Te mau tamarii e roohia nei i te hepohepo rahi
“RANDY!” O ta Rita ïa i tuô, e te riaria rahi i te mau mea ta ˈna i ite na te atea mai a fatata noa ˈtu ai oia i to ˈna fare. Teie ta ˈna tamaiti o Randy, tei tarî ia ˈna i rapae au mai i te haamaramarama o te piha taotoraa, e 8 metera i nia ˈˈe i te aua. I roto mai i te fare, ua faaroo o Larry i te mau tuô rahi riaria a ta ˈna vahine e ua aueue atoa aˈera hoi oia. Ma te horo na nia mai i te eˈa, ua ouˈa ˈtura oia i roto i te piha taotoraa e ua haru maira ia Randy, ua tatara mai ia ˈna, aita i pohe, e ua tuu atura i roto mai i te fare. Ua hinaaro te mau metua o Randy e ite oioi i te mau pahonoraa. “Eaha hoi oe i na reira ˈi? No te aha?” o ta raua ïa i ui atu ma te ore â e tiaturi i te ohipa e tupu ra. “E nehenehe hoi oe e pepe roa; e nehenehe hoi oe e pohe!” Ua pahono noa maira o Randy e “Hinaaro vau e pohe”. E pae anaˈe matahiti to Randy.
IA HIˈOHIA hoi, aita e fifi to Randy, e tamaiti iti oraora maitai. Eita e manaˈohia e e hinaaro o ˈna e haapohe ia ˈna. Tera râ, ua itehia i muri aˈe i te tahi hiˈopoaraa i ravehia e e tamarii o Randy tei roohia i te hepohepo rahi.
Mai ia Randy, mea rahi te mau tamarii i teie mahana i roohia i te hepohepo rahi. I te mea hoi e aita ta ratou e ravea no te faaruru i to ratou hepohepo, te tamata nei vetahi e faaore i to ratou manaˈo taiâ. Tera râ, o te hepohepo roto roa te matara mai. No vetahi pae, e riro te manaˈo taiâ aita e matara ra, i te faatupu i te maˈi i te pae tino aore ra i te hoê haerea iino mau i roto i te mau taurearea. No te vetahi atu, e itehia te hepohepo rahi na roto i te tahi mau ohipa faaino-roa-raa ia ratou iho, mai te mau pepe hohonu mau, te amu-hua-raa i te maa, te inu-hua-raa i te ava aore ra te rave-hua-raa i te mau raau taero, e tae noa ˈtu i te haapoheraa ia ˈna iho. Te na ô ra te Te tamarii e hepohepo ra (beretane) e: “E rave rahi o taua mau fifi nei—mai te haapoheraa ia ˈna iho—tei faarirohia i te hoê tau, ei tuhaa na te mau taata paari e na te mau taurearea paari aˈe. I teie nei, mai te huru ra ïa o te feia apî roa ˈˈe teie e roohia nei.”
‘Nafea hoi te reira e nehenehe ai e tupu?’ ta te mau taata paari ïa e ani ra ma te peapea rahi. ‘E ere anei te vai-tamarii-rii-raa i te taime no te mau hauti, i te tau ataraa e te tau faaarearearaa?’ Te pahonoraa a te rahiraa o te mau tamarii, eita roa ˈtu ïa. “Te faariroraa i te vai-tamarii-rii-raa ei tau faaanaanataeraa, na te mau taata paari noa ïa parau,” o te manaˈo ïa o te taote ra o Julius Segal. Ua haapapuhia teie parau mau peapea mau na te taote tamarii ra o Joseph Lupo e na ô ra e: “E piti ahuru ma pae matahiti vau i teie nei i roto i teie toroa taote. I teie mahana, te ite nei au e ua tataimaha te numera o te mau tamarii rii e o te mau taurearea i roohia i te hepohepo rahi.”
Na te aha hoi i faatupu i taua huru hepohepo rahi ra i roto i te mau tamarii? Eaha te mau tapao? Nafea ia tauturu i te mau tamarii i roohia i te hepohepo rahi? E tuatapapahia ïa teie mau uiraa i roto i te mau tumu parau i mua nei.