“Ia patu na tatou iho i te hoê oire”
Na to tatou taata papai A ara mai na! i Helemani
E MEA papu e 50 i nia i te hanere o outou o te ora nei i roto i te oire. Ia au i te tahi mau numeraraa, fatata te afaraa o te feia i roto i te ao nei te ora ra i roto i te oire. Te parau ra te hoê pu e “i te numeraraa hopea nei, i te matahiti 2000, e tia i te mau oire ia farii hau atu i te 75 i nia i te hanere i te huiraatira na Marite apatoa.” Te faaite atoa ra oia ia tatou e i te roaraa o taua noâ area tau, e tataipiti te numera o te feia e ora i roto i te mau oire no Afirika.
Noa ˈtu e aita outou e ora nei i roto i te oire, te rave ra paha outou i te hoê ohipa i reira, te haere nei outou e hoohoo haere i reira, aore ra e fanaˈo outou i te mau taoˈa maitai ta te hoê oire e pûpû ra. E mana to te oire i nia i te taatoaraa. Auê hoi to tatou oraraa i te taa ê ahiri e aita te reira!
Te hoê oire piihia Enoha
Ua haamata aˈena te paturaa o te mau oire. No Kaina, te tamarii matamua i fanauhia, te taio nei tatou e “te faatia ra oia i te oire i reira, mairi ihora oia i taua oire ra ia Enoha, i te iˈoa o ta ˈna ra tamaiti.” (Genese 4:17) Na roto i te paturaa i te hoê oire, peneiaˈe e faito nainai ia faaauhia i te oire i to tatou nei tau, ua haamau o Kaina i te hoê hohoˈa no te mau ui no a muri atu.
Ua rave te huru natura o te taata no te vai amui noa e ia tahoê noa ratou i te hoê vahi. E ere noa no te faahoaraa no te ruperupe râ e te parururaa, i te mau senekele tahito iho â râ, e pinepine te mau pǔpǔ taata i te arohia. Teie râ, e ere noa no te reira anaˈe te tumu i turai i te mau taata ia haamata i te patu i te mau oire.
Te faˈi ra Te Buka parau paari o te ao nei (beretane) e te vai ra e maha tuhaa matamua o tei aratai e ia patuhia i te mau oire. Te vai ra te “(1) haereraa i mua i te pae o te maimiraa [matini au auahi, puai o te uira, te mau ravea haapurororaa, (2) te haaatiraa natura tano [te tahi mau tumu o te vahi ïa, te ahuaraˈi, te mau anavai e te horoaraa pape], (3) te faanahonahoraa totiale [feia mana, faatereraa], (4) te maraaraa o te huiraatira.”
Mea ohie ia rave i te ohipa i roto i te mau oire e te haaputuraa i te puai no te ohipa i roto i te hoê noa area. No reira, i roto e rave rahi mau oire te itehia ra te mau fare hoo mama no te feia rave ohipa e to ratou utuafare. I teie mahana, e te faurao huiraatira e no te taata tataitahi ineine i taua iho taime, aita te atearaa e tapea i te manuïaraa i te pae tapihooraa e te pae politita. No te reira, te haaparare nei te mau oire i to ratou mana i roto i te mau mataeinaa.
E taairaa piri roa to vetahi mau oire tahito i nia i te mau tiaraa i te pae faaroo. Te parau nei te Genese 11:4 e: “E ua na ô ihora ratou [te feia i ora i muri noa ˈˈe i te Diluvi i te tau o Noa] Tatou e patu i te tahi oire no tatou, e te tahi pare, e ia puta noa ˈtu te upoo i nia i te raˈi ra [e faaohipahia no te haamoriraa i te pae faaroo], ia itea to tatou iˈoa, o te purara ê noa ˈtu tatou e ati noa ˈˈe te fenua atoa nei.”
Ua amuihia i roto i te paturaa o te hoê oire i te ohipa i te pae totiale, faaroo, tapihooraa, e te geotaraphia oia atoa i te tuhaa politita. I te hoê â taime, o te oire te puai matamua i te roaraa o te mau senekele o tei turai i te totaiete taata no to tatou nei tau, mai ta tatou i ite atu e o tei mana i nia ia tatou paatoa.
Taa ê hoê â noa râ huru
Te tapao nei Te Buka parau paari api beretane (beretane) e “ua itehia te mau pǔpǔ matamua tei haamauhia i roto i te peho ruperupe haumǎrû o te Nile, te Tigre, te Eupharate, te Indus, e te anavai rearea.” Oia mau, mea taa ê roa te mau oire matamua o te 20raa o te senekele i to ratou hohoˈa pae anavai hopea.
I te mau senekele i mairi, ua ora te rahiraa o te mau taata i te mau mataeinaa. Te oire rahi matamua i te fenua Beretane i te matahiti 1300, ei hiˈoraa, o Lonedona ïa e tei raro aˈe mai te huiraatira i te 40 tausani oia hoi 1 i nia i te hanere o te taatoaraa o te feia e ora ra i te oire. I te matahiti 1650 fatata i te 7 i nia i te hanere o te beretane atoa e ora ra i Lonedona. I te omuaraa o te senekele 19, ua piri te numera o te oire i te mirioni taata. I teie mahana, tei raro aˈe i te 9 i nia i te hanere o te beretane e ora nei i te mataeinaa. Ua haaputu te toea atoa i roto i te pu o te oire, te tahi tau hitu mirioni i roto noa i te oire rahi no Lonedona Rahi.
Ei haapapuraa o te faito o te mau oire i te tupuraa e te oioiraa i te rahi, i te matahiti 1900, o Lonedona anaˈe te oire i roto i te ao atoa nei e te hoê huiraatira e hoê mirioni taata. I teie nei te vai ra e 200 oire e hau atu i te hoê mirioni taata. Te faahiti ra te feia tuatapapa i te geographia no te mau mirioni oire, oia hoi te hoê anairaa oire piri mai te itehia ra i te vahi no Ruhr i Helemani, i reira te hiti i te roaraa o te anavai Ruhr, mai ia Duisburg e tae atu i Dortmund, e faatupu ra i te hoê noa pǔpǔ taata o te ore e pau.
Noa ˈtu te mau taa-ê-raa, te vai ra to te mau oire tahito e no teie nei tau i te hoê tuearaa—te mau fifi. E aita râ i ite aˈenei e rave rahi mau fifi e te aano atoa mai te itehia ra i teie mahana. Tei roto te mau oire i te arepurepuraa rahi mau. Mai te peu e ua hopoi mai te ‘paturaa tatou iho i te hoê oire’ i te tahi atu mea no te huitaata, ua faaite atoa mai ia tatou e, no to tatou huru taata tia ore e te aratairaa a te taata topa haere noa, e ere te paturaa i te mau oire i te ohipa maitai roa ˈˈe no te haamâha i to tatou mau hiaai.