“Auê, auê te oire rahi nei e”

I ROTO i te mau oire atoa o te ao nei e parauhia e mau oire rahi, mai te mea ra ïa e aita ˈtu mau oire tuiroo roa ˈˈe maoti râ te mau oire e faarirohia ei mau oire faaroo moˈa. Te haapapu maira râ te mau parau ra “auê, auê” e aita roa ˈtu te oire faaroo parauhia e oire “rahi” i roto i te Apokalupo 18:10 e fariihia ra e te Atua. No te aha hoi?

Te haereraa i te tahi pae e tae atu ai i te pohe ore?

E parauhia te mau oire moˈa hindous i te fenua Inidia e mau tīrthas, oia hoi te auraa “te haereraa i te tahi pae” aore ra “e mau “taheraa pape papaˈu.” E rave rahi, mai ia Banaras (parau-atoa-hia Bénarès Kasi, aore ra Varanasi), e vai ra i nia i te mau hiti anavai pape. Ua papuhia râ e e ere ratou i te mau haereraa taata mau, e mau taheraa pape papaˈu varua râ ia au i tei parauhia ra, e faatia i te mau taata ia na roto atu i te pape ora ma te ore e haapeapeahia e tae atu ai i te hoê oraraa maitai aˈe i muri aˈe.

Te na ô ra te hoê buka paari e: “Te Vārānasi o te hoê ïa o te mau oire tahito roa ˈˈe o teie nei ao e taata-noa-hia râ . . . , te faanahoraa matamua a te taata i ropu i te peho o te Ganges.” E pu faaroo teie no te piti o te tausani matahiti hou to tatou nei tau. Noa ˈtu â ïa e oire hindou teie, e ite-atoa-hia oia i roto i te mau buka tahito a te haapaoraa parauhia a te bouddha e a te haapaoraa mahometa. I te senekele ono hou to tatou nei tau, a riro noa ˈi o Bénarès ei Basileia no Kasi, na taua area ra to Bouddha pororaa i ta ˈna aˈoraa matamua. Ua ô mai te haapaoraa mahometa i te matahiti 1194 o to tatou nei tau, a roaahia ˈi taua oire ra i te mau mahometa.

I te pae apatoerau o te fenua Inidia i nia i te anavai ra parauhia Ganges to Bénarès vairaa, oia te hoê o na oire hindous moˈa roa ˈˈe e hitu o taua fenua ra. I nia i to ˈna mau hiti, te vai ra te hoê vahi taipe i haapaohia no te mau atua hindous tataitahi e o te mau tīrthas rahi tataitahi. No reira te The Encyclopedia of Religion e mairi ai taua oire ra “te fenua nainai o te teotarafia moˈa o te fenua Inidia.” Te na ô faahou ra taua buka ra e: “Te puai no roto mai i taua mau haapueraa atua taipe ra oia hoi te mau tīrthas, e tae noa ˈtu te feia paari i taua noa iho vahi ra, na te reira i faariro ia Bénarès ei vahi pereninaraa haapopou-roa-hia ˈˈe o te fenua Inidia.”

Te faariro nei te mau hindous i te oire no Bénarès, ei vahi tano maitai roa ˈˈe no te pohe. Te auraa o te pereota tuiroo roa ˈˈe oia hoi Kāśyām maranam muktih teie ïa: “ua riro te poheraa i Kasi ei tiamâraa.” E peu matauhia i te parau e te taata e pohe i reira, na Siva iho e haapii mai ia ˈna, e aratai-atoa-hia oia “na roto atu i te pape pue o te samsāra e tae atu i te ‘fenua atea i te hiti moana’ o te pohe ore.”a

Mai te mau anavai pape i te mau vahi atoa, e na roto atu na te Ganges i te mau oire ruperupe no tahito ra, ma te ohi mai hoi i te mau hairiiri e te mau taoˈa chimiques atoa o te mau vahi e na reira ˈtu oia i te tahe. I taua atoa taime ra, e taora ˈtu na te mau hindous faaroo, ia au i tei titauhia e te mau peu faaroo, fatata e 10 000 mau tino pohe i roto i te anavai i te mau mahana atoa. E e pou atoa mai na hoi te feia tere perenina o te ore roa ˈtu e tâuˈa i te fifi o te maˈi, na nia mai i te mau taahiraa o te mau hiti avanai no te faatupu i te hopuraa pape faaroo. Te reira mau anei te eˈa e tae atu ai i te pohe ore?

