Mea hinaaro anei na outou i te niho haavare?

E ERE te mau niho haavare, tei riro pinepine hoi ei parau hauti, i te mea arearea roa na te feia e niho haavare to ratou. Mai te peu e mea maitai anaˈe to outou mau niho mau atoa, e ere ïa te parau no te niho haavare i te mea faufaa no outou. Tera râ noa ˈtu â ïa e eita roa ˈtu outou e faaruru atu i teie fifi, e riro te mea e tuatapapahia i roto i teie tumu parau i te tauturu ia outou ia haafaahiahia i te haamaitairaa o te mau niho maitai roa e e riro hoi i te faaitoito ia outou ia na reira noa—mai te peu e e tia ia outou.

Inaha, no te aha hoi e rave rahi mau taata tei manaˈo e mea haapao maitai roa ratou i to ratou mau niho, e ite ai i te hoê mahana e te erehia ra ratou i to ratou mau niho. E riro te taote niho i te faahiti mai ia outou i te mau parau i muri nei. Ia mairi te taata i te 30 matahiti, te tumu rahi roa ˈˈe no te ereraahia te hoê taata i to ˈna mau niho o te maˈi tie niho ïa. Tera râ, e nehenehe atoa te hoê taata e erehia i to ˈna mau niho i roto i te tahi ati aore ra ia pe to ˈna niho.

Inaha, mea hinaaro mau anei na outou i te niho haavare mai te peu e aita vetahi o to outou mau niho faahou?a No te aha hoi mai te huru ra ïa e te maitai ra vetahi mau taata noa ˈtu aita to ratou e niho. O te tahi noa anei taoˈa imiraa moni te mau niho haavare i tuuhia ˈtu i roto i te huiraatira?

No te aha hoi te mau niho haavare?

Ei pahonoraa i teie nei mau uiraa, e hiˈopoa anaˈe tatou eaha te mau ohipa a to tatou mau niho. E hau atu â ta ratou ohipa i te hauti-noa-raa i nia i to tatou hohoˈa mata. Ia auau tatou i ta tatou maa, e huˈahuˈa roa ïa e inaha, e nehenehe atura hoi te mau pape vaiharo e anoˈihia i te mau huˈa maa, e ohie roa ˈtu ai te tino i te amu i te maa. Mai te peu e aita to tatou niho i rahi roa aore ra aita to tatou e niho faahou, eita ïa ta tatou maa e huˈahuˈa maitai. Eita atoa hoi to tatou nau tie niho e nehenehe e rave maitai i ta raua ohipa. No reira te taata aita to ratou e niho e tamata nei i te tuu i ta ratou maa i roto i te taofe, te tî, aore ra i te tahi atu inu, e riro ïa ratou i te roohia i te tahi mau fifi i te pae no te faatoparaa i ta ratou maa. Mai te peu râ e te tahi noa tau niho te erehia ra, mea etaeta roa ïa te parau no te faanahoraa maa no te mea e riro hoi te mau maa paari e titau e ia faahuˈahuˈa-maitai-hia, i te apehia.

E tauturu atoa to tatou mau niho ia tatou ia paraparau, te hoê teie haamaitairaa ta tatou hoi e varavara roa i te haamanaˈo e tae roa ˈtu i te taime vetahi e ore ai. E tauturu ratou i te arero e te vaha ia nehenehe te parau ia taˈi maitai e taa-maitai-hia mai ai. Ei hiˈoraa, eita te parau e nehenehe e taˈi maitai mai te piri vauera i te hopearaa o te hoê parau e ore e nehenehe e tupu, aita anaˈe e niho. Eita e ore outou i te tapao mai i te reira i to outou faarooraa ˈtu i te hoê taata aita to ˈna e niho i te paraparauraa mai. Inaha, e tia i te hoê taata e niho haavare to ˈna ia faaau maitai i to ˈna arero i taua mau niho ra no te faaafaro faahou i te taˈiraa parau. Noa ˈtu e e titau te reira i te taime, mea maitai aˈe râ hoi te mau faahopearaa ia faaauhia i te vai-niho-ore-raa ra.

Eaha ˈtura ïa i te pae no te himene e no te faaoto i te upaupa aita anaˈe to te hoê taata e niho? E nehenehe hoi teie mau ohipa e rave-maitai-hia ia faahuru-ê-hia te mau niho haavare na roto e rave rahi mau huru raveraa. E riro te feia himene, vetahi mau taata hauti teata, faaoto upaupa mai te pû te huru, te mau faatere hau, e vetahi mau taata to ratou toroa ia patahia ïa to ratou hohoˈa, i te faˈi e e fifi roa to ratou toroa aita anaˈe to ratou e niho.

E huru ê roa atoa te hohoˈa o te hoê taata aita anaˈe to ˈna e niho. E itehia te vaha ia miˈomiˈo e tae noa ˈtu hoi te ihu e te porotaa, e inaha huru hiˈoraa ruau aˈe atura ïa te hoê taata. E nehenehe te reira e faaere i te tiaturi ia ˈna iho e oia hoi e faatupu i te hepohepo i te pae no te feruriraa i roto i te tahi pae.

E riro te ereraahia i te hoê niho i te faatopa i to tatou faanahoraa niho. E nahonaho maitai to tatou mau niho, maoti tera e tera niho, mai te mau ofai i roto i te hoê araka no Roma. No reira ia erehia i te hoê niho, e huru ê roa ïa te niho tapiri mai. E faatupu teie ohipa i te mau area i rotopu i te mau niho e toe ra, e e nehenehe atura hoi te mau huˈa maa e haaputu noa i roto i te mau area tie niho, e e riro te tie niho i te uteute roa e i te oru. E nehenehe atoa te niho e hauti ra, e faaino i te faanahoraa o te mau niho, fifi roa ˈtura ïa ia auau i te maa.

