Te oroa otahi a te Nazareta Ereere

NA TE PAPAI VEA A A ARA MAI NA! I PHILIPINO

EITA outou e ite pinepine i te hoê nahoa mai teie te rahi. Teie râ, i Manila nei, e itehia teie ohipa i te mau 9 no tenuare atoa. E mau hanere tausani katolika faaroo o tei putuputu i Plaza Miranda i te Fare pure no Quiapo, no te tiai ia faura mai te Nazareta Ereere.

‘Te Nazareta Ereere?’ o ta outou paha e ani. E, ua riro teie tii mai te hoê taata te rahi, o Iesu Mesia e amo ra i te hoê satauro ei tumu no te hoê haereraa moˈa otahi roa tei riro, ia au i te buka Filipino Heritage, “ma te mârô-ore-hia, ei faaiteraa taata roa ˈˈe, te rahi roa ˈˈe . . . a te haapaoraa i roto i te Nunaa kerisetiano hoê roa i Asia,” oia hoi i Philipino.

Te haereraa moˈa taata roa

Ia matara anaˈe te mau opani o te fare pure, e tuôtuô haere te nahoa tei maamaahia ma te maniania ahitiri. E taorahia ˈtu e piti taura roa i roto i te nahoa no te huti i te paepae huira i reira te Nazareta Ereere e tia ˈi. E taputô te feia faaroo no te haru i te mau taura. E hanahana rahi te reira no ratou. E tuati vetahi i to ratou rima no te faaateatea i te eˈa ia ô atu te haereraa moˈa. Aita e tiaa to te mau tane atoa, e ua omono ratou pauroa i te hoê piriaro e ua tuu i te hoê tauera i nia i to ratou upoo aore ra ua taamu i nia i to ratou arapoa.

Na nia mai i te hoê tahua i pihai iho i te fare pure, ua oti te hoê taata poroi i te faataa i te tahi mau faaueraa i te nahoa e tiai noa ra. Hoê mea e haapapu-maitai-hia: I roto i te haereraa moˈa matamua, eita te mau vahine e faatiahia. E ite-papu-hia te tumu i te taime e huti-mǎrû-hia ˈi te Nazareta Ereere i rapae i nia i te mahora; e mea huehue roa.

E ouˈa ˈtu te nahoa feia faaroo tei maamaahia, ma te turairai e te faaô, e tae roa i te paiumaraa na nia ˈtu i te tahi no te tamata i te tapea ˈtu i te Nazareta Ereere. E tia i te tahi mau tane i nia i te paepae ia turai atu i te mau taata i raro no te paruru i te tii i te nahoa maamaa. Ia rahi roa te taata e faatiahia ia paiuma i te hoê taime, e nehenehe te paepae e tahuri. Noa ˈtu teie mau parururaa atoa, e tahuri mai te paepae i te tahi mau taime, e e titauhia e 30 minuti tae atu i te hoê hora no te faatia faahou mai i nia, no te rahi o te feia e tamata i te tapea ˈtu i te tii.

E tia noa te feia mataitai na nia i te mau aroâ ǒaǒa no Quiapo no te hiˈo atu i te Nazareta Ereere ia tere mǎrû noa na roto i te mataeinaa. E faatorohia te mau mori meli no te faaite i te paieti i te tii. E afai mai vetahi i te mau tii nainai aˈe no ǒ mai i to ratou fare. E mau reva rarahi e haapapu ra i te mau pǔpǔ rau o te feia faaroo a te Nazareta Ereere o te apee i te haereraa moˈa.

E taora ˈtu vetahi no roto i te nahoa i ta ratou mau tauera e ta ratou mau horoi i te hoê o te mau taata i nia i te paepae i pihai iho i te Nazareta Ereere. E ǔi oia i nia i te tii aore ra i nia i ta ˈna satauro a taora faahou atu ai ia ratou ra. E tamǎrô te taata faaroo tei oaoa roa i ta ˈna tauera i nia i to ˈna mata. Na muri i te haereraa moˈa matamua, te apee ra te hoê reni roa o te mau tii, e rave rahi e mau hohoˈa nainai aˈe o te Nazareta Ereere. E mea papu aˈe ïa no te mau vahine ia apiti mai i reira.

