E hoona anei te rave ohipa i ta ˈna moni ohipa?
A HIˈO na ia ratou! E au ra e te haa nei ratou no te ora, mea pinepine i roto i te mau fare veve roa, e rave rahi taime e te mea noa e navai no te ora, noa ˈtu e te faaea ra e te faaamu ra e rave rahi i rotopu ia ratou i to ratou utuafare i roto i te hoê nunaa ona. O te mau rave ohipa ooti ratere ïa ratou, tau pae mirioni ratou i te mau Hau amui no Marite anaˈe, o te ohi nei i te maa hotu e te mau pota no te tahi o te mau taiete rarahi roa ˈˈe a te nunaa.
A hiˈo na i te mau rifa i nia i to ratou tino tei mauiui roa i te raveraa i te ohipa i raro aˈe i te mahana. A hiˈo na ia ratou ia tamata i te faaetaeta i to ratou tua i muri aˈe i te mau hora roa ma te piˈo noa i raro, no te ohi i te mau pota o te faaunauna i te mau paepae e te mau maa punu o te mau fare toa e te mau fare hooraa atea. Mai te poipoi e tae roa i te ahiahi, e ono e e hitu mahana i te hebedoma, tei reira ratou. A hiˈo na i te mau tamarii, e rave ra i te ohipa i pihai iho i to ratou mau metua e mea pinepine to ratou mau papa e mama ruau. E rave rahi o teie mau taurearea o te iritihia i te haapiiraa i to ratou apîraa roa no te mea te apee nei to ratou mau metua i te mau auhuneraa, tera tau i muri aˈe i tera tau. E teie mau tutavaraa atoa ia noaa noa mai te mea e navai ia ora ratou.
Mea fiu anei na outou te maniania tamau o te mau manureva e rere ra i raro roa a mataitai noa ˈi outou i teie mau rave ohipa ia rohi i roto i te mau faaapu? Te ǎhu ra anei to outou mata e te putaputa ra e te maero ra anei to outou iri ia pîpî anaˈe mai te manureva i te raau tupohe manumanu taero? Te mǎtaˈu ra anei outou i te atâtaraa e farereihia e outou i teie nei e a muri aˈe? Te mǎtaˈu ra teie mau rave ohipa. Ua mau roa te raau i pîpîhia i nia i to ratou ahu, i roto i to ratou ihu, e to ratou mahaha. Ua ite ratou i teie mau raau taero i te faainoraa i ta ratou mau tamarii e to ratou mau metua ruhiruhia. Ua ite ratou i te mau melo utuafare e te mau hoa rave ohipa o tei hapepa i te hoê faito matahiti apî no te mea ua taero ratou i te mau raau tupohe manumanu.
Ua fanauhia te hoê tamarii, e taurearea apî oia i teie nei, e ua taa ê to ˈna tauupu, aita to ˈna e uaua iˈo i nia i te ouma i te pae atau, e hoê pae o to ˈna mata o tei paruparu. Te tiaturi nei to ˈna metua tane e ua roohia oia i teie hapepa na roto i te mau raau tupohe manumanu i pîpîhia i nia i te mau faaapu fraises i te tau a hapû ai to ˈna metua vahine ia ˈna. Ua tapaohia e te faaino nei te pîpîraa i te raau tupohe manumanu anaˈe, e 300 000 rave ohipa i te matahiti [i te mau Hau amui no Marite] e te roohia nei te mau rave ohipa ooti ratere i te hapepa e pae taime hau atu i te mau rave ohipa o te tahi atu toroa.