Mai te aha hoi te mure ore o te “oire mure ore”?

Te tahi atu anavai, piihia na i te hoê taime o Albula no te haapapu i te maramarama o to ˈna mau pape, e tahe mai ïa oia na roto mai i te oire faaroo no Europa, te “oire mure ore” [Roma] o na mouˈa e hitu. Te iˈoa o teie anavai, mea maoro hoi i teie nei to ˈna ereraahia i to ˈna maramarama, o Tiber ïa i teie mahana. E mea maoro atoa taua oire ra i te faatupuraa i ta ˈna na mouˈa e hitu. Tera râ “te faufaa o mutaa ihora tei ora mai i Roma,” ta te The New Encyclopædia Britannica ïa e parau ra, “eita e noaahia i te tahi noa ˈˈe oire no te pae Hitia o te râ.”

E rave rahi tatini mau fare tahito e mau paturaa tahito roa tei haapapu mai i taua faufaa ra. Ua riro mau ei maereraa i te mea e ua ora mai ratou, inaha e rave rahi hoi taime to taua oire ra i te haruraahia e i te eiâraahia—i te omuaraa o te senekele maha hou to tatou nei tau na te mau Gaulois e i to tatou nei tau na te mau Visigoths i te matahiti 410 ra, na te mau Vandales i te matahiti 455, na te mau Normands i te matahiti 1084, na te mau nuu petahia i te moni na te emepera i te matahiti 1527 ra, na te nuu faehau a Napoléon i te matahiti 1798, e na te mau Helemani e te Fenua auhoa i te Piti o te Tamaˈi rahi.

Noa ˈtu te taa ê o te oire patuhia no Roma, e 4 anaˈe i nia i te hanere o te taatoaraa o te oire apî, o te Roma ïa ta te mau milioni mau ratere e haere rahi na e mataitai, inaha tei reira te rahiraa o te mau fare tahito i te vairaa. Te tahi atu mataitairaa na te mau ratere, i te omuaraa iho â râ o te matahiti 1993, o “Sixtus V ïa e o Roma.” Ia au i to ˈna tiaraa pâpa mai te matahiti 1585 e tae atu i te matahiti 1590 ra, ua vaiiho mai o Sixtus i te hoê tapao i vai maoro mai i mua i te aro o Roma tei parauhia “te metua tane o te oire apî faanahohia o teie nei tau.” Ma te faataa mai no te aha oia i faaapî faahou ai ia Roma, te papai ra te The European e: “A tahi, no te faatupu ïa i te hoê huru hamaniraa fare paari maitai no te haapapu i te mana o te Vaticana i nia i te haamǎtaˈuraa a te haapaoraa porotetani. . . . Te piti, no te faariro ïa i te oire o Roma, tei riro hoi i roto e rave rahi mau tuhaa ei oire taa ê mau o te fenua, ei vahi faufaa roa ˈˈe o te Ierusalema Apî.”