I te hoê â taime, i roto i te fare pure, te taparu ra te feia faaroo, e mau vahine iho â râ, i te tauturu a te Nazareta Ereere na roto i te tahi atu raveraa. Ia tomo atu ratou i te uputa ra, e apiti atu ratou i roto i te reni roa o te feia e haere mǎrû noa ˈtu i nia i to ratou turi na roto i te eˈa haereraa taata o te fare pure e tae roa ˈtu i te fata ra.

Eaha te mea e maamaa roa ˈi te taata?

Te parauhia ra e ua rave te Nazareta Ereere e rave rahi mau semeio. Ua parau o Alberto, ahuru ma piti matahiti to ˈna, e ua haere oia i te oroa e to ˈna papa e to ˈna mama ruau, no te mea ua horoa mai te Nazareta Ereere i te mau taime atoa i te mea o ta ˈna i ani na roto i te pure. Te na ô ra o Mauricio e ua apiti atu oia i te haereraa moˈa ma te tiaturi e e faaorehia mai ta ˈna mau hara e e noaa mai te tamǎrûraa i te mau fifi e te mau hepoheporaa o te oraraa.

Te taime matamua o Mauricio i haere ai i te oroa, e 24 matahiti ïa to ˈna. I te mau matahiti atoa, ua nehenehe oia e tapea i te mau taura o te huti i te tii. I te paeraa o te taime, ua hinaaro puai oia e paiuma roa ˈtu i nia i te paepae. Ua tauturu vetahi o to ˈna mau hoa ia ˈna ia tae i nia, i reira to ˈna ǔiraa i ta ˈna tauera i nia i te avae o te Nazareta Ereere; i muri iho, ua ouˈa faahou atu oia i roto i te nahoa. Tera te ohipa faahiahia roa ˈˈe, ta te rahiraa e nehenehe noa e tiai.

Nohea mai te oroa

Te parauhia ra e na te hoê taata Inidia Mexico i tarai i te Nazareta Ereere (te parau nei vetahi e na te hoê taata tarai Philipino aore ra Tinito i hamani) e ua afaihia mai i Manila na nia i te pahi i te senekele 17 ra. Ua hamani te feia tarai i te hoê tii otahi roa na roto i te tarairaa ia ˈna i roto i te hoê raau ereere aore ra na roto i te peniraa i te tii i te peni maereere, o te tano maitai e te hohoˈa o te mau taata no Mexico e no Philipino. I te senekele 18, ua haamoˈahia te Nazareta Ereere i Quiapo na nia i te aniraa a Basilio Sancho, arii epikopo no Manila, o tei haamaitai ia ˈna. I muri iho, i te omuaraa o te senekele 19, ua haamaitaihia oia e te Pâpa Pie VII.

Teie râ, i te matahiti 1923 anaˈe to ˈna afai-matamua-raahia i rapae ei tuhaa no te haereraa moˈa o te hope na roto i te oroa o te mataeinaa no Quiapo. Ua tamau noa te mau haereraa moˈa i te faatupuhia e tae roa mai i teie nei.

E haamoriraa idolo anei?

Mai tei matauhia, e itehia te Nazareta Ereere i to ˈna vahi i muri mai i te hoê hiˈo i pihai iho i te tomoraa o te fare pure. Tei ropu teie hiˈo e piti pǎpǎ e faataa ra i te mau Sampung Utos, oia hoi na Ture Ahuru. No te tahi mau kerisetiano, e mea arearea roa, inaha te na ô ra te piti o na Ture Ahuru e: “Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei . . . Eiaha roa oe e piˈo i raro ia ratou, eiaha hoi e tavini ia ratou.” (Exodo 20:4, 5) E ere anei te Nazareta Ereere i te hoê hohoˈa tarai ta te mau katolika faaroo e tavini ra?

Eita te rahiraa o te mau katolika e na reira i te manaˈo. Te na ô ra te Buka parau paari katolika apî (beretane) e: “I te mea e te haamoriraa e horoahia i te hoê hohoˈa, e naea ˈtu e e hope i roto i te taata tei faahohoˈahia, e nehenehe te hoê â huru haamoriraa faataehia i te taata, e horoahia i te hohoˈa e faataipe ra ia ˈna.” Tera ta e rave rahi mau katolika no Philipino i parau—oia hoi te haamori ra ratou, eiaha te hohoˈa, ia Iesu Mesia râ, o ˈna hoi ta te tii e faahohoˈa ra. E hiˈopoa anaˈe na maa taime iti i teie huru feruriraa.