Mai te peu e aita outou e putapû ra i te hiˈoraa ˈtu ia ratou ia rohi i roto i te mau faaapu aore ra i te iteraa ˈtu i to ratou mau huru oraraa veve mau, a faaroo ïa eaha ta ratou e parau ra. “E pohe roa oe i te rohirohi i teie ohipa,” o ta te hoê mama ïa e hitu ta ˈna tamarii e parau ra i muri aˈe i te hoê mahana rohiraa roa i roto i te faaapu. “E hopu vau i te pape e haere atu ai e taoto. Ua mairi i te hora maha i teie aahiata i to ˈu araraa mai e aita e taime no te faaineine i te maa no te avatea, aita ïa vau i tamaa. I teie nei, ua rohirohi roa vau no te tamaa.” Ua opupuhia to ˈna rima. E mea mauiui roa ïa ia tamaa anaˈe oia e te patia aore ra te punu taipu.
“E tauturu [ta mâua mau tamarii] ia mâua i te tahi mau taime i te hopea hebedoma,” o ta te tahi atu metua vahine e parau ra, “e ua ite ratou e eaha te huru o te ohipa i roto i te faaapu. Eita ratou e hinaaro e rave i teie ohipa ei imiraa na ratou. . . . Te vai noa ra te mau taratara i roto i to ˈu mau rima i to ˈu pofairaa i te anani i te tau toetoe i mairi aˈenei.” Te na ô ra ta ˈna tane e: “E rave matou i te ohipa mai te poipoi e tae atu i te ahiahi e ono mahana i te hebedoma. . . . Tera râ, te reira iho â paha ta matou ohipa i to matou oraraa taatoa. Eaha ˈtu hoi ta matou ravea?” Ia amuihia raua, te noaa nei i teie nau feia tau 10 000 dala marite haihai roa i te matahiti—te faito veve ia au i te mau faatureraa marite.
Te mǎtaˈu nei te mau rave ohipa i te amuamu ia ore ratou ia erehia i ta ratou ohipa. “Ia amuamu oe,” o ta te hoê rave ohipa ïa e parau ra, “eita ratou e ani faahou mai ia oe.” E rave rahi mau rave ohipa ooti ratere, e mau tane e e mau metua tane ratou o tei vaiiho i to ratou utuafare no te apee i te mau auhuneraa, no te mea hoi e mea reporepo e ua apǐ roa te mau vahi faaearaa, e mea pinepine e mau fare hamanihia i te rehu e faaeahia e 300 rave ohipa, no te tahi atu mau melo o to ratou utuafare. “Mea au roa ia faaea i pihai iho i [to ˈu utuafare] i te matahiti taatoa,” o ta te hoê metua tane ïa e parau ra, “tera râ, aita ta ˈu e ravea.” “Tei raro roa matou,” o ta te tahi atu e parau ra. “Eita e nehenehe e haere faahou atu â i raro, e tia ïa ia haere i nia.” No te faaino roa ˈtu â i to ratou huru, e rave rahi o ratou tei raro roa ta ratou moni ohipa. No vetahi, ua riro e 10 000 dala marite [1 000 000 farane] i te matahiti no te hoê utuafare rave ohipa ei mea rahi roa, te hoê moni ohipa eita e naeahia ia ratou. “E nehenehe te feia fatu faaapu e aufau i te mau moni ohipa e aufauhia ra i te mau fenua veve e e tihati noa i te mau rave ohipa o te ore e rave i te mea e faauehia mai ia ratou,” o ta te vea People Weekly e faataa ra. “E au hoi i te rave ohipa ta ˈna ra utua,” o ta Iesu ïa i parau. (Luka 10:7) Te aniani ra paha te mau rave ohipa ooti ratere e afea râ teie parau e tano ai no ratou.
