahmad, taata faatere e haapao i te parau no te mau taurearea i te Fare maˈi no Nova Scotia i Dartmouth, i Kanada, i to ˈna manaˈo no nia i te faahemaraa a te haamoriraa a Satani. “Te imi nei te mau taurearea i te mau mea e haapeepee maitai ia ratou. Te feia manaˈo paruparu, e pinepine o te feia aravihi ore ïa, teie e hutihia nei na te [haamoriraa a Satani]. Mai te huru ra ïa e turai te reira ia ratou ia manaˈo e e mana to ratou.”

Mai teie te huru to te tahi atu vahine mutoi e tuatapapa i te parau no te haamoriraa a Satani, e mutoi huna atoa no San Francisco faataaraa mai i te fifi: “Ua riro to tatou nei ao ei vahi aita e itehia ra i te anaanatae no vetahi ê. Mea anaanatae aˈe na tatou ia tatou iho i te tahi atu. Te ora nei tatou i roto i te hoê ao haavî mau, i roto i te hoê totaiete aita e haapaoraa. Te manaˈo nei te mau taurerarea e tera iho â te huru o te oraraa e te faahopearaa, hutihia ˈtura ïa ratou i roto i te haamoriraa a Satani.”

Mai te aha mau na te huru o te mau taurearea i ô i roto i te haamoriraa a Satani? “Te taparahi pohe nei te mau taurearea ia ratou iho e i to ratou mau hoa. E fifi to tatou,” ta Larry Jones ïa, te peretiteni o te Tuhaa o te ohipa Taparahi taata i roto i te Haamoriraa e ta te hoê raatira mutoi tapao piti atoa hoi i Boise, Idaho, fenua Marite, i faaara mai. Te parau ra te tahi atu mutoi, no te hau no Illinois, tei hiˈopoa maite i te tereraa e te tupuraa o te haamoriraa a Satani, na nia i to ˈna tiaraa taata aˈo i te mau mutoi i te fare haapiiraa tuarua, e e 90 i nia i te hanere o te mau taurearea teie e hauti nei i roto i te haamoriraa a te diabolo, o tei ô mai i roto no te mea e peu te reira, tera râ 10 i nia i te hanere “teie e riro roa nei i roto i te haamoriaa a Satani e teie e moe roa nei i roto.”

Ua papai te hoê vea haapiiraa no Brooklyn, New York, te School News Nationwide, Tenuare-Febuare-Mati 1994, oia hoi i roto i te tuhaa “Haapaoraa,” i te hoê tumu parau e teie te upoo parau “No te aha te haamoriraa a Satani e huti ai i te manaˈo o te mau taurearea.” Teie ta ˈna e faaite ra: “I muri aˈe to e piti na taurearea tamaroa motoraa i roto i te fare tamaaraa o te hoê fare haapiiraa tuarua, ua ouˈa ˈtura te taurearea i upootia i nia, e ma te huru ê mau, ua afai atura i to ˈna rima i nia, ma te uumu i to ˈna rima, e te faatoro i te piti o to ˈna manimani e to ˈna manimani nainai i nia. Aita te orometua haapii i te ohipa aravihi, i nehenehe e faataa mai no te aha e rave rahi mau taurearea e rave ai i te mau hohoˈa o te mau taata hohoˈa demoni e afii puaaniho. E ua moe ê te mau buka no nia i te ohipa tahutahu mai roto atu i te vairaa buka a te fare haapiiraa.

“Inaha, te herehere ra te mau taurearea i te mana, i te ohipa tahutahu, e te miterio a te haamoriraa a Satani. No te rahiraa, e ohipa arearea roa e te haapeepee te manaˈo. No te tahi pae, mea peapea roa—mea peapea mau â e oia hoi e nehenehe e haapohe i te hoê taurearea 17 matahiti o Lloyd Gamble te iˈoa—tei pohe i roto i te hoê faatusiaraa na Satani.

“I muri aˈe i to Lloyd poheraa e a tapeahia ˈi to ˈna taeae 15 matahiti i taparahi haapohe ia ˈna, ua haapii aˈera te mau taata paari o te mataeinaa no Monroe nafea râ ratou ia taa i te mau tapao tei vai moe noa na hoi na mua ˈˈe: te ‘tapao rima a te diabolo’, te mau hohoˈa afii puaaniho e te mau buka e faaamu i te feruriraa o te mau taurearea, te mau peu faaroo e te mau pifaoraa.”

Mai te huru ra ïa e aita e hopearaa to te mau faaiteraa no nia i te mau tamarii i raro mai i te ahuru matahiti e te mau taurearea tei taparahi i to ratou mau metua e te tahi atu mau melo o to ratou mau fetii e o te haamoriraa a Satani hoi te tumu. Ua taparahi-haapohe-hia te mau tamarii na te tahi atu mau tamarii i roto i taua mau huru ohipa nei. Mai te mau taata paari satani, ua tapûpû te mau tamarii e ua haapohe hoi i te mau animala. Ua faatusiahia te mau animala rata i nia i te fata o te mau peu faaroo satani. Eita e navai te parau no te nenei i te hoê tuhaa o te ohipa taparahi taata e ravehia nei e te mau tamarii tei farii i te haapaoraa o te haamoriraa a Satani.

Te hauti noa ra anei teie mau tamarii i faahitihia ˈtu na, i roto i te haamoriraa a Satani? Mea iti roa anei aore ra mea varavara roa anei te feia i ô papu i roto i te haamoriraa a Satani? Aita atoa, o te pahonoraa ïa a te feia tei tuatapapa i te parau no teie mau taata e faaohipa nei i te mau ohipa tahutahu. Ua parau o David Toma, te hoê mutoi huna tahito i riro mai i muri iho ei taata orero no te faaanaanatae i te mau taurearea, e i roto i te mau fare haapiiraa atoa ta ˈna i paraparau, e ani na oia i teie nei â uiraa, “Ehia rahiraa outou te mau taurearea tei matau i te hoê taata aore ra tei faarooroo e ua ô te hoê taata i roto i te mau peu a te haamoriraa a Satani?” Te parau ra oia e “hoê i nia i te toru o te mau taurearea haere haapiiraa tei afai i to ratou rima i nia.”

Ia au i te taata ra o Shane Westhoelter, peretiteni no te Tuhaa haapurororaa parau o te fenua, mai 30 e tae atu i te 40 i nia i te hanere o te mau taurearea haere haapiiraa tuarua tei ô i roto i te tahi huru o te ohipa tahutahu. Taa ê atu, te parau ra o Westhoelter e hau atu i te 70 i nia i te hanere o te taatoaraa o te mau ohipa taparahi taata, na te mau taurearea i raro mai i te 17 matahiti ïa i rave, e te tumu no te ôraa ïa ratou i roto i te mau ohipa tahutahu.

[Parau iti faaôhia i te api 13]

Ua itea i te haamoriraa a Satani i te hoê repo hotu mau i roto i te ui apî o teie nei tau