Inaha hoi, e ere te mau katolika anaˈe te rave nei i teie huru haamoriraa. Hoê â manaˈo to te mau haapaoraa Etene i roto i te mau senekele. Ei hiˈoraa, ia au i te parau a Lactantius, te hoê Metua o te Ekalesia no te senekele maha, e parau na hoi taua mau etene ra e: “Eita matou e mǎtaˈu i te mau hohoˈa iho, i te mau taata râ no ratou taua mau hohoˈa ra, e no to ratou hoi iˈoa teie mau hohoˈa e pûpûhia ˈi.”

Te auraa anei ïa e e ore te mau faaueraa a te Atua no nia i te haamoriraa i te mau idolo e tano no ratou? E mea papu mau anei teie feruriraa ia tamata anaˈe oia i te faaore i te Parau a te Atua? Inaha, mai te peu e e na reira te rahiraa o te feia haamori idolo i te feruri, no vai ïa teie mau faaueraa?

A haamanaˈo e a horoa ˈi te Atua i na Ture Ahuru ia Mose ra, ua hamani te mau ati Iseraela i te hoê kafa auro e ua tipapa ratou i mua. Aita paha te nunaa i manaˈo e e haamoriraa idolo ta ratou e rave ra. I roto i to ratou feruriraa, ua faahohoˈa teie kafa ia Iehova. (Exodo 32:4, 5) Ua mauruuru anei râ te Atua i te mea o ta ratou i rave? Te taio ra tatou e ua parau o Iehova i reira ia Mose e: “A haere, a pou oe i raro; ua ino to mau taata ta oe i aratai mai mai Aiphiti maira. Ua faarue vave roa iho nei ratou i te eˈa ta ˈu i faaue ia ratou e e na reira. Ua hamani ratou i te kafa faatô na ratou i e ua haamori atu i te reira; e ua hopoi ratou i te tusia.”—Exodo 32:7, 8.

Te tahi atu uiraa te tia ia hiˈopoahia oia hoi, e mea tano anei ia faahanahana i te hoê hohoˈa. Aita te Bibilia i faaherehere i ta ˈna parau no nia i teie tuhaa. Te na ô ra oia e: “Aore ratou i ite, aore i haroaroa; ua piri to ratou mata i ore ai ratou i ite ai; e to ratou aau i ore i haroaroa ˈi ratou. Aitâ hoi te hoê i manaˈo noa ˈˈe i to ˈna aau, . . . e piˈo anei hoi au i raro i te tumu o te raau nei?”—Isaia 44:18, 19.

E nehenehe anei te hoê hohoˈa e tauturu i to ˈna mau taata faaroo?

Ua papai te hoê perepitero katolika e: “E tumu papu aˈe to te taata e tuu nei i to ratou tiaturiraa i roto i te mana o te Nazareta Ereere no Quiapo, i te feia e tiaturi nei i te hoê auri puaahorofenua aore ra te hoê avae rapiti.”

Area ra, te na ô ra te Bibilia i to ˈna aˈe pae no nia i teie mau hohoˈa: “E ia tiaoro noa ˈtu te taata ia ˈna, e ore e tia ia parau mai; e ia roohia oia e te ati, e ore e tia ia ˈna ia faaora.” Te faaite papu maira te Atua ra o Iehova e “te hamani maitai, e ore roa e tia ia ratou.”—Isaia 46:7; Ieremia 10:5.

Aita e feaaraa e “e itoito” to te mau katolika faaroo o te paiuma nei na nia ˈtu i te tahi ia nehenehe ratou e tapea i te Nazareta Ereere “i ta te Atua,” “e ere râ i te itoito ite.” (Roma 10:2) Te faaitoito nei matou i teie mau taata ia noaa i te ite papu na roto i te tuatapaparaa i te Parau a te Atua, te Bibilia, a rave ai i “te paieti mau e te ino ore i mua i te aro o te Atua, o to tatou Metua ra.”—Iakobo 1:27.

[Hohoˈa i te api 20]

E haaputuputu te taata ia ǔihia ta ratou mau tauera e ta ratou mau horoi i nia i te tii