Te feia haapii i ta tatou mau tamarii
E tuatapapa anaˈe na i teie nei i te feia tei ia ratou te hopoia e haapii i te tamarii e te taata paari i te taio, te papai, te mau reta parau, te numeraraa, te ite aivanaa matamua, te haerea i te vahi raveraa ohipa—e mau tuhaa hoi o te faito haapiiraa matamua. I roto i te mau fare haapiiraa teitei, te haapii nei te mau orometua i te ture, te rapaauraa, te ite no te huru o te mau taoˈa, te faatereraa matini, e te mau ravea aravihi teitei, e mau tuhaa e faatere nei i te mau ohipa aufau-rahi-roa ˈˈe-hia i teie anotau o te mau matini roro uira e te reva teitei. No te faufaa rahi o te tuhaa haapiiraa, e ere anei i te mea tano ia aufau-rahi-hia te mau orometua haapii no ta ratou ohipa faahiahia roa e rave nei? Ia hiˈohia te feia e noaa nei i te mau tino moni rarahi roa ia faaauhia i ta ratou ohipa e rave ra, e au ra e ua haafaufaa ore te totaiete i te toroa orometua haapii.
I te pae hopea o teie senekele 20, ua riro te haapiiraa tamarii ei toroa atâta roa i te tahi mau vahi, eiaha noa i te mau fare haapiiraa tuarua, i te mau fare haapiiraa tamatahi atoa râ. I te tahi mau oire, te faauehia nei te mau orometua haapii ia tomo e te mau tâpû raau i roto i te mau piha haapiiraa e te mau vahi hautiraa no te paruru ia ratou i te mau tamarii faaroo ore. Te rave nei te mau tamarii haere haapiiraa faito matahiti atoa i te mau pupuhi e te mau tipi, i nia ia ratou e i roto i ta ratou afata vairaa maa.
Ua roohia te mau orometua haapii, te tane e te vahine, i te hamani-ino-raa i te pae tino ravehia e te mau taurearea. I te mau fare haapiiraa tuarua i te mau matahiti i mairi aˈenei [i te mau Hau amui no Marite], hau atu i te 47 000 orometua haapii e e 2,5 mirioni taurearea o tei hamani-ino-hia. “Te itehia nei teie fifi i te mau vahi atoa,” o ta te vea orometua haapii ra NEA Today e faataa ra, “tera râ, e mea ino roa ˈtu â i roto i te mau oire, i reira, i te mau matahiti atoa, e nehenehe te orometua haapii e hamani-ino-hia 1 taime i nia i te 50 i te fare haapiiraa.” Ua haamaraa te parareraa o te raau taero e te ava i te mau fare haapiiraa i te taahoa o te mau orometua haapii.
No te faateimaha roa ˈtu â ia ratou, i te tahi mau vahi, te titauhia ra te mau orometua haapii ia faarahi â i to ratou ite i roto i to ratou toroa, ia faaohipa i ta ratou tau faafaaearaa no te rave i te mau haapiiraa faaaravihiraa aore ra no te haere atu i te mau tairururaa aore ra te mau apooraa na te mau orometua haapii i roto i ta ratou tuhaa. Teie râ, e maere anei outou i te iteraa e i roto i te tahi mau oire rarahi no te mau Hau amui no Marite, e nehenehe te moni ohipa a te feia tiai fare haapiiraa—te feia e tamâ nei e e tataˈi nei i te mau fare haapiiraa—e hau atu e 20 000 dala marite i te moni ohipa a te mau orometua haapii?
E ere hoê â moni ohipa ta te mau orometua haapii i tera e tera fenua, i tera e tera hau, e i tera e tera mataeinaa. I te tahi mau fenua, ta te mau orometua haapii te moni ohipa raro roa ˈˈe o te nunaa. I roto atoa i te mau fenua ona aˈe, te faaite ra te mau tabula e ia hiˈohia te hopoia e vai ra i nia i te tapono o te mau orometua haapii, aita ïa ta ratou mau moni ohipa e tuea ra.