Te faahua parau ra te oire no Vaticana, te hoê tuhaa iti fenua no Roma e o ˈna taua “parahiraa ra o te Ierusalema apî.” I te matahiti 1929, ua tarima te faatereraa fasciste italia i te Parau faaau no Latran, ma te farii hoi i te mana faatere o te oire no Vaticana. E mai reira mai to te pâpa faatereraa mai i taua oire ra ma te mana papu maitai i te pae no te faaotiraa, no te horoaraa i te ture e no te haavaraa. Te vai ra ta te Vaticana ta ˈna iho fare rata, ta ˈna iho mau reni niuniu e to ˈna atoa iho hoi nuu, e oia atoa ta ˈna mau faehau tiai, e haapao i te parau no te parururaa i te pâpa. Ta te mau ratere râ e hinaaro matamua ra e ite o te Basilique ïa no Petero Peata, tei riro e rave rahi senekele te maoro ei fare pure rahi roa ˈˈe i roto i te amuiraa faaroo kerisetiano. Ua ore taua huru nei i te matahiti 1989 ra a amuihia mai ai te fare pureraa rahi no Yamoussoukro e vai ra i Côte d’Ivoire.

Te parau ra te The New Encyclopædia Britannica e “no te hoê maororaa 1 000 matahiti, no te riro ei taata no Roma, e tia ïa ia tapea i te mau taviri o te ao nei, ia ora ma te hau, te teoteo e ma te oraraa nahonaho maitai.” Eiaha râ hoi i teie nei! Inaha, te haapapu ra te mau ohipa ino i te pae politita i Roma e te oreraa te faaroo e haere i mua i roto i te oire no Vaticana e ua iti roa mai te mure ore o tei parauhia te mau haafaahiahiaraa o te mau tau i mairi.

Te vahi moˈa roa ˈˈe o te faaroo mahometa?

Fatata hoê tausani milioni mau taata o te faaroo mahometa i roto i te ao nei teie e faariro nei i te oire o te Mecque ei “vahi tano maitai no te mau ohipa a te taata i te pae no te atua, no te mau melahi, e no te mau parau tohu mai te taime faufaa roa mai â o te poieteraa.”b Ia au i te haapaoraa mahometa, i reira hoi te poieteraa i te haamataraa, i reira to Aberahama paturaa i te fare haamoriraa matamua, e i reira to ˈna raveraa i ta ˈna vahine tavini ia Hagara e ta raua tamaiti ia Isemaela.

Fatata roa mai ia tatou nei, eita e ore i te matahiti 570 o to tatou nei tau, i Arabia Saudi i te Mecque to Muḥammad fanauraahia. I te omuaraa, mea iti roa te taata i farii i ta ˈna mau haapiiraa. Inaha, e vahi pape i roto i te medebara noa te Mecque e vai ra i nia i te reni o te mau pǔpǔ taata e na reira ˈtu i te tere i rotopu i te fenua Inidia e ia Europa, e te mǎtaˈu ra hoi ta ˈna mau taata hoo taoˈa mana rahi mau e ia faatupu te mau tauiraa i te pae faaroo a Muḥammad, i te toparaa i te pae tapihooraa tauiraa. Ma te ore hoi e manuïa i reira, ua fariu aˈera o Muḥammad i Yathrib, tei itehia i muri aˈe i raro aˈe i te iˈoa ra no Al-Madīnah (Medina), te hoê oire tei hau atu i te 300 kilometera i te pae apatoerau hitia o te râ. I te matahiti 630 râ o to tatou nei tau, ua hoˈi atura oia i te Mecque, ua haru maira i taua vahi ra, e ua faariro aˈera hoi ei pu varua no te faaroo mahometa.

I teie mahana, e oire ruperupe roa te Mecque e e oire ua rau te huru o te mau nunaa i reira, tera râ o te mau taata faaroo mahometa anaˈe te nehenehe e ora i reira. I te avaˈe no Dhuʼl-Hijja, te avaˈe moˈa o te pereninaraa, e rave rahi milioni taata e haere mai na i reira no te faaî i ta ratou hopoia faaroo o te hajj. E i te Mecque, e mataitai atoa na te mau taata tere perenina i te Mosquée Moˈa, i reira ratou e haere ai e hitu taime na te hiti i te hoê vahi moˈa iti e vai ra i pihai atu i te ropuraa o te aua aita e tapoˈi fare, o te mosquée.