Eaha te taa-ê-raa i rotopu i te niho mau e te niho haavare

Te taa-ê-raa faufaa roa i rotopu i te mau niho mau e te mau niho haavare, ua mau maitai ïa te mau niho mau i roto i te ivi taa. Na te reira hoi e faaohie ia ratou i te tâpû, i te aati, e i te faahuˈahuˈa roa i ta tatou mau maa. E û atu te mau niho raro i nia i te mau niho i nia, na roto i te faahuˈahuˈaraa e te tâpûraa i te maa.

I te tahi aˈe pae, e vai noa te mau mauraa niho haavare i nia i te mau taa. E vai noa ratou i to ratou vairaa, na te arero paha e turai atu, na te mau papariˈa, aore ra ia tamauhia. Eita te mau niho haavare e mau roa mai te mau niho mau, e ohie roa hoi i te tatarahia.

No reira, te maitairaa o te mau niho haavare, tei te taata tataitahi ïa. E ere te maitai o te mau niho haavare mai to te mau niho mau. Te hohoˈa e te huru o te mau taa, te huru o te mau mea rii, e oia hoi te huru feruriraa o te taata e niho haavare to ˈna, mai to ˈna aravihi i te haapiiraa i te faaohipa ia ratou, e mau tumu anaˈe teie e haapapu mai i te mau huru maitai o te mau niho haavare. To ratou otia matamua o te ereraahia ïa ratou i te au maite. Tera râ, ia hiˈohia, e nehenehe te mau niho haavare e hapehia e e niho mau.

I te tahi râ taime, i muri noa ˈˈe te hoê taata e tamau ai i te niho haavare, oia e ite maitai ai i te paari, te huru, e te ohie o te mau niho mau. E nehenehe te taata e rave rii mai i te hohoˈa mau tera râ eita roa ˈtu e noaahia ia ˈna i te faito faahiahia roa.

E riro paha e tei roto outou i te huru tupuraa e manaˈo ai outou e e hinaaro anei outou i te mau niho haavare, te taatoaraa aore ra te tahi noa tuhaa. Papu maitai, tei ia outou noa te opuaraa, tera râ mea maitai ia hiˈopoa i to ˈna mau faahopearaa maitai. E riro te reira i te tauturu ia outou ia ape i te mau fifi i te pae no te faatoparaa i te maa, i te tauturu ia outou ia amu i te maa e au, e ia paraparau maitai. E riro mau â ratou i te haamaitai i to outou hohoˈa mata.

Noa ˈtu â ïa te tahi mau taata e niho haavare to ratou te peapea nei ratou i te mea e ua erehia ratou i to ratou mau niho mau, ua faatupu te ruperuperaa te mau niho haavare i te tahi faito mauruuru e te tahi huru au maitai i roto e rave rahi milioni taata i roto i te ao taatoa nei.

[Nota i raro i te api]

[Tumu parau tarenihia i te api 21]

A faaiti mai i te mau haamâuˈaraa

E PINEPINE te faahopearaa no te hoê tere i te taote niho aore ra i te taote faaafaro i te faanahoraa o te niho, o te hoê ïa parau haamâuˈaraa teimaha mau. E nehenehe râ hoi outou e faaitoitohia e te tahi mau faanahoraa i itehia mai e o te riro i te tauturu i ta outou mau tamarii.

“Te fifi rahi roa ˈˈe no nia i te mau niho i ore i afaro maitai e te mau taa i fefe i rotopu i te mau Marite,” ta te The New York Times ïa e parau ra, “o te faahopearaa ïa o ta tatou mau maa e amu nei e ua tatarahia hoi te tahi mau mea rii i roto maoti te mau ravea a te pae maona.” Te manaˈo e horoahia ra teie ïa, te “faaitoito nei [te hoê huru faanahoraa maa e titau ra e ia auau-maitai-hia te maa] i te tupuraa o te taa (e tupu atura hoi te hoê area rarahi maitai no te farii i te mau niho o te ore e piripiri roa), e aratai atoa i te tupuraa tamau o te niho e e faanaho i te tupuraa papariˈa e o te vaha.”

Ua tamata te mau aivanaa i te haapapu i teie nei manaˈo na roto i te horoaraa ˈtu na te mau urî taata i te mau maa paari e te mau maa mǎrû. Eaha ihora ïa te faahopearaa? Mea iti roa te mau fifi i itehia “i te pae no te faanahoraa o te niho”, i roto i te mau urî taata i amu i te maa e tia ia auau-maitai-hia. E nehenehe iho â ïa e parau e e riro te hoê faanahoraa maa e titau i ta outou tamarii ia auau maitai i ta ˈna maa, i te haapapu e e ravea te reira no te faaiti mai i ta outou parau haamâuˈaraa i te pae no te niho. Te tahi atu ravea, te tautururaa ïa i ta outou mau tamarii ia haamatau i te purumu maitai i to ratou mau niho e te horoi maitai na roto i te mau area niho.

[Hohoˈa i te api 22]

Tei tera e tera niho te maitairaa o to tatou mau niho. Aita anaˈe e niho tapiri mai no te tauturu e ia vai maitai ratou i to ratou iho vahi, e pinepine te mau niho i te “iri” e oia hoi i te faaino i te tahi atu mau niho.