Ia au i tei faataahia i roto i te vea The New York Times, ua parau te hoê taata faahapa i te moni ohipa a te mau orometua e te feia haapii e: “Mea iti roa iho â te hoonaraa aore ra te haamauruururaa i horohia na te mau toroa maitihia, mai te toroa orometua haapii . . . , i te mau Hau amui no Marite. Ua manaˈo noa hoi te taata e, ‘na ratou tera [ohipa], mea oaoa na ratou ia rave i teie toroa.’ Aita vau e manaˈo ra e mea tano, e aita atoa vau e manaˈo ra e mea maramarama te reira.” A rave na, ei hiˈoraa, i teie tabula i piahia i roto i te vea The New York Times: “Ua maraa te mau moni ohipa no te mau rave ohipa i te mau Fare haapiiraa teitei e te mau Fare haapiiraa tuatoru i te matahiti haapiiraa 1991-92 i te faito iti roa ˈˈe i roto e 20 matahiti,” oia hoi te hoê faito au noa e 3,5 i nia i te hanere. “Ia faatanohia te maraaraa e 3,5 i nia i te hanere e te maraaraa o te hoo,” o ta te hoê vahine maimi ïa i tapao, “ua maraa te mau moni ohipa i te faito huˈa roa e 0,4 i nia i te hanere.” Te rahi nei te tapitapiraa e no te mau moni ohipa raro roa e aufauhia ra i te feia haapii e amo ra i ta ratou hopoia, e rave rahi o te faahepohia ia faarue i te toroa haapii no te imi i te mau ohipa aufau-maitai-hia ˈˈe.
Te faaetaetaraa tino
Te tahi hiˈoraa taa ê roa o te mau moni teitei, o te ao ïa o te faaetaetaraa tino. Eaha te manaˈo o te mau rave ohipa ooti ratere veve e te mau orometua haapii tei raro roa ta ratou moni ohipa, i te mau tino moni tia teitei roa a te feia taaro tuiroo?
E ataata anei ma te farii maitai te mutoi e haaati noa ra e te taata tupohe auahi e ineine noa ia taˈi mai te pu faaararaa—e feia hoi o te faaruru nei i te pohe i te mau mahana atoa i roto i ta ratou ohipa—i te mau tino moni rarahi e aufauhia ra i te mau taata toroa taaro no te mea te faateiteihia ra ratou ei feia tuiroo? I te mau Hau amui no Marite, hau atu i te 700 mutoi o tei taparahihia i roto i ta ratou ohipa i na matahiti hoê ahuru i mairi aˈenei. Mea rahi atoa te feia tupohe auahi e pohe nei. Teie râ, ua ite-papu-hia na te ao atoa nei e tei raro roa te moni ohipa a teie mau taata toroa faaineine-maitai-hia. Eita anei ratou e uiui i te faufaa ta te totaiete i tuu i nia i ta ratou ohipa e to ratou ora?
A rave na i te hiˈoraa o te hautiraa popo baseball—e hautiraa rahi e arato nei i te feia turu i te ohipa taaro i te mau Hau amui no Marite, i Kanada, e i Tapone. Hau atu i te 200 feia hauti i roto i te mau pǔpǔ rarahi i te mau Hau amui no Marite o te aufauhia nei hau atu i te hoê mirioni dala marite [100 000 000 farane] i te matahiti. I te hopea o te tau hautiraa baseball o te matahiti 1992, e 100 feia hauti o tei tarima i te mau parau faaau o te haapapu e e aufauhia ratou e 516 mirioni dala marite. I nia i teie mau taata hauti, e 23 o tei tarima i te mau parau faaau tei hau atu i te 3 mirioni dala marite i te matahiti. Te hemo nei teie mau tino moni maere mau aufauhia i te feia hauti aita i matau-maitai-hia, i te mau parau faaau a te feia tuiroo aˈe, o tei tarima ia aufauhia ratou hau atu i te 43 mirioni dala marite no e ono matahiti hautiraa e e 36 mirioni dala marite no e pae matahiti. I te matahiti tataitahi, e maraa noa te mau tino moni, e te haamauhia ra te mau faito apî no te tino moni teitei roa ˈˈe i roto i te aamu o te baseball. Ua ite-atoa-hia te maraa-taue-raa o te moni a te feia hauti popo marite i nia i te faito au noa e 500 000 dala marite.
Te faatupu nei teie mau tino moni i teie uiraa, E naeahia anei i te taata taio ia feruri e e aufauhia mai oia e 62 500 dala marite [6 250 000 farane] i te hebedoma? “Tera hoi te moni e aufauhia i taua mau taata hauti popo [marite] ona mirioni ra i roto i te Pǔpǔ hauti popo marite a te nunaa i te mau hebedoma atoa i roto i te tau hautiraa e 16 hebedoma,” o ta te vea The New York Times i faaite. “E teie taata hauti baseball ona e 2 mirioni, e aufauhia e 75 000 dala marite [7 500 000 farane] i te mau piti hebedoma atoa? Ia tatarahia te mau tute, e toe noa mai ta ˈna e 50 000 dala marite [5 000 000 farane] no te tauturu ia ˈna ia faaruru e tae roa ˈtu i te 15 o te avaˈe i muri iho.” Eita ïa e taiohia te moni aufauhia i te taata taaro tuiroo no te mau tauihaa e hoohia na nia i to ˈna iˈoa, te mau popo tarimahia e ana, te mau tarimaraa na te feia turu i te pǔpǔ hauti, e te mau moni aufauhia mai ia faaiteite anaˈe oia ia ˈna, e ia amuihia e nehenehe e naeahia e mau mirioni dala marite. I ǒ nei â, eaha ta te orometua haapii e moni ohipa raro roa ta ˈna e manaˈo inaha e mea iti aˈe te noaa mai ia ˈna i te hoê matahiti taatoa i te moni e aufauhia i te hoê taata taaro no te hoê noa hautiraa?
No te mana o te afata teata, ua fanaˈo atoa te mau taata toroa taaro i te pae no te golf [huiraa popo], te tennis [tairiraa popo], te basketball [taoraraa popo i roto i te ete], e te hockey [huiraa popo i nia i te pape toetoe paari], i te mau tino moni rarahi. E mau mirioni dala marite e noaa i te feia tuiroo i roto i ta ratou mau tuhaa. E tarimahia te hoê parau faaau e 42 mirioni dala marite e te hoê taata hauti hockey rahi no e ono matahiti. E 22 mirioni dala marite e noaa nei i te tahi atu taata hauti hockey i roto e pae matahiti, te faito au noa e 4,4 mirioni dala marite no te hoê tau hautiraa, noa ˈtu e eita oia e hauti no ta ˈna pǔpǔ no te mea ua pepe aore ra ua maˈihia oia.
I te hoê hautiraa tennis i rotopu e piti feia hauti aravihi, hoê tane e hoê vahine—tei parauhia te “Aroraa tane e vahine”—ua tataˈu raua i nia i te mahora tairiraa popo ia upootia mai te re e 500 000 dala marite [50 000 000 farane]. Noa ˈtu e ua noaa te re i te tane, te na ôhia ra e ua fanaˈo raua toopiti atoa ra i te tahi “tino moni rahi no to raua faaiteiteraa ia raua, o tei ore i faaitehia tera râ o tei manaˈohia tei roto i te 200 000 e te 500 000 dala marite taitahi.”
I roto i te mau fenua mai ia Beretane, Italia, Tapone, e Paniora, no te faahiti noa i te tahi, ua maraa rahi roa te moni aufauhia i te mau taata toroa taaro—e mau tino moni haama tei roto i te mau mirioni dala marite. Ua turai teie mau ohipa atoa i te hoê taata toroa hauti tennis ia parau e mea “faufau” te mau moni aufauhia i te mau matahiti 90.
E ere râ e te faahapahia ra te mau taata toroa taaro no teie mau tino moni teitei. Na te mau fatu pǔpǔ hauti e pûpû nei i te mau tino moni rarahi na te feia mea ite i te hauti. E rave noa mai hoi te feia hauti i te mea e pûpûhia ra ia ratou. Na te feia hauti e ume nei i te rahiraa taata turu i te mau pǔpǔ hauti. Ei hiˈoraa, i te mau tau hautiraa baseball e hautiraa popo marite no te matahiti 1992, e mau numera taata teitei roa ˈˈe i tae mai i roto e rave rahi mau tahua taaroraa. Ua faarahi atu â te reira e te mau parau faturaa afata teata i te apî a te feia fatu pǔpǔ hauti. No reira, te manaˈo nei vetahi e ua tano roa e ia faahoˈihia te moni a te feia hauti no ta ratou tuhaa e rave ra.
Ua riro te mau tino moni maamaa e aufauhia ra no te tairi i te hoê popo na nia i te hoê upea, no te hui i te popo i roto i te hoê apoo huˈa roa, aore ra na nia i te hoê mahora baseball, ia faaauhia i te moni ohipa veve roa aufauhia i te mau rave ohipa ooti ratere e rohi nei i te mahana taatoa i raro aˈe i te veavea no te ohi i ta tatou maa, ei faahohoˈaraa peapea no te mau mea e haafaufaahia ra e te hoê totaiete ona.
A rave na i te hoê hiˈoraa taa ê roa, to te tahi atu taata toroa tuiroo. Ma te ohipa e te hoê tino moni tei raro mai i te 2 mirioni dala marite no te maimi i te hoê patia arai no te aro i te maˈi polio, ua rohi te aivanaa Marite ra o Jonas Salk e to ˈna mau hoa maimi e rave rahi mau hora i roto i te hoê piha maimiraa ma te anoi i tera patia arai i muri aˈe i te tahi, ma te tamata e te tamata faahou. I te matahiti 1953, ua faaite o Salk e ua noaa mai te hoê patia arai tamataraa. I rotopu i te feia matamua i tamatahia i teie patia arai, te vai ra o Salk, ta ˈna vahine, e ta raua e toru tamaiti. Ua itehia e mea atâta ore e mea manuïa taua patia arai ra. I teie mahana, e nehenehe e parau e ua tumâhia te maˈi polio.
E rave rahi mau haapopouraa tei faataehia ˈtu ia Salk ra no ta ˈna tuhaa faahiahia mau i roto i te arairaa i teie maˈi pohe e te haaparuparu. Teie râ, aita oia i farii i te hoê noa ˈˈe haamauruururaa i te pae moni. Ua hoˈi atu oia i ta ˈna piha maimiraa no te haamaitai atu â i te patia arai. Oia mau, ta ˈna haamauruururaa mau, e ere te moni, o te oaoaraa râ ia ite i te mau tamarii e te mau metua i te tiamâraa mai i te mǎtaˈu i taua ati ino ra.
I te pae hopea, a feruri na e e haapii outou i te tiaturiraa e ora e a muri noa ˈtu i roto i te hoê paradaiso i nia i te fenua, i reira e faaore-roa-hia te paruparu o te tino, te maˈi, e te oto e a muri noa ˈtu. A manaˈo na i te moni ohipa rahi e nehenehe e noaa mai i te orometua haapii i taua parau apî oaoa ra. Teie râ, te vai ra teie mau huru orometua, e te haapii nei ratou ma te aufau-ore-hia! Aita e haamauruururaa i te pae moni no ratou! I to Iesu parauraa e ‘e au te mau rave ohipa i ta ratou utua,’ aita oia e faahiti ra i te mau moni ohipa no taua mau orometua haapii i teie parau apî maitai. (Luka 10:7) Ua parau oia e e fanaˈo ratou i te mau mea e titauhia e ratou. Ua parau atoa oia i taua mau taata ra e: “I horoa-noa-hia mai ta outou, e horoa noa hoi outou.” (Mataio 10:8) Eaha ta ratou haamauruururaa? O ta Iesu mau â ïa, te taata rahi roa ˈˈe i ora aˈenei, i tǎpǔ mai—te ora mure ore i nia i te hoê fenua tamâhia tei riro ei paradaiso. Eita te mau tino moni ehia rahiraa mirioni e faitohia i te reira!
[Tumu parau tarenihia i te api 9]
Te moni, te roo, aore ra te raau taero—Eaha te maiti?
Ua turai te faahemaraa o te roo e o te mau mirioni dala marite e noaa mai i roto i te toroa taaroraa i te mau taurearea ia faaohipa i te mau raau pâmu uaua (stéroïdes anabolisants) no te tarai i te mau tino pautuutu maitai e te faaoruraa i te mau uaua i roto i te hoê area taime poto roa. Ua faaara te taote ra o William N. Taylor, melo no te Porotarama hiˈopoaraa i te raau taero no te mau tataˈuraa rarahi Marite, e ua naeahia te raveraa i teie mau raau taero i “te faito o te maˈi pee.” Te manaˈohia ra e, i te mau Hau amui no Marite anaˈe, tau 250 000 taurearea o te faaohipa ra i te mau raau pâmu uaua.
“Mea fifi roa ia tiaturi i te faaheporaa ia faaohipa i te mau raau pâmu uaua i te fare haapiiraa,” o ta te hoê taata toroa hauti popo ïa i parau. “Eita te feia taaro e feruri e 20 matahiti na mua ˈˈe i te mau fifi e noaa mai ia rave ratou i te mau raau pâmu uaua. Eita ratou e feruri e 20 mahana na mua ˈˈe, i te mau fare haapiiraa iho â râ. Teie te huru feruriraa o te taata taaro, te taurearea iho â râ: E faaohipa vau i te mau ravea atoa no te manuïa.”
“Ia hinaaro vau e riro ei taata hauti,” o ta te hoê ïa taata e opua ra e riro ei taata toroa hauti popo i parau, “e tia ia ˈu ia rave i te mau raau pâmu uaua. . . . Mea puai hoi te tataˈuraa i roto i te piha amoraa faito. E hinaaro oe e ia rahi to oe tino e to oe puai i te mau matahiti atoa, e e hiˈo atu oe e te pautuutu noa ˈtura te feia i pihai iho mai, e e hinaaro oe e ia pautuutu atoa oe. E mea puai taua feruriraa ra.” Noa ˈtu râ teie manaˈo, ua naeahia i teie taata taaro, ma te ore e faaohipa i te mau raau pâmu uaua, te tapao o ta ˈna i haamau—te riroraa mai ei taata toroa hauti popo. Te tiaturi nei oia e “e faaino rahi aˈe [te mau raau pâmu uaua] i te hautiraa i te mau raau taero opanihia.”
Mea rahi te parau i papaihia, eiaha noa e te mau taote, e te feia atoa râ i mauiui rahi i te mau faahopearaa atâta o te mau raau pâmu uaua e vetahi atu mau raau taero no te faaetaeta i te tino. Ua hope te mau tupuraa ino roa ˈˈe na roto i te pohe.
[Hohoˈa i te api 7]
E mau rave ohipa ratere e ooti ra i te oniani piropiro i Gilroy, Kalifonia
[Faaiteraa i te tumu]
Camerique/H. Armstrong Roberts
[Hohoˈa i te api 8]
E ere anei i te mea tano ia aufau-rahi-hia te mau orometua haapii no ta ratou ohipa faahiahia roa e rave nei?
[Hohoˈa i te api 10]
Hau atu i te 200 feia hauti baseball a te mau pǔpǔ rarahi i te mau Hau amui no Marite o te aufauhia nei hau atu i te hoê mirioni dala marite i te matahiti
[Faaiteraa i te tumu]
Focus On Sports