E taua vahi moˈa ra o te Kaaba ïa, te hoê huru hamaniraa mai te afata ra te huru e tapoˈihia mai i te hoê ahu ereere e te vai ra hoi i roto te Ofai Ereere moˈa. Taua ofai ra, ta te mau Mahometa e manaˈo ra e ua horoahia ia Adamu ra no te faaore i te mau hara i to ˈna tiavaruraahia mai Edene mai, te parauhia ra e i te haamataraa e mea uouo oia. I roto i te mau parau tutuu a te mau Mahometa, ua mou te Kaaba matamua i roto i te diluvi o te tau o Noa, area te Ofai Ereere ra, ua ora mai ïa e ua horoahia i muri iho ia Aberahama ra na te melahi ra o Gaberiela, e i muri iho ua patu faahou aˈera o Aberahama i te Kaaba e ua faahoˈi faahou aˈera hoi i te Ofai Ereere i nia i to ˈna vairaa mau. I te pae no te Kaaba—ia au i te faaroo mahometa te vahi moˈa roa ˈˈe i te fenua nei—te mau mahometa e fariu ai no te pure e pae taime i te mahana.

E piti ahuru ma maha uputa e aratai tia ˈtu i roto i te aua o te Mosquée Moˈa, te uputa tomoraa matauhia râ no te feia tere perenina o te Uputa ïa o te Hau, e vai ra i te poro apatoerau. Inaha, e ere noa te mau mea i te mea ohie i te taime te hajj e tupu ai. I te matahiti 1987, ua tamata te tahi mau melo o te faaroo mahometa i te haru i te mosquée e na ratou aˈe e faatere. Aita râ hoi i maoro roa, ua nahonaho faahou te mau mea e te reira i muri aˈe i te haapoheraahia hau atu i te 400 melo o te faaroo mahometa e e 650 melo i pepe roa. Mea peapea mau â te ere-papu-raahia i te hau i roto i te vahi moˈa roa ˈˈe o te mau vahi moˈa atoa o te faaroo mahometa, ua tamahanahanahia râ te mau mahometa maoti te haapiiraa a te faaroo mahometa oia hoi ia pohe noa ˈtu te hoê taata i roto i te area taime te hajj e tupu ai, e riro ïa oia i te tomo oioi atu i roto i te raˈi.

Te noaaraa e piti huru hau?

O Ierusalema, e faarirohia na te mau ati Iuda e e faaitehia na na te mau kerisetiano ei Oire Moˈa e na te mau melo o te faaroo mahometa mai te toru o te parahiraa moˈa roa ˈˈe i nia i te fenua nei (i muri mai i te Mecque e te Medina), to ˈna auraa oia ïa “te noaaraa e piti huru hau.” Mai te matahiti 1070 mai hou to tatou nei tau, oia te oire pu no Iseraela tahito, inaha i vai na oia hau atu i te 900 matahiti na mua ˈtu i raro aˈe i te iˈoa no te Salema. (Genese 14:18) I te mea hoi e tei reira te pu faatere o te nunaa i te vairaa, tano maitai iho â ïa to ˈna vairaa, i roto i te mau mouˈa i nia i te hoê teiteiraa fatata e 750 metera i nia ˈˈe i te faito o te moana, ma te faariro hoi ia ˈna i taua tau ra mai te hoê o te mau oire pu rahi roa ˈˈe i roto i te ao nei.

I te senekele maha hou to tatou nei tau, ua noaa aˈera o Ierusalema i te faatereraa Heleni. E i te piti o te senekele hou to tatou nei tau, ua ohipa puai mai te mana o te Hau emepera roma e rahi noa ˈtura. I te roaraa o te tau faatereraa a Heroda Rahi, ua ruperupe noa o Ierusalema. Mai te mea ra ïa e te tia noa râ te tuhaa o te patu o te aua o te hiero ta ˈna i hamani, i matauhia i teie mahana mai te Patu (Otoraa) i te pae Hitia o te râ. I te mea hoi e ua tamata te mau ati Iuda i te patoi atu i te zugo a to Roma, ua aro maira te mau nuu roma ia Ierusalema i te avaˈe eperera o te matahiti 70 o to tatou nei tau. Aita i taeahia i te pae avaˈe i muri iho, ua mou roa aˈera te oire e ta ˈna hiero.

Ia au i te tahi mau numera, ua noaa o Ierusalema e 37 taime. E i roto e rave rahi mau tupuraa, te hoê tuhaa o te oire i pau aore ra te taatoaraa o te oire. Ua tia noa mai râ te hoê Ierusalema apî i nia i te mea tahito. No reira, i te matahiti 130 o to tatou nei tau, ua faaue aˈera te emepera o Hadrian e ia patuhia te hoê oire apî, te hoê oire o Aelia Capitolina te iˈoa. Eita te ati Iuda e faatiahia e tomo i roto, fatata e piti senekele te maoro. I muri iho, i te omuaraa o te senekele hitu o to tatou nei tau, ua haru aˈera te mau mahometa i taua oire ra e ua patu faahou aˈera i muri iho te Vahi teitei o te Pǎpa i nia aore ra i pihai atu i te vahi tei reira te hiero apî.

Ua haamauhia te Hau o Iseraela o teie nei tau i te matahiti 1948 ra, e i te matahiti 1949, ua tatuhaahia o Ierusalema i rotopu ia Iseraela e o Ioridana. I te matahiti 1967 râ, i roto i te roaraa o te tamaˈi parauhia te Tamaˈi ono mahana, ua haru maira to Iseraela i te afaraa o Ierusalema e vai ra i te pae hitia o te râ. E mai reira mai, ua faaapî aˈera hoi ratou i te oire, a tamata noa ˈi oia i te tapea i te tiamâraa o to ˈna aamu. I te matahiti 1993, ua taeahia to ˈna huiraatira i nia i te faito hau atu i te afa milioni.

I roto i na haapaoraa matamua e toru o te ao nei teie e faariro nei ia Ierusalema ei oire moˈa, i te tahi taime, e itehia te mau hepoheporaa i te pae faaroo i te uˈanaraa. “I roto i te mau aroraa atoa i tupu i rotopu i te mau ati Iuda e te mau Arabia, o te aroraa e ô atoa mai o Ierusalema i roto, te aroraa papu ore roa ˈˈe e te fifi hoi ia haavî,” ta te Time ïa e parau ra. No teie nei, te ite-rii-hia ra iho â e e piti huru hau ta te iˈoa o Ierusalema e tǎpǔ maira.

“E riro to oe mau oire i te pau”

E taipe te oire i faahitihia i roto i te Apokalupo 18:10 i te mau haapaoraa hape atoa e ore e fariihia e te Atua. “Auê te oire rahi nei o Babulonia e, auê oe te oire etaeta nei e! hora-tahi-noa-hia iho nei hoi to oe pohe e!” Papu maitai, te auraa ra e topa te mau haapaoraa atoa e patoi i te Atua ra o Iehova i raro aˈe i te haavaraa. Noa ˈtu ta ratou mau hiero, ta ratou mau oroa faaroo, e ta ratou mau faaunauna faaroo atoa, eita te mau oire “rahi” faaroo o teie nei tau e pûpû mai i te parururaa e vai maoro i te mahana haavaraa a te Atua ra.

[Nota i raro i te api]

[Hohoˈa i te api 24]

Te mosquée moˈa o te Mecque e te Kaaba

[Faaiteraa i te tumu]

Camerapix

[Hohoˈa i te api 25]

Te Patu Otoraa a te mau ati Iuda i Ierusalema e te Vahi teitei o te Pǎpa a te mau mahometa (aui)

[Faaiteraa i te tumu]

Garo Nalbandian