Walsingham—Aimârôraa o te fare moˈa i Beretane
NA TE TAATA PAPAI VEA A ARA MAI NA! I BERETANE
WALSINGHAM, te hoê oire iti i Norfolk County, Beretane, o tei farii hau atu e 100 000 taata pererina i te matahiti no te mataitai i te mau fare moˈa o te Vahine ra no Walsingham. E turuhia te hoê fare moˈa na te mau Katolika no Roma, e te tahi na te Ekalesia ïa no Beretane. Ua aratai ïa te reira i te hoê aimârôraa.
“Ua riro te Tere Perenina o te Fenua i Walsingham ei ohipa mauiui tei tupu i te mau matahiti i mairi aˈenei,” o ta te hoê ïa ekalesiatiko no te Ekalesia no Beretane i papai i roto i te vea Church Times. E faaruru . . . te pǔpǔ taata o te tere perenina i te mau tuôraa iria e te puai atoa o . . . te hoê nahoa o te feia patoi o te rahi noa ra e tei faanahonaho-maitai-hia.”
No te aha teie patoiraa? “Aita i taa ê te mea e ravehia ra i ǒ nei ma te iˈoa o te kerisetianoraa i te peu etene,” o ta te feia orure hau e patoi nei no nia i te fare moˈa o te Ekalesia no Beretane, “te hoê haama rahi no te Parau mau, ei mea faufau i mua i te Atua e te hoê faainoraa hairiiri no ta tatou tufaa porotetani.”
E mea varavara ia ite i teie mau huru tupuraa i roto i te haapaoraa i Beretane. Eaha te mea e vai ra i Walsingham no te faatupu i taua mau manaˈo hohonu etaeta ra? E tauturu te hiˈo-faahou-raa i te aamu o te mau fare moˈa e ia taa outou i te reira.
Te patoi ra te Porotetani i te Katolika
Na mua ˈˈe i te Reforomatio o te senekele 16, e fenua Katolika Roma o Beretane e e rave rahi to ˈna fare moˈa i reira. Te fare tahito roa ˈˈe tei Walsingham ïa, te oire pu o te fare moˈa o te Paretenia ra o Maria. Ua haamatahia te reira i te matahiti 1061 a patu ai te vahine a te taata faatere te hoê fare i roto i te oire iti. Ia au i te aai, ua faaite-orama-hia te mau tuhaa iti o to ˈna paturaa, mai tei parauhia ei hohoˈa te reira no te fare i Nazareta i reira te metua vahine o Iesu, o Maria i te nohoraa. I roto i te mau Matahiti Ropu, ua tui te roo o teie fare moˈa tei pûpûhia na Maria e ua faufaahia na te ao nei.
Ua haere atu te mau arii e te mau taata rii i Walsingham. Eaha te mea i ume ia ratou? Hau atu i te tii raau o Maria e te tamarii ra o Iesu i nia i to ˈna turi, ua vai aˈena te mau faaoreraa hara e te mau taoˈa faaroo no te hoê moni hoo mâmâ, e ua parauhia e ua rapaauhia te mau maˈi i reira. E nehenehe atoa te feia perenina e ite i te “semeio” i Walsingham, te hoê farii parauhia e te vai ra te tahi û haapaarihia o Maria i roto. Ua tiaturi te tahi mau taata mataitai e e puˈa papai aore ra e raau taero uouo piihia te ‘blanc de céruse’ noa te mea i roto a feaa noa ˈi te manaˈo o Erasmus, te taata tuatapapa Bibilia, e mea mau anei te taoˈa faaroo, o ta vetahi i manaˈo e e huˈahuˈa puˈa papai tei anoihia e te uouo o te hoê huero moa.
No te aha teie huru taata reforomatio tuiroo mai ia Erasmus i rave ai i teie tere perenina i Walsingham? Peneiaˈe no te faatupu i te hoê euhe. Noa ˈtu e ua faataa oia i te mau tuhaa rii e rave rau o te fare moˈa, “e mea puai ta ˈna faaooo i nia i te paieti rahi i te pae faaroo,” o ta Te buka parau paari Katolika e parau ra. Ua papai o Erasmus “na roto i te hoê huru faaooo e te tiaturi ore,” o ta te taata tuatapapa aamu ra o Frederic Seebohm e faataa nei, ma te parau faahou e aita e haapapuraa “e e taata haamori o ˈna iho i te Paretenia aore ra te hoê taata tiaturi i te mana o te tere perenina i to ˈna fare moˈa.”
I te roaraa o te Reforomatio, ua mono te Ekalesia no Beretane haamau-apî-hia i te haapaoraa Katolika no Roma. I te matahiti 1538, ua vavahihia te fare moˈa mai tei piihia i muri iho o te “Taata tahutahu no Walsingham,” i raro aˈe i te faaueraa a te arii Henri VIII, te faatere o te ekalesia apî, e ua hoohia te vahi ra. Ua afaihia te tii, te hoê taipe vahavaha o te haamoriraa idolo, e 160 kilometera i Chelsea i Lonedona e i reira ua tutuihia i mua i te taata.
Te rave nei te mau Porotetani i te hohoˈa Katolika
I te haamataraa o teie senekele, ua tatai faahou mai te Ekalesia no Beretane i te Vahine ra no Walsingham—ei fare moˈa Porotetani ra! I te matahiti 1921, ua tuuhia te hoê hohoˈa taraihia o te tii matamua ra i roto i te paroita o te ekalesia no Walsingham, e ua tae atu te feia perenina matamua i te matahiti i muri iho. A rahi noa ˈi te roo o te fare moˈa, oia atoa te riri o te tahi mau melo o te ekalesia. I te avaˈe me o te matahiti tataitahi, i te afairaahia te tii na roto i te mau aroâ e 30 minuti te maoro, te patoi uˈana nei ratou i te haamoriraa idolo.
I te matahiti 1934, ua haamau te mau Katolika no Roma i ta ratou Fare Moˈa o te Vahine ra o te Fenua, i Walsingham. Te vai ra i roto i taua fare moˈa ra te piti o te hohoˈa o te tii matamua o te metua vahine e te aiû e ua vaiihohia te reira i roto i te vairaa tiaa o te fare pure tahito. Teie te vahi matauhia e te feia perenina no te vaiiho i to ratou mau tiaa no te haere avae i te fare moˈa matamua o te oire iti. Ma te anaanatae, ua tapea te feia patoi i te fare moˈa o te Ekalesia no Beretane, o ta ratou e tamau i te tiaturi e ei haamoriraa te reira ia Maria e ei faainoraa i te tufaa a te ekalesia a te Porotetani.
Te vai râ anei te tahi atu tumu no te patoiraa uˈana a te feia orure hau? E rave rahi o te tiaturi nei e te vai ra. Te faaite ra te vea The Independent e: “Ua riro te mau patoiraa i muri iho ei mǎtaˈuraa i te mau peu mǎhǔ tei faataehia i te ‘peu Gin and Lace’ iho â râ, oia hoi te hoê faaiteraa haama o te peu mǎhǔ i roto i te ekalesia no Beretane.” Te faaauhia ra te reira i te hoê pǔpǔ tane o te Ekalesia no Beretane, te mau ekalesiatiko iho â râ, o tei faariro ia Walsingham ei vahi tairururaa matahiti na ratou a tau matahiti i mairi aˈenei. No te aha ratou e haere ai? Ua faataa te hoê taata perenina tamau e: “E ere te reira te vahi e mea rahi roa te mau taata e ere i te mǎhǔ i te ao nei.”
Oia mau, e tia i te mau kerisetiano ia ape i teie huru tupuraa, niuhia i nia i te haamoriraa idolo e i teie nei i te peu mǎhǔ.—Korinetia 1, 6:9; 10:14; Ioane 1, 